¿Baʼax ken u chíikbes u kʼiinil Jéeoba?
¿Baʼax ken u chíikbes u kʼiinil Jéeoba?
«U kʼiinil Yuumtsileʼ bíin taalak [...], jeʼel bix u taal juntúul j-ookol yéetel áakʼabeʼ. [...] Le luʼumoʼ bíin tóokaʼak paʼteʼ yéetel tuláakal baʼax yaniʼ.» (2 PED. 3:10)
1, 2. 1) ¿Bix kun tsʼoʼokol tiʼ le kʼasaʼan yóokʼol kaabaʼ? 2) ¿Baʼax kʼáatchiʼiloʼob ken k-xakʼalt teʼ xookaʼ?
LE KʼASAʼAN yóokʼol kaabaʼ káaj u yantal le ka joʼopʼ u tuklaʼal jeʼel u páajtal u gobernartaʼal le Luʼum tumen chéen wíinikoʼ, baʼaleʼ lelaʼ chéen upʼéel nojoch tuus (Sal. 2:2, 3). ¿Jeʼel wa u pʼáatal utiaʼal mantatsʼ upʼéel baʼal ku yantal yoʼolal upʼéel tuuseʼ? Maʼatan. Baʼaleʼ u kʼasaʼan yóokʼol kaab Satanaseʼ maʼ chéen tu juunal kun xuʼulul tiʼiʼ. Jéeoba kun xuʼulsik. Yéetel yaan u beetik teʼ kʼiin u tukulmoʼ yéetel le bix u kʼáateʼ, baʼaleʼ yaan u beetik jeʼex u nuʼuktik u justicia yéetel u yaabilajeʼ (Sal. 92:7; Pro. 2:21, 22).
2 Apóstol Pedroeʼ ku yaʼalik: «U kʼiinil Yuumtsileʼ bíin taalak tiʼ le kʼiin maʼ táan u páaʼtaʼaloʼ, jeʼel bix u taal juntúul j-ookol yéetel áakʼabeʼ. Le kaʼanoʼob túunoʼ bíin xuʼulsaʼakoʼob yéetel jumpʼéel jakʼbeʼen juum, tuláakal baʼax beetaʼanileʼ bíin xuʼulsaʼak yéetel kʼáakʼ, bey xan le luʼumoʼ bíin tóokaʼak paʼteʼ yéetel tuláakal baʼax yaniʼ» (2 Ped. 3:10). ¿Baʼax ku chíikbesik «le kaʼanoʼob» yéetel «le luʼum» ku yaʼalik le tekstoaʼ? ¿ Baʼax u kʼáat u yaʼal «tuláakal baʼax beetaʼanileʼ bíin xuʼulsaʼak? ¿Baʼax tu yóotaj u yaʼal Pedro yéetel le tʼaan «le luʼumoʼ bíin tóokaʼak paʼteʼ yéetel tuláakal baʼax yaniʼ»? Koʼoneʼex ilik u núukil le kʼáatchiʼobaʼ, lelaʼ jeʼel u yáantkoʼon k-aktáant le baʼaxoʼob ku taal u kʼiinoʼ.
Le kaʼanoʼob yéetel le luʼum kun xuʼulsbiloʼ
3. ¿Baʼax «le kaʼanoʼob» ku yaʼalik 2 Pedro 3:10, yéetel bix kun xuʼulsbiloʼob?
3 Yaan kʼiineʼ le Bibliaoʼ ku ketik le gobiernoʼob yéetel le «kaʼanoʼob[oʼ]», tumen maas yaan u páajtaliloʼob tiʼ u maasil wíinikoʼob (Isa. 14:13, 14; Apo. 21:1, 2). «Le kaʼanoʼob [...] bíin xuʼulsaʼakoʼ» ku chíikbesik u gobiernoiloʼob le kʼasaʼan yóokʼol kaabaʼ. ¿Baʼaxten ku yaʼalik «bíin xuʼulsaʼakoʼob yéetel jumpʼéel jakʼbeʼen juum», wa jeʼex u yaʼalik uláakʼ upʼéel Bibliaeʼ, «kʼaʼamkach juum»? Maʼ xaaneʼ tumen jach séebaʼan kun xuʼulsbiloʼob.
4. ¿Baʼax ku chíikbesik «le luʼum[oʼ]», yéetel bix kun xuʼulsbil?
