No Antoy Iparungtal na Agew nen Jehova

“Say agew nen Jehova et onsabin singa matakew, . . . tan naromog so dalin tan saray bengatlan wadtan.”​—2 PED. 3:10.

1, 2. (a) Panon a mangangga so kaplesan a marelmeng a sistema na bengabengatla? (b) Antoran tepet so pantongtongan tayo?

SAY kaplesan a marelmeng a sistema na bengabengatla et manigsisia ed katilaan a sarasarag kuno na too ya uleyan so dalin anggan anggapoy Jehova. (Sal. 2:2, 3) Lawas kasin makapansiansia so antokaman a base ed katilaan? Seguradon andi! Agtayo la kaukolan nin alagden so mundo nen Satanas a naderal a bukor, lapud deralen itan na Dios diad inggeter ton panaon tan diad paraan to. Sayan paneral na Dios ed marelmeng a mundo so mangipapatnag ed perpekton inkahustisya tan panangaro to.​—Sal. 92:7; Uli. 2:21, 22.

² Oniay insulat nen apostol Pedro: “Say agew nen Jehova et onsabin singa matakew, a diad satan et naandi so katawenan diad maksil ya ungol, balet natunaw iray ampetapetang a bengatlan walad tawen tan dalin, tan naromog so dalin tan saray bengatlan wadtan.” (2 Ped. 3:10) Anto so “katawenan” tan “dalin” ya asalambit dia? Antoray “bengatlan” natunaw? Tan antoy labay ya ibaga nen Pedro ed “dalin tan saray bengatlan wadtan” a “naromog”? Say pangamta na ebat ed sarayan tepet et makatulong ed sikatayo pian niparaan itayo ed makapataktakot iran nagawa ed arapen.

Saray Katawenan tan say Dalin et Naandi

3. Antoray “katawenan” ya asalambit ed 2 Pedro 3:10, tan panon iran “naandi”?

³ Sano say salitan “katawenan” et simbolikoy impakausar to ed Biblia, kaslakan lan say natutukoy et saray walaan na pakauley, a mas atagey nen saray sakop da. (Isa. 14:13, 14; Apo. 21:1, 2) Irerepresenta na “katawenan” a “naandi” so pananguley na totoo ed mauges a katooan. Say pakaandi na sarayan katawenan “diad maksil ya ungol” et mangipapanengneng a maples so kaderal da.

4. Anto so irerepresenta na “dalin,” tan panon itan a naderal?

⁴ Irerepresenta na “dalin” so mundo na katooan a binmeneg ed Dios. Ontan so mundo nen panaon nen Noe, kanian dineral na Dios itan panamegley na Delap. “Diad panamegley na satan lanlamang a salita, say katawenan tan say dalin a wala natan et nigana ed apoy tan iyaalagar ed agew na panangukom tan kaderal na totoon agmaridios.” (2 Ped. 3:7) Diad saman a Delap et pinsanan a dineral so amin a mauges a totoo. Balet, diad onsasabin “baleg ya irap” et aliwan pinsanan so kaderal noagta walaray mantutumbokan a nagawa. (Apo. 7:14) Diad gapo na satan ya “irap,” pakiwasen na Dios iray manuley ed sayan mundo a maneral ed “Makapanyarin Babilonia,” sirin et ipapanengneng toy pankabusol to ed relihyoson balangkantis. (Apo. 17:5, 16; 18:8) Insan, diad Armagedon ya unor lan parte na baleg ya irap et upoten nen Jehova iray nakekeran kabiangan na mundo nen Satanas.​—Apo. 16:14, 16; 19:19-21.

‘Natunaw Iray Bengatla’

5. Antoy kabiangan ed ‘saray bengatla a natunaw’?

⁵ Antoray ‘bengatla a natunaw’? Say salitan ‘bengatla’ ya sinalambit nen Pedro et ontutukoy ed saray manunan bengatla a mangiimpluensya ed mundo pian magmaliw a mauges  so kakikiwas, ugali, kagagawa, tan kalat to. Kabiangan ed saratan a ‘bengatla’ so “espiritu na mundo” “ya ipapatnag natan na saray agmatulok.” (1 Cor. 2:12; basaen so Efeso 2:1-3.) Satan ya espiritu odino “dagem” et kasmak ed mundo nen Satanas. Sasagyaten to ray totoo a mannonot, manplano, mansalita, tan onkiwas a mipara’d panagnonot nen Satanas, say matangsit, rebelyoson “manuley na autoridad na dagem.”

