Ta te Ra o Iehova ka Akaari Mai

“E tae maira te rā o te Atu mei te keia i te po ra . . . e te enua oki e te angaanga tini ravarai ki runga, ka pou ïa i te ai.”​—2 PETE. 3:10.

1, 2. (a) Akapeea teia akatereanga o te au mea kino e ope ei? (e) Eaa te au uianga ka akamanako tatou?

KUA akatumuia te akatereanga o te au mea kino ki runga i te pikikaa maata e ka rauka i te tangata i te akaaere meitaki tikai i te enua, kare ra a Iehova. (Sala. 2:2, 3) Ka vai tinamou ua ainei te pikikaa e tuatau ua atu? Kare rava! Kare tatou e tiaki atu e kia takoreia atu te ao o Satani. Ka takoreia te reira e te Atua i te tuatau tei akatakaia e ia e na roto i tana uaorai mataara. Ka akaari meitakiia mai ta te Atua ka rave ki teia ao kino na roto i tona tu tika e tona aroa.​—Sala. 92:7; Mase. 2:21, 22.

² “E tae maira te rā o te Atu [Iehova] mei te keia i te po ra,” i tata ei te apotetoro ko Petero, “ka peke ke atu oki teianei rangi ma te paku maata, e taravai te au tumu o te enua i te veravera maata, [“e ka kiteaia,” NW] te enua oki e te angaanga tini ravarai.” (2 Pete. 3:10) Eaa te “rangi” e te “enua” e taikuia ra i konei? Eaa te “au tumu o te enua” te ka taravaiia? E eaa te aiteanga o ta Petero tuatua “e ka kiteaia” te ‘enua e te angaanga tini ravarai’? Te kite anga i te au pauanga no teia au uianga ka tauturu te reira ia tatou kia akateateamamao no te au tupuanga mataku rikarika te ka tupu mai a te tuatau ki mua.

Ka Peke Ke Atu te Rangi e te Enua

3. Eaa te “rangi” tei taikuia i roto ia 2 Petero 3:10, e akapeea te reira i te peke ke anga?

³ Me akatutuia mai i roto i te Pipiria, e taiku putuputuia ana te “rangi” ki te au mana tutara, tei akateiteiia ki runga ake i to ratou au tangata. (Isa. 14:13, 15; Apo. 21:1, 2) Te ‘peke ke anga te rangi’ te akatutu maira i te tutaraanga a te tangata i runga ake i te taiate akono kore i te Atua. Te peke ke anga ratou ma te “paku maata”​—me kore “aruruanga maata,” tei tau ki tetai urianga—​penei te akakite maira te takore vivikiia anga teia au rangi nei.

4. Eaa te “enua,” e akapeea te reira i te takoreia anga?

⁴ Te akatutu maira te “enua” i te au tangata o teianei ao tei akatakake mai mei te Atua. Kua tupu ana te reira ao i to Noa tuatau, e na roto i ta te Atua akaue anga, kua takoreia atu te reira e te Vaipuke. “Kareka te rangi e te enua e vai nei, te tāpuia nei ïa e taua tuatua ra no te ai, kia tae ki te rā akavaanga, e te mate o te aronga akono kore i te Atua ra.” (2 Pete. 3:7) Kua takoreia e te Vaipuke te au tangata kino ravarai i taua taime ra, e ka tupu marie ua te takoreanga e tu mai nei i te tuatau o “te tumatetenga maata.” (Apo. 7:14, NW) Te tuanga mua o taua tumatetenga ra, ka akakeu te Atua i te au tutara poritiki o teianei ao kia takore atu ia “Babulonia maata,” i te akaari anga i tona riri no taua vaine akaturi akonoanga ra. (Apo. 17:5, 16; 18:8) E oti, i roto i te tamaki i Aramakito, te tuanga openga o te tumatetenga maata, na Iehova uaorai e takore atu i te toenga o to Satani ao.​—Apo. 16:14, 16; 19:19-21.

‘Taravaiia te Au Tumu o te Enua’

5. Eaa te kapiti maira ki te au tumu o te enua akatutuia?

⁵ Eaa “te au tumu o te enua” te ka ‘taravaiia’? “Te au tumu o te enua” tei taikuia mai e Petero te tou ra ki te au mea puapinga te akaari maira i te au peu tau kore, te au tu, te au aerenga, e te au akakoroanga o teianei ao. Te kapiti maira “te au tumu o te enua” i te ‘vaerua  o teianei ao,’ te “angaanga ririnui nei i roto i te aronga akarongo kore.” (1 Kori. 2:12; e tatau ia Ephesia 2:1-3.) Te totoa maata nei te vaerua, me kore te “reva,” i roto i te ao o Satani. Te akakeu ra te reira i te tangata kia manako, kia parani, kia tuatua, e kia rave i te au mea te akaata maira i te manako o Satani, te tu ngakau parau, meameaau o “te ariki mana o te reva.”

