Nakai Liu Matakutaku a Laua he Fakaotiaga

KO E matahiku he 1970, ne mauokafua a Gary mo Karen kua tata tuai e fakaotiaga he lalolagi. Ti hiki a laua ki tua he taone mo e fifili ke gahua ke leveki aki ni a laua. Manako a laua ke momoui.

Ke moua e lotomatala kua lata ia laua, ne fakatau e laua e tau tohi, o he tau vahega fakaako mo e tau seminā, ti tutala ke he tau tagata tokologa ka maeke. Tō e laua e tau lakau kai mo e 50 e akau kūkū ne fai fua. Fakaputu foki e laua e tau tega akau mo e tau koloa fakaaoga. Ne fakaako a laua ke tō mo e fakamata e tau mena kai. Fakaako he kapitiga a laua ke tamate mo e fakamata e tau vala manu. Ne fakaako a Karen ke mailoga e tau akau mo e tau vaka akau he vaouhi ne maeke a laua ke kai ka nakai fai mena kai. Fakaako a Gary ke taute e lolo mai he tau hana, talaga e sitou lapatoa ne fakaaoga e tau gaafi, mo e talaga e fale ne nakai fakaaoga e hila.

“Ha kua kelea e tau mena tutupu he lalolagi he magaaho ia,” he talahau e Karen, “ne manatu au kua teitei fakaoti e kaufakalataha.” Fakamaama e Gary: “Tuga e falu fuata, ne makaukau lahi au he lali ke fakahako e fili tagata, Felakutaki i Vieteneme, mo e mahani kolokolovao. Ka kua mafiti e fakagogoa haaku. Ki a au, tuga kua haia e tau tagata he puhala ke moumou ne lautolu a lautolu.”

“Taha pō,” he talahau e Gary, “ne fai magaaho atā au ti lagaki hake e au e Tohi Tapu mo e totou mai ia Mataio ke he  Fakakiteaga. Fā foki e pō, ne liu au totou ai. He pogipogi ke lima aki, ne tala age au ki a Karen: ‘Kua nonofo tuai a tautolu he tau aho fakamui. To nakai leva ti fakameā he Atua e lalolagi. Lata ia taua ke kumi a lautolu ka momoui.’” Ne kamata a Gary mo Karen ke o he taha lotu ke he taha lotu, he kumi he tau tagata ne manako ke mautauteute ma e fakaotiaga.

Nakai leva, ne fina atu taha he Tau Fakamoli a Iehova ke he gutuhala ha laua, ti kamata e fakaako Tohi Tapu. “Ne fiafia lahi au,” he manatu e Karen, “ha kua fakamaama mooli ki a au e tau Tohiaga Tapu. Ko e kupu mooli hagaao ke he magaaho he fakaotiaga e mena kua leva e kumi haaku ki ai, ti kua moua tuai e au. Na fai amaamanakiaga mooli ma e vahā anoiha. Ka e mua e mitaki, ne kamata au ke fakatupu e tuaga kapitiga mo e haaku a Matua he lagi, ko e Tufuga mo e Atua he lagi mo e lalolagi katoatoa.”

Pehē a Gary: “Kua kakano mooli e moui haaku. He fakaako agataha au ke he Tohi Tapu, ne nakai oti e fia manako haaku ki ai. Totou e au e perofetaaga he Tohi Tapu, kumikumi e fakamooliaga to hoko mooli ai, ti mauokafua to taute fakamafiti he Atua. Manatu au, ‘Kua lata e tau tagata ke mautauteute, nakai ke he matematekelea, ka ko e moui kua manako e Atua ma tautolu.’ ” Ne moua e Gary mo Karen e onoonoaga mitaki ke he vahā anoiha. He nakai tupetupe ke he fakaotiaga he lalolagi, ne mauokafua a laua to utakehe he Atua e tau lekua ne fakamamahi aki e tau tagata mo e to fakafoou e lalolagi mo parataiso.

Ko e heigoa ha Gary mo Karen hane taute mogonei he 25 e tau he mole? Pehē a Karen: “Kua atihake tumau e au e fakaalofa haaku ki a Iehova ko e Atua mo e tua haaku ki a ia, ti lali au ke lagomatai falu ke taute pihia foki. Ne felalagoaki au mo Gary he fakatumau ke fakamalolō mo e fakalataha he magafaoa ha maua ke tapuaki ke he Atua. Lali a maua ke fakatokatoka tumau, ti eketaha ai ke fakatumau e moui mukamuka ke maeke a maua ke hagaaki ke he falu mo e tau manako ha lautolu.”

Lafi e Gary: “Liogi tumau au ma e Kautu he Atua ke hoko mai mo e tamai e fakatotokaaga ke he tau miliona. Ko e tau magaaho takitaha ne tutala au ke he tala mitaki he Kautu he Atua mo e falu, ne liogi au ke maeke ia au ke talahau falu amaamanakiaga mai he Tohi Tapu ke he taha e tagata. Molea e 25 e tau, kua tali totonu e Iehova e liogi ia. Talitonu au mo Karen to nakai leva ti tamai e Iehova e tau hikiaga lalahi ke he lalolagi, ka e nakai liu a maua matakutaku he fakaotiaga.”—Mataio 6:9, 10; 2 Peteru 3:11, 12.

[Fakatino he lau 9]

Fiafia a Gary mo Karen mogonei he lagomatai falu ke moua e amaamanakiaga he fekau he Tohi Tapu