4 «Le luʼumoʼ» ku chíikbesik le máaxoʼob maʼatech u meyajtkoʼob Diosoʼ. Jeʼex tu kʼiiniloʼob Noeiʼ yanchaj xan upʼéel kʼasaʼan yóokʼol kaab, baʼaleʼ xuʼulsaʼab tumen Dios teʼ Búulkabaloʼ. Le Bibliaoʼ ku yaʼalik: «Le kaʼanoʼob yéetel le luʼum yanoʼob [bejlaʼaʼ], kanáantaʼanoʼob utiaʼal le kʼáakʼoʼ, tu yoʼolal u tʼaan Jajal Dios xan. Le kʼáakʼoʼ bíin u tóokoʼob tu kʼiinil le pʼis óoloʼ, le ken xuʼulsaʼakoʼob le máaxoʼob kʼasaʼanoʼoboʼ» (2 Ped. 3:7). Teʼ Búulkabal yanchaj úuchjeakiloʼ u puul xuʼulsaʼabik tiʼ le kʼasaʼan máakoʼoboʼ, baʼaleʼ teʼ «nojoch yaayaj óolal» ku taal u kʼiinoʼ maʼ u puul kun xuʼulsbil tiʼ le kʼasaʼan máakoʼoboʼ (Apo. 7:14). Yáaxeʼ, Dioseʼ yaan u péeksik le gobiernoʼob utiaʼal ka u xuʼulsoʼob tiʼ «le nojoch Babilonia», wa tuláakal le religionoʼob ku kaʼanskoʼob baʼaloʼob maʼ jaajtakoʼ yéetel ku yokskubaʼob tiʼ u baʼalubaʼob le yóokʼol kaabaʼ (Apo. 17:5, 16; 18:8). Ken tsʼoʼokokeʼ, Jéeobaeʼ yaan u taasik le Armagedón utiaʼal u xuʼulsik tiʼ u yalab u kʼasaʼan yóokʼol kaab Satanasoʼ (Apo. 16:14, 16; 19:19-21).
«Tuláakal baʼax beetaʼanileʼ bíin xuʼulsaʼak»
5. ¿Baʼax táakaʼan ichil «tuláakal baʼax beetaʼanil» le kʼasaʼan yóokʼol kaabaʼ?
5 ¿Baʼax u kʼáat u yaʼal «tuláakal baʼax beetaʼanileʼ bíin xuʼulsaʼak»? Le máaxoʼob xokik baʼax u kʼáat u yaʼal u tʼaaniloʼob le Bibliaoʼ, ku yaʼalikoʼobeʼ le tʼaan griego ku suʼutul «tuláakal baʼax beetaʼanil[oʼ]» ku tsʼáaik naʼatbil xan «u káajbal upʼéel baʼal» wa le «baʼaxoʼob ku beetaʼal utiaʼal u káajsaʼal upʼéel baʼaloʼ». Upʼéel diccionario tiʼ le Bibliaoʼ ku yaʼalik xan: «Lelaʼ ku meyaj kaʼach utiaʼal u yúuchul tʼaan tiʼ u letrai le alfabetooʼ». Le oʼolal le tʼaan «tuláakal baʼax beetaʼanil» meyajnaj tiʼ Pedrooʼ, ku chíikbesik le bix u tuukul le máakoʼoboʼ, le baʼaxoʼob ku tsʼíiboltikoʼoboʼ yéetel le baʼaxoʼob ku beetkoʼob ku bin tu contra le baʼax ku yaʼalik Diosoʼ. Ichil lelaʼ táakaʼan xan «le tuukul ku taal tiʼ le yóokʼol kaab» péeksik «le máaxoʼob maʼ tu yuʼubikoʼob u tʼaan Jajal Diosoʼ» (1 Cor. 2:12; xokaʼak Efesoiloʼob 2:1-3). Le tuukulaʼ ku keʼetel yéetel le iikʼoʼ, tumen tiaʼan tiʼ tuláakal le yóokʼol kaab yaan yáanal u páajtalil le Kʼaasilbaʼaloʼ. Lelaʼ ku péeksik máak tuukul, tsikbal yéetel u beet baʼaloʼob ku chíikbesik u kʼaakʼas modos Satanás, u gobernantei le iikʼoʼ.
6. ¿Baʼax ku beetik le máaxoʼob ku chaʼik u nuʼuktaʼaloʼob tumen Satanasoʼ?