6. Akapeea te vaerua o teianei ao i te akaariia mai anga?

⁶ No reira, me kua kite me kare, ko te aronga tei akakeuia e te vaerua o teianei ao te akatika ra i to ratou manako e te ngakau kia akakeuia e Satani, te akaata maira ratou i tona manako e tona tu. Tei tupu mai, kua rave ratou i ta ratou e inangaro ra, kare ra e akamanako ana i te anoano o te Atua. Kua ariu atu ratou ki te au turanga na roto i te tu akaparau me kore noinoi, te akaari ra ratou i te tu meameaau ki te aronga mana, e te rave ua ra ratou i “te anoano tika kore o te kopapa nei, e te anoano tika kore o te mata nei.”​—E tatau ia 1 Ioane 2:15-17.

7. Eaa ra tatou ka ‘paruru ei i to tatou ngakau’?

⁷ E mea puapinga tikai kia ‘paruru tatou i to tatou ngakau,’ na te rave anga i te au ikianga meitaki no runga i to tatou pirianga oa, te au puka ka tatau, te au tamataoraanga, e te Web site ta tatou e akara ana i runga i te Internet! (Mase. 4:23, NW) Kua tata te apotetoro ko Paulo e: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.” (Kolo. 2:8) E mea puapinga tikai taua akamatakiteanga ra te vaitata anga mai te ra o Iehova, no te mea ka taravai te reira ‘vera’ te kare rava i tupu ana i mua ana i te “au tumu o te enua” o ta Satani akatereanga, i te akapapu anga mai e kare e rauka i te reira i te kopae atu i te riri otooto o te Atua. Te akamaara maira teia au tuatua a Malaki 4:1 kia tatou e: “Te tae maira te ra, te ka tu a umu i te ka anga; e te aronga ngakau parau ravarai, e te aronga katoa i rave i te kino ra, e riro ïa ei teita; e ka oki ratou i taua rā ra [e] tae maira.”

‘Ka Kiteaia te Enua e te Au Angaanga Tini Ravarai’

8. Akapeea te enua e te angaanga tini ravarai i te ‘kiteaia anga’?

⁸ Eaa te aiteanga o ta Petero tuatua, tona tataanga e ‘ka kiteaia te enua e te angaanga tini ravarai ra’? Te tuatua ra a Petero e i te tuatau o te tumatetenga maata, ka akaari pu ua mai a Iehova i te ao o Satani, na te akakite anga mai e te patoi ra te reira Iaia e Tona Patireia, e ka tau rai te reira kia takoreia atu. Te tuatua totou anga no taua tuatau ra, te tatau ra a Isaia 26:21 e: “Te aere mairā Iehova mei tona ra ngai, e tutaki i to te enua nei i ta ratou ara; e na te enua e akakite mai i te toto i roto iaia ra, e kare oki aia e tapoki akaou i tona au tangata i taia ra.”

9. (a) Eaa ta tatou ka kopae, e no teaa ra? (e) Eaa ta tatou ka akatupu, e no teaa ra?

⁹ I to Iehova ra, ko te aronga tei akakeuia e teianei ao e tona vaerua kino ka akaari mai i to ratou tu tika tikai, na te tamate katoaanga i tetai e tetai. E tika rai, te akakeu ra te au tu tamataoraanga kino tei matauia i teia tuatau i te au manako o te au tangata i te taime ‘e akateitei ra tetai tangata i tona rima i te rave i te rima o tona tangata tupu.’ (Zeka. 14:13) E mea puapinga tikai kia kopae tatou i te au mea ravarai​—te au teata, te au puka, te au vitio kangakanga, e te vai atura—​te ka akatupu ki roto ia tatou i te au tu te rikarika ra te Atua, mei te akaparau e te inangaro i te kino! (2 Samu. 22:28; Sala. 11:5) E akatupu tatou i te ua o te vaerua tapu o te Atua, no te mea ka patoi ngaueue kore atu taua au tu ra i te vera akatutuanga no to Iehova ra ra.​—Gala. 5:22, 23.

“Te Rangi Ou e te Enua Ou”

10, 11. Eaa te “rangi ou” e te “enua ou”?

