Dahme Rahnen Siohwa Pahn kasalehda

“Rahnen Kaun-o pahn leledo duwehte lipirap emen. . . . oh sampah iangahki audepe kan koaros pahn sohrala.”​—2 PIT. 3:10.

1, 2. (a) Ia duwen koasoandi suwed wet eh pahn imwisekla? (b) Peidek dah kan kitail pahn tehkpene?

 KOASOANDI suwed en ahnsou wet kin poahsoankihda likamw me dene aramas kak uhtohrda sang Siohwa oh kaunda sampah. (Mel. 2:2, 3) Mie mehkot kak poatopoat me kohsang mehkot me likamw? Uhdahn sohte kak! Ahpw, kitail sohte anahne awih pwe en Sehdan sampah en pein imwisekla, pwe Koht pahn ketin kasohrala koasoandi wet ni ahnsou oh ni wiepe ehu me e ketin koasoanehdi. Dahme Koht pahn ketin wiahiong koasoandi suwed wet pahn uhdahn kasalehda sapwellime pwung oh limpoak.​—Mel. 92:7; Lep. Pad. 2:21, 22.

² Wahnpoaron Piter ntingihedi: “Rahnen Kaun-o pahn leledo duwehte lipirap emen. Ni rahno, lahng pahn sohrala ni ngihl kamasepwehk, audepen pahnlahng pahn roangala, ohkihla kisiniei, oh sampah iangahki audepe kan koaros pahn sohrala.” (2 Pit. 3:10) Ia wehwehn “lahng” oh “sampah” wasaht? Ia wehwehn ‘audepe’ kan me pahn ohkihla kisiniei? Oh ia wehwehn “sampah iangahki audepe kan koaros” pahn “sohrala” me Piter koasokoasoia? Atail ese pasapengpen peidek pwukat pahn sewese kitail en kaunopada ong soahng kamasepwehk kan me pahn wiawi ni ahnsou keren.

Lahng oh Sampah me Pahn Sohrala

3. Ia wehwehn “lahng” me kileldi nan 2 Piter 3:10? Ia duwen eh pahn sohrala?

³ Ni ahnsou me Paipel kin doadoahngki lepin lokaia “lahng” ni karasaras, e kin kalapw dokedoke irail akan me ahneki manaman en kaunda tohn arail wehi kan. (Ais. 14:13, 14; Kaud. 21:1, 2) “Lahng [me] pahn sohrala” kin wehwehki kaundahn aramas me kin kakaun koasoandi me uhwong Koht. Arail sohralahki “ngihl kamasepwehk” ele pahn kasalehda arail pahn mwadang kasohrala.

4. Ia wehwehn “sampah”? Ia duwen eh pahn kasohrala?

⁴ “Sampah” kin wehwehki aramas akan me kin dohsang rehn Koht. Mie soangen aramas pwukat ni mwehin Noha oh Koht mahsanih me irail pahn sohrala ni ahnsoun Nohliko. “Nanleng oh sampah en ahnsou wet mihmihehki mahsenohte en Koht oh wie nekinek ong ni ahnsou re pahn ohkihla kisiniei. Re wie nekinek ong ni rahnen kadeik, iei rahnen kamwomwmwomwlahn me suwed kan.” (2 Pit. 3:7) Nohliko kasohrehla aramas suwed koaros ni ahnsou ehute, ahpw rahnen kasohrala me pahn kohdo pahn ekis ekis wiawi erein “kahn kamakam kowahlap.” (Kaud. 7:14, NW) Tepin ahnsoun kahn kamakam kowahlap, Koht pahn ketin kamwakid kaun akan en sampah wet en kauwehla “Papilon Lapalap.” Met kin kasalehda me Koht kin ketin kalahdeki pelien lamalam likamw me karasaraski lihen netiki paliwere. (Kaud. 17:5, 16; 18:8) Mwuri, ni mahwen en Armakedon, me iei kaimwisekpen kahn kamakam kowahlap, Siohwa pahn ketin kihsang luhwen koasoandien Sehdan koaros.​—Kaud. 16:14, 16; 19:19-21.

Audepe kan pahn Ohkihla Kisiniei

5. Dahme kin pidada ‘audepe’ kan?

⁵ Dahkot ‘audepe’ kan me pahn “ohkihla kisiniei”? ‘Audepe’ kan me Piter ntingihedi kin dokedoke soahng kan me kahrehiong sampah en ahneki madamadau, elen mour oh mehn akadei kan me kin uhwong Koht. ‘Audepe’ kan iangahki madamadau en sampah kin  “kamwakamwakid oh kakaun irail kan me kin uhwong Koht.” (1 Kor. 2:12; wadek Episos 2:1-3.) Madamadau wet de “nan wehwe” kin lella wasa koaros nan en Sehdan sampah. E kin uhdahn kamwakid en aramas akan arail madamadau, koasoandi, lokaia, oh mwekid kan ni ahl ehu me kasalehda madamadau en Sehdan, “kaun manaman en nan wehwe,” me kin pohnmwahso, oh kin uhwong Koht.