6 Le máakoʼoboʼ, kex u yojloʼob wa maʼeʼ, ku chaʼik u nuʼuktaʼal u tuukuloʼob yéetel u puksiʼikʼaloʼob tumen Satanás, le oʼolal ku beetkoʼob baʼaloʼob kʼaastak. Ku beetkoʼob chéen baʼax u kʼáatoʼob, maʼatech u tuklikoʼob baʼax utstutʼaan Dios. Ku kaxtik chéen u yutsiloʼob mantatsʼ, ku taaskubaʼob noj baʼalil, maʼatech u yuʼubkoʼob tʼaan, ku binoʼob tu paach chéen u «kʼaakʼas tsʼíibolaloʼob le luʼumkabil wíinkliloʼ» yéetel «u kʼaakʼas tsʼíibolalil le ichoʼ» (xokaʼak 1 Juan 2:15-17). *
7. ¿Baʼaxten unaj k-kanáantik k-puksiʼikʼal?
7 Le oʼolal jach maʼalob ka k-beet le baʼax ku yaʼalik le tekstoaʼ: «Kanáant a tuukul» wa a puksiʼikʼal (Pro. 4:23). Utiaʼal lelaʼ unaj u meyajtoʼon maʼalob le naʼat ku taal tiʼ Dios utiaʼal k-yéeyik yéetel máaxoʼob ken k-bisba, tiʼ baʼaxoʼob ken k-náays k-óol yéetel baʼaxoʼob ken k-xokeʼ wa baʼaxoʼob ken k-il tiʼ Internet. Pabloeʼ ku yaʼalik: «Kanáantabaʼex maʼ a chaʼikeʼex a bisaʼaleʼex tumen le máaxoʼob u kʼáat u tuseʼexoʼob yéetel luʼumkabil tuukuloʼoboʼ bey xan yéetel tʼaanoʼob chéen kuneloʼoboʼ; tumen letiʼobeʼ maʼatan u chʼaʼikoʼob [...] muukʼ tiʼ Cristo, baʼaleʼ tiʼ u kaʼansaj máakoʼob yéetel tiʼ yóokʼol kaabil tuukuloʼob» (Col. 2:8). Le baʼax tu yaʼalaʼ maas unaj k-ilik k-beetik bejlaʼeʼ tumen jach naatsʼ yanik u kʼiinil Jéeoba, tuʼux kun tóokbil «tuláakal baʼax beetaʼanil» u kʼasaʼan yóokʼol kaab Satanás. Jeʼex túun k-ilkoʼ maʼ ken u salvartubaʼob ken pʼuʼujuk Jéeoba. Malaquías 4:1 ku yaʼalik: «Le kʼiin tʼabaʼan bey jumpʼéel [hornooʼ] táan u náatsʼal, le j-kaʼanal ichoʼob yéetel [le] loolob máakoʼoboʼ, bíin elekoʼob bey sojol ichil kʼáakʼ tʼabaʼaneʼ. Bíin tóokaʼakoʼob tumen le kʼiin bíin taalakoʼ».
«Le luʼumoʼ bíin tóokaʼak paʼteʼ yéetel tuláakal baʼax yaniʼ»
8. ¿Bix kun chíikbesbil le baʼaxoʼob ku beetaʼal teʼ luʼumaʼ?
8 ¿Baʼax tu yóotaj u yaʼal Pedro le ka tu yaʼalaj «le luʼumoʼ bíin tóokaʼak paʼteʼ yéetel tuláakal baʼax yaniʼ»? Le tʼaan ku suʼutul «bíin tóokaʼak[oʼ]» ku tsʼáaik naʼatbil xan «u chíikbesaʼal upʼéel baʼal», «u jóoʼsaʼal tiʼ sáasil wa baʼax» wa «u pʼáatal yóoʼkabil upʼéel baʼal». Lelaʼ ku yeʼeskeʼ Pedroeʼ tu yóotaj u yaʼaleʼ tu kʼiinil le «nojoch yaayaj óolaloʼ» yaan u chíikpajal tuláakal le baʼaxoʼob kʼaastak ku beetaʼal teʼ yóokʼol kaabaʼ. Jéeobaeʼ yaan u chíikbeskeʼ le kʼasaʼan yóokʼol kaabaʼ tiaʼan tu contraeʼ yéetel tu contra u Reino, le oʼolal ku náajmatik ka xuʼulsaʼak. Isaías 26:21 ku yaʼalik: «Yuumtsileʼ, bíin u kaʼaj jóokʼol ich u jalaʼach naj utiaʼal u jaatsʼ tu yoʼolal u kʼebanoʼob u kajnáaliloʼob luʼum, luʼumeʼ, maʼ bíin u kaʼa taʼakbes máaxoʼob u loobiltmajiʼ, baʼaleʼ bíin u chaʼa u yilaʼal le máaxoʼob [tu] kíimsajoʼoboʼ».