6. Antoray pakapatnagan ed espiritu na mundo?

⁶ Kanian, saramay naalisan na espiritu na mundo et aabuloyan day isip tan puso ra a naimpluensyaan nen Satanas, amta ra man itan odino andi. No ontan sirin, nipapanengneng day panagnonot tan kagagawa nen Satanas. Say resulta et gagawaen day labalabay da, tan ibabaliwala ray linawa na Dios. Sikaray mapaatagey tan masiblet, rebelde ed saray walad pakauley, tan nigalet ed “pilalek na laman tan say pilalek na mata.”​—Basaen so 1 Juan 2:15-17. *

7. Akin a kaukolan tayon protektaan so puso tayo?

⁷ Talagan importante sirin a “yatol [odino, protektaan tayoy] puso” tayo diad makabat a pampili na kaulop, babasaen, panagligliwaan, tan saray Web site a nenengnengen tayo ed Internet! (Uli. 4:23) Oniay insulat nen apostol Pablo: “Manalwar kayo: ompan walay mamatit ed sikayo ya usaren toy minumundon karunongan tan maapan panagpalikdo unong ed tradisyon na totoo, unong ed inuugaw iran bengatla ed mundo tan aliwan unong ed si Kristo.” (Col. 2:8) Lalon kakkaukolan iyan ganggan legan a manasingger so agew nen Jehova, lapud say sobran ‘petang’ na “agew” to et tunawen toy amin a ‘bengatla’ a walad sistema nen Satanas. Diad ontan et niparungtal ya agda nasarag so petang na sanok na Dios. Nipapanonot na saya imay imbaga na Malaquias 4:1: “Say agew onsabi, sikato so mamool a singa apoy na palbaan; et saray amin a mapangta, tan saray amin a manggawa na mauges sikara naani dayami; et say agew ya onsabi poolan to ra naani.”

“Naromog so Dalin tan Saray Bengatlan Wadtan”

8. Antoy labay ya ibaga na “naromog so dalin tan saray bengatlan wadtan”?

⁸ Antoy labay ya ibaga nen Pedro sanen insulat ton “naromog so dalin tan saray bengatlan wadtan”? Say salitan “naromog” et nayari met ya ipatalos a “naamtaan” odino “niparungtal.” Say labay ya ibaga nen Pedro et legan na baleg ya irap, iparungtal nen Jehova so mundo nen Satanas, ipaamta To ya sumpa itan ed Sikato tan ed Panarian To, tan sirin et kanepegan toy naderal. Oniay mapropetikon imbaga na Isaias 26:21 nipaakar ed satan a panaon: “Si Jehova ompaway a manlapu ed pasen to pian dusaen to so saray manaayam ed dalin lapu ed inkauges da. Say dalin met lakseban to so dala to, tan anggan kapigan agto la sakbongan so saray inatey to.”

9. (a) Antoy nepeg tayon ipulisay, tan akin? (b) Antoy nepeg tayon bayuboan, tan akin?

⁹ Legan na agew nen Jehova, saramay nampaimpluensya ed mundo tan ed marelmeng ya espiritu nen Satanas et napatnagay tuan inkatoo ra, tan manpapateyan ni ra ingen. Diad tua, nayarin saray nanduruman bayolente a babantayan odino panagligliwaan a popular natan et kokondisyonen toy nonot na dakel pian diad satan a panaon et “singkaten na balang sakey a too so kaabay to tan kabilen to.” (Zac. 14:13, Maung a Balita) Talagan importante sirin ya ipulisay tayo so antokaman​—saray pelikula, libro, video game, tan arum ni ra​—a nayarin mamawala’d sikatayo na ug-ugalin kagula na Dios a singa say inkamapaatagey tan panlabay ed karamsakan! (2 Sam. 22:28; Sal. 11:5) Imbes, bayuboan tayo so bunga na masanton espiritu na Dios, lapud saratan a kualidad et aliling toy agnapoolan diad agew na sanok nen Jehova.​—Gal. 5:22, 23.

 “Balon Katawenan tan Balon Dalin”

10, 11. Anto so “balon katawenan” tan “balon dalin”?

