Oityi Onthiki Ya Jeova Maikahololola

“Onthiki ya Jeova maiya ngo tyimphulu, . . . iya oohi novilinga vikahimo mavikahololoka”—2 PEDRO 3:10.

1, 2. (a) Oñgeni ouye uno wovivi maukapwa? (b) Omapulo patyi matulilongesa?

 OUYE uno wovivi ukahi nokuhongolelwa nolusoke luomatutu luokuti ovanthu vapondola okutumina kombanda yoohi tyihena ombatelo ya Jeova. (Salmo 2:2, 3) Okuti kuna otyipuka tyilingwa nomatutu tyipondola okutualako apeho? Au. Ngotyo katupondola okukevelela ouye wa Satanasi ulihanyaune oo muene. Anthi, mauhanyuako na Huku momuvo anaka no monkhalelo yae. Etyi Huku makalinga nouye uno wovivi, matyikalekesa nawa ouviuki wae noluembia lwae.—Salmo 92:7; Provérbios 2:21, 22.

² Apostolu Paulu wahoneka okuti “onthiki ya Jeova maiya ngo tyimphulu, eulu malikanyimako nokuayuela unene. Mahi mokonda yomutokoto omunene ovipuka mavikasenguluka, iya oohi novilinga vikahimo mavikahololoka.” (2 Pedro 3:10) “Oohi” “neulu” viapopiwa apa oityi? Ovipuka patyi mavikasenguluka? Oityi Paulu ahandele okupopia etyi ati “oohi novilinga vikahimo mavikahololoka”? Okunoñgonoka omakumbululo omapulo oo, matyitukuatesako okukala tyelipongiya pala ovipuka vietesa owoma mavikamoneka apa katutu.

Oohi Neulu Mavikanyimuako

3. Eulu liapopiwa mu 1 Pedro 3:10 oityi? Oñgeni malikanyimuako?

³ Mombimbiliya ondaka “eulu” ovikando ovinyingi ilekesa omautumini, mokonda ekahi komutwe wovanthu vakuavo. (Isaías 14:13, 14; Revelação 21:1, 2) “Eulu [eli] malikanyimuako,” omautumini ovanthu, atumina ouye wonondingavivi. Okulamba kualio “nokuayuela unene,” ine “nomutitimo omunene,” mokutala tyilekesa okuti eulu olio malikahanyuako liwa-liwa.

4. “Oohi” ilekesa tyi, iya oñgeni maikahanyuako?

⁴ “Oohi” ilekesa ouye wovanthu vahaumbila Huku. Ouye ngoo waliko kononthiki mba Noe iya Huku atumu okuuhanyako Nombila Onene. “Nondaka yatyo oyo, eulu noohi vikahiko hono, viapakwa pala otupia, nonthiki yekoyeso no yehanyauko liovanthu vehei Huku.” (2 Pedro 3:7) Namphila Ombila Onene yahanyeneko ovanthu aveho onondingavivi otyikando tyike vala, mahi ehanyauno likahi nokuya malilingwa katutu-katutu mokueenda “kuononkhumbi ononene.” (Revelação 7:14) Monthele yotete yononkhumbi ononene, Huku mahindila ovatumini vopulitika okuhanyako “Ombambilonia Onene,” okulekesa okuti uyele onongeleya ombo mbukahi ngekunga. (Revelação 17:5, 16; 18:8) Iya movita vio Armagedon, viahulilila kononkhumbi ononene, Jeova makamanako ouye wa Satanasi wahupapo.—Revelação 16:14, 16; 19:19-21.

“Ovipuka Mavikasengululwa”

5. Ovipuka viapopiwa na Petulu viakutikinya tyi?

⁵ “Ovipuka” patyi “mavikasengululwa”? “Ovipuka” Petulu apopia, ovipuka aviho vihindila ouye okukala novituwa ovivi, no nontheto, nononkhalelo mbomuenyo no mahando Huku eyele. “Ovipuka” ovio  viakutikinya “omphepo yomouye” “ikahi nokuundapa movanthu vehetavela.” (1 Coríntios 2:12; tanga Efésios 2:1-3.) Ospilitu oyo ine “omphepo” ikahi mouye wa Satanasi. Ihindila ovanthu okusoka, nokupopia, nokulinga ovipuka mononkhalelo mbulekesa okutuwa kua Satanasi, omukalavi nokuna omalityindailo “omutumini womphepo” youye.

