Jumae Ijjibed ko Rej Itok jen Lemnok ko an Armij Ro

LEMNOK ko kin ta eo ekkar im eo ejjab ekkar ak ta eo ej menin nebar im menin kajokok reoktõk ilo kajjojo jikin ko. Lemnok kein rej bareinwõt oktõk elikin elõñ yiõ ko. Kin men in, ñe jej riiti bwebwenato ko ilo Baibel im rar walok ilo ien ko etto, jej aikwij etali lemnok ko rar buñbuñ im tõmak ko an armij ro ilo ien eo ijellokin ar lor melele eo ar mõke kin ta eo jej riiti.

Ñõn wanjoñok, jen etale ruo lemnok ko me ekkã an Jeje ko ilo kajin Grik konono kaki, nebar im jok. Bwe jen maroñ bõk melele eo ejime kin eon ko me rej konono kin nebar im jok, jej aikwij lemnok kin ewi wãwen an kar armij ro watõki men kein ilo ien eo.

Men ko Rar Aurõk ilo Ien ko an Dri Kristian ro Mokta

Juõn dri meletlet ear ba, “Dri Grik, dri Rom, im dri Judia ro rar watõk nebar im jok einwõt men ko raurõktata ilo jukjuk im ber ko air. Armij ro rar kajerbal air mour im rar mõnõnõ in mij ñõn air jibarek buñbuñ, bõk nebar, juõn ãt emõn, im koutiej.” Kinke kõnan eo air ñõn bõk nebar ear kajur, men in ear kõmõn bwe wãwen an armij ro lemnok kin ir en jelet ir.

Buñbuñ, utiejiir, im nebar rar men ko relukkun aurõk ilo jukjuk im ber eo im elap an kar lemnok kin utiejen armij ro, ekitibuj ro reutiej im ro retã. Nebar ear berber ion lemnok eo an armij eo kin e mõke im bareinwõt lemnok ko an ro jet. Ñõn nebar juõn armij, men in ear melelen air kalikar iman mejen armij ro bwe emõn mwilin armij eo. Ear bareinwõt melelen air bwilõñ kin an mweie ak utiej, im kin men in rej kwalok air koutiej e. Juõn emaroñ bõk nebar ilo an kõmõni jerbal ko remõn ak kin an lap an tijemlok ilo men ko ej kõmõni jen ro jet. Ilo okõtõn men in, elañe kar kajirere kake juõn armij iman mejen ro jet, men in ear kõmõn bwe en jok ak iñjake bwe ro jet rejjab koutiej e. Armij in ej bõk iñjake rõt kein ejjab kin an nana bõklikõt eo an, ak kin an armij ro kananaik e.

Ke Jisõs ear konono kin an juõn armij bõk jikin “jijõt eo eutiejtata” ak “etãtata” ilo juõn kwojkwoj, men in ear kitibuj an bõk nebar ak jok, ekkar ñõn wãwen lemnok eo an armij ro ilo ran ko. (Luk 14:​8-​10) Ear or ruo ien ko dri kalor ro an Jisõs rar akwaile dron kin “wõn iair e naj laptata.” (Luk 9:​46; 22:24) Rein rar kwalok lemnok eo im elap an aurõk ilo jukjuk im ber eo air. Ilo ejja ien eo wõt, dri tel ro an kabuñ eo an dri Ju ro, ro im eutiej burueir im rar bõk jitõbõn jiaik dron, rar lemnok bwe jerbal in kwalok nan eo an Jisõs ear kajitokjen utiej im maroñ eo air. Ak jibarbar ko air ñõn kamol iman mejen armij ro bwe reutiejlok jen e ikijen kõbauwe ko air, rar jab lo tõbrõk.​—Luk 13:11-​17.