¹⁰ E tatau ia 2 Petero 3:13. Te “rangi ou” ko te Patireia o te Atua i te rangi, tei akanooia i te mataiti 1914 te akamutu anga “te au tuatau akatakaia no te au pa enua.” (Luka 21:24, NW) Te o maira te Karaiti ko Iesu e tona aronga tutara e 144,000 ki roto i teia  kavamani tiratiratu, te maataanga ia ratou kua rauka ta ratou tutakianga i runga i te rangi. I roto i te puka o Apokalupo, te akatutuia maira teia aronga tei ikiia ei “oire tapu ra, ko Ierusalema ou, i te eke anga mai mei ko mai i te Atua i runga i te rangi, kua akamaneaia mei te vaine i akamaneaia no te akaipoipo anga ki tana tane ra.” (Apo. 21:1, 2, 22-24) Mei ia Ierusalema rai i runga nei i te enua te ngai i akanooia ai te kavamani i Iseraela taito ra, ko Ierusalema Ou e tana Tane Akaipoipo ko ratou te kavamani o te akatereanga ou o te au mea nei. Te eke mai anga o teia oire mei te rangi mai, kare te aiteanga e ka eke tikai mai te reira, inara ka akatere mai te reira i te au mea o te enua nei.

¹¹ Te taikuia ra te “enua ou” ki te taiate tangata ou i runga nei i te enua tei akaari mai i to ratou kauraro puareinga anga ki te Patireia o te Atua. Ko te parataito pae vaerua ta te iti tangata o te Atua e mataora ra i teianei ka akatinamou meitakiia ki tona ngai tau i roto ‘i taua enua’ manea e aere maira, tei nooia e te tangata. (Ebe. 2:5) Akapeea tatou e riro ei ei tuanga no taua akatereanga ou o te au mea nei?

Teateamamao no te Ra Maata o Iehova

12. Eaa ra teianei ao ka poitirere ei te aere mai anga te ra o Iehova?

¹² Kua totou mai a Paulo raua ko Petero e ka aere mai te ra o Iehova “mei te keia” rai​—kare e kiteaia atu, e kare i tapapaia atu. (E tatau ia 1 Tesalonia 5:1, 2.) Ka poitirere katoa te au Kerititiano mou, te tapapa ua ra i taua ra ra te tae viviki mai anga o te reira. (Mata. 24:44) Inara, ka maata atu ta teianei ao ka kite mai i to te poitirere ua anga. Kua tata a Paulo e: “E tuatua oki te tangata [tei anga ke mei ia Iehova] e, e au, e kare e kino; ei reira ratou e rokoia uaia mai ei e te mate viviki, mei te vaine nui kia rokoia e te mamae ra; e kare rava ratou e ora.”​—1 Tesa. 5:3.

13. Akapeea tatou i te kopae anga kia kore e akavareia e te tuatua “e au, e kare e kino”?

¹³ Te riro ra te tuatua “e au, e kare e kino” ei pikikaa anga tei akauruia e te temoni; inara, kare te reira e akavare i te au tavini o Iehova. “Kare [kotou] i roto i te poiri,” i tata ei a Paulo, “ka rokoia mai ei kotou e taua rā ra mei te keia. E tamariki anake kotou no te mārama, e tamariki no te ao.” (1 Tesa. 5:4, 5) No reira kia noo ua tatou ki roto i te marama, kare e akavaitata atu ki te ao poiri o Satani. Kua tata a Petero e: “E aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra [te au orometua pikikaa i roto i te putuputuanga Kerititiano], e inga iora kotou i to kotou maroiroi anga.”​—2 Pete. 3:17.

14, 15. (a) Akapeea a Iehova i te akangateitei anga ia tatou? (e) Eaa te au tuatua akauruia ka akamanako meitaki tatou?

¹⁴ E akara ana e kare a Iehova e akakite ua maira kia tatou e ‘kia matakite tatou’ e kare ra i rave ana i tetai apinga. Inara, te akangateitei ra aia ia tatou na te oronga aroa mai anga i te au akamarama anga kua “kite ana [tatou] i teianei au mea” e eaa te ka tupu mai no te tuatau ki mua.

¹⁵ Ma te mii, kare tetai pae i kea mai ana me kore kua aviri mai i te au akamaaraara anga no  te vai ara ua anga. ‘E raungauru mataiti to matou akarongo ua anga i taua akamaaraara anga ra,’ i karanga ai ratou. Inara, kia akamanako ua rai taua aronga tataki tai ra e ko te tuatua anga i taua au tuatua ra, te manako ekoko tikai ra ratou ia Iehova e tana Tamaiti, kare ko te pupu tavini akono meitaki ua. E “tapapa [ua] atu rai,” i na Iehova ai. (Haba. 2:3) Pera katoa, kua akakite a Iesu e: “Kia matakite oki, kare kotou i kite i te ora e tae mai ei to kotou Atu.” (Mata. 24:42) Kua tata katoa a Petero e: “Mei te aa ra to kotou tu e tikaʼi i te tuatua tapu e te akono i te Atua; I te tatari anga, e te rapurapu anga atu, kia tae mai taua rā o te Atua ra.” (2  Pete. 3:11, 12) Kare rava te pupu tavini akono meitaki e tona Pupu Akaaere e manako kore ana no runga i taua au tuatua puapinga ra!