6. Oñgeni ospilitu youye iimbukwa?

⁶ Ngotyo, aveho vena omphepo youye tyilinge vetyii ine kavetyii, vayeka omutima wavo nomalusoke vihongiliyue na Satanasi, iya avakala nomalusoke ae novituwa viae. Moluotyo, valinga etyi vahanda, kavesukile nehando lia Huku. Valinga ovipuka nomalityindailo ine okulipaka popawa, nokuhetavela kovatumini. Tupu kavelityilika “epeleyo liolutu nepeleyo liomaiho.”—Tanga 1 João 2:15-17. a

7. Omokonda yatyi tuna “okuyunga nawa omutima [wetu]”?

⁷ Tyakolela ngatyi “okuyunga nawa omutima [wetu]” mokulandula onondonga mba Huku konthele yokuholovona omapanga, novipuka tutanga, novitalukiso, netyi tutala mo Internete! (Provérbios 4:23) Apostolu Paulu wahoneka okuti: “Lungukei: opo pahakale nawike umutyindapo ngononkhuatwa mbae, nomalongeso omatutu, noviso viovanthu, ovipuka viomouye vihatundile ku Kristu.” Colossenses 2:8) Elondolo olio liakolela vali unene putyina onthiki ya Jeova ikahi popepi, mokonda ‘outokotwe’ wayo omunene maukasengulula “ovipuka”aviho viouye wa Satanasi, okulekesa okuti kavipondola okutyilika outokotwe wonyengo ya Huku. Otyo tyituhinangelesa onondaka ombu mba Malaquias 4:1 mbati: “Onthiki ikahi nokuya, itema ngofolonu, iya aveho vomalityindailo no vokulinga ovivi aveho mavakala ngeholi. Iya onthiki maiya tyotyili, maivehanyeko.”

“Oohi Novilinga Vikahimo Mavikahololoka”

8. Oñgeni oohi novilinga vikahimo “mavikahololoka”?

⁸ Oityi Petulu ahandele okupopia etyi ahoneka okuti “oohi novilinga vikahimo mavikahololoka”? Ondaka “okuhololoka” tupu ipondola okupitiyua okuti “okuvasiwa” ine “okuhikululwa.” Petulu walekesa okuti mokueenda kuononkhumbi ononene, Jeova makahikulula ouye wa Satanasi, okulekesa kuaveho okuti uyele Huku Nouhamba Wae. Iya moluotyo, watokala okuhanyuako. Isaías 26:21, wapopia konthele yomuvo watyo oo, okuti: “Jeova ukahi nokutunda pomphangu yae, opo akoyese vokuatunga kombanda yoohi, mokonda yonkhali vemulingila. Iya oohi maihololola ohonde vamomesa, kamiholeka vali ovanthu vayo vokuaipawa.”

9. (a) Oityi tuesukisa okuanya, iya omokonda yatyi? (b) Oityi tuesukisa okukala natyo, iya omokonda yatyi?

⁹ Mokueenda kuonthiki ya Jeova, vana vokuna ovituwa viouye nomphepo yao ombi, mavakalekesa oñgeni tyotyili vatuwa, alo umwe mavekeliipaa kese umwe na mukuavo. Ononkhalelo ononyingi mboungangala novitalukiso viakaka hono, vikahi nokulonga ovanthu etyi mavakalinga pomuvo oo, putyina okuoko kuomunthu “makukakatukila okuoko kuamukuavo.” (Zacarias 14:13) Moluotyo, tyakolela tulityilike kese tyimwe, onosinema, nomikanda no novideo game, novikuavo vali vipondola okutukalesa novituwa Huku eyele, omalityindailo noungangala! (2 Samuel 22:28; Salmo 11:5) Anthi, tukalei notyinyango tyospilitu ya Huku matyituvatela okukala novituwa maviketuhupisa monthiki yonyengo ya Jeova.—Gálatas 5:22, 23.

 “Eulu Epe Noohi Omphe”

10, 11. “Oohi omphe” “neulu epe” oityi?

