Ki mannyer Zezi i glorifye ladrwatir Zeova?
Ki mannyer Zezi i glorifye ladrwatir Zeova?
“Bondye in swazir [Kris], pour ki par son disan, par mwayen lafwa, pese dimoun i ganny pardonnen. Bondye in fer sa pour montre son lazistis.”—ROM. 3:25.
1, 2. (a) Ki Labib i ansennyen lo kondisyon limanite? (b) Ki kestyon ki pou ganny diskite dan sa lartik?
BOKOU dimoun i konn sa resi dan Labib konsernan rebelyon dan zarden Edenn. Nou tou nou santi lefe pese Adan, zis parey i ganny eksplike dan sa parol: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” (Rom. 5:12) Menm si nou kapab fer en kantite zefor pour fer sa ki byen, nou fer bann fot e pour sa nou bezwen ganny pardonnen avek Bondye. Menm zapot Pol ti plennyen an dizan: “Mon pa fer sa ki byen ki mon anvi fer, me mon fer sa ki mal, ki mon pa anvi fer. Malere! La sa ki mon ete!”—Rom. 7:19, 24.
2 Vi ki nou’n ne avek sa tandans pour fer pese, i byen pour nou demann nou lekor sa bann kestyon: Ki mannyer i’n posib pour Zezi sorti Nazaret ne san erit pese e akoz i ti ganny batize? Ki mannyer lavi Zezi lo later ti glorifye ladrwatir Zeova? Pli enportan ankor, ki lanmor Zezi in akonplir?
Ladrwatir Bondye i ganny kestyonnen
3. Ki mannyer Satan ti anbet Ev?
3 Adan ek Ev, nou premye paran, ti fer zot bet e rezet dominasyon Bondye. Zot ti swazir pour zot ganny dirize par “sa serpan lantikite, ki apel dyab ou Satan.” (Rev. 12:9) Remarke ki mannyer sa ti arive. Satan ti kestyonnen si Zeova i diriz avek ladrwatir. I ti fer sa kan i ti demann Ev: “Eski i vre ki Bondye in dir zot pa manz fri dan tou pye dibwa sa zarden?” Ev ti repet klerman ki Bondye ti’n dir zot pa tous en pye spesifik dan sa zarden akoz si zot ti fer li, zot ti pou mor. Apre sa, Satan ti akiz Bondye konmkwa i ti pe koz manti, akoz i ti dir: “Non, zot pa pou mor.” I ti anbet Ev e fer li krwar ki Bondye ti pe priv li en bon keksoz e ki si i manz sa fri, i ti pou vin parey Bondye, i ti pou kapab deside pour li menm kwa ki byen e kwa ki mal.—Zen. 3:1-5.
4. Konman ki imen in finalman tonm anba dominasyon Satan?
4 Anfet, Satan ti pe sey dir ki bann imen ti pou pli ere si zot ti endepandan avek Bondye. Olye siport ladrwatir Bondye, Adan ti ekout son madanm e li osi i ti manz sa fri ki zot pa ti devret manze. Pour fini kont, Adan ti gat sa bon relasyon ki i ti annan avek Zeova e finalman tou son desandans in erit pese ek lanmor ki en fardo lo nou. An menm tan, limanite ti tonm anba dominasyon Satan, “bondye sa lemonn.”—2 Kor. 4:4, King James Version; Rom. 7:14.
5. (a) Ki mannyer Zeova ti fer sa ki i ti dir? (b) Ki lespwar Bondye ti donn desandans Adan ek Ev?
5 Zeova ti pas santans lanmor lo Adan ek Ev, zis parey i ti’n dir i pou fer. (Zen. 3:16-19) Me sa pa vedir ki plan Bondye ti’n tonm dan delo. O kontrer, kan i ti pe pas santans lo Adan ek Ev, Zeova ti donn zot desandans en rezon pour annan lespwar. I ti fer sa kan i ti koz lo plan ki i ti annan pour prodwi en “desandans” ki Satan ti pou bles lo talon. Par kont, talon sa desandans ti pou geri e i ti pou ‘kraz latet Satan.’ (Zen. 3:15) Labib i koz en pe plis lo sa tenm ler i dir sa konsernan Zezi Kri: “La rezon akoz Garson Bondye in aparet, se zisteman pour detri bann travay dyab.” (1 Zan 3:8) Me ki mannyer kondwit ek lanmor Zezi ti glorifye ladrwatir Bondye?