16. Eaa te tu ta tatou ka kopae, e no teaa ra?

¹⁶ E tika rai, ko “te tavini kino” ra tei tuatua e kare te Pu e tae vave mai. (Mata. 24:48) Ko taua tavini kino ra e tuanga aia no te pupu tei akatakaia mai i roto ia 2 Petero 3:3, 4. “Kia tae ki te au rā openga ra,” i tata ei a Petero, ‘ka kitea mai te aronga taitoito, te akono ra i to ratou uaorai anoano’ i te aviri anga i te aronga tei tapapa meitaki i te ra o Iehova. Ae, kare i akara mou ua ki runga i te au anoano o te Patireia, kua akamanako ua ratou ia ratou uaorai e i to ratou uaorai anoano noinoi. Auraka rava tatou e akatupu i taua manako kino ra e te akarongo kore! Inara, e akamanako tatou “i te akakoromaki maata o to tatou Atu ra, ko te ora ïa” na te tutu maroiroi anga i te Patireia e te akariro anga i te tangata ei pipi, e kare e apiapi maata atu i te tuatau ka tupu mai te au mea, na te Atua ko Iehova te reira angaanga.​—2 Pete. 3:15; e tatau ia Angaanga 1:6, 7.

Irinaki i te Atua Ora

17. Akapeea te au Kerititiano akarongo mou i te ariu anga ki te akamatakiteanga a Iesu kia akaruke ia Ierusalema, e no teaa ra?

¹⁷ I muri ake te tomo anga te pupu vaeau o Roma ia Iudea i te mataiti 66 T.N., kua akarongo te au Kerititiano akarongo mou ki ta Iesu akamatakiteanga kia akaruke i te oire o Ierusalema i te tuatau me tupu mai te reira. (Luka 21:20-23) Eaa ra ratou i akarongo viviki ei e te rave papu tikai anga i te reira? Kare ekoko e kua maara ia ratou ta Iesu akamatakiteanga. Papu tikai e te irinaki ra ratou e ka tupu mai teia au turanga ngata no ta ratou ikianga, mei ta Karaiti rai i akamatakite mai. Inara i taua taime rai, kua kite ratou e kare rava a Iehova e akaruke i tona aronga tiratiratu.​—Sala. 55:22.

18. Akapeea te au tuatua a Iesu tei kiteaia i roto ia Luka 21:25-28 i te akakeu anga i toou manako no te tumatetenga maata te aere maira?

¹⁸ E mea tau kia irinaki pu tikai tatou ki runga ia Iehova, no te mea koia anake ua to tatou ora me tupu mai te tumatetenga maata rava ki teia akatereanga o te tuatua enua o te  tangata ravarai. I tetai tuatau i muri ake te akamataanga te tumatetenga maata, i mua ake ka tuku mai ei a Iehova i tana akavaanga ki runga i te toenga o teianei ao, ka ‘taravaiia te ngakau tangata i te mataku, e te manako ua anga i taua au mea ra i te vaitata anga mai i te ao nei.’ Inara, te mataku ruketekete ua ra te au enemi o te Atua, kare ra te au tavini tiratiratu o Iehova e mataku. I tetai tua, ka mataora ratou no te mea kua kite ratou e te vaitata maira to ratou ora.​—E tatau ia Luka 21:25-28.

19. Eaa te ka uriuriia i roto i te atikara ka aru mai?

¹⁹ Ae, e tuatau mataora tikai te tuatau ki mua te tapapa maira i te aronga tei akatakake mai mei teianei ao e tona “au tumu o te enua”! Inara, mei ta te atikara e aru maira ka akamarama mai, me te inangaro ra tatou i te ora, e maata atu ta tatou ka rave i te kopae ua anga i te kino. Ka anoanoia tatou kia akatupu i te au tu te akamareka ra ia Iehova e te rave anga i te au angaanga ka ariki mai aia.​—2 Pete. 3:11.

Ka Rauka Ainei ia Koe te Akataka?

• Eaa te akatutuia maira . . .

e te “rangi e te enua” o teia tuatau?

e “te au tumu o te enua”?

e te “rangi ou e te enua ou”?

• Eaa tatou ka irinaki pu tikai ei ki te Atua?

[Au Uianga Apii]

[Tutu i te kapi 5]

Akapeea koe te ‘paruru anga i toou ngakau’ e te vai takake anga mei teianei ao?

[Tutu i te kapi 6]

Akapeea tatou me akaari e te manako ra tatou ‘i te akakoromaki maata o to tatou Atu ei ora’?