Wala na Sila Nahadlok sa Katapusan

SANG ulihi nga bahin sang dekada 70, nagpati gid si Gary kag si Karen nga malapit na ang katapusan sang kalibutan. Gusto gid nila nga mabuhi pero indi nila gusto nga magdepende sa iban. Gani, naghalin sila sa siudad kag nagsaylo sa uma.

Para makahibalo sila kon ano ang himuon, nagbakal sila sing mga libro, nag-attend sa mga seminar, kag nagpulupamangkot sa iban. Nagtanom sila sing mga utan kag 50 ka dwarf nga kahoy nga nagapamunga. Nagtago sila sing mga liso kag mga gamit sa pagpananom. Nagtuon man sila sa pagtanom kag pagpreserbar sing pagkaon. Gintudluan sila sang ila amiga kon paano mag-ihaw kag magpreserbar sang karne. Gintun-an man ni Karen kon ano nga mga gamot kag tanom sa kagulangan ang puede kaunon engkaso nga maubusan sila sing pagkaon. Naghimo si Gary sing kalan nga metal kag gintun-an niya kon paano maghimo sing gatong halin sa mais. Nagtukod man sia sing balay nga ara na ang tanan.

“Bangod mabudlay gid ang kahimtangan sadto, abi ko maabot na ang katapusan,” siling ni Karen. “Pareho sa iban nga pamatan-on, nangin aktibista ako kay gusto ko nga masolusyunan ang rasismo, inaway sa Vietnam, kag korapsion. Pero napaslawan lang ako. Pamatyag ko ang mga tawo mismo ang magalaglag sang ila kaugalingon,” siling ni Gary.

 “Isa ka gab-i, daw wala ako sing obrahon, gani ginkuha ko ang Biblia kag ginbasa ini halin sa Mateo asta sa Bugna. Pagkasunod nga apat ka gab-i ginbasa ko ini liwat. Pagkaaga, ginsilingan ko si Karen: ‘Ari na kita sa katapusan nga mga adlaw. Dali na lang tinluan sang Dios ang duta. Dapat pangitaon naton ang mga tawo nga iya luwason,’” siling ni Gary. Gani nagsulod sila sa lainlain nga relihion para mabal-an kon diin sa sini ang nagahanda sa pag-abot sang katapusan.

Sang ulihi, may nagkadto sa ila nga Saksi ni Jehova kag gintudluan sila sa Biblia. Si Karen nagsiling: “Nanamian ako kay ginpaathag gid sa akon ang Kasulatan kag natun-an ko ang kamatuoran parte sa katapusan. Amo gid ini ang ginapangita ko halin sang una. Kanami kay may paglaum na ako sa palaabuton. Pero ang mas maayo pa gid kay nangin suod ako sa akon Amay sa langit, ang Manunuga kag Dios sang uniberso.”

Si Gary nagsiling: “May kahulugan na ang akon kabuhi. Kada magtuon ako sa Biblia daw indi ko ini pag-untatan. Sang ginbasa ko ang mga tagna sa Biblia kag gin-usisa ang mga pamatuod nga nagakatabo na ini subong, nakumbinse gid ako nga dali na lang ang paghukom sang Dios. Sa pensar ko, ‘Ang handaan sang mga tawo indi ang katapusan kundi ang kabuhi nga gusto sang Dios para sa aton.’” Si Gary kag si Karen may paglaum na sa palaabuton. Sa baylo nga mahadlok sa pag-abot sang katapusan, nagasalig na sila nga dulaon sang Dios ang mga problema sang katawhan kag himuon ang duta nga paraiso.

Ano na subong ang ginahimo nanday Gary kag Karen, pagligad sang sobra 25 ka tuig? Nagsiling si Karen: “Ginapalig-on ko pa gid ang akon gugma kag pagtuo kay Jehova nga Dios kag ginabuligan ang iban nga amo man sini ang himuon. Nagabuligay kami ni Gary nga pabakuron ang amon pamilya samtang nagasimba sa Dios. Gin-organisar namon sing maayo ang amon iskedyul kag ginpasimple ang amon kabuhi para makabulig pa kami sa iban.”

Si Gary nagdugang pa: “Pirme ko ginapangamuyo nga mag-abot ang Ginharian sang Dios para madula na ang tanan nga problema sang tawo. Kada magwali ako sing maayong balita sang Ginharian sang Dios, ginapangamuyo ko nga may masugiran ako bisan isa lang ka tawo parte sa paglaum nga ginatudlo sang Biblia. Sa sobra na sa 25 ka tuig, ginsabat gid ni Jehova ang akon pangamuyo. Nagapati kami ni Karen nga dali na lang bag-uhon ni Jehova ang kahimtangan sa duta. Pero wala na kami nahadlok sa katapusan.”—Mateo 6:9, 10; 2 Pedro 3:11, 12.

[Retrato sa pahina 9]

Subong, sanday Gary kag Karen nalipay sa pagsugid sa iban sing paglaum halin sa Biblia