Ta eo Ran eo an Jeova Enaj Kalikare

“A ran eo an Jeova enaj itok einwõt juõn dri kwot, . . . im lõl kab men in kõmõn ko ilo e renaj alikar.”​—2 PIT. 3:​10, NW.

1, 2. (a) Ewi wãwen an naj jemlok jukjuk im ber in? (b) Ta kajitõk ko jenaj etali?

 JUKJUK im ber in enana kiõ ej berber ion riõp eo bwe armij remaroñ lo tõbrõk ilo air iroij ioir mõke im jenolok jen Jeova. (Sam 2:​2, 3) Eor ke jabrewõt men ej berber ion juõn riõp emaroñ ber ñõn indrio? Jab ñõn jidrik! Bõtab, jejjab aikwij kõtar mae ien eo jukjuk im ber in an Setan enaj mõke joko. Jen men in, Anij enaj kokkure lõl in ilo ien eo ekkar im ilo wãwen eo an. Kõmõn ko an Anij nae lõl in enana enaj kwalok ilo wãppen kin ekajet jime im yokwe eo an.​—Sam 92:7; Ken. 2:​21, 22.

² Dri jilik Piter ear je: “A ran eo an Jeova enaj itok einwõt juõn dri kwot, im ilo ran eo lõñ ko renaj joko kin juõn ainiken elap, ak men ko ilo e renaj unlok kin bwil elap, im lõl kab men in kõmõn ko ilo e renaj alikar.” (2 Pit. 3:​10, NW) Ta melelen “lõñ ko” im “lõl” eo me eon in ej konono kake? Ta “men ko” me renaj unlok? Im ta melelen an Piter ba bwe “lõl kab men in kõmõn ko ilo e renaj alikar”? Ar jela uak ko ñõn kajitõk kein renaj jibõñ kij bwe jen pojõk ñe men ko rekamijak renaj walok ilo ien ko rej berotok.

Lõñ ko im Lõl Renaj Joko

3. “Lõñ ko” me 2 Piter 3:​10 ej konono kaki rej jutõk kin ta, im ewi wãwen air naj joko?

³ Ñe Baibel eo ej kajerbal nan in “lõñ ko” ilo kõkkar, ekkã an jitõñlok ñõn ailiñ ko ak ro me eor air maroñ ñõn iroij ion armij ro. (Ais. 14:13, 14; Rev. 21:​1, 2) “Lõñ ko [me] renaj joko” rej jutõk kin wãwen iroij eo an armij ro ilo jukjuk im ber in enana. Air joko kin juõn “ainiken elap” emaroñ kalikar bwe renaj joko ilo mõkõj.

4. “Lõl” eo ej jutõk kin ta, im ewi wãwen naj kokkure?

⁴ “Lõl” eo ej jutõk kin jukjuk im ber in armij ro me rejenolok jen Anij. Kar eindrein lõl eo ilo ran ko an Noa, im kin men in Anij ear kakien bwe enaj kokkure ilo an bõktok juõn Ibijliplip. “A lõñ ko kiõ im lõl, kin nan eo, kejbãroki ñõn kijeek ilo ran in ekajet im kokkure armij renana.” (2 Pit. 3:7) Meñe ilo ien Ibijliplip eo aolep ro renana rar mij ilo juõn wõt ien, ak ilo “iñtan eo elap” me ej berotok, ien kokkure eo enaj walok ilo elõñ miãñõn. (Rev. 7:​14) Ilo mõtõn eo ken kajuõn ilo ien iñtan eo, Anij enaj kamakõt dri kien ro an lõl ñõn kokkure “Babilõn Elap,” im ilo wãwen in ej kwalok an kijirãte kabuñ ko rewan. (Rev. 17:​5, 16; 18:​8) Inem ilo mõtõn eo eliktata, Armagedõn, Jeova enaj kokkure aolepen jukjuk im ber eo an Setan.​—Rev. 16:14, 16; 19:19-​21.

“Men ko . . . Renaj Unlok”

5. Nan in kõkkar eo “men ko” rej kitibuj ta?

⁵ Ta “men ko” me “renaj unlok”? Ke Piter ear kajerbal nan kein “men ko” ear jitõñlok ñõn men ko me rej kõmõn an armij ro kwalok karkar ko, lemnok ko, wãwen ko, im mejenkajik ko an lõl, im rej bareinwõt kitibuj ‘mõntin lõl’ me “ej jerbal ilo ro dri kiblia.”  (1 Kor. 2:​12; riit Dri Epesõs 2:​1-3.) Mõntin ak “mejatoto” in ej jededlok ilo lõl in an Setan. Ej kamakõt armij ro ñõn air lemnok, konono, im emakõt ak kõmõni men ko me rej kwalok karkar ko karkarin Setan, eo ej “iroij in kajur ko in mejatoto” me eutiej buruen im ej juõn dri jumae.

