JESUSMAN, amigon Lázaro may unqusqa kasqanta willanku. Chay willaytaqa, Lazarop panasnin María, Marta ima, apachimusqanku. Paykunaqa, Betaniapi tiyakurqanku. Chantapis, Jesús, Jordán mayu chimpanpi kachkaspapis, turankuta jampiyta atisqanta yuyanku. Imaraykuchus ñawpaqpiña, chayta ruwayta atisqanta rikuchirqa (Mateo 8:5-13; Juan 11:1-3).

Jesusqa, mana usqhaytachu Lazarota jampirqa. Bibliapi ninjina, ‘maypichus kachkarqa chaypi, iskay pʼunchaytawanraq qhipakurqa’ (Juan 11:6). ¿Imaraykú chayta ruwarqa? ¿Yachayta munawaqchu? *... Kunanqa chayta qhawarisun.

Jesusman, Lázaro unqusqa kasqanta willasqankumanta iskay pʼunchayninman, wañupusqanta yachanña. Chayrayku discipulosninman nin: “Jaku, uj kutitawan Judeaman rinachej”, nispa. Paykunataq kutichinku: “Qanimpalla judiosqa rumiswan chʼanqaykusuyta munarqanku. Ujtawanchu jaqayman riyta munashallankitaj?”, nispa. Jesustaq kutichin: “Lazaro kawsaqenchejqa puñushan. Kunan risaj payta rijchʼarichimoj”.

Apostolestaq Jesusman ninku: “Señor, puñushallanchus chayqa, walejyaponqachá”, nispa. Jesustaq sutʼinchan: “Lazaroqa wañupumpuni”, nispa. Chantataq apostolesnin tʼukunakunpaqjina, nin: “Kusikuni qankunarayku mana chaypi kasqaymanta [...]; kunan jaku”.

Chantá Tomasqa, apostolesman nin: “Noqanchejpis rinallataj, paywan khuska wañumuna”, nispa. ¿Imaraykú chayta nin? Imaraykuchus paykunaqa, Jesuspa enemigosnin payta wañuchiyta munasqankuta yachanku. Paywan riptinkutaq, ichá paykunatapis wañuchillanqankutaq. Jinapis, Jesuswan khuska rinku. Iskay pʼunchayninmantaq, Lazarop llaqtan Betaniaman chayanku. Chaytaq, Jerusalenmanta kimsa kilometrosninman kachkan (Juan 11:7-18).

Yachankichu, ¿imaraykú Jesús, Lazarota mana usqhaytachu jampiq rirqa?... Jesusqa, aswan ñawpaqta runasta kawsarichirqaña. Chay runasqa, pisi horasllata wañusqa karqanku (Lucas 7:11-17, 22; 8:49-56). Kunantaqrí, Lazaroqa tawa pʼunchaytaña wañusqa karqa. Manataq pipis, wañusqapuni kasqanmanta iskaychakunmanchu karqa.

Martaqa, Jesús chayamuchkasqanta yachaspa, usqhayllata taripaq rirqa. Nintaq: “Señor, kaypichus kawaj karqa chayqa, turay mana wañupunmanchu karqa”, nispa. Jesustaq sunquchan: “Turayki kawsarimonqa”, nispa. Chantá Martaqa, wasinman kutispa ñañan Mariaman  nin: “Yachachej Señorqa kaypiña, wajyasunkitaj”, nispa.

Mariataq, usqhayta Jesusta taripaq lluqsirqa. Wasinpi kaq judiostaq, panteonman waqaq richkasqanta yuyaspa, qhipanta lluqsillarqankutaq. Chantataq, María, paywan riqkunapis waqachkarqanku. Jesustaq, sunqunta nanachikuspa waqallarqataq. Chaymantaqa, maypichus Lázaro pʼampasqa kachkarqa, chayman rirqanku. Jesustaq runasta kamachin: “Chay rumita ithirichiychej”, nispa. Chaywanpis, Marta nin: “Señor, asnashanña; tawa pʼunchayña pʼampasqa kashan”.

Runataqrí, Jesusta kasuspa rumita ithirichinku. Jesustaq, Lazarota kawsarichinanpaq Diosmanta atiyta mañakun. Chantá, qhaparispa nin: “Lázaro, llojsimuy”, nispa. Chay ratopacha, Lázaro lluqsimurqa. “Makisnin, chakisnin vendaswan maytʼusqa” kasqanraykutaq, Jesús nin: “Phaskaraychej chay vendasninta”, nispa (Juan 11:19-44).

Kunan, ¿reparankichu imaraykuchus Jesús amigonta mana usqhayllata yanapasqanta?... Payqa, Tatan Jehovap atiyninta aswan sumaqta rikuchiyta munarqa. Arí, Jesusqa maychus tiemponpi chayta ruwarqa. Chayrayku, achkhas Jesuspi creerqanku (Juan 11:45). ¿Imatá Jesusmanta yachakuwaq?...

Qamqa, wañusqasta mana kawsarichiyta atispapis, Jesusjina, Diosmanta, sumaq ruwasqasninmanta ima, wakkunawan, maykʼaqchus parlanaykipaq reparay. Ichá, compañerosniykiwan, yachachiqniykiwan ima, Diospa Reinonmanta parlariwaq. Wakkunatapis, Jehovata riqsinankupaq yanapawaq. Wañusqasta kawsarichimuyta munasqanta, atiyniyuqtaq kasqanta riqsichiwaq.