Sinifikasyon batenm Zezi
6. Ki mannyer nou konnen Zezi pa ti erit pese Adan?
6 Kan i ti en adilt, Zezi ti devret egal avek Adan ler i ti ankor parfe. (Rom. 5:14; 1 Kor. 15:45) Sa i vedir ki Zezi ti pou bezwen ne parfe. Ki mannyer sa ti pou posib? Lanz Gabriyel ti klerman eksplik Mari, manman Zezi: “Lespri sen i a desann lo ou, Bondye i a kouver ou avek son pisans; e pour sa rezon, sa zanfan ki pou ne pou sen, i pou apel Garson Bondye.” (Lik 1:35) Aparaman, depi byen zenn Mari ti’n dir Zezi laverite konsernan son nesans. Se pour sa rezon ki, en fwa kan Mari ek Zozef, papa sonnyen Zezi, ti vwar Zezi dan tanp Bondye, sa zanfan ti demande: “Zot pa konnen ki mon bezwen dan lakaz mon Papa?” (Lik 2:49) I evidan ki depi byen zenn Zezi ti konnen ki i ti Garson Bondye. I ti vreman anvi glorifye ladrwatir Bondye.
7. Kwa ki Zezi ti annan ki ti presye?
7 Zezi ti montre ki i ti senserman enterese avek bann keksoz spirityel akoz i ti asiste bann renyon pour ladorasyon regilyerman. Avek sa lespri parfe ki i ti annan, sirman i ti kapab aprann e konpran tou sa ki i ti tande e lir dan Lekritir Ebre. (Lik 4:16) I ti osi annan en lot keksoz presye. I ti annan en lekor imen parfe ki ti kapab ganny sakrifye pour bann imen. Kan i ti ganny batize, Zezi ti pe priye e petet i ti pe mazin sa parol profetik dan Psonm 40:6-8.—Lik 3:21; lir Ebre 10:5-10. *
8. Akoz Zan Batis pa ti oule Zezi i batize?
8 Zan Batis pa ti oule batiz Zezi o konmansman. Akoz? Parski Zan ti pe batiz bann Zwif pour montre ki zot ti’n repantir zot pese kont Lalwa. Zan ti en fanmir pros Zezi, sirman i ti konnen ki Zezi ti en dimoun drwat, alor i pa ti neseser pour li repantir. Me Zezi ti asir Zan ki i ti neseser pour Li ganny batize. Zezi ti eksplike: “Koumsa ki nou pou fer tou sa ki zis.”—Mat. 3:15.
9. Ki batenm Zezi ti reprezante?
9 Konman en imen parfe, sirman Zezi ti’n kapab krwar ki parey Adan, i ti annan sa posibilite pour vin papa en ras ki parfe. Par kont, Zezi pa ti zanmen anvi fer en keksoz koumsa, akoz sa pa ti lavolonte Zeova. Bondye ti’n anvoy Zezi lo later pour akonplir son rol konman sa desandans ki ti’n ganny promet ouswa Mesi. Sa ti enplik sakrifye son lavi parfe lo later konman en sakrifis. (Lir Izai 53:5, 6, 12. *) Byensir, batenm Zezi ti napa menm sinifikasyon avek sa ki pour nou. I pa ti enplik dedye son lavi avek Zeova parski Zezi ti deza form parti nasyon Izrael ki ti en pep ki ti dedye avek Zeova. O kontrer, batenm Zezi ti pe montre ki i ti’n prezant son lekor pour fer lavolonte Bondye parey ti’n ganny predir dan Lekritir konsernan Mesi.
10. Ki i ti enplike pour fer lavolonte Bondye konman Mesi e ki mannyer Zezi ti santi anver sa?
10 Pour Zezi, fer lavolonte Bondye ti enplik pres sa bon nouvel lo Rwayonm Bondye, fer disip e prepar zot pour sa travay fer disip ki zot ti pou fer a lavenir. Ler Zezi ti prezant son lekor avek Bondye pour fer son lavolonte, sa ti montre ki i ti’n volonterman pare pour andir persekisyon e menm en lanmor kriyel pour siport ladrwatir Zeova konman Souvren. I ti en plezir pour Zezi fer lavolonte Bondye akoz i ti kontan son Papa ki dan lesyel en kantite e i ti en lazwa pour li prezant son lekor konman en sakrifis. (Zan 14:31) I ti osi kontan pour konnen ki i ti kapab ofer valer son lavi parfe avek Bondye konman en ranson pour ki nou ganny delivre dan lesklavaz pese ek lanmor. Eski Bondye ti dakor pour Zezi ofer son lekor e desarz sa bann gro responsabilite? Definitivman wi!