Bar juõn lemnok elap an dri Ju, dri Grik, im dri Rom ro ilo ien ko an dri Kristian ro jinoin, kar lemnok eo bwe ear juõn men ekajookok ñe rej “jibwe juõn armij im naruõn iman mejen ro jet kin men eo enana ear kõmõne.” Ke kar liabe juõn armij ilobwilij ak kalbuji, men in ear kajok e iman mejen ro mõtõn, baamle eo an, im aolep ro ilo bukwon eo an, meñe ear or ruõn kin men eo  enana ear kõmõne ak jab. An nana etan emaroñ kõmõn bwe en luji juõn lemnok emõn kin e mõke im kokkure kõtan eo an iben ro jet. Men eo elaplok an kajokok jen air liabe juõn armij ilobwilij, ej ñe rej wutik nuknuk ko an ak dreñlokwe. Men kein rar kõmõn bwe armij ren kijirãte im kajirere kake e im ear kõmõn bwe en nana etan iben armij ro.

Kaje eo ekajookoktata ej ñe juõn armij ej mij ion alal in iñtan eo. Juõn dri meletlet etan Martin Hengel ear ba bwe kar kajerbal kaje in “ñõn dri kamakoko ro wõt. Kin men in, ear kõkkar kin jok im iñtan eo ekanuij lap.” Inem armij ro rar jibed baamle eo im ro mõtõn armij in kar kajok e bwe ren karmijeteik e. Kinke Kraist ear mij ilo wãwen in, aolep ro im rar kõnan erom dri Kristian ilo ien eo, rar aikwij jelmae kajirere jen armij ro. Enañin aolep armij ro rar watõke bwe ej juõn menin bwebwe ñõn an juõn kwalok bwe ej dri kaloran juõn eo im rar totoik ion alal in iñtan eo. Dri jilik Paul ear je, “Kim kwalok Kraist eo emwij [totoik] E, lõkatip ñõn dri Ju, im bwebwe ñõn dri ailiñ ko.” (1 Kor. 1:​23) Ewi wãwen an kar dri Kristian ro jinoin anjo ion wãwen in ebin?

Lemnok eo Eoktõk kin Men ko Raurõk

Dri Kristian ro jinoin rar bokake kien eo im rar kate ir ñõn bõprae jok eo ej itok jen mwil enana. Dri jilik Piter ear je, “Enjelok iami en iñtan kin an dr’urõt, ak dri kwot, ak dri kõmõn nana, ak dri wãlok ilo men ko an armij ro jet.” (1 Pit. 4:​15) Bõtab, Jisõs ear kanan bwe dri kalor ro an renaj bõk matõrtõr kin air jutõk kin etan. (Jon 15:20) Piter ear je, “Elañe armij ej iñtan kin an dri Kristian, en jab ãliklik  [ak jok], a en kaibujuij Anij.” (1 Pit. 4:​16) An juõn jab jok kin an iñtan einwõt juõn dri kaloran Kraist ear kalikar bwe ear oktõk wãwen an lemnok jen kar armij ro ilo ien eo.

Dri Kristian ro rar jab kõtlok bwe wãwen lemnok eo an armij ro en jelet mwiliir. Ilo jukjuk im ber eo an dri Kristian ro jinoin, ear juõn menin bwebwe ñõn air watõk armij eo kar totoik ion alal in iñtan eo bwe ej Messaia eo. Lemnok in emaroñ kar lap an jibed dri Kristian ro ñõn air bõk ejja lemnok eo wõt an armij ro. Bõtab, rar kwalok air tõmak bwe Jisõs kar Messaia eo ilo air lor e, meñe armij ro rar kajirere kake ir. Jisõs ear ba: “Jabrewõt eo e naj jokkake Iõ im nan ko Aõ, ilo ebeben in ej lũñ im jerawiwi, Nejin armij e naj jokkake e, ien eo Ej itok ilo aibujuij an Jemen iben enjel rokwojarjar.”​—Mark 8:​38.

Ranin, jemaroñ jelmae ijjibed ko im rej kajeoñ in kõmõn bwe jen ilok jen kabuñ in Kristian. Ijjibed kein remaroñ itok jen dri jikuul ro mõtar, ro dri turid, ak dri jerbal ro mõtar, ro im rej kajeoñ in kõmõn bwe jen bõk kwonad ilo makõtkit ko retton im jab mol. Rein remaroñ kajeoñ in kõmõn bwe jen jok kin ar lor kien ko rewãnik an Anij. Ta eo jej aikwij kõmõne?