9. 1) ¿Baʼax maʼ unaj k-beetikiʼ, yéetel baʼaxten? 2) ¿Baʼax modosi unaj k-eʼesik, yéetel baʼax ten?
9 Tu kʼiinil Jéeobaeʼ, le máaxoʼob ku chaʼik u nuʼuktaʼaloʼob tumen le yóokʼol kaab bey xan tumen u gobernantei le iikʼoʼ yaan u yeʼeskoʼob jach bix le modos yantiʼoboʼ yéetel yaan tak u paklan kíimskubaʼob. Maʼ xaaneʼ, le náaysaj óoloʼob tuʼux jach ku baʼateʼel le máakoʼoboʼ táan u kaʼansiktiʼob baʼax ken u beetoʼob teʼ kʼiin le ken «u machoʼob u yéet wíinikil utiaʼal u baʼateloʼob tu baatsiloʼob» (Zac. 14:13). Le oʼolal maʼ unaj k-chaʼantik peliculaʼob, k-xokik libroʼob, k-báaxtik videojuegoʼob mix uláakʼ baʼaloʼob jeʼel u beetik k-taasikba nojbaʼalil yéetel jeʼel u beetik u jatsʼutstal k-ilik le baʼateloʼob yéetel u maasil baʼaxoʼob u pʼekmaj Diosoʼ (2 Sam. 22:28; Sal. 11:5). Tsʼoʼoleʼ unaj k-eʼesik le modos ku taal tiʼ u yich le kiliʼich muukʼ utiaʼal u béeytal k-salvartikba tiʼ le «nojoch yaayaj óolal» ken u taas Jéeobaoʼ (Gal. 5:22, 23).
«Túumben kaʼanoʼob» yéetel «túumben luʼum»
10, 11. ¿Baʼax «le túumben kaʼan» yéetel «le túumben luʼumoʼ»?
10 (Xokaʼak 2 Pedro 3:13.) ¿Baʼax ku chíikbesik «le túumben kaʼanoʼoboʼ»? Ku chíikbesik u Reino Dios káaj u gobernar teʼ kaʼan tu jaʼabil 1914, le ka tsʼoʼok «le kʼiinoʼob tsʼaʼan tiʼ le kaajoʼoboʼ» (Luc. 21:24, NM). Jesús yéetel le 144,000 sukuʼunoʼob yéeyaʼanoʼob utiaʼal u binoʼob kaʼanoʼ, letiʼob kun gobernaroʼob teʼ Reinoaʼ, bejlaʼeʼ u maas yaʼabil tiʼ letiʼobeʼ tsʼoʼok u binoʼobiʼ. U libroi Apocalipsiseʼ ku yaʼalikeʼ le sukuʼunoʼob yéeyaʼanoʼoboʼ letiʼob «le nojoch kiliʼich kaajoʼ, le túumben Jerusalén, ku yéemel teʼ kaʼanoʼ, tiʼ Jajal Dios u taal. U [líiʼsmuba] bey utúul [novia] utiaʼal, u yíichameʼ» (Apo. 21:1, 2, 22-24). U gobiernoi u úuchben kaajil Israeleʼ tiʼ yaan kaʼach tu kaajil Jerusaleneʼ. Teʼ túumben luʼumoʼ, Jesús yéetel u novia, le Túumben Jerusalén, kun gobernaroʼoboʼ. Le kaajaʼ yaan «u yéemel teʼ kaʼanoʼ», lelaʼ u kʼáat u yaʼaleʼ yaan u nuʼuktik le baʼaxoʼob kun beetbil way Luʼumeʼ.
11 «Le túumben luʼumoʼ» ku chíikbesik le máaxoʼob ken u tsʼáaubaʼob yáanal u nuʼuktaj le Reino kun kajtaloʼob way Luʼumaʼ. Jeʼel u páajtal u yaʼalaʼaleʼ, le máaxoʼob meyajtik Dios teʼ kʼiinoʼobaʼ bey tiaʼanoʼob tiʼ upʼéel Paraísoeʼ. Baʼaleʼ teʼ «yóokʼol kaab bíin taalak» wa teʼ túumben luʼumoʼ jach yaan u kuxtaloʼob tiʼ upʼéel Paraíso (Heb. 2:5). ¿Baʼax unaj k-beetik utiaʼal k-kuxtaliʼ?