¹⁰ Tanga 2 Pedro 3:13. “Eulu epe,” Ouhamba wa Huku keulu, wavialekua menima 1914, etyi ‘omuvo wanakua womalongo’ wapua. (Lucas 21:24) Ouhamba oo wotyotyili, utuminwa na Kristu kumwe no 144.000, otyinyingi vatambulale ondyambi yavo keulu. Momukanda wa Revelação, ovanthu ovo vaholovonwa, vapopiwa okuti “epundaumbo likola, o Jelusalei Omphe, ilauka keulu ku Huku, nokuapongiyua ngondombwa yafiwiswa pala omulume wae.” (Revelação 21:1, 2, 22-24) Ngetyi mo Jelusalei ankho omo mukala otyipundi tyoutunimi wo Isilayali kohale, o Jelusalei omphe Nomphunga, ovo ovatumini vouye omupe. Epundaumbo olio liokeulu ‘malikalauka okutunda keulu’ mokuhimbika okutumina ovipuka aviho pano pohi.

¹¹ “Oohi omphe,” onkhalelo omphe yovanthu pano pohi, mavalekesa okuti vetavela nehambu Ouhamba wa Huku. Opalaisu yopaspilitu omu ovanthu va Huku vekahi pahetyino, okuhulililako maikakala pomphangu yayo yaviuka ‘mouye watyo oo omuwa mauya.’ (Hebreus 2:5) Oñgeni onthue tupondola okukakala mouye watyo oo omupe?

Lipongiya pala Onthiki Onene ya Jeova

12. Omokonda yatyi onthiki ya Jeova maitumphulukisa ouye?

¹² Paulu na Petulu, vapopile konthele yonthiki ya Jeova maikeya “ngetyi otyimphulu tyiya” nokuyombaila otyiuhulukila. (Tanga 1 Tessalonicenses 5:1, 2.) Alo umwe Ovakristau, vatualako nokukevelela onthiki oyo, mavakatumphuluka neuhuluko liayo. (Mateus 24:44) Mahi, ouye kamaukatumphuluka vala. Paulu wahoneka okuti: “Putyina [vokuayapuka ku Jeova] vapopia okuti: ‘Ombembwa netuliyo!’ iya ehanyu maliya otyiuhulukila, ngetyi onongembia mbuuhulukila omukai omulemi, iya kamavahupu.”—1 Tessalonicenses 5:3.

13. Oñgeni matulityilika okukembwa ‘nombembwa netuliyo!’ mavikapopiwa?

¹³ Onondaka “Ombembwa netuliyo!” mavakapopia, ounkhembi omukuavo wovilulu. Mahi, ovaumbili va Jeova kamavetavela ounkhembi oo. Paulu wahoneka okuti: “Onwe kamukahi menthiki, opo onthiki oyo imuuhulukile ngovimphulu. Mokonda onwe amuho muvana votyitei, novana votyitenya.” (1 Tessalonicenses 5:4, 5) Moluotyo, tutualeiko okukala motyitei, kokule nenthiki liouye wa Satanasi. Petulu wahoneka okuti: “Nonthyolwa, mokonda otyo muetyiñgonokale tete, kalei tyalunguka opo vehemuyapule [nomalongeso omatutu mewaneno lio Vakristau] mokonda yononkhali mba vana vehetavela ovitumino, iya amuhasoyo mepameko lienyi.”—2 Pedro 3:17.

14, 15. (a) Oñgeni Jeova etuhivilika? (b) Onondaka patyi mba Huku tuna okupaka momutima?

¹⁴ Tala okuti Jeova ketupopila vala ‘tukale tyalunguka,’ ahalingi vali na tyimwe. Anthi, oe utuhivilika mokonda moluembia lwae  wetuavela ‘tete enoñgonoko’ mokutupopila etyi matyikapita komutwe.

¹⁵ Anthi, vamwe kavesuku ine vatomba omahinangeleso tupewa konthele yokukala tyalunguka. Vapopia okuti, ‘Omahinangeleso oo onthue tueivale mokueenda kuomanima omanyingi.’ Mahi, ovanthu ovo vesukisa okuhinangela okuti mokupopia ngotyo, vekahi nokupula Jeova no Mona wae, hamupika wekolelo. Jeova wati: “Tualako nokukevelela.” (Habacuque 2:3) Tupu, Jesus wati: “Tualeiko okutala nawa, mokonda onwe kamutyii onthiki patyi Tatekulu yenyi meya.” (Mateus 24:42) Okuyawisako, Petulu wahoneka okuti: “Muesukisa okukala ovanthu patyi, konthele yovituwa viasukuka novilinga vilekesa onthilo na Huku, tyina mukevelela nokuanoñgonoka nawa okuya kuonthiki ya Jeova!” (2 Pedro 3:11, 12) Omupika wekolelo no Nonkhalamutwe mbo Nombangi mba Jeova, na lumwe mavatombo onondaka ombo mbakolela!