6. Ilo wãwen it jitõbõn lõl in ealikar?

⁶ Kin men in, meñe rejela ak jab, ro im rar kõtlok bwe mõntin lõl in en jelet ir rej kwalok karkar ko im lemnok ko an Setan. Tokjen men in, rej kõmõn ekkar ñõn kõnan ko air im ejelok air koutiej ankilan Anij. Utiej buru im kibbon rej kõmõn bwe ren emakõt ñõn men ko rej walok, rej kwalok jitõbõn jumae nae ro reutiej, im rej lor wõt “mõm an kõniek, mõm an mej ko.”​—Riit 1 Jon 2:​15-​17. *

7. Etke jej aikwij ‘kejbãrok buruer’?

⁷ Inem elukkun aurõk bwe jen ‘kejbãrok buruer’ ilo ar kõmõn jokãlet ko remeletlet ikijen ro jej tel ar ibeir, men ko jej riiti, menin kamõnõnõ ko, im Web site ko me jej lali ilo Internet! (Ken. 4:​23) Dri jilik Paul ear je: “Komin kejbãrok kom bwe ejelok juõn en rakimi kom kin katak in meletlet eo an ak kin an mon bata, ekar ñõn bwebwenato mokta an armij rõn, im ñõn irinekatak ko an lõl, im jab ñõn Kraist.” (Kol. 2:8) Nan in jiroñ in elaplok an aurõk ke ran eo an Jeova ej ebaktok, kinke “bwil” eo ekanuij lap enaj kaõnlok ak kokkure aolep “men ko” an jukjuk im ber in an Setan, ilo an kalikar bwe rejjab maroñ jutõk nae bwil in illu eo an Anij. Men in ej kakememej kij kin nan ko ilo Malkai 4:1, (UBS): “Ran eo enaj itok ñe aoleb ro eutiej burueir kab ro ri nana renaj bwil einwõt ujoj mõrã. Ilo ran eo renaj bwil im lukkun jako.”

“Lõl Kab Men in Kõmõn ko ilo E Renaj Alikar”

8. Ewi wãwen lõl kab menin kõmõn ko ilo e renaj “alikar”?

⁸ Ta melelen an kar Piter ba bwe “lõl kab men in kõmõn ko ilo e renaj alikar”? Nan eo “alikar” emaroñ bareinwõt melelen “jela kake.” Inem nan kein an Piter ej melelen bwe ilo ien iñtan eo elap, Jeova enaj kalikar bwe lõl eo an Setan ej jumae E im Ailiñ eo An, kin men in ej tellokin bõk kokkure. Ilo an kanan kin ien in, Aiseia 26:21 (UBS) ej ba: “Iroij ej itok jen ijo jikin bwe en kaje armij otemjej ilõl kin air jerawiwi. Ire im uror ko rar kõmmõni ilo ittino ion lõl renaj alikkar, im bũdrej ejamin bar noj ro emwij mõn ir.”

9. (a) Ta eo jej aikwij karmijete, im etke? (b) Ta eo jej aikwij kadrek iber, im etke?

⁹ Ilo ran eo an Jeova, ro rar kõtlok bwe lõl im jitõbõn lõl in enana ren jelet ir renaj kwalok kin kain armij rõt ir, ilo air mõn dron. Ilo mol, emaroñ bwe menin kamõnõnõ ko relej me rebuñbuñ ranin rej kamineneik lemnok ko an elõñ armij ro ñõn ien eo ñe kajjojo armij “enaj jibwe armij eo iturin im ire ibben.” (Zek. 14:13, UBS) Kin men in, elap an aurõk bwe jen karmijeteik jabrewõt men, einwõt pija in aluij ko, buk ko, mijjin in ikkure ko, im men ko eierlok wõt me remaroñ kadrek iber karkar ko Anij ej driki, einwõt utiej buru im yokwe lej! (2 Sam. 22:28; Sam 11:5) Jen men in, jen kadrek karkar ko karkarin Anij kinke karkar kein renaj kamaroñ kij ñõn jutõk bin wõt ñe bwil eo ilo kõkkar me ekanuij lap enaj itok ilo ran eo an Jeova.​—Gal. 5:​22, 23.

“Lõñ ko Rekãl im Lõl Ekãl”

10, 11. Ta “lõñ ko rekãl im lõl ekãl”?