6. Ia duwen madamadau en sampah eh kin sansalda?

⁶ Eri, mendahki arail ese de soh, irail kan me kin mwekidki madamadau en sampah kin mweidohng Sehdan en kamwakid arail madamadau oh mohngiong, kahrehda re kin kasalehda eh madamadau. Met imwikihla ar kin wia dahme re men wia oh sohte kin nsenohki kupwuren Koht. Re kin mwekid ni aklapalap oh roporop, re kasalehda madamadau en uhwong irail me ahneki manaman en kaunda, oh re kin saledekiong wia arail ineng me kin pid “ineng en uduk, oh mehkan me aramas kin kilang oh ahnehda.”​—Wadek 1 Sohn 2:15-17.

7. Dahme kahrehda kitail anahne ‘pere mohngiongitail’?

⁷ Eri, ia uwen kesempwal kitail en kin ‘pere mohngiongitail,’ ni atail kin wiahda pilipil mwahu kan me poahsoankihda dahme kitail sukuhlki sang sapwellimen Koht koasoandi kan! Koasoandi pwukat kin pidada ihs me kitail en werekiong, dahme kitail en wadek, mehn kamweit kan, oh pil atail pahn doadoahngki Web site kan nan Internet. (Lep. Pad. 4:23, NW) Wahnpoaron Pohl ntingihedi: “Eri, kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.” (Kol. 2:8) Kaweid wet kin uhdahn kesempwal ni atail kerkerenlahng sapwellimen Siohwa rahn, pwe ‘audepe’ kan koaros en ahn Sehdan koasoandi pahn peikipeseng ‘karakar’ mwuledek, oh eri kasalehda me re sohte ahneki irair kan me sohte kak mwasingkihla sapwellimen Koht engieng. Met kin katamankin kitail mahsen kan me kileldi nan Malakai 4:1: “Rahn ehu pahn kohdo me aramas koaros me pohnmwahso oh suwed pahn isihsla, rasehng mwuten dihpw meng.”

“Sampah Iangahki Audepe kan Koaros Pahn Sohrala”

8. Ia duwen sampah oh audepe kan koaros ar pahn “sohrala”?

⁸ Ia wehwehn “sampah iangahki audepe kan koaros pahn sohrala” me Piter ntingihedi? E wehwehki me erein ahnsoun kahn kamakam kowahlap, Siohwa pahn ketin kasalehda ni sansal me ahn Sehdan sampah kin uhwong Ih oh Sapwellime Wehio oh e warohng kasohrala. Aiseia 26:21 kohpada duwen ahnsowo: “KAUN-O pahn ketido sang nan mwoale pwehn ketin kalokehki tohn sampah diparail kan. Kamaramas akan me wiawiher nin sampah ni rir pahn sansalda, oh pwehl solahr pahn ekieki irail kan me kamakamalahr.”

9. (a) Dahme kitail anahne soikala, oh pwekida? (b) Dahme kitail anahne kakairada, oh pwekida?

⁹ Erein sapwellimen Siohwa rahn, irail akan me mweidohng sampah oh eh madamadau suwed en kin kamwakid irail pahn kasalehda uhdahn soangen aramas dahkei irail, oh re kakete kemehla emenemen. Ni mehlel, soangsoangen mehn kamweit kan me kin kasalehda tiahk lemei me aramas kin perenki rahnwet kin kaukaunop madamadau en me tohto ong ahnsowo me “emenemente aramas pahn poarehng mehn mpe men oh peiong.” (Sek. 14:13) Eri, ia uwen kesempwal kitail en soikala mehkoaros duwehte kasdo, pwuhk kan, video games oh soahng teikan me ele pahn kahrehiong kitail en ahneki irair kan me duwehte aklapalap oh perenki tiahk lemei me Koht kin ketin kalahdeki! (2 Sam. 22:28; Lep. Pad. 6:16-19) Ahpw, kitail en kakairada wahn sapwellimen Koht manaman pwehki irair pwukat pahn sewese kitail en pitsang kehl en sapwellimen Siohwa engieng.​—Kal. 5:22, 23.

“Lahng Kapw oh Sampah Kapw”

10, 11. Dahkot “lahng kapw” oh “sampah kapw”?

