Saida mak Maromak Jeová nia loron sei hatudu
Saida mak Maromak Jeová nia loron sei hatudu
“Naʼi [Jeová] nia loron sei toʼo mai hanesan ahu-naʼin ida; . . . no ahi sei han lakon rai no buat hotu neʼebé iha nia.”—2 PED 3:10.
1, 2. (a) Oinsá mak mundu aat neʼe sei lakon? (b) Ita sei estuda pergunta saida deʼit?
MUNDU aat neʼe fiar lia-bosok ida neʼebé dehan katak ema rasik bele ukun mundu neʼe no la presiza Maromak Jeová. (Sal 2:2, 3) Buat naran deʼit neʼebé tuir lia-bosok bele tahan ba nafatin ka lae? Lae duni! Maski nuneʼe, ita hatene katak Satanás nia mundu sei la halakon nia an rasik, tanba Maromak mak sei halakon mundu neʼe iha ninia tempu neʼebé loos no tuir ninia dalan. Buat neʼebé Maromak sei halo ba mundu aat neʼe sei hatudu ninia justisa no ninia domin.—Sal 92:7; Prov 2:21, 22.
2 Apóstolu Pedro hatete: “Naʼi [Jeová] nia loron sei toʼo mai hanesan ahu-naʼin ida; iha loron neʼebá lalehan sira sei lakon ho tarutu makaʼas, [“no buat hotu iha nia sei lakon tanba manas”, MF] no ahi sei han lakon rai no buat hotu neʼebé iha nia.” (2 Ped 3:10) Saida mak “lalehan” no “rai” neʼe? Saida mak “buat hotu” neʼebé sei lakon? No Pedro nia liafuan “rai no buat hotu neʼebé iha nia” sei “lakon” katak sá? Hatene resposta ba pergunta sira-neʼe sei ajuda ita atu sai prontu ba buat neʼebé sei akontese iha Maromak nia loron neʼebé besik ona atu mai.
Lalehan no rai neʼebé sei lakon
3. Saida mak “lalehan sira” neʼebé temi iha 2 Pedro 3:10? Oinsá mak sira sei lakon?
3 Kuandu Bíblia uza liafuan “lalehan”, dala barak ida-neʼe reprezenta ukun-naʼin sira, neʼebé foti sira-nia an aas liu fali povu neʼebé sira ukun. (Isa 14:13, 14; Apok 21:1, 2) Tan neʼe, “lalehan sira [neʼebé] sei lakon” reprezenta governu sira neʼebé ukun iha mundu neʼebé dook husi Maromak. Liafuan “sira sei lakon ho tarutu makaʼas” karik hatudu katak Maromak sei halakon lalais governu sira-neʼe.
4. Saida mak “rai”? Oinsá mak ida-neʼe sei lakon?
4 “Rai” reprezenta ema hotu iha mundu neʼe neʼebé ketak husi Maromak. Iha Noé nia tempu, mundu mós nakonu ho ema hanesan neʼe, tan neʼe Maromak tesi lia hodi halakon sira liuhusi Rai-Nabeen. “Hodi Maromak nia liafuan neʼe, lalehan no rai ohin neʼe nian marka tiha ba ahi, toʼo loron justisa nian no tempu neʼebé Naʼi sei halo lakon ema aat sira.” (2 Ped 3:7) Maski Rai-Nabeen halakon ema aat hotu dala ida deʼit, maibé durante tempu “terus makaʼas”, Maromak sei la halakon buat hotu dala ida deʼit. (Apok 7:14) Terus boot sei komesa bainhira Maromak book ukun-naʼin sira iha mundu neʼe atu halakon “Babilónia Boot”, hodi hatudu oinsá nia hakribi relijiaun falsu neʼebé hanesan feto-aat. (Apok 17:5, 16; 18:8) Tuirmai, iha parte ikus iha terus boot neʼe, Maromak Jeová rasik sei halakon buat aat seluk iha Satanás nia mundu liuhusi funu Armajedón.—Apok 16:14, 16; 19:19-21.
“Buat hotu . . . sei lakon”
5. “Buat hotu” inklui saida?
5 Saida mak “buat hotu” neʼebé “sei lakon”? Liafuan “buat hotu” neʼebé Pedro temi, neʼe mak kona-ba buat sira neʼebé hamosu hahalok aat no hakarak aat neʼebé mundu neʼe hatudu. “Buat hotu” neʼe inklui “mundu nia espíritu”, neʼebé “book an iha ema ulun-toos sira-nia laran”. (1 Kor 2:12; lee Efeso 2:1-3.) Satanás nia mundu nakonu ho espíritu neʼe. No ida-neʼe book ema atu hanoin, atu halo planu, atu koʼalia, no atu halo hahalok neʼebé haleno Satanás neʼebé foti-an no ‘ida neʼebé ukun mundu neʼe’.