16. Otyituwa patyi tuna okulityilika, iya omokonda yatyi?

¹⁶ Anthi, “omupika ondingavivi,” oe usoka okuti “Omuhona ukahi nokuseta.” (Mateus 24:48) Omupika oo ondingavivi, ukahi kumwe novanthu vapopiwa mu 2 Pedro 3:3, 4. Petulu wahoneka okuti: “Kononthiki mbahulililako makukeya ovanthu vomukuele,” mavakalinga “ngetyi ovo muene vahanda,” okukuela vana vatualako okutavela okuti onthiki ya Jeova ikahi popepi. Ovanthu ovo vomukuele, kavesukile novilinga Viouhamba wa Huku, anthi vasukalala vala nomahando avo elungavi. Tuhakalei na lumwe notyituwa otyo otyivi tyokuhetavela. Anthi, ‘tutalei oumphua-lundo wa Tatekulu yetu ngeyovo,’mokuundapa unene movilinga viokuivisa Ouhamba wa Huku, nokulinga ovalongwa. Tupu, tuhasukalalei unene konthele yomuvo Jeova Huku makafuisapo ehando liae.—2 Pedro 3:15; tanga Atos 1:6, 7.

Yumba Onthumbi mu Huku Weyovo

17. Oñgeni Ovakristau vekolelo vetavelele elondolo lia Jesus liokutila mo Jeslusalei? Omokonda yatyi?

¹⁷ Konyima yetyi ongombo yovita yova Roma yautukila o Judeia menima 66 P.K. Ovakristau vekolelo vetavelele elondolo lia Jesus liokutila mepundaumbo lio Jelusalei tyihasete. (Lucas 21:20-23) Omokonda yatyi vatundilemo liwa-liwa? Omokonda vapakele momutima elondolo lia Jesus. Tyotyili, ankho vetyii okuti etokolo liavo maliveetela ononkhumbi, ngetyi Kristu alondolele. Mahi, tupu, ankho vetyii okuti Jeova na lumwe malimbwa ovaumbili vae vekolelo.—Salmo 55:22.

18. Onondaka mba Jesus mu Lucas 21:25-28, mbukukalesa ñgeni konthele yononkhumbi ononene mambuya?

 ¹⁸ Nonthue tuna okuyumba onthumbi aiho mu Jeova, mokonda oe vala meketuyovola tyina ouye wamanyingila mononkhumbi ononene mouye auho. Putyina ononkhumbi ononene mbamahimbika, mahi tyina nkhele Jeova ehenehanyeko ovanthu vouye vahupapo, ovanthu “mavakaambuka nowoma, mokonda yovipuka mavikeya kombanda yoohi.” Namphila onondyale mba Huku mavakateketa nowoma, ovaumbili va Jeova vekolelo kamavakakala nowoma. Anthi, mavakahambukwa mokonda vetyii okuti eyovo liavo likahi popepi.—Tanga Lucas 21:25-28.

19. Oityi matukelilongesa monthele mailandulako?

¹⁹ Tyotyili, vana vatualako tyeliyapuka nouye “novipuka” viouye, mavakakala nehambu enene ngatyi! Ngetyi onthele mailandulako maikahangununa, inkha tuhanda okukamona omuenyo, katulityilika vala ovivi. Mahi tuesukisa okukala novituwa viapandwa na Jeova nokulinga ovipuka oe ehole.—2 Pedro 3:11.

[Onondaka Poutoi]

Okuti Ove Upondola Okuhangununa?

• Oityi . . .

oohi neulu” vikahiko hono?

“ovipuka”?

‘eulu epe noohi omphe’?

• Omononda yatyi tuyumbila onthumbi yetu aiho mu Huku?

[Omapuko Elongeso]

[Olutalatu pefo 17]

Oñgeni upondola “okuyunga vali nawa omutima wove” nokutualako tyeliyapuka nouye?

[Olutalatu pefo 18]

Oñgeni matulekesa okuti “tutala oumphua-lundo wa Tatekulu yetu ngeyovo?”