¹⁰ Riit 2 Piter 3:​13. “Lõñ ko rekãl” ej Ailiñ  eo an Anij ilõñ me ear jutõk ilo yiõ eo 1914 ke “ien ko an dri ailiñ ko” ear jemlok. (Luk 21:24) Kien in an Anij ej ejaakin Kraist Jisõs im 144,000 ro im renaj iroij iben, im enañin aolepeir emwij air bõk jinekjij eo air ñõn mour ilõñ. Ilo buk in Reveles̃õn, kar pijaik rein emwij kãlet ir einwõt ‘jikin kwelok eo ekwojarjar, Jerusalem ekãl, me ej wõnlõltak jen lõñ jen iben Anij, im emwij kapoje einwõt kõra ej litlit ñõn leo belen.’ (Rev. 21:​1, 2, 22-​24) Einwõt kar ilo Jerusalem, jikin eo me kien eo an Israel eo etto ear ber ie, Jerusalem eo ekãl im Leo Belen rej ejaakin kien eo me enaj iroij ion jukjuk in ber eo ekãl. Jikin kwelok in ilo kõkkar enaj “wõnlõltak jen lõñ” ikijen an lolorjake aolep makõtkit ko an lõl.

¹¹ “Lõl ekãl” ej jitõñlok ñõn jukjuk im ber eo ekãl in armij ro ion lõl me emwij air kalikar bwe rej mõnõnõ in kõtãik ir ñõn Ailiñ eo an Anij. Enaj lukkun jejit ñe ainemõn im burukuk eo ikõtan Anij im armij ro an ranin enaj ber ilo ‘lõl eo enaj itok.’ (Hib. 2:5) Ewi wãwen ar maroñ erom mõtõn jukjuk im ber eo ekãl?

Kwon Pojõk ñõn Ran eo Elap an Jeova

12. Etke armij ro ion lõl renaj ilbõk ñe ej itok ran eo an Jeova?

¹² Paul im Piter rar jimor kanan bwe ran eo an Jeova enaj itok ‘einwõt juõn dri kwot’ me ej ajãdrikdriktok ilo ien eo jejjab kõtõmene kake. (Riit 1 Dri Tessalonika 5:​1, 2.) Dri Kristian ro remol me rej kõtar wõt an ran eo itok, renaj bareinwõt ilbõk kin an naj walok ilo idriñ. (Matu 24:44) Bõtab, armij ro renaj iion juõn men elaplok jen air baj bwilõñ wõt. Paul ear je: “Ñe [armij ro rejenolok jen Jeova] rej ba, Ainemõn im ejelok unin am lelñoñ, eokwe eiriñ naj kokkure ir, einwõt iñtan ej walok ñõn juõn kõra ej bõroro; im re jamin ko.”​—1 Tes. 5:3.

13. Ewi wãwen ar maroñ kejbãrok bwe nan kein “Ainemõn im ejelok unin am lelñoñ” ren jab mone kij?

¹³ Air lamij im ba “Ainemõn im ejelok unin am lelñoñ” enaj bar juõn riõp me ej itok jen Setan im dimõn ro an, bõtab men in ejamin mõne dri korijer ro an Jeova. Paul ear je: “Komij jab ilo marok, bwe ran eo en jibwe kom einwõt dri kwot. Bwe kom otemjej ro nejin maram im ran.” (1 Tes. 5:​4, 5) Inem jen berwõt ilo maram im ber etolok jen marok eo an lõl in an Setan. Piter ear je: “Ro jitenburu, bwe kom jela mokta kin men kein, komin lale ñe [dri kaki ro rewan ilo congregation eo] kab bõklok kom kin bwir an ro renana , im kom buñ jen ami bin.”​—2 Pit. 3:​17.

14, 15. (a) Ewi wãwen an Jeova koutiej kij? (b) Ta nan ko emwij kakõrmoli me jej aikwij lukkun lemnok kaki?

¹⁴ Kwomaroñ kile bwe Jeova ejjab baj ba wõt “komin lale” ak ekil wõt. Jen men in, ej koutiej kij ilo an kõmõn bwe jen “jela mokta” kin men ko relap renaj walok ilo ran ko rej ber iman.

¹⁵ Bõtab, ekaburomõjmõj bwe jet rar oktõk im jab kwalok air itoklimo im  bareinwõt rar kõrraati nan in kakememej ko kin aikwij eo ñõn ar ekil wõt. Remaroñ ba ‘Kimar roñ ejja nan in kakememej in wõt iomin elõñ yiõ ko.’ Bõtab, armij rein rej aikwij kememej bwe ilo air ba nan kein, ilo mol rej kwalok air berre jab kumi in dri korijer eo etiljek im meletlet wõt ak bareinwõt Jeova im Jisõs. Jeova ear ba, “Kwon kõttar wõt.” (Hab. 2:3, UBS) Jisõs ear errã ilo an ba: “Komin ekil; bwe kom jaje ilo ran õt Iroij e naj itok.” (Matu 24:42) Bareinwõt Piter ear je: “Ta men eo komin wõjake ilo kõmõn wãnik im kabuñ rokwojarjar, Ke komij kõtõmene im lipjerjer an ran in Iroij itok.” (2 Pit. ​3:11, 12) Kumi in dri korijer eo etiljek im meletlet im Kumi eo Ej Tel Dri Kennan ro an Jeova (Governing Body eo) rejamin kajitokjen nan kein raurõk!