6. Mundu nia espíritu book ema atu hatudu hahalok saida deʼit?
6 Tan neʼe, sira neʼebé halo tuir mundu nia espíritu, maski sira hatene ka la hatene, sira haleno Satanás nia hahalok no hanoin. Nuneʼe sira halo tuir deʼit buat neʼebé sira hakarak no la hanoin kona-ba Maromak nia hakarak. Sira iha hahalok foti-an no hanoin deʼit sira-nia an, sira haburas hahalok kontra hasoru sira neʼebé iha kbiit nuʼudar ulun, no mós sira husik deʼit “hakarak aat isin nian, hakarak aat matan nian” mak domina sira.—Lee 1 Joao 2:15-17. *
7. Tanbasá mak ita presiza “proteje [ita-nia] laran”?
7 Nuneʼe, importante tebes atu “proteje [ita-nia] laran”! Ita bele halo ida-neʼe hodi halo desizaun neʼebé matenek tuir Maromak nia haree kuandu ita hili kolega, hili livru, halimar, no haree sítiu iha internét. (Prov 4:23) Apóstolu Paulo hatete: “Haree bá katak ema ida la halo imi sai atan hodi lohi imi ho liafuan neʼebé mai husi matenek ema nian, no husi neon sira neʼebé ukun mundu neʼe, laʼós husi Kristu.” (Kol 2:8) Konsellu neʼe importante liuliu tanba Maromak Jeová nia loron besik ona atu mai. Loron neʼe sei halo nabeen ‘buat aat hotu’ iha Satanás nia mundu, neʼe katak sira la bele tahan Maromak nia hirus. Ida-neʼe halo ita hanoin-hetan liafuan iha Malaquias 4:1 neʼebé hatete: “Loron neʼebé lakan hanesan ahi fornu nian sei mai, no ema hotu neʼebé foti-an no ema hotu neʼebé halo buat aat sei sai hanesan duʼut maran. No loron neʼebé sei mai sei han sira hotu.”
“Rai no buat hotu neʼebé iha nia” sei lakon
8. Oinsá mak “rai no buat hotu neʼebé iha nia” sei “lakon”?
8 Pedro nia liafuan “rai no buat hotu neʼebé iha nia” sei “lakon” katak sá? Pedro nia liafuan neʼe katak durante terus boot Maromak Jeová sei halakon Satanás nia mundu neʼebé kontra Nia no Ninia Reinu. Hodi koʼalia kona-ba tempu neʼe, Isaías 26:21 hatete: “Maromak Jeová sei sai husi ninia fatin atu tesi lia ba ema neʼebé moris iha rai neʼe neʼebé kontra nia, no rai sei nakonu ho raan neʼebé fakar no rai la bele tan atu subar ema neʼebé mate tanba oho.”
9. (a) Saida mak ita labele simu? Tanbasá? (b) Saida mak ita tenke haburas? Tanbasá?
9 Durante Maromak Jeová nia loron, sira neʼebé haleno mundu no ninia espíritu neʼebé aat sei hatudu sai sira-nia hahalok loloos, toʼo sira mós oho malu. Karik halimar sira neʼebé nakonu ho violénsia no neʼebé ema barak gosta, prepara sira-nia hanoin ba tempu neʼebé ema ida-idak sei foti liman no “sei loloos hasoru ninia maluk”. (Zac 14:13) Tan neʼe, importante tebes atu ita la simu buat naran deʼit, hanesan filme, livru, video game, no buat seluk tan neʼebé bele book ita-nia laran atu halo hahalok neʼebé Maromak odi, hanesan foti-an no hadomi violénsia! (2 Sam 22:28; Sal 11:5) Nuneʼe, mai ita haburas hahalok neʼebé Maromak nia espíritu santu lori mai, tanba hahalok sira-neʼe sei ajuda ita atu bele hamriik metin iha Maromak Jeová nia loron.—Gal 5:22, 23.
“Lalehan foun no rai foun”
10, 11. Saida mak “lalehan foun” no “rai foun”?
