Mbaʼéichapa oikovaʼekue umi kristiáno ypykue?

Karpintéro rembiapo

‘Péva piko ndahaʼéi pe karpintéro raʼy?’ (MATEO 13:55)

OIMÉNE rehendúmava Jesúspe ojekuaa hague ‘karpintéroramo’ (Marcos 6:3). Péro mbaʼéichapa oikorakaʼe chugui karpintéro? La Bíbliape heʼi Jesús rehe pe ‘karpintéro raʼy’, upévare ikatu jaʼe ituvanga José omboʼe hague chupe.

Péro, mbaʼéichapa ombaʼaporakaʼe umi karpintéro síglo primérope? Mbaʼeichagua erramiéntapa oiporu hikuái? Mbaʼe mbaʼépa Jesús ojaponerakaʼe karpinteríape? Ha mbaʼéichapa oipytyvõ chupe pe tembiapo oporomboʼe hag̃ua?

Ombaʼapo hogayguándi Koʼápe jahecha mbaʼéichapa peteĩ karpintéro omboʼehína itaʼýra ypykuépe oiporukuaa hag̃ua taládro de árko. Hapykuepekuéra katu pe itaʼýra michĩvéva ojesarekohína hesekuéra.

Yma péicha ojepokuaavaʼekue hikuái, umi túva omboʼe itaʼýrape oiko hag̃ua chugui karpintéro. Haʼekuéra oñepyrũ ohekomboʼe umi mitãrusúpe orekópe 12 ha 15  áño rupi. Péro oiko hag̃ua chuguikuéra karpintéro katupyry ombaʼapovaʼerã hikuái heta áñore karpinteríape. Upéicharõ oiméne Jesús heta tiémpo ombaʼaporakaʼe José ndive. José oiméne omboʼe chupe ha péicha Jesús oaprende chugui heta mbaʼe. Ajépa ovyʼaitenerakaʼe ohechávo Jesúsgui oikoha peteĩ karpintéro katupyry!

Ko traváho ijetuʼu Umi karpintéro oikuaa porã vaʼerã mbaʼeichagua yvyrápa oiporúta. Upe tiémpope Israélpe oĩvaʼekue pe ciprés, roble, cedro, olivo ha sicómoro. Primer síglope ndaiporivaʼekue aserradéro ni umi lugár oñevendeha távla medidaitére. Upévare haʼekuéra okonsegi hag̃ua umi távla ohovaʼerã kaʼaguýpe oiporavo umi yvyramáta, oity ha upéi ogueraha umi rróllo pohýi karpinteríape.

Umi karpintéro oreko rire pe yvyra ojapokuaáma heta mbaʼe chugui. Hembiapokuéra ningo iñimportanteterei, pór ehémplo ombaʼapo pohýi vaʼerã hikuái omopuʼã hag̃ua peteĩ óga. Haʼekuéra ojapo umi víga, eskaléra óga ryepypegua, okẽ, ventána ha umi yvyra ojeporúva oñemopuʼã hag̃ua pe óga.

Ojapo avei hikuái muévle. Ko páhinape jahechakuaa umíva: armário orekóva kahón, estánte ha okẽ (1), apyka (2), sílla (3), ha opaichagua mesa (4). Ojapo avei hikuái koraʼi mitã rendag̃ua. Ha heta vése ombojeguaka umi muévle ojapóva. Upéi ombohasa hese varnís, séra térã aséite oprotehe ha omoporã hag̃ua hembiapokue.

Ojapo avei hikuái opa mbaʼe oñekotevẽva oñembaʼapo hag̃ua kokuépe. Pór ehémplo júgo (5), orkílla, rrastríllo ha pála (6). Umi arádo (7) katu imbarete porã vaʼerã, ikatu hag̃uáicha pe iérro oĩva ipúntare oike umi yvy atãre. Ojapo avei hikuái karréta (8) ha karretílla, umi irruedarã irrájova ha irrajoʼỹva. Umi karpintéro omyatyrõ avei opa mbaʼe ojapovaʼekue.