Unaj k-páaʼtik u nojoch kʼiinil Jéeoba
12. ¿Baʼaxten jach yaan u sajaktal le máaxoʼob maʼatech u meyajtkoʼob Dios ken kʼuchuk u kʼiinil Jéeobaoʼ?
12 Pablo yéetel Pedroeʼ tu yaʼaloʼobeʼ u kʼiinil Jéeobaeʼ yaan «u taal jeʼel bix u taal juntúul j-ookol yéetel áakʼabeʼ», wa tiʼ upʼéel súutukil maʼ táan u páaʼtaʼaliʼ (xokaʼak 1 Tesalonicailoʼob 5:1, 2). Tak le máaxoʼob meyajtik Dios táan u páaʼtikoʼoboʼ yaan u jaʼakʼal u yóoloʼob ken u yiloʼob u séeb káajal (Mat. 24:44). Baʼaleʼ le máaxoʼob maʼatech u meyajtkoʼob Diosoʼ maʼ chéen kun jaʼakʼal u yóoloʼobiʼ. Pabloeʼ ku yaʼalik: «Le ken u yaʼal[oʼob] [...]: Tuláakal jejetsʼkil yéetel maʼalob yanileʼ, letiʼ le ken téek taalak tu yóokʼoloʼob le xuʼulsajoʼ jeʼel bix le kʼiʼinamil ku taal tiʼ juntúul koʼolel [taʼaytak u síijil u chaambaleʼ]; maʼ tu páajtal u púutsʼuloʼob» (1 Tes. 5:3).
13. ¿Baʼax unaj k-beetik utiaʼal maʼ k-tuʼusul le ken aʼalaʼak «tuláakal jejetsʼkil yéetel maʼalob yanil»?
13 Le ken joʼopʼok u yaʼalikoʼob «tuláakal jejetsʼkil yéetel maʼalob yanileʼ» chéen uláakʼ upʼéel tuus ku taal tiʼ u kʼasaʼan angeloʼob Satanás, baʼaleʼ maʼ kun béeytal u tuskoʼob le máaxoʼob meyajtik Jéeobaoʼ. Apóstol Pabloeʼ ku yaʼalik: «Teʼexeʼ sukuʼuneʼex, maʼ ich éekʼjochʼeʼenil yaneʼexiʼ utiaʼal ka téek taalak ta wóokʼoleʼex u kʼiinil Yuumtsil jeʼel bix u téek taal juntúul j-ookoleʼ. Tumen tuláakaleʼexeʼ utiaʼaleʼex le sáasiloʼ yéetel le kʼiinoʼ» (1 Tes. 5:4, 5). Le oʼolal bejlaʼeʼ jach kʼaʼabéet k-ilik k-pʼáatal ichil le sáasil ku taal tiʼ Diosoʼ yéetel k-náachkuntikba tiʼ le éekʼjochʼeʼenil ku taal tiʼ u kʼasaʼan yóokʼol kaab Satanasoʼ. Pedroeʼ tu yaʼalaj yaan u yantal máaxoʼob kaʼansik baʼaloʼob maʼ jaajtak ichil le múuchʼuliloʼ: «In yaabilaj sukuʼuneʼex, tumen teʼex[eʼ] a wojeleʼex le baʼaloʼob maʼiliʼ úuchukaʼ, kanáantabaʼex, utiaʼal maʼ a jíiltaʼaleʼex tu yoʼolal u tuusoʼob le máaxoʼob kʼasaʼanoʼoboʼ mix a lukʼuleʼex tiʼ le baʼax jeetsʼel a wanileʼexoʼ» (2 Ped. 3:17).
14, 15. 1) ¿Baʼax páajtalil u tsʼaamajtoʼon Jéeoba? 2) ¿Baʼaxoʼob jach unaj k-chʼaʼik en cuentai?
14 Jeʼex túun k-ilkoʼ, Jéeobaeʼ maʼ chéen ku yaʼalik: «Kanáantabaʼex» wa «maʼ u náayal a wóoleʼex». Baʼaxeʼ ku tsʼáaiktoʼon u páajtalil k-ojéeltik jach baʼaxoʼob ku taal u kʼiin.