¹⁰ Wadek 2 Piter 3:13. “Lahng kapw” iei  sapwellimen Koht Wehin nanleng, me tepida kakaun nan pahr 1914, ahnsoun wehin liki kan ar imwisekla. (Luk 21:24) Koperment lapalap wet wiawihkihda Krais Sises oh ienge kaun akan meh 144,000, me pali laud en irail aleier ketingparail nanleng. Nan pwuhken Kaudiahl irail pilipilda pwukat kin rasehng “Kahnimw Sarawio, Serusalem Kapw, e kohkohdi sang nanleng rehn Koht, kaunopada mwahu oh kapwata, duwehte lih kamwohd emen me kapwatadahr pwe en tuhwong eh pwoud.” (Kaud. 21:1, 2, 22-24) Duwehte Serusalem nin sampah kin wia wasahn kaunda en Israel mahs, Serusalem Kapw oh eh ohl Kamwohdo wiawihkihda koperment en koasoandi kapw. Kahnimw wet pahn ‘kohdi sang nanleng,’ met sohte wehwehki me e pahn uhdahn kohdihdo sampah ahpw e wehwehki me e pahn kaunda sampah.

¹¹ “Sampah kapw” kin dokedoke pwihn en aramas akan me pahn kasalehda me re perenki uhpahiong Wehin Koht. Irair en popohl oh miniminpene me sapwellimen Koht aramas akan ahneki ahnsou wet pahn pweida ni pwung nan sampah kaselel me pahn kohdo me aramas kin kousoan ie. (Ipru 2:5) Ia duwen atail kak wiahla kisehn koasoandi kapw?

Kaunopada ong Rahn Lapalap en Siohwa

12. Dahme kahrehda aramas akan en sampah pahn pwuriamweikihla sapwellimen Siohwa rahno?

¹² Pohl oh Piter koaros kohpada me sapwellimen Siohwa rahn pahn kohdo “rasehng lipirap emen” ni ahnsou ehu me aramas akan sohte kin kasik. (Wadek 1 Deselonika 5:1, 2.) Kristian mehlel kan me kin kasikasik rahno pil pahn pwuriamweikihla mwomwen eh mwadangete pwarada. (Mad. 24:44) Ahpw aramas akan en sampah pahn pwuriamweikihla laudsang irail. Pohl ntingihedi: “Ni ahnsou me aramas akan [me kin dohsang rehn Siohwa] pahn nda, ‘Mehkoaros meleilei oh mwahu,’ iei ahnsowo me apwal laud pahn mwadangete lelohng irail—e pahn mwadangete lelohng irail rasehng medek en neitik ong lih emen, oh aramas sohte pahn pitsang.”​—1 Des. 5:3.

13. Ia duwen atail en dehr mweidohng lokaia pwukat “Mehkoaros meleilei oh mwahu” en pitihkitaildi?

¹³ Arail kin nda “Mehkoaros meleilei oh mwahu” pahn wia ehu likamw me kohsang ngehn saut akan ahpw e sohte pahn pitihdi sapwellimen Siohwa ladu kan. Pohl ntingihedi: “Kumwail sohte kin mihmi nan rotorot; eri, Rahno sohte pahn kapwuriamwei ni eh pahn lelohng kumwail, rasehng lipirap emen. Pwe kumwail koaros aramas marain kei, me kisehn rahn.” (1 Des. 5:4, 5) Eri, kitail en mihmi nan marain, oh dohsang rotorot en ahn Sehdan sampah. Piter ntingihedi: “Eri, kompoakepahi ko, ni amwail eseier mepwukat, kumwail kaleke pwe kumwail dehr iangala padahk likamw en aramas suwed pwukat [me iei sounpadahk likamw akan nan mwomwohdiso en Kristian] oh pwupwuweisang nan mour teng en amwail pwoson.”​—2 Pit. 3:17.

14, 15. (a) Ia duwen Siohwa eh ketin kawauwih kitail? (b) Soangen mahsen dah kan nan Paipel me kitail anahne tamataman?

¹⁴ Siohwa sohte mahsanihongete kitail en “kaleke,” ahpw e ketin wia laud sang met. E ketin kawauwih kitail oh mweidohng kitail en ‘ese mepwukat’ ni eh ketin kawehwehiong kitail dahme pahn wiawi ni ahnsou kohkohdo.