11. Ki mannyer Zeova ti montre ki i ti aksepte Zezi konman sa Mesi ouswa Kris ki ti’n ganny promet?
11 Sa kat ekriven Levanzil ti dir ki Zezi ti ganny laprouvasyon Zeova ler i ti pe sorti dan delo Larivyer Zourden. Zan Batis ti dir: “Mon ti war Lespri-sen desann sorti dan lesyel parey en kolonm e apoz lo li. . . . Mwan mon’n war sa, e la mon temwannye, ki limenm Garson Bondye.” (Zan 1:32-34) Deplis, pandan sa menm moman, Zeova ti dir: “Sa mon Garson byenneme, ki donn mwan bokou lazwa.”—Mat. 3:17; Mark 1:11; Lik 3:22.
Fidel ziska lanmor
12. Ki Zezi ti fer pandan trwa-z-an edmi apre son batenm?
12 Diran sa trwa-z-an edmi ki ti vini apre, Zezi ti fer bokou zefor pour ansenny bann dimoun lo son Papa e lo lefet ki Bondye i diriz avek ladrwatir. Sa bann vwayaz ki i ti fer apye partou dan Later Promiz ti fer li fatige, me napa nanryen ki ti kapab anpes li anons laverite plennman. (Zan 4:6, 34; 18:37) Zezi ti ansenny lezot konsernan Rwayonm Bondye. I ti geri bann malad, nouri bann lafoul lafen e menm resisit dimoun mor. Tousala ti pe montre sa ki Rwayonm Bondye pou fer pour limanite.—Mat. 11:4, 5.
13. Ki Zezi ti ansennyen konsernan lapriyer?
13 Avek limilite, Zezi ti loue Zeova pour sa lansennyman ek mirak ki i ti pe fer pour geri bann malad, olye rann glwar son lekor, e sa i en legzanp remarkab. (Zan 5:19; 11:41-44) Zezi ti osi fer konnen sa ki pli enportan pour priy lo la. Dan nou lapriyer, nou devret priye pour ki non Bondye, setadir Zeova “i ganny vwar konman sen” (not dan NW) e ki dominasyon Bondye i ranplas move dominasyon Satan pour ki Son “lavolonte i ganny akonpli lo later parey dan lesyel.” (Mat. 6:9, 10) Zezi ti osi ankouraz nou pour viv an armoni avek sa kalite lapriyer par ‘rod plito Rwayonm Bondye ek lazistis Bondye.’—Mat. 6:33.
14. Menm si Zezi ti parfe, akoz i ti demann zefor pour li akonplir son rol dan plan Bondye?
14 Anmezir sa letan kot i ti pou mor konman en sakrifis ti pe aprose, Zezi ti vin pli konsyan konsernan sa gro responsabilite ki ti lo li. Plan ek repitasyon son Papa ti pe depan lo si i pou reste fidel malgre sa leprev enzis ek en lanmor kriyel. Senk zour avan son lanmor, Zezi ti priye: “Aprezan, mon leker i trouble. E ki mon pou dir? ‘Papa eparny mwan sa moman soufrans?’ Me se pour sanmenm sa moman ki mon’n vini.” Apre ki i ti’n eksprim sa bann santiman natirel, Zezi pa ti konsantre lo son lekor plis, me i ti konsantre plito lo sa keksoz ki ti pli enportan e priye: “Papa glorifye ou non.” Zeova ti reponn deswit: “Mon’n deza glorifye li e mon pou glorifye li ankor.” (Zan 12:27, 28) Wi, Zezi ti volonterman pare pour pas atraver sa pli gran tes lentegrite ki okenn imen pa’n deza bezwen pas atraver. Sirman, kan i ti tann parol son Papa sa ti donn Zezi konfyans ki i ti pou reisi glorifye e zistifye souvrennte Zeova. San okenn dout i ti reisi!