¹⁰ Basaen so 2 Pedro 3:13. Say “balon katawenan” et say Panarian na Dios diad tawen, ya inletneg nen 1914 sanen angangga “iray aturon panaon na saray nasyon.” (Luc. 21:24) Tugyopen na sayan gobierno si Jesu-Kristo tan saray 144,000 a kaiba ton manuley, a karaklan ed saraya et akaawat la’d tumang da ed tawen. Diad Apocalipsis, sarayan pinili et deniskribe a “masanton syudad, say Balon Jerusalem, ya onleleksab manlapud tawen a kawalaan na Dios tan sikatoy akaparaan bilang sakey a nobya a kinawesan na marakep parad piasawaan to.” (Apo. 21:1, 2, 22-24) Nensaman, say kawalaan na gobierno na Israel et diad Jerusalem. Mipadpara, say manugyop ed gobierno na balon sistema na bengabengatla et say Balon Jerusalem tan say Nobyo to. Sayan mangatatawen a syudad so ‘onleksab manlapud tawen,’ salanti, iyapasakey toy imano to ed dalin.

¹¹ Say natutukoy a “balon dalin” et saray katooan a mabulos a manpapasakop ed Panarian na Dios. Say espiritual a paraison panggagayagaan na saray totoo na Dios natan ni labat et sigpot lan nasumpal diad marakdakep a “mundo ya onsabi.” (Heb. 2:5) Panon itayon magmaliw a kabiangan na satan a balon sistema na bengabengatla?

Manparaan Parad Makatantandan Agew nen Jehova

12. Akin et pakabiglaan na mundo so isabi na agew nen Jehova?

¹² Impasakbay di Pablo tan Pedro a say agew nen Jehova et onsabin “singa matakew”​—agnaliklikas tan ag-iilaloan. (Basaen so 1 Tesalonica 5:1, 2.) Anggaman tatalaranan na saray tuan Kristiano itan ya agew, siansia nin nasurpresa ira ed biglan isabi na satan. (Mat. 24:44) Balet, mas nabigbigla so mundo. Oniay insulat nen Pablo: “Sano ibabaga [na saramay angibeneg ed si Jehova]: ‘Kareenan tan kaligenan!’ et tampol ya onsabi ed sikara so biglan kadederal a singa pampapasakit na biin malukon; tan ag-iran balot makaliktar.”​—1 Tes. 5:3.

13. Antoy gawaen tayo pian ag-itayo napalikdo na kelyaw ya “Kareenan tan kaligenan!”?

¹³ Say kelyaw ya “Kareenan tan kaligenan!” et sakey nin katilaan a manlalapud saray demonyo. Balet, agnapalikdo na satan iray lingkor nen Jehova. Insulat nen Pablo: “Anggapo kayo ed kabilungetan pian nasabian na satan ya agew a singa ed saray matakew, ta sikayon amin et ananak na liwawa tan ananak na agew.” (1 Tes. 5:4, 5) Sirin, mansiansia tayo ed liwawa, ya arawdawi ed ambilbilunget a mundo nen Satanas. Oniay insulat nen Pedro: “Inad-arok ira, lapud amta yo la iya, manalwar kayo sirin pian agkayo nibalang a kaiba ra [saray palson managbangat diad kongregasyon] diad panamegley na katilaan na saray totoon mananumlang na ganggan tan agkayo natumba diad itatalindeg yo.”​—2 Ped. 3:17.

14, 15. (a) Panon itayon papagalangan nen Jehova? (b) Anto ran pinuyanan a bilin so nepeg tayon seryosoen?

¹⁴ Imanoen ya ag-itayo labat basta binilin  nen Jehova a “manalwar.” Noagta, pinagalangan to itayo diad maad-aron impangiter to’d sikatayo na pasakbay, diad ontan et ‘amta tayo la’ iray nagawa ed arapen.

¹⁵ Balet makapaermen ta imbaliwala odino agsinisia na arum iray panonot nipaakar ed kablian na pansiansian aliing. Nayarin ibaga ran, ‘nensaman mi ni ‘tan narerengel.’ Kaukolan a nodnonoten na saratan a totoo a sano ibabaga ra itan et aliwa labat a say matoor ya aripen so kukuestionen da, noag si Jehova tan say Anak to a mismo. Oniay inkuan nen Jehova: “Alagar mon onsabi.” (Hab. 2:3, MB) Ontan met, inkuan nen Jesus: “Mantultuloy kayon manbantay, lapud agyo amta no anton agew so isabi na Katawan yo.” (Mat. 24:42) Niarum ni, insulat nen Pedro: “Imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon, legan ya aalagaren tan sankanonot yo lawas so isabi na agew nen Jehova!” (2 Ped. 3:11, 12) Agbalot ibaliwala na matoor ya aripen tan say Mananguley ya Ulop to iyan seryoson bilin!