Oiméne ojekuaarakaʼe Jesús rehe ombaʼapo hague heta áño karpinteríape. Ojekuaáne ipirére okai hague kuarahy akúre, imbarete ha ipo ikallopaha oiporu heta haguére hácha, serrúcho ha martíllo.

Oiporunerakaʼe oporomboʼe hag̃ua Jesús ohechaukavaʼekue avei haʼeha peteĩ mboʼehára katupyry, oiporúvo umi ehémplo ndahasýiva omboʼe hag̃ua Ñandejára rembipota. Ha oiméne oiporurakaʼe oporomboʼe hag̃ua umi mbaʼe oaprendevaʼekue karpinteríape. Peteĩ jey haʼe oporandu: ‘Maʼerã piko upéicharõ repena pe mbaʼe kuʼi oĩvare ne ermáno resápe, péro nderehechái pe víga oĩva nde resápe?’. Jesús oikuaa porã vaʼekue mbaʼeichaitépa tuicha ha ipohýi peteĩ víga (Mateo 7:3). Tiémpo rire heʼi: ‘Pe oaráva ha ojeréva omaña hapykue gotyo ndaikatumoʼãi oike Ñandejára rréinope’. Ha oiméne Jesús ojaporakaʼe heta arádo (Lucas 9:62). Haʼe omokyreʼỹvo la héntepe omoirũ  hag̃ua chupe oiporu avei ko ehémplo: ‘Peñemoĩ chendive che júgo guýpe ha che pomboʼéta. Che júgo ningo iporã, ha che kárga ivevýi’ (Mateo 11:29, 30). Katuete Jesús ikatupyrynerakaʼe ojapo hag̃ua umi júgo iporã ha ndahasýiva ojeporu hag̃ua.

Jahecháma haguéicha Jesúspe oñehenoivaʼekue ‘karpintéro raʼy’. Oiméne umi hénte heʼi upéicha oapoʼiségui chupe. Péro umi kristiáno tee síglo primérope guare ha koʼag̃aguápe, tuichaiterei mbaʼe omoirũ upe karpintéro iñumildetévape.

[Rrekuádro oĩva páhina 26-pe]

Erramiénta ryru

Jesús haʼevaʼekue peteĩ karpintéro katupyry. Haʼe oiméne oikuaa ha oiporukuaarakaʼe umi erramiénta jahecháva koʼápe: Pe siérra ningo (1) peteĩ márko ojejapóva yvyrágui ha orekóva peteĩ óha de iérro hãimbáva serrúchoicha. Eskuádra katu (2) ojeporu oñemarka hag̃ua moõitépa oñekytĩvaʼerã pe yvyra. Ha pe plomáda (3) ojeporu oñemopuʼã porã hag̃ua peteĩ mbaʼe. Ambue erramiénta hína pe nivél (4), rrégla (5), ha sepíllo (6), orekóva iguýre peteĩ óha haimbéva omosỹi hag̃ua pe yvyra. Ha pe hácha (7) katu ojeporu ojeity hag̃ua umi yvyramáta.

Pe tórno de árko (8) ojeporu oñemboapuʼa hag̃ua pe yvyra, ha pe gubia (9) katu ojelavra hag̃ua. Pe erramiénta ryru ári jahecha peteĩ máso yvyraguigua (10). Upéva ojeporu umi klávo yvyraguigua ha eskóplo rehe. Jahecha avei peteĩ serrúcho (11), peteĩ kyse hiʼýva jováiva ojeporúva oñemoldea hag̃ua yvyra, (12) ha oĩ avei umi klávo (13). Henondépe katu oĩ peteĩ martíllo de iérro (14) ha peteĩ azuela (15), ojeporúva ojelavra hag̃ua yvyra. Pe erramiénta ryru ári jahecha avei peteĩ kyse (16) ha mokõi eskóplo (17). Ha pe mbaʼyru rehe ojeko peteĩ taládro de árko (18).