15 Baʼaleʼ yaan kʼiineʼ, ken aʼalaʼak teʼ múuchʼulil maʼ u náayal u yóol máakoʼ, yaan máaxeʼ maʼatech u beetik u cuentai wa ku joʼopʼol u yaʼalik maʼ jaaj le baʼax ku yaʼalaʼaloʼ. Maʼ xaaneʼ ku joʼopʼol u yaʼalik: «Jach úuch joʼopʼok in wuʼuyik u yaʼalaʼal leloʼ». Baʼaleʼ unaj u kʼaʼajskeʼ ken u yaʼal baʼaloʼob beyoʼ maʼ chéen táan u pʼáatal maʼatech u creertik baʼax ku yaʼalik le palitsil chúukpajaʼan u yóoloʼ, baʼaxeʼ táan u pʼáatal maʼatech u creertik baʼax ku yaʼalik Jéeoba yéetel Jesús. U jaajileʼ Jéeoba aʼalik tiʼ cada utúul tiʼ toʼon: «Páaʼtej» (Hab. 2:3). Jesús xaneʼ ku yaʼalik: «Pʼil ichneneʼex, tumen maʼ a wojeleʼex baʼax hora ken taalak Yuumtsil[iʼ]» (Mat. 24:42). Pedro xaneʼ ku yaʼalik: «Bey túunoʼ yéetel bukaʼaj kʼub óolal yéetel kiliʼichil unaj a kuxtaleʼex. Páaʼteʼex yéetel séebkunteʼex u kʼuchbal u kʼiinil Jajal Dios» (2 Ped. 3:11, 12). Le palitsil chúukpajaʼan u yóol yéetel u Cuerpo Gobernanteoʼ mix utéen ken u chéen uʼuyoʼob le baʼaxoʼob ku yaʼalik Jéeobaoʼ.
16. ¿Baʼax tuukulil maʼ unaj u yantaltoʼoniʼ, yéetel baʼaxten?
16 Le máax tuklik táan u xáantal u taal le Tsʼuuloʼ letiʼe «kʼasaʼan [...] palitsil[oʼ]» (Mat. 24:48). Le máakoʼobaʼ letiʼe ku yaʼalaʼal teʼ 2 Pedro 3:3 yéetel 4: «Tiʼ le u tsʼook kʼiinoʼoboʼ bíin taalak pʼaʼas máakoʼob, táan u kuxtaloʼob jeʼel bix u kʼáat u kʼaakʼas tsʼíibolaloʼobeʼ». Letiʼobeʼ ku cheʼejkoʼob le máaxoʼob beetik baʼax ku yaʼalik Jéeoba yéetel táan u páaʼtikoʼob u kʼuchul le kʼiin u yaʼalmoʼ. Tsʼoʼoleʼ maʼatech u kanáantkoʼob le baʼaxoʼob utiaʼal le Reinooʼ, baʼaxeʼ chéen ku kaxtik u yutsiloʼob yéetel ku beetkoʼob chéen baʼax u kʼáatoʼob. Toʼoneʼ mix utéen unaj k-tuukul yéetel k-beetik baʼaloʼob beyoʼ. Baʼaxeʼ unaj k-ilik «le chúukaʼan óolal yaan tiʼ k-Yuumtsil» bey upʼéel páajtalil utiaʼal k-salvartikbaeʼ yéetel unaj k-tsʼáaik k-óol teʼ kʼaʼaytaj yéetel k-kaʼansik uláakʼ máakoʼoboʼ. Maʼ unaj k-jach chiʼichnakkúuntikba k-ojéelt baʼax kʼiin ken úuchuk le baʼaxoʼob aʼalaʼanoʼ, tumen chéen Jéeoba u yojel baʼax kʼiin ken u beete (2 Ped. 3:15; xokaʼak Beetaʼanoʼob 1:6, 7).
Unaj k-kʼubik k-óol tiʼ le Dios kun salvarkoʼonoʼ
17. ¿Baʼax tu beetaj le yáax cristianoʼob kajaʼanoʼob kaʼach Jerusalenoʼ, yéetel baʼaxten tu beetoʼob beyoʼ?