16. Kain lemnok rõt eo jej aikwij kejbãrok kij jene, im etke?

¹⁶ Ilo mol, eo ej bõk lemnok eo bwe erumij an Iroij itok ej “dri korijeran eo enana.” (Matu 24:​48) Dri korijer in enana ej mõtõn kumi eo me 2 Piter 3:​3, 4 ej kwalok kake. Piter ear je, “Ilo ran ko eliktata, eor dri kajirere re naj itok,” ro me ekkar ñõn “mõm ko air” rej kajirere kake ro rej ekil wõt kin ran eo an Jeova. Aet, jen air kaurõk air korijer ñõn Anij im rejetake Ailiñ eo an, dri kajirere rein rej lemnok wõt kin ir mõke im kõnan ko air rekibbon. Jen jab bõk kain lemnok rõt in ekiblia im ekauwatata! Jen men in, jen ‘watõk meanwõr an ar Iroij einwõt menin lomor’ ilo ar boub wõt ilo jerbal in kwalok nan kin Ailiñ eo im kõmõn dri kalor ro im jab le jen joñõn ar inebata kin ñãt eo men ko an Jeova Anij renaj walok.​—2 Pit. 3:​15; riit Jerbal 1:​6, 7.

Kwon Liki Anij in Lomor Eo

17. Ewi wãwen an kar dri Kristian ro retiljek emakõt ñõn nan in kakkil eo an Jisõs ñõn ko jen Jerusalem, im etke?

¹⁷ Elikin an dri tõrinae ro an Rom nitbwili Judia ilo yiõ eo 66, dri Kristian ro retiljek rar bokake nan in kakkil eo an Jisõs ñõn ko jen jikin kwelok eo an Jerusalem ilo ien eo ear bellok ñõn air kõmõne men in. (Luk 21:20-​23) Etke rar emakõt ilo mõkõj im bin wõt ilo bebe eo air? Ejelok berre, rar kememej wõt nan in kakkil eo an Jisõs. Emol, rar kõtõmene bwe bebe eo air enaj kar kitibuj air iion wãwen ko rebin, einwõt an kar Kraist kakkil ir kake. Bõtab ilo ejja ien eo wõt, rar jela bwe Jeova ejamin ilok jen armij ro an retiljek.​—Sam 55:22.

18. Ilo wãwen it nan ko an Jisõs ilo Luk 21:25-​28 rej jelet lemnok eo am kin iñtan eo elap me enaj itok?

¹⁸ Kij bareinwõt jej aikwij liki Jeova, kinke  e wõt emaroñ lomoren kij ñe jukjuk im ber in enaj iion iñtan eo ekanuij lap me ejañin kar walok mokta. Elikin an jino walok iñtan eo elap im mokta jen an Jeova kokkure jukjuk im ber in, armij renaj “rarrimijlok kin lelñoñ, im kin kiljake men ko re naj walok ion lõl.” Bõtab, dri korijer ro retiljek an Jeova rejamin lelñoñ. Jen men in, renaj lõñliñ kinke rejela bwe ejjabto renaj bõk lomor.​—Riit Luk 21:25-​28.

19. Ta eo jenaj etale ilo katak in tok juõn?

¹⁹ Aet, juõn ilju ekanuij kalõñliñ ej ber iman ro rej kõmõn bwe ren jenolok wõt jen lõl in im “men ko” an! Bõtab, einwõt an katak in tok kemelele, elañe jekõnan bõk mour, elaplok men ko jej aikwij kõmõni jen ar baj kejbãrok kij jen men ko renana. Jej aikwij kadrek iber karkar ko rej kamõnõnõik Jeova im kõmõni jerbal ko rej kabuñburuen.​—2 Pit. 3:​11.

[Kamelele eo itulal]

Kwomaroñ ke Kemelele?

• Ta eo men kein rej jutõk ikijen . . .

‘lõñ ko im lõl’ ranin?

“men ko”?

“lõñ ko rekãl im lõl ekãl”?

• Etke jej lukkun liki Anij?

[Kajitõk ko ñan katak]

[Pija ilo peij 5]

Ewi wãwen kwomaroñ “kejbãrok buruõm” im kõmõn bwe kwon jenolok wõt jen lõl in?

[Pija ilo peij 6]

Ewi wãwen ar maroñ kwalok bwe jej ‘watõk meanwõr an ar Iroij einwõt menin lomor’?