16. Anton awawey so pansagpotan tayon agnabayuboan, tan akin?

¹⁶ Mapatnag a say “mauges ya aripen” so mangibabagan mabayag ni isabi na Katawan. (Mat. 24:48) Sayan marelmeng ya aripen et kabiangan na grupon sinalambit ed 2 Pedro 3:3, 4. Insulat nen Pedro a “diad kaunoran iran agew et walaray managbalaw” a lapud ‘tutumboken da ray dilin pilalek da,’ et babalawen da iray matoor a manaalagar ed agew nen Jehova. On, imbes ya iyapasakey day nonot da ed Panarian, say piimano ra et say inkasikara tan say dilin pilpilalek da. Say onian agmatulok tan mapeligron panagnonot et agtayon balot komon nabayuboan! Imbes, komon ta “ipasen [tayon] kilalaban so panaanos na Katawan tayo.” Nagawaan tayo itan no okupado itayo ed panagpulong tan panaggaway babangatan tan ag-alablabas a panaabalaay pangamta’d panaon a si Jehova a Dios labat so makapangigeter.​—2 Ped. 3:15; basaen so Gawa 1:6, 7.

Manmatalek ed Dios a Manangiliktar

17. Antoy reaksion na saray matoor a Kristiano ed pasakbay nen Jesus a taynan so Jerusalem, tan akin?

¹⁷ Kayari inlusob na saray armada na Roma ed Judea nen 66 C.E., inunor na saray matoor a Kristiano so bilin nen Jesus a bektan walay pankanawnawa ra et taynan da lan tampol so syudad na Jerusalem. (Luc. 21:20-23) Akin et kinmiwas iran tampol tan ag-ira nanduaruwa? Lapud sankanonot dan naynay imay pasakbay nen Jesus. Seguradon amta ra a satan a desisyon da et walay katekep ton irap, impasakbay  la itan nen Jesus. Balet, amta ra met ya agbalot paulyanan nen Jehova iray matoor ed sikato.​—Sal. 55:22.

18. Antoy epekto na imbaga nen Jesus a walad Lucas 21:25-28 ed panmoriam ed onsasabin baleg ya irap?

¹⁸ Ontan tayo met, kaukolan a sigpot a manmatalek itayo ed si Jehova, ta sikato labat so makapangiliktar ed sikatayo sano nasagmak na sayan kaplesan a sistema so “baleg ya irap” ya agnin balot agawa. Kayari na igapo na baleg ya irap balet antis ya deralen nen Jehova so nakekeran kabiangan na mundo, “saray totoo et onkapuy lapud takot tan pantatalaran da ed saray nagawa diad dalin.” Tan legan ya manggiwgiwgiw ed takot iray kalaban na Dios, saray matoor a lingkor balet nen Jehova et ag-ontakot. Manliket ira ingen lapud amta ra ya asingger lay kililiktar da.​—Basaen so Lucas 21:25-28.

19. Anto so aralen ed onsublay ya artikulo?

¹⁹ On, agaylan makapalikliket ya arapen so manatalaran ed saramay mansiasiansian biig ed mundo tan ed saray “bengatlan” kabiangan na satan! Ingen ta unong ya ipaliwawa ed onsublay ya artikulo, no labay tayoy mansiansian manbilay, agtayo labat basta paliisan so mauges. Noagta, kaukolan tayon bayuboan iray kualidad a mamaliket ed si Jehova tan gawaen iray bengatlan aabobonan to.​—2 Ped. 3:11.

[Paimano ed leksab]

Kasin Nipaliwawam?

• Antoy irerepresenta na . . .

kaplesan a ‘katawenan tan dalin’?

‘saray bengatla a natunaw’?

“balon katawenan tan balon dalin”?

• Akin a sigpot tayon panmamatalkan so Dios?

[Tepetepet Parad Panagaral]

[Litrato ed pahina 5]

Panon mon naprotektaay pusom tan mansiansian biig ed mundo?

[Litrato ed pahina 6]

Panon tayon nipanengneng ya ‘ipapasen tayon kilalaban so panaanos na Katawan tayo’?