¹⁵ E kansensuwed pwe ekei kin soukautih de  peikasalki mehn kataman kan me pid anahnepen pepehd oh mwasamwasahn. Re kin nda, ‘Kitail rongehr mehn katamanohte sounpar tohto.’ Ahpw, irail pwukat anahne tamataman me sang ni ar kin nda soahng pwukat, re kin ni mehlel peikasalki Siohwa oh sapwellime Ohl, kaidehn ihte pwihn en ladu lelepek. Siohwa mahsanih: “Awiawihete.” (Apak. 2:3) Sises pil mahsanih: “Kumwail eri mwasamwasahn pwe kumwail sehse rahn me amwail Kaun-o pahn ketido.” (Mad. 24:42) Patehng met, Piter ntingihedi: “Soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno, oh wia uwen me kumwail kak pwe en kamwadangahdo.” (2 Pit. 3:11, 12) Pwihn en ladu lelepek oh eh Pwihn me kin apwalih mwomwohdiso nan sampah pwon sohte mwahn kin soukautihong mahsen kesempwal pwukat!

16. Soangen madamadau dah me kitail anahne liksang? Dahme kahrehda?

¹⁶ “Papah suwed men” iei me kin medemedewe me eh Soumas kin pwapwand. (Mad. 24:48) Papah suwedo iei kisehn pwihn me 2 Piter 3:3, 4 kawehwehda. Piter ntingihedi: “Ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail” me kin tamataman sapwellimen Siohwa rahn ni lelepek. Ei, irail kin nsenohkihte pein irail oh arail ineng roporop kan laudsang doadoahk kan me pid duwen Wehio. Kitail en dehr kakairada soangen sapeik oh madamadau keper wet! Ahpw kitail en ‘tehk mwahu sapwellimen Kaun-o kanengamah ong kitail ni eh ketikihong kitail ahnsou mwahu en ale komour’ ni atail kin pwerisekiong doadoahk en kalohki Wehio oh katohnpadahk oh sohte nohk pwunodki ahnsou kan me Siohwa Koht ketin koasoanehdi.​—2 Pit. 3:15; wadek Wiewia 1:6, 7.

Likih Koht en Komour

17. Ia duwen Kristian lelepek kan ar kin mwekidki sapwellimen Sises kehkehlik en tangasang Serusalem? Dahme kahrehda?

¹⁷ Mwurin karis en sounpei en Rom kapilpene Sudia nan pahr 66, Kristian lelepek kan kapwaiada sapwellimen Sises kehkehlik en tangasang kahnimw en Serusalem ni tepin ahnsou mwahu en tang. (Luk 21:20-23) Dahme kahrehda re mwekid ni mwadang? Kitail kak kamehlele me irail kin tamataman sapwellimen Sises kehkehlik. Mehlel, re kin ese me arail pilipil pahn apwal duwehte me Sises ketin kohpadahr. Ahpw ni ahnsowohte re pil ese me Siohwa sohte pahn ketin likidmeliehla sapwellime kan me lelepek.​—Mel. 55:22.

18. Ia duwen sapwellimen Sises mahsen nan Luk 21:25-28 eh kamwakid omw madamadau ong kahn kamakam kowahlap me pahn kohdo?

¹⁸ Kitail pil anahne likih Siohwa ni unsek, pwe ih kelehpw kak doarekitailla ni ahnsou me koasoandi wet pahn lelohng kahpwal me keieu  laud nan poadopoad en aramas. Ahnsou ehu mwurin tepin kahn kamakam kowahlap, ahpw mwohn Siohwa pahn ketin kadeikada sampah pwon, aramas akan pahn“lipwongmaskihla ar masak ni ar pahn awiawih mehkan me pahn wiawihong sampah pokon.” Mendahki sapwellimen Koht imwintihti kan pahn rerrerki ar masak, sapwellimen Siohwa ladu lelepek kan sohte pahn masepwehk. Ahpw re pahn peren pwehki re ese me komourparail kerendohr.​—Wadek Luk 21:25-28.

19. Dahme kitail pahn tehkpene nan iren onop en mwuhr?

¹⁹ Ei, ia uwen kaperen en ahnsou kohkohdo ong irail me kin tohrohrasang sampah oh “audepe kan”! Ahpw ma kitail men ale mour, kitail anahne wia laud sang ihte soikala dahme suwed. Iren onop en mwuhr pahn kawehwehda met. Kitail anahne kakairada irair kan me pahn kaperenda Siohwa oh wia doadoahk kan me e kin kupwurki.​—2 Pit. 3:11.

Ke Kak Kawehwehda?

• Ia wehwehn ‘lahng oh sampah’en ahnsou wet?

• Ia wehwehn ‘audepe’ kan?

• Ia wehwehn “lahng kapw oh sampah kapw”?

• Dahme kahrehda kitail en likih Koht ni unsek?

[Peidek en Onop]

[Kilel nan pali 13]

Ia duwen omw kak “pere mohngiongomw” oh tohrohrasang sampah?

[Kilel nan pali 14]

Ia duwen atail kasalehda me kitail kin ‘tehk mwahu sapwellimen Kaun-o kanengamah’?