10 Lee 2 Pedro 3:13. “Lalehan foun” mak Maromak nia Reinu iha lalehan, neʼebé harii tiha iha tinan 1914 kuandu ‘jentiu sira-nia otas hotu ona’. (Lc 21:24) Iha Reinu ka governu neʼe, Kristu Jesus mak ukun nuʼudar liurai hamutuk ho ninia maluk naʼin-144.000, sira barak simu ona sira-nia kolen iha lalehan. Iha livru Apokalipse koʼalia kona-ba sira nuʼudar “sidade santa, Jeruzalein foun, tun mai husi Maromak iha lalehan, furak hanesan noiva neʼebé hatais tiha ba nia laʼen”. (Apok 21:1, 2, 22-24) Iha Izraél antigu, ukun-naʼin sira ukun husi sidade Jeruzalein, nuneʼe mós Jeruzalein Foun no ninia Noivu mak nuʼudar governu neʼebé sei ukun mundu foun. Jeruzalein Foun neʼe sei ‘tun mai husi lalehan’ hodi tau matan ba rai.
11 “Rai foun” reprezenta ema iha mundu foun neʼebé hatudu ona katak sira hakruʼuk an ba Maromak nia Reinu. Maski ohin loron Maromak nia povu haksolok ho buat diʼak barak hanesan iha dame no unidade, maibé iha “mundu neʼebé atu mai” sira sei haksolok liután ho buat sira-neʼe. (Ebr 2:5) Oinsá mak ita bele sai parte iha “mundu neʼebé atu mai”?
Prontu ba Maromak Jeová nia loron boot
12. Tanbasá mak ema seluk sei hakfodak kuandu Maromak Jeová nia loron mai?
12 Paulo no mós Pedro hatete nanis katak Maromak nia loron sei mai “hanesan ahu-naʼin ida” ka naʼok-teen iha kalan. (Lee 1 Tesalonika 5:1, 2.) Ema kristaun loos neʼebé hein hela loron neʼe mós sei hakfodak tanba loron neʼe sei mai lalais. (Mt 24:44) Sá tan ema seluk neʼebé la hein loron neʼe, sira sei hakfodak liután. Paulo hatete: “Wainhira ema [neʼebé ketak husi Maromak Jeová] dehan: ‘Loron sira-neʼe hakmatek no iha dame’ mak tekiteki buat aat sira mosu, hanesan feto neʼebé atu tuur ahi; no ema ida la bele halai husi nia.”—1 Tes 5:3.
13. Saida mak ajuda ita atu la husik ema nia liafuan “hakmatek no iha dame” atu lohi ita?
13 Tuir loloos, liafuan “hakmatek no iha dame” neʼebé ema sei hakilar mak Diabu nia lia-bosok ida tan, maibé ida-neʼe sei la lohi Maromak Jeová nia atan sira. Paulo hatete: “Imi la moris iha nakukun laran, . . . atu loron neʼe toman imi hanesan naʼok-teen ida. Lae, imi hotu naroman nia oan no loron nia oan.” (1 Tes 5:4, 5) Nuneʼe, mai ita hela iha naroman, dook husi Satanás nia mundu neʼebé nakukun. Pedro hatete: “Imi neʼebé hatene ona buat ida-neʼe, matan-moris bá atu imi-nia laran-metin la bele namlele, hafoin husik ema aat nia hanorin laloos neʼe lori lakon imi.”—2 Ped 3:17.
14, 15. (a) Oinsá mak Maromak Jeová hafolin ita? (b) Avizu saida mak ita tenke hafolin nafatin?
14 Maromak Jeová la hatete deʼit atu ita “matan-moris”, maibé nia mós hafolin ita hodi ho laran-diʼak ajuda ita atu hatene nanis buat balu neʼebé sei akontese iha futuru.
15 Triste katak ema kristaun balu ladún hafolin avizu atu matan-moris nafatin. Karik sira hatete: ‘Ba tinan barak ona ami rona avizu neʼebé hanesan.’ Maibé, ema sira-neʼe tenke hanoin-hetan katak hodi hanoin hanesan neʼe, sira laʼós deʼit duvida kona-ba grupu atan laran-metin no matenek, maibé sira mós duvida kona-ba Maromak Jeová no ninia Oan. Maromak Jeová hatete: “Hein nafatin bá.” (Hab 2:3) Nuneʼe mós, Jesus hatete: “Neʼe duni, imi matan-moris bá . . . basá imi la hatene iha loron neʼebé mak imi-nia Naʼi hiʼit an mai.” (Mt 24:42) Liután neʼe, Pedro hatete: “Imi-nia moris no imi-nia hamtaʼuk Maromak sei sai oinsá loos, hodi hein no halo mosu lalais mai Maromak nia loron nia hiʼit an mai?” (2 Ped 3:11, 12) Atan laran-metin no matenek no ninia Grupu Administradór hafolin duni liafuan sira-neʼe hodi nafatin hein ho matan-moris!
