Xana A Wu Swi Tiva?

Xana muapostola Pawulo a a ehleketa hi yini loko a vulavula hi ku ‘kongomisiwa enxaxamelweni’?

▪ Pawulo u te: “Xikwembu . . . [xi hi kongomisa] enxaxamelweni wa ku hlula hi fambisana na Kreste naswona xi endla nun’hwelo wa ku tiviwa ka xona wu twiwa ha hina endhawini yin’wana ni yin’wana! Hikuva eka Xikwembu hi nun’hwelo wo nandziha wa Kreste exikarhi ka lava ponisiwaka ni le xikarhi ka lava lovaka; eka lavo hetelela hi nun’hwelo lowu humaka eku feni wu ya eku feni, eka lavo sungula hi nun’hwelo lowu humaka evuton’wini wu ya evuton’wini.”—2 Vakorinto 2:14-16.

Pawulo a a kombetela eka mukhuva wa Varhoma wo endla minkhuvo yo xixima ndhuna-nkulu leyi nga hlula valala va Tiko enyimpini. Eminkhubyeni yoleyo, nhundzu swin’we ni vabohiwa lava kumiweke enyimpini a va vekiwa erivaleni naswona a ku endliwa switlhavelo hi tinkuzi loko hi hala tlhelo ndhuna-nkulu leyi nga hlula enyimpini yi dzunisiwa hi vanhu hinkwavo. Endzhaku ka sweswo, vabohiwa vo tala lava kumiweke enyimpini a va dlayiwa.

The International Standard Bible Encyclopedia yi kombisa leswaku xigego lexi nge “nun’hwelo wo nandziha wa Kreste,” lexi eka van’wana xi vulaka vutomi kasi eka van’wana xi vulaka rifu “swi nga ha endleka leswaku xi tekiwe eka mukhuva wa Varhoma wa ku hisiwa ka murhi wa risuna hi nkarhi wa minkhuvo ya vona. Swi nga ha endleka leswaku nun’hwelo wa kona a wu tsundzuxa vabohiwa lava nga kumiwa enyimpini leswaku va ta dlayiwa ku nga ri khale.” *

Xana a ku ri yini ‘tindhawu leti tlakukeke’ leti nkarhi na nkarhi ku vulavuriwaka ha tona eMatsalweni ya Xiheveru?

▪ Loko Vaisrayele va ri ekusuhi ni ku nghena eTikweni ra Xitshembiso, Yehovha u va byele leswaku va herisa tindhawu hinkwato leti Vakanana a va gandzela eka tona. U te: “Mi fanele . . . mi lovisa swifaniso swa vona hinkwaswo swa maribye, ni swifaniso swa vona hinkwaswo leswi n’okisiweke swa nsimbi mi ta swi lovisa, ni tindhawu ta vona hinkwato leti tlakukeke to kwetsima mi ta ti lovisa.” (Tinhlayo 33:52) Tindhawu teto ta vugandzeri bya mavunwa swi nga ha endleka leswaku miako ya tona a yi ri ni tindhawu leti nga pfuleka ehenhla leswaku ti nghenisa moya kumbe a ku ri ni tindhawu tin’wana leti vanhu a va hlangana eka tona, to tanihi le hansi ka mirhi ni le mitini yin’wana. (1 Tihosi 14:23; 2 Tihosi 17:29; Ezekiyele 6:3) A ti khavisiwe hi tialitari, tinsika to kwetsima, swifaniso, tindhawu leti a va hisela eka tona mirhi ya risuna ni swin’wana leswi a va swi tirhisa loko va gandzela.

Loko ku nga si akiwa tempele eYerusalema, Vaisrayele a va gandzela Yehovha etindhawini leti Matsalwa ma ti vulaka tindhawu leti tlakukeke. Muprofeta wa Xikwembu Samuwele a a endla switlhavelo “endhawini leyi tlakukeke” leyi vito ra yona ri nga boxiwangiki, naswona ndhawu ya kona yi le tikweni ra Zufu. (1 Samuwele 9:11-14) Endzhaku ka loko tempele yi akiwile, tihosi to tala leti a ti tshembekile eka Yehovha, ti ringete ku herisa ‘tindhawu teto leti tlakukeke.’—2 Tihosi 21:3; 23:5-8, 15-20; 2 Tikronika 17:1, 6.

[Nhlamuselo ya le hansi]

[Xifaniso lexi nga eka tluka 23]

Swifaniso swa minkhuvo ya Varhoma hi Lembe-xidzana ra VumbirhI C.E.

[Xihlovo Xa Kona]

Photograph taken by courtesy of the British Museum

[Xifaniso lexi nga eka tluka 23]

Tinsika To Kwetsima Leti Saleke EGezere