Kajeoñwe Ro Rar Kejekron Jok

Bwe en drebij wõt an tiljek ñõn Jeova, Jisõs ear iion mij eo elaptata an kar kajokok. ‘E ar iñtan ion alal in iñtan eo, im kejekron jok eo.’ (Hib. 12:2) Dri kijirãt ro an Jisõs rar jeptake, emmõje, wutik nuknuk ko an, dreñlokwe, dilaiki, im kajirere kake e. (Mark 14:65; 15:29-​32) Meñe eindrein, Jisõs ear kejekron air kajok e iman mejen armij ro. Ewi wãwen? Ear jab ebwer meñe ear iion wãwen kein. Jisõs ear jela bwe ear aurõk iman mejen Jeova, im ear jab bukot nebar jen armij ro. Meñe Jisõs ear mij ilo wãwen eo rej kõmõn ñõn juõn dri kamakoko, ak Jeova ear koutiej e ikijen an kar kejerkakbijeik e im kõmõn bwe en eo kein karuo utiejtata ilõñ. Ilo Dri Pilippai 2:​8-​11 ej ba, ‘Kraist Jisõs E ar mõke kõtãik E, im E ar bokake ñõn mij, aet, mij eo ion alal in iñtan eo. Kin men in bareinwõt Anij e ar kanuij koutiej E, im lelok ñõn E Ãt eo e utiej jen ãt otemjej, bwe ilo etan Jisõs bukwe otemjej ren bukwelõlõ, an dri lõñ, im dri lõl, im dri iomin lõl, im bwe lo otemjej ren kwalok bwe Jisõs Kraist e Iroij, ñõn aibujuij an Anij Jemen.’

Jisõs ear kile bwe enaj or iñjake ko kin jok im renaj walok jen mij eo an. Ear bareinwõt inebata kin an naj nana etan Jeova elañe rar naruõn kin blaspim. Inem Jisõs ear kajitõk iben Jeova bwe en jab kõtlok bwe men in ekajookok en walok. Ear jar, “Kwon bõklok kõp in jen Iõ.” Bõtab, Jisõs ear kõtãik e ñõn an kõmõnmõn ankilan Anij. (Mark 14:36) Ear jutõk bin nae ijjibed ko kar bõktok ion im ear kejekron men in ekajookok. Men in ej eindrein kinke ro wõt im rar bõk wãwen lemnok eo an armij ro ilo ien eo renaj kar jok. Alikar bwe ear jab wãwen drein an kar Jisõs lemnok.

Rar bareinwõt kalbuji im dreñlokwe dri kalor ro an Jisõs. Wãwen kein kar kõmõn ñõn ir ear kõmõn bwe armij ro ren jab koutiej ir im rar kejekron im kijirãte ir. Meñe eindrein, ak men kein rar jab kõmõn bwe ren ebwer. Dri kalor ro remol rar jumae ijjibed ko rej itok jen lemnok ko an armij ro im rar kejekron jok eo. (Matu 10:17; Jerb. 5:​40; 2 Kor. 11:23-​25) Rein rar jela bwe rar aikwij ‘kwotak alal in iñtan eo ran otemjej, im lor Jisõs.’​—Luk 9:​23, 26.

Ak ta kin kij ranin? Men ko lõl in ej watõki menin bwebwe, mõjino, im ekajookok, Anij ej watõki einwõt menin meletlet, rekajur, im raurõk. (1 Kor. 1:​25-​28) Ejjab ke juõn menin bwebwe im jajelokjen elañe jej kõtlok bwe lemnok ko an armij ro ren jelet kij?

Jabrewõt eo ekõnan bõk nebar ej kaurõk wãwen an lõl in lemnok kin e. Bõtab, einwõt Jisõs im dri kalor ro an, jekõnan bwe Jeova en Jerar. Kin men in, jenaj kaurõk men ko Jeova ej kaurõki im men ko rekajookok iben Jeova jen bareinwõt watõki bwe rekajookok.

[Pija ilo peij 4]

Lemnok ko an armij ro kin jok ear jab jelet Jisõs