16. Ita presiza hasees an husi hahalok saida? Tanbasá?
16 Tuir loloos, ‘atan aat’ mak dehan katak Naʼi sei kleur atu mai. (Mt 24:48) Atan aat neʼe mak parte husi grupu ema neʼebé temi iha 2 Pedro 3:3, 4. Pedro hatete katak “iha loron ikus” sei mosu ema “neʼebé moris deʼit tuir sira-nia isin nia laran-aat”, no sira sei koʼalia aat ba sira neʼebé hein nafatin Maromak Jeová nia loron. Sin, duké tau uluk Maromak nia Reinu iha sira-nia moris, ema aat sira-neʼe hanoin deʼit sira-nia an no sira-nia hakarak aat. Mai ita nunka haburas hahalok aat hanesan neʼe neʼebé perigu! Maibé, mai ita “haree ita Naʼi nia laran-luak nuʼudar maksoin” hodi badinas nafatin iha serbisu haklaken no hanorin no hodi la hanoin demais kona-ba bainhira mak buat neʼe hotu sei mosu, tanba tuir loloos Maromak Jeová deʼit mak hatene kona-ba oras no tempu.—2 Ped 3:15; lee Apostolu 1:6, 7.
Tau fiar ba Maromak salvasaun nian
17. Saida mak ema kristaun neʼebé laran-metin halo hodi tuir Jesus nia avizu? Tanbasá?
17 Iha tinan 66, kuandu tropa Roma tama iha Judeia, ema kristaun sira neʼebé laran-metin halo tuir Jesus nia avizu atu halai sai kedas husi sidade Jeruzalein. (Lc 21:20-23) Tansá mak sira halo tuir no sai kedas? Ita bele fiar katak sira hanoin nafatin kona-ba Jesus nia avizu. Maski sira hatene katak sira sei hasoru susar tanba foti desizaun ida-neʼe, hanesan Kristu hatete nanis ona, maibé sira mós hatene katak Maromak Jeová nunka husik ninia atan sira neʼebé laran-metin ba nia.—Sal 55:22.
18. Oinsá mak Jesus nia liafuan iha Lucas 21:25-28 kona-ba terus boot neʼebé atu mai, book ita?
18 Ita mós tenke tau fiar tomak ba Maromak Jeová, tanba nia deʼit mak bele salva ita kuandu mundu aat neʼe hasoru terus boot neʼebé seidauk akontese uluk. Bainhira terus boot hahú ona maibé antes Maromak Jeová tesi lia ba mundu tomak, ema “sei mate tanba deʼit taʼuk, hodi hanoin saida mak sei mosu iha raiklaran”. Maski Maromak nia inimigu sei taʼuk tebetebes, maibé Maromak Jeová nia atan sira sei la taʼuk buat ida. Sira sei haksolok tanba sira hatene katak sira-nia salvasaun besik ona.—Lee Lucas 21:25-28.
19. Saida mak ita sei estuda iha lisaun tuirmai?
19 Sin, sira neʼebé la halo parte iha mundu aat neʼe no la halo tuir “buat hotu” iha nia, sei haksolok tanba sira iha futuru neʼebé kapás! Maibé, hanesan lisaun tuirmai sei esplika, atu ita bele hetan moris ita presiza halo buat seluk tan, laʼós deʼit hasees an husi buat neʼebé aat. Ita presiza haburas hahalok neʼebé halo Maromak Jeová kontente no halo buat neʼebé nia hakarak.—2 Ped 3:11.
[Nota–rodapé]
^ par. 6 Atu hatene liután oinsá mak mundu nia espíritu book ema, haree livru Bertukar Pikiran mengenai Ayat-Ayat Alkitab, pájina 312-315.
Ita bele hatán?
• ‘Lalehan no rai’ ohin neʼe nian reprezenta saida?
“Buat hotu” reprezenta saida?
“Lalehan foun no rai foun” reprezenta saida?
• Tanbasá mak ita presiza tau fiar tomak ba Maromak?
[Pergunta estudu nian]
[Dezeñu iha pájina 5]
Oinsá mak Ita bele ‘proteje Ita-nia laran’ no la halo parte iha mundu aat neʼe?
[Dezeñu iha pájina 6]
Oinsá mak ita hatudu katak ita “haree ita Naʼi nia laran-luak nuʼudar maksoin”?