Ki lanmor Zezi ti akonplir
15. Zis avan i ti mor, akoz Zezi ti dir: “Tou in akonpli”?
15 Avan pran son dernyen souf lo sa poto martir, Zezi ti dir: “Tou in akonpli!” (Zan 19:30) Pa i vre ki pandan sa trwa-z-an edmi apre son batenm ziska son lanmor Zezi ti reisi akonplir bann gran keksoz avek led Bondye! Kan Zezi ti mor, i ti annan en gro tranblemandter ki ti arive, e en zofisye larme Romen ki ti responsab pour son egzekisyon ti ganny pouse pour dir: “Vreman sa ti Garson Bondye.” (Mat 27:54) I tre probab ki sa zofisye ti’n vwar kan Zezi ti pe ganny monke ler i ti pe dir ki i Garson Bondye. Malgre tou sa ki i ti’n pas atraver, Zezi ti gard son lentegrite e prouve ki Satan i en gran manter. Konsernan tou bann ki siport souvrennte Bondye, Satan ti dir: “En dimoun pou donn tou sa ki i annan pour sov son lavi.” (Zob 2:4, Complete Jewish Bible) Atraver son fidelite, Zezi ti montre ki Adan ek Ev ti pou’n kapab reste fidel dan zot leprev ki ti pli fasil. Pli enportan ankor, lavi ek lanmor Zezi ti siport e glorifye ladrwatir Zeova konman Souvren. (Lir Proverb 27:11. *) Eski i annan lezot keksoz ki lanmor Zezi in akonplir? Definitivman wi!
16, 17. (a) Akoz bann Kretyen avan letan Zezi ti kapab annan en bon relasyon avek Bondye? (b) Ki rekonpans Zeova ti donn son Garson pour son fidelite e ki Senyer Zezi Kri pe kontinyen fer?
16 Plizyer serviter Zeova ti viv avan ki Zezi ti vin lo later. Zot ti annan en bon relasyon avek Bondye e zot ti annan sa lespwar pour ganny resisite. (Iza. 25:8; Dan. 12:13) Me lo ki baz, Zeova, sa Bondye sen ti pou beni sa bann imen fidel enparfe dan sa fason merveye? Labib i eksplike: “Se li [Zezi Kri] ki Bondye in swazir, pour ki par son disan, par mwayen lafwa, pese dimoun i ganny pardonnen. Bondye in fer sa pour montre son lazistis akoz dan letan pase in montre pasyans, e i pa’n pini zonm pour zot pese; sa se pour prouv, dan letan prezan, ki limenm Bondye i zis, e ki i zistifye tou sa ki annan lafwa dan Zezi.”—Rom. 3:25, 26.
17 Zeova ti rekonpans Zezi par resisit li e donn li en pozisyon pli siperyer ki sa enn ki i ti annan avan vin lo later. Aprezan, Zezi i en lespri imortel. (Ebr. 1:3) Konman Gran Pret ek Lerwa, Senyer Zezi Kri pe kontinyen ed bann ki swiv li pour glorifye ladrwatir Bondye. Eski pa nou vreman rekonesan ki Zeova, nou Papa ki dan lesyel, i sa Enn ki rekonpans tou sa ki fer sa e ki imit son Garson par servi li fidelman?—Lir Psonm 34:3; * Ebre 11:6.
18. Ki lot lartik letid pou koz lo la?
18 Tou bann imen fidel ziska lepok Abel ti annan en relasyon pros avek Zeova akoz zot ti annan lafwa ek konfyans dan sa Desandans ki ti’n ganny promet. Zeova ti konnen ki son Garson ti pou gard son lentegrite e ki son lanmor ti pou en ranson parfe pour kouver “pese lemonn.” (Zan 1:29) Lanmor Zezi in anmenn byenfe pour bann dimoun dan nou letan osi. (Rom. 3:26) Alor, ki byenfe ranson Kris in anmennen pour ou? Sa pou ganny diskite dan prosen lartik letid.
[Not anba lo paz]
^ par. 7 La zapot Pol pe sit Psonm 40:6-8 dapre tradiksyon Septant an Grek, ki osi enkli sa parol “ou’n prepar en lekor pour mwan.” Napa sa fraz dan bann vye maniskri Lekritir Ebre ki nou annan.
^ par. 9 Izai 53:5, 6, 12: “I ti ganny perse pour nou lofans; I ti ganny kraze pour nou bann fot. Pinisyon ki ti sipoze anmenn lape pour nou i’n vin lo li, e akoz son bann blesir nou’n ganny geri. Parey bann mouton nou tou nou ti bann dimoun eran, sakenn ti pe mars dan son prop semen; e Zeