¿Tuku natasiya kxkilhtamaku Jehová?
¿Tuku natasiya kxkilhtamaku Jehová?
«Xkilhtamaku nkimPuchinakan [Jehová] akxni xliminat, namin xtachuna nkgalhana [...]. Ntiyat chu xtatlawkan chixkuwin, paks [«natakatsi», NM].» (2 PEDRO 3:10)
1, 2. 1) ¿Tiku namalakgsputu xalixkajni kakilhtamaku niku lamaw? 2) ¿Tukuya takgalhskinin naʼakxilhaw?
LAKCHIXKUWIN lakpuwankgo pi tlan namapakgsinankgo kKatiyatni chu ni nakapulalin Jehová, pero uma lu lanka takgsanin (Salmo 2:2, 3). ¿Tlan xliputum kilhtamaku natawila tuku kaj ktakgsanin takilhtinit? Ni. Pero ni nakgalhiyaw asta akxni xkakilhtamaku Satanás xakstu nalamalakgsputu. Wa Jehová tiku namalakgsputu. Chu namalakgsputu akxni lakkaxwilinit, akxni chuna natlawa nalimasiya pi lakatitum tuku tlawa chu xapaxkina (Salmo 92:7; Proverbios 2:21, 22).
2 Apóstol Pedro wa: «Xkilhtamaku nkimPuchinakan akxni xliminat, namin xtachuna nkgalhana nkatsisni, akxni nalakgsputa akgapun, lipikua namakawan nalakgpankga, chu ntu litustuka ntiyat, napasay, nalakgsputa. Wan ntiyat chu xtatlawkan chixkuwin, paks [«natakatsi», NM]» (2 Pedro 3:10). ¿Tuku kilhchanima «akgapun» chu «ntiyat» nema lichuwinan uma texto? ¿Tuku kilhchanima «ntu litustuka ntiyat» nema «nalakgsputa»? ¿Tuku wamputun tuku lichuwinalh Pedro pi «ntiyat chu xtatlawkan chixkuwin, paks [«natakatsi», NM]»? Kaputsaw xtakgalhtin umakgolh takgalhskinin xlakata nakinkamakgtayayan natayaniyaw tuku lu lipekua nala nema aku mima.
Akgapun chu katiyatni nema nakamasputukan
3. ¿Tuku kilhchanima «akgapun» nema lichuwinan 2 Pedro 3:10, chu la nakamalakgsputukan?
3 Minkilhtamaku Biblia limapakuwi «akgapun» mapakgsinanin xlakata kamapakgsikgo amakgapitsi latamanin (Isaías 14:13, 14; Apocalipsis 21:1, 2). «Nalakgsputa akgapun», kilhchanima mapakgsinanin nema tamakgatlinikgonit Dios. ¿Tuku xlakata tawan pi «lipikua namakawan nalakgpankga»? Max xlakata lakapara nakamalakgsputukan.
4. ¿Tuku kilhchanima «ntiyat» chu la namalakgsputukan?
4 «Tiyat» kilhchanima latamanin tiku ni skujnikgo Dios. Chuna la lamaw uku xtachuna la akxni xlama Noé, xlamakgolh tiku lixkajni xlikatsikgo wa xlakata Dios kalimalakgsputulh Munkaklat. «Akgapun xawa katiyatna [...] aya lipulhkakanit pi wa lhkuyat nalimalakgsputukan. [...] Yama kilhtamaku Dios natatlaway kuinta xlipaks wanti lixkajnit tilatamakgolh lakimpi namapatinikgokan.» (2 Pedro 3:7.) Akxni timilh Munkaklat kaj lakapara kamalakgsputuka tiku lixkajni xlikatsikgo pero lisputni nema aku namakaminkan pulakatunu la Dios lakkaxwilinit, akxni chuna nalatilha wanikan «ntlanka tapatin» (Apocalipsis 7:14). Akxni Dios nalimin lisputni, pulana natlawa pi políticos namasputukgo «xatlanka Babilonia» nema Dios ni akxilhputun, kilhchanima putum takanajla nema tamalakgxtumikgonit tuku xaxlikana chu ni xaxlikana takanajla. (Apocalipsis 17:5, 16; 18:8). Xaʼawatiya nema Jehová natlawa kxguerra nema wanikan Armagedón, namalakgsputu tuku naʼakgataxtu kxkakilhtamaku Satanás (Apocalipsis 16:14, 16; 19:19-21).
«Ntu litustuka ntiyat, [...] nalakgsputa»
5. ¿Tuku wamputun «ntu litustuka ntiyat»?
5 ¿Tuku kilhchanima «ntu litustuka ntiyat», nema [...] «nalakgsputa»? «Ntu litustuka ntiyat» nema lichuwinan Pedro kilhchanima wantuku tlawa pi tiku xalak kakilhtamaku nalikatsikgo, nalakpuwanankgo chu natlawakgo tuku ni lakgati Dios. «Ntu litustuka ntiyat» na kilhchanima «ntalakapastakna ntu xala katuxawat» nema «skujma kxnakukan lakgachixkuwimakgananin» o tiku ni kgalhakgaxmatnankgo (1 Corintios 2:12; kalikgalhtawakga Efesios 2:1-3). Uma talakapastakni na wanikan «un», xlakata talakgatuminit kkakilhtamaku, nema mapakgsi Akgskgawini. Kamalakpuwani la xla lakgati, kamalakpuwani la nalakkaxwilikgo tuku natlawakgo, kamachuwini chu kamatlawi chuna la lakpuwan «xapuxku xala kaʼunin», wa Satanás tiku tlanka makgkatsikan chu ni kgalhakgaxmatnan.
6. ¿La litasiya pi latamanin kgalhikgo xtalakapastakni kakilhtamaku?
6 Max katsikgo o ni katsikgo latamanin tiku kapasanit xtalakapastakni kkakilhtamaku mastakgo talakaskin pi Satanás naʼakgchipa xtalakapastaknikan chu xnakujkan o xʼanimajkan wa xlakata lakpuwanankgo chu likatsikgo chuna la Satanás. Lilatamakgo chuna la lakaskinkgo, chu ni lakpuwankgo la akxilha Dios tuku tlawamakgolh. Putum kilhtamaku tlanka kamakgkatsikan, xakstukan kapaxkikan, ni kgalhakgaxmatkgo mapakgsinanin chu tlawakgo wantuku «xlimakgapaxuwakgolh xtiyatliwakan [...], lakgatilakankgo lhuwa xkgalhikgolh wantu luwa tlan tasiyuy» (kalikgalhtawakga 1 Juan 2:15-17, Hua Xasasti Talaccaxlan 1999). *
7. ¿Tuku xlakata xlakaskinka nakuentajtlawayaw kinakujkan?
7 ¡Lu xlakaskinka namakgantaxtiyaw uma tastakyaw: «Nakuentajtlawaya mi naku»! (Proverbios 4:23.) Wa xlakata xlakaskinka nalimaklakaskinaw liskgalala nema kinkamaxkiyan Dios, akxni nalaksakaw tiku nakatalalinaw, tuku nalilakgastananaw chu tuku nalikgalhtawakgayaw, o akxni namaklakaskinaw Internet. Pablo kinkawaniyan: «Kuintaj kakatlawakantit mpi ti ni nakaliʼakgskgawiyan wantu ni kgalhiy xlakgasi ntachuwin maski xla tastakat, sampi wa yuma nkaj xtapalaksaknikan nchixkuwin, [...] wa lantla nkaj xachunata ntalakapastakna xala katuxawat, wampi ni wa lantla xtamasiyun nCristo» (Colosenses 2:8). Chu la uku tlakg xlakaskinka namakgantaxtiyaw uma tastakyaw xlakata xkilhtamaku Jehová lakatsu wi, ama kilhtamaku «napasay» chu namalakgsputu «ntu litustuka ntiyat» uma wamputun xkakilhtamaku Satanás. Xkakilhtamaku Satanás nila katitayanilh xtasitsi Jehová. Malaquías 4:1 na wa lichuwinan: «Namin kilhtamaku nema lhkuma xtachuna akgtum horno, chu putum tiku lanka kamakgkatsikan chu tiku tlawakgo tuku nitlan nalitaxtukgo la xaskakni tuwan nema lakapara lhku. Chu uma kilhtamaku nema mima xlikana nakamalakgsputu».
«Ntiyat chu xtatlawkan chixkuwin, paks» natakatsi
8. ¿La «natakatsi» xtatlaw katiyatni?
8 ¿Tuku xwamputun Pedro akxni wa «ntiyat chu xtatlawkan chixkuwin, paks [«natakatsi», NM]»? Wantuku Pedro xwamputun wa pi akxni Dios nalimin lanka tapatin natakatsi tuku nitlan tlawamakgolh latamanin. Jehová liwana namasiya pi xkakilhtamaku Akgskgawini lakatayama Dios chu xTamapakgsin wa xlakata nakamalakgsputu. Isaías 26:21 lichuwinan la Jehová nakamalakgsputu: «Jehová taxtuma kxputawilh xlakata nakamalakgaxokge latamanin xalak katiyatni tuku nitlan tlawanikgonit, chu katiyatni nalimasiya kgalhni nema stajtamakganit chu nialh katimatsekgli tiku anta kamakgnikanit».
9. 1) ¿Tuku ni kilitlawatkan chu tuku xlakata? 2) ¿Tuku nakatsiniyaw chu tuku xlakata?
9 Akxni namin xkilhtamaku Jehová, liwana natasiya tiku mastakgonit talakaskin nakapasa xalixkajni xtalakapastakni kakilhtamaku asta chatunu chatunu nalamakgnikgo. Max xlakata lilakgastanamakgolh tuku nitlan latlawani, kamasiyanima tuku natlawakgo akxni nachan kilhtamaku xlakata «chatunu chatunu [...] namakgni xcompañero» (Zacarías 14:13). Wa xlakata lu xlakaskinka pi ni naʼakxilhaw películas, libros, videojuegos o atanu tuku natlawa pi lankajwa nalikatsiyaw, napaxkiyaw tuku lixkajni o atanu tayat nema Dios ni akxilhputun (2 Samuel 22:28; Salmo 11:5). Nachuna, nalilatamayaw tuku kinkamatlawiyan xʼespíritu santo Dios, uma natlawa pi nakatsiniyaw tayat nema nakinkamakgtayayan nalakgtaxtuyaw akxni namin xtasitsi Jehová, la akxni wi tuku mapukan chu nitu lani (Gálatas 5:22, 23).
«Xasasti akgapun chu xasasti tiyat»
10, 11. ¿Tuku wamputun «xasasti akgapun» chu «xasasti tiyat»?
10(Kalikgalhtawakga 2 Pedro 3:13.) Pero ¿tuku kilhchanima «xasasti akgapun»? Kilhchanima xTamapakgsin Dios nema tsukulh mapakgsinan kʼakgapun kata 1914 akxni sputli «kilhtamaku nema lilhkawilikanit naciones» (Lucas 21:24, NM). Uma Tamapakgsin pulalin Jesús chu 144,000 tiku natamapakgsinankgo kʼakgapun, umakgolh nialh xlhuwakan lamakgolh kkatiyatni. Libro xalak Biblia nema wanikan Apocalipsis kalimapakuwi: «[«Kachikin», NM] xasantujlani, wa Xasasti Jerusalén, wa cha ntu xtaktama nkakgapun kxmakan Dios, tlan xkaxya xtachuna nchatum ntsumat natatawila xlitatawilat» (Apocalipsis 21:1, 2, 22-24). Israel xala makgasa xwi xpumapakgsin kJerusalén. Kxasasti kakilhtamaku, namapakgsinankgo Jesús chu xlitatawilat, Xasasti Jerusalén. Uma kachikin “natakta kʼakgapun” uma wamputun pi natawilayacha kʼakgapun chu namapakgsinan unu kKatiyatni.
11 «Xasasti tiyat» kilhchanima latamanin tiku nalatamakgo chu xatapaxuwan natapakgsinikgo xTamapakgsin Dios. Tlan nawanaw pi xlakata kintakanajlakan la uku, xlakskujnin Dios lamawa kparaíso xaʼespiritual. Pero kilhtamaku nema aku mima uma paraíso natawila: «xasasti katuxawat ntu namin» uma wamputun xasasti kakilhtamaku (Hebreos 2:5). ¿Tuku kilitlawatkan xlakata tlan anta nalatamayaw?
Katakaxwi xlakata natayaniyaw kxalanka xkilhtamaku Jehová
12. ¿Tuku xlakata latamanin xalak kakilhtamaku kaks nalilakawankgo akxni namin xkilhtamaku Jehová?
12 Pablo chu Pedro wankgo pi xkilhtamaku Jehová namin «xtachuna nkgalhana» uma wamputun pi namin akxni ni katsiyaw (kalikgalhtawakga 1 Tesalonicenses 5:1, 2). Asta xaxlikana kstalaninanin Cristo tiku kgalhkgalhimakgolh uma kilhtamaku kaks nalilakawankgo xlakata kaj lakapara nachin (Mateo 24:44). Pero latamanin tiku ni skujnikgo Jehová tlakg nalipekuankgo. Apóstol Pablo wa: «Akxni nawankgoy: Anan ntakaksni [o tlan wilaw], nitu ntamakpuwan anan, pus akxni lakapala nalakgchinkgoy ntalakgsputni, xtachuna nkaj xalan min xtakatsanajwat nchatum mpuskat natawila kskgata; na ni katilakgtaxtukgolhku» (1 Tesalonicenses 5:3).
13. ¿La tlan natlawayaw xlakata ni nakinkaʼakgskgawiyan latamanin akxni nawankgo pi «anan ntakaksni, nitu ntamakpuwan»?
13 Akxni nawankgo «anan ntakaksni, nitu ntamakpuwan anan» uma akgtum takgsanin nema namalakgatumikgo demonios; pero ni katikaliʼakgskgawika xlakskujni Jehová. Apóstol Pablo wa: «Wixin natalanin, ni kapakglhtuta [o kapukswa] lapatit mpala kaj ni katikatsitit nakalakgchinan xtachuna nkgalhana akxni yama nkilhtamaku. Xampi paks xala kaxkgakgana wixin, chu na wa xala kakuwini wixin» (1 Tesalonicenses 5:4, 5). ¡Lu xlakaskinka natawilayaw kxkachikin Jehová chu ni natawilayaw kxkakilhtamaku Satanás niku kapukswa! Apóstol Pedro kamakatsinilh kstalaninanin Cristo pi xʼamakgolh laktaxtukgo nixaxlikana makgalhtawakgananin, uma tuku wa: «Wixin, xatapaxkin, mpi alitastakyawanitantitta, kuintaj kakalitlawakantit, ni akxtum titaliʼakgtsankgakgoyatit xliʼakgtsankgankan nkalawaj chixkuwin mpala naliʼakgchakgxatit ntu ntliwakglh wilanitit kmintakanajlakan» (2 Pedro 3:17).
14, 15. 1) ¿Tuku lanka talakgalhaman kinkamaxkinitan Jehová? 2) ¿Tuku kinkamalakapastakayan kBiblia nema lu kilikuentajtlawatkan?
14 Kaʼakxilhwi pi Jehová ni kaj kinkawaniyan: «Kuintaj kakalitlawakantit» uma na wamputun «skgalalh katawilatit» (El libro del Pueblo de Dios). Wata, kinkamaxkiyan lanka talakgalhaman xlakata “kinkalitastakyawaman” na wamputun kinkawaniyan tuku nala kkilhtamaku nema aku mima.
15 Lu nitlan, pero akxni kcongregación lichuwinankan pi lu xlakaskinka skgalalh natawilayaw, makgapitsi ni kuentajtlawakgo chu ni kanajlakgo. Wilakgolh tiku max lakpuwankgo: «Makgasa kkgaxmatma tuku wankan pi namin». Pero xlikatsitkan pi akxni chuna wankgo wa lakatayamakgolh Jehová chu xKgawasa, ni kajwatiya lakatayamakgolh skujni xalipaw. Xlikana, wa Jehová tiku kinkawaniyan chatunu chatunu akinin: «Skgalalh katawila» (Habacuc 2:3). Nachuna Jesús kinkawaniyan: «Skgalalh katawilatit; xampi ni katsiyatit ntu hora, akxni namin mimPuchinakan» (Mateo 24:42). Nachuna apóstol Pedro kinkawaniyan: «¿Ti nchixkuwin miliwanatkan, wa lantla xasantujlani mililatamatkan nakgalhiyatit, chu xkakninanin Dios nawanatit? Wixin nti nkgalhkgalhitipatit namin xkilhtamaku Dios» (2 Pedro 3:11, 12). Skujni xatalipaw chu xaskgalala chu Lakgkgolotsin tiku Pulalinkgo xkachikin Dios putum kilhtamaku lu xlakaskinka akxilhkgo tuku wankan pi nala.
16. ¿Tukuya tapuwan ni kilikgalhitkan chu tuku xlakata?
16 Wantiku lakpuwan pi kiMalanakan tamakgapalima, wa «nitlan skujni» (Mateo 24:48). Chu uma nitlan skujni litaxtu wantiku talichuwinan 2 Pedro 3:3, 4: «Akxni xlikgatsputnita nawan nkatuxawat, nalakatakinankgoy nkgalhkgamananin, nalilatamakgoy wa lantlata [...], nitlan xtalakapastaknakan». Umakgolh kalilitsinkgo tiku kgalhakgaxmatkgo Jehová xlakata xlakan skgalalh wilakgolh akxni Jehová nalimin lisputni. Tiku lilitsinankgo ni lichuwinankgo xTamapakgsin Dios, wata tlawakgo tuku xlakan lipaxuwakgo chu xakstukan kapaxkikan. Akinin, nikxni chuna nalakpuwanaw, komo chuna natlawayaw ¡nachuna nakinkaʼakgspulayan tuku nakaʼakgspula! Wata kaʼakxilhwi: «Lantla makgapalama xliminat nkimPuchinakan, kaliʼakgatakgs[wi] mpi kaj xpalakata xliʼakgaputaxtunkan amakgapitsin» chu kalichuwinaw Dios chu kakamakgalhtawakgaw amakgapitsin. Nikxni nalakpuwanaw pi kilikatsitkan tukuya kilhtamaku Jehová nalimin lisputni, xlakata kajwatiya Jehová lakgchan nawan tukuya kilhtamaku nalimin (2 Pedro 3:15; kalikgalhtawakga Hechos 1:6, 7).
Kalipawaw Dios tiku nakinkalakgmaxtuyan
17. ¿La tlawakgolh kstalaninanin Cristo tuku kalimapakgsilh Jesús pi xtaxtukgolh kJerusalén chu tuku xlakata chuna tlawakgolh?
17 Kata 66 akxni xminita Jesús soldados xalak Roma akgchipakgolh Judea. Wantiku xlikana xkgalhakgaxmatkgo Jesús xkatsikgo pi xkawaninit lakapara xtaxtukgolh kJerusalén chu akxni chalh kilhtamaku pi xlitaxtutkan xwanit, taxtukgolh (Lucas 21:20-23). ¿Tuku xlakata lakapara taxtukgolh chu ni makgtiy lakpuwankgolh? Xlakata liwana xlakapastakkgo tuku xkawaninit Jesús. Maski xkatsikgo pi xʼamakgolh kgalhikgo taʼakglhuwit xlakata xtaxtukgolh, Jesús chuna xkawaninit, pero liwana xkatsikgo pi Jehová nikxni xʼama kamakgxtakga komo xlakan xkgalhakgaxmatkgolh (Salmo 55:22).
18. Chuna la wan Lucas 21:25-28, ¿la miliʼakxilhat lanka talakgaputsit?
18 Akinin nachuna xliputum kilatamatkan nalipawanaw Jehová, xlakata kajwatiya Jehová tlan nakinkalakgmaxtuyan akxni kʼuma kakilhtamaku naʼanan lanka talakgaputsit, akxni naʼanan lanka tapatin nema nikxni aminit. Akxni atsinu tsankga nawan akxni Jehová nalimin lisputni, ama kilhtamaku latamanin tiku ni kgalhakgaxmatnankgo «nalilakgawitikgoy [o nalitakatalakgo] nchixkuwin lantla nchapikua nakgalhkgalhitawilakgoy nkatuwa ntu namin nalay lantla xlikatlanka nkatuxawat». Pero tiku ni makgxtakgkgo Jehová ni katipekuankgolh chuna la napekuankgo tiku ni kgalhakgaxmatkgo Jehová. Wata napaxuwakgo, xlakata naʼakgatekgskgo pi atsinu kilhtamaku tsankga nakalakgmaxtukan (kalikgalhtawakga Lucas 21:25-28).
19. ¿Tuku naʼakxilhaw kʼartículo nema stalani uma?
19 Tiku ni makgtanukgo tuku xalak kakilhtamaku chu tuku «litustuka» lu tlan tuku namakglhtinankgo kilhtamaku nema aku mima. Pero chuna la naʼakxilhaw kʼartículo nema stalani uma, xlakata nakgalhiyaw latamat nema ni kgalhi xlisputni nikaj talakaskin ni natlawayaw tuku nitlan. Na talakaskin naliskujaw xlakata nakgalhiyaw xatlan tayat chu natlawayaw tuku Jehová lakgati (2 Pedro 3:11).
[Notas nema wilakgo kpágina]
^ párr. 6 Tayat nema malakatsuki xtalakapastakni kkakilhtamaku tlakg liwana talichuwinan klibro Razonamiento a partir de las Escrituras, kpáginas 140 asta 144, tlawakgonit xtatayananin Jehová.
¿La xkgalhtinanti?
• ¿Tuku kilhchanima «akgapun» chu «ntiyat» nema wilakgolh la uku?
• ¿Tuku kilhchanima «ntu litustuka ntiyat»?
• ¿Tuku kilhchanima «xasasti akgapun» chu «xasasti tiyat»?
• ¿Tuku xlakata xliputum kilatamatkan lipawanaw Dios?
[Takgalhskinin]
[Epígrafe xla página 13]
¿La tlan nakuentajtlawayaw kinakujkan chu ni namakgtanuyaw tuku xalak kakilhtamaku?
[Epígrafe xla página 14]
¿La limasiyayaw pi xlakata «makgapalama xliminat nkimPuchinakan, [...] liʼakgatakgs[aw] mpi kaj xpalakata xliʼakgaputaxtunkan amakgapitsin»?