Wawanakar yatichañataki

¿Kunatsa Jesusax Lázaro amigopar ukspach jan qullkpachäna?

JESUSARUX Jordán jawir khurkatatwa jan wali yatiyäwinak yatiyapxi: Lázaro sat munat amigopaw wali usut jikxatasi. Ukhaxa Jesusax Betania markat wali jayankkänwa, uka markanwa Lazarompi kullakanakapampix jakasipxi. Jesusan ukham jayankataps yatipkchïnxa, Jesusar yatiyañapatakix mä uywataruw khitapxäna, kunattix ukham jayankkasas jilapar qullañatak chʼamanïtap yatipxänwa. Niyas uka nayrax mä usutaruw ukham qullatayna (Mateo 8:5-13; Juan 11:1-3).

Ukampisa, Jesusax janiw amigoparux ukspach qullkänti. Bibliax akham siwa: “Pä urumpiw qhiparäna kawkhankkäntix ukkhana” sasa (Juan 11:6). ¿Kunatsa Jesusax ukspach jan qullqkpachäna uk yatiñ munasmati? *... Bibliax uka tuqit kamsis uk yatxataskakiñäni.

Lazaron pä uru jiwatäxatap yatisaxa Jesusax apostolanakapar akham sänwa: “Wasitampi Judearu sarañäni” sasa. Wali muspharataw jupanakax akham sapxäna: “Yatichiri, mayürukiwa judionakax qalamp kʼupjasin jiwayañ munapxtam. ¿Wasitampit ukaru sarañ munta?” sasa. “Lázaro amigosax ikiskiwa, ukampis nayax sartayanïwa” sasaw Jesusax säna.

Apostolanakapasti sapxarakïnwa: “Tata, ikiskchi ukaxa, waliptaskaniwa” sasa. Ukatwa Jesusax jupanakarux qhan sarakïna: “Lazarox jiwatäxiwa”. “Kusistwa jan ukankataxata, ukhamaw wali jumanakatakixa, [...]. Ukampis uñjiri sarañäni” sasa. Uk istʼasax apostolanakapax janiw sum amuyapkpachänti.

Tomás sat maynïr apostolapax akhamwa mayninakarux sarakïna: ‘Jiwañjamäkchinisa jiwasax jupamp chik sarañäni’ sasa. Kunattix uñisirinakapax Jesusarus jupanakarus jiwayañ munapxatap yatipxänwa. Ukhampachas Jesusampi chika sarañwa amtapxäna. Pä uru sarasax Betania markaruw puripxäna, uka markax Jerusalén markat kimsa kilometronak sarañankänwa (Juan 11:7-18).

¿Kunatsa Jesusax ukspach jan sarañ munkpachäna uk yattati?... Jesusax waljaniruw jaktayäna, ukampis uka jiwatanakax mä qhawqha horanakakiw jiwatapxäna (Lucas 7:11-17, 22; 8:49-56). Ukampis Jesusax purkäna ukhaxa, Lazarox pusi uruw jiwatäxäna, ukhamasti janipuniw khitisa Lazarox janiw jiwatäkänti sasin siskaspänti.

Ukat Jesusan markar purisinkatap yatisaxa, Martax tʼijsuwayasinwa Jesusar jikxatir saräna. Ukat akham sänwa: “Tata, jumatix akankasamänxa jilaxax janiw jiwkasapänti” sasa. Ukat Jesusax akham sasaw chuymachtʼäna: “Jilamax jaktaniwa” sasa. Ukat utapar kuttʼasax akham sasaw kullakapar jamasat säna: “Yatichirix akankiwa, jawsasktamwa” sasa.

 Uta jakʼankirinakapasa amigonakapas Mariar mistuwayir uñjasax jiwat jilapar uñjiriw sarpacha sasaw arksuwayapxäna. Ukampis Jesusamp jikisiriw saraski. Mariaru ukat jupamp chikäpkäna uka jaqinakar jachir uñjasax Jesusax jachaqtʼasirakïnwa. Ukat ukspachaw Lazarox imatäkäna ukar sarapxäna, imäwix mä jachʼa qalampi punkut atkatatänwa, ukatwa Jesusax akham säna: “Atiqapxam uka qala” sasa. Martasti Jesusarux sänwa: “Tata, niya qʼaptatäxpachawa, pusüruxchixay jiwatapatxa” sasa.

Jesusar istʼasax qal atiqapxänwa, ukhawa Jesusax Diosar mayisi ukat Lazaror jaktayañatak chʼam churatapatsa yuspäraraki. Ukat akham sasaw jachʼat artʼäna: “¡Lázaro, mistunim!” sasa. Ukatsti Lazarow “amparanakapas, kayunakapas chʼuqäñanakamp ñachʼantata” mistunïna. Ukatwa Jesusax sarakïna: “Jararapxam, sarnaqpan sam” sasa (Juan 11:19-44).

¿Kunatsa Jesusax amigopar ukspach jan yanaptʼir sarkpachäna uk amuyxtati?... Kunattix ukhamatwa Jehová Dios Awkipax wali chʼamanïtap uñachtʼayaspäna. Ukxa Jesusax tiempoparuw luräna, ukat uk uñjasax waljaniw jupar iyawsapxäna (Juan 11:45). ¿Kunsa jumax Jesusan luräwipat yatiqasisma?...

Niyas jumax janiw jiwatanak jaktaykasmati. Ukampis kunjamtï Jesusax lurkänxa, ukhamarakiw jumax tiempoparu Diosan muspharkañ luratanakapata ukat kunsa jutïrin lurani ukanakat yatiyasma. Inas yatiqir masinakamaru jan ukax yatichirinakamaru yatiychisma. Ukat clasenkkasas kunsa Diosan Apnaqäwipax jaqinakatak lurani uks qhanañchtʼarakismawa. Ukhamatwa mayninakarux Jehová Diosar uñtʼapxañapatak yanaptʼäta. Jupakiw jiwat familiaranakasar jaktayañ muni, ukatakis chʼamaniraki.

[Qhanañchäwi]

JISKTʼANAKA:

▪ ¿Kunatsa Jesusax Lazaror jan ukspach qullqkpachäna?

▪ ¿Kunatsa Tomasax Jesusamp chika sarañax ‘jiwañjamäkchinisa jupamp chik sarañäni’ sasin mayni apostolanakar sispachäna?

▪ ¿Khitisa Jesusarux Lazaror jaktayañapatak chʼam churäna?

▪ ¿Kunsa Jesusat yatiqasisma?