17 Tu jaʼabil 66 tiʼ le yáax siglooʼ, u soldadoiloʼob Romaeʼ baʼatelnajoʼob tu contra Judea. Le yáax cristianoʼoboʼ kʼajaʼantiʼobeʼ Jesuseʼ u yaʼalmaj unaj u jóokʼloʼob Jerusalén tu séebaʼanil ken yanak u páajtalil, le oʼolal ka tu yiloʼob u yúuchul le baʼax aʼalaʼanoʼ bey tu beetiloʼoboʼ (Luc. 21:20-23). ¿Baʼaxten tu chʼaʼatuklaj u séeb púutsʼloʼob? Tumen maʼ tubaʼantiʼob le baʼax u yaʼalmaj Jesusoʼ. Kex u yojloʼob yaan u muʼyajtkoʼob wa baʼax talmil ken púutsʼkoʼobeʼ, u yojloʼob maʼ kun pʼatbiloʼob tumen Jéeoba wa ku chúukpajal u yóol u meyajtoʼob, jeʼex aʼalaʼabiktiʼob tumen Jesusoʼ (Sal. 55:22).
18. Jeʼex u yaʼalik Lucas 21:25 tak 28, ¿bix unaj a wilik u kʼiinil le nojoch muʼyajiloʼ?
18 Toʼon xaneʼ unaj k-kʼubik k-óol tiʼ Jéeoba, tumen chéen letiʼ jeʼel u béeytal u salvartikoʼon le ken káajak le nojoch muʼyajil mix utéen ilaʼanoʼ. Táanil tiʼ u xuʼulsik Jéeoba tiʼ u yalaʼ le kʼasaʼan yóokʼol kaabaʼ, le máaxoʼob maʼ tu yuʼuboʼob tʼaanoʼ yaan tak «u desmayaroʼob tumen jach saajkoʼob yoʼolal le baʼaloʼob ku yilkoʼob ku taal u kʼiinil u yúuchul way luʼumeʼ, NM». Le máaxoʼob pʼekmil Diosoʼ yaan u jach sajaktaloʼob, baʼaleʼ le máaxoʼob meyajtik yéetel chúukaʼan óolaloʼ maʼ kun sajaktaloʼob. Baʼaxeʼ yaan u kiʼimaktal u yóoloʼob tumen u yojloʼob tsʼoʼok u náatsʼal u kʼiinil u salvartaʼaloʼob (xokaʼak Lucas 21:25-28).
19. ¿Baʼax ken k-il teʼ tuláakʼ xookoʼ?
19 Jeʼex túun k-ilkoʼ, le máaxoʼob maʼatech u yokskubaʼob tiʼ u baʼalubaʼob le yóokʼol kaabaʼ jach jatsʼuts baʼax ku páaʼtikoʼob. Baʼaleʼ jeʼex ken k-il teʼ tuláakʼ xookoʼ maʼ chéen unaj k-kanáantik maʼ k-beetik baʼax kʼaas utiaʼal ka yanaktoʼon le kuxtal minaʼan u xuuloʼ. Baʼaxeʼ unaj k-ilik u yantaltoʼon jatsʼuts modos yéetel k-beetik baʼaxoʼob utstutʼaan Jéeoba (2 Ped. 3:11).
[Tsolajiloʼob]
^ xóot’ol 6 Le bix u tuukul le máakoʼob nuʼuktaʼanoʼob tumen Satanasoʼ ku maas tsoʼolol teʼ libro Razonamiento a partir de las Escrituras, táan juʼun 140 tak 144.
¿Jeʼel wa a kanik a tsoleʼ?
• ¿Baʼax ku chíikbesik «le kaʼanoʼob» yéetel «le luʼum» yaan bejlaʼoʼ?
• ¿Baʼax u kʼáat u yaʼal «tuláakal baʼax beetaʼanil» kun xuʼulsbiloʼ?
• ¿Baʼax ku chíikbesik «le túumben kaʼan» yéetel «le túumben luʼumoʼ»?
• ¿Baʼaxten k-jach kʼubik k-óol tiʼ Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 5]
¿Bix jeʼel k-kanáantik k-puksiʼikʼal utiaʼal maʼ k-táakpajal tiʼ le baʼaxoʼob ku beetaʼal teʼ kʼasaʼan yóokʼol kaabaʼ?
[U tsolajil le oochel teʼ táan juʼun 6]
¿Bix k-eʼesik «le chúukaʼan óolal yaan tiʼ k-Yuumtsil» bey upʼéel páajtalil utiaʼal k-salvartikbaeʼ?