Nan No Tin Miedu Mas di e Fin

NA FIN di dékada di 1970, Gary ku Karen tabata konvensí ku fin di mundu tabata serka. P’esei, nan a sali for di stat pa bai biba den kunuku i a disidí di biba kompletamente independiente. Nan mes kier a produsí òf haña tur loke nan tabatin mester pa satisfasé nan nesesidatnan. Nan kier a sobrebibí e fin.

Pa siña e abilidatnan nesesario pa logra esei, nan a kumpra tur sorto di buki, asistí na kurso i seminario i a papia ku mas tantu hende posibel. Nan a planta un hòfi di bèrdura i tambe 50 palu di fruta enano. Nan a warda un stòk grandi di simia i hèrmènt. Nan a siña kultivá e tera i preservá e kosecha. Un amiga a siña nan kon ta mata bestia i kon pa salga òf huma karni. Karen a siña rekonosé mata i rais den mondi, di manera ku nan lo por a kome nan den kaso ku kuminda kaba laga nan. Gary a siña produsí kombustibel for di maishi i a traha un fòrnu di karbon di metal i a konstruí un kas ku no tabatin mester di awa ni koriente djafó.

Karen a konta: “E situashon mundial teribel di e tempu ei a laga mi sinti ku fin di sivilisashon lo a yega un ora pa otro.” Gary a splika: “Meskos ku otro hóbennan, mi a djòin un grupo di aktivista ku a purba di pone fin na rasismo, Guera di Vietnam i korupshon. Pero den poko tempu mi a keda desilushoná. Segun mi, si e situashon a sigui asina, hende lo a kaba ku su mes for di riba tera.”

 Gary a sigui konta: “Un anochi, mi no tabatin masha kos di hasi, i mi a disidí di kue un Beibel i a les’é for di Mateo te Revelashon. Mi a bolbe les’é kuater anochi tras di otro. Riba e di sinku dia, mi di ku Karen: ‘Nos ta bibando den e último dianan. Djis akí Dios lo tuma medida pa limpia e tera. Nos tin ku haña e hendenan ku lo sobrebibí.’” Gary ku Karen a kuminsá bai di un religion pa otro, en buska di e hendenan ku kier a prepará pa e fin.

No a tarda mashá ku un Testigu di Yehova a bati na nan porta, i nan a kuminsá studia Beibel. Karen ta kòrda kon emoshoná e tabata, “pasobra di bèrdat nan tabata splika mi e Skritura. Mi tabata buska e bèrdat tokante e tempu di fin, i por fin mi a hañ’é. Tabatin un speransa sigur pa futuro. Es mas, mi a kuminsá forma un amistat ku mi Tata selestial, e Kreador i Dios di universo.”

Gary a konta: “Mi bida a haña berdadero propósito. Unabes ku mi a kuminsá studia Beibel, mi no kier a stòp. Mi a lesa e profesianan di Beibel, mi a analisá e prueba ku nan tabata kumpliendo, i mi a keda konvensí ku djis akí Dios lo a aktua. Mi di den mi mes: ‘Hende mester prepará pa e bida ku Dios ke pa nos tin, no pa desaster.’” Gary ku Karen a haña un punto di bista positivo di futuro. En bes di preokupá tokante fin di mundu, nan a haña e konfiansa ku Dios lo kita tur e problemanan ku ta asotá humanidat i lo transformá e tera den un paradeis.

Kiko Gary ku Karen ta hasiendo aworakí, 25 aña despues? Karen a bisa: “Mi ta sigui fortalesé mi amor pa Yehova Dios i mi fe den dje, i mi ta purba yuda otro hende hasi meskos. Ami ku Gary ta apoyá otro, segun ku nos ta mantené nos famia fuerte i uní den nos adorashon di Dios. Nos ta purba keda organisá, i nos ta hasi esfuerso pa tene nos bida simpel, ya asina nos por konsentrá riba otro hende i nan nesesidatnan.”

Gary a agregá: “Regularmente mi ta pidi pa e Reino di Dios bini i trese alivio pa miónes di hende. Kada biaha ku mi kompartí e bon notisia di e Reino di Dios ku otro hende, mi ta pidi Dios pa laga mi duna por lo ménos ún persona maske ta un poko speransa for di Beibel. Pa mas ku 25 aña, Yehova, den su bondat, a kontestá e orashon ei. Ami ku Karen ta kere ku pronto Yehova lo trese kambionan grandi riba tera, ma nos no tin miedu mas di e fin.”​—Mateo 6:​9, 10; 2 Pedro 3:​11, 12.

[Plachi na página 9]

Awor Gary ku Karen ta gusta yuda otro hende haña un speransa for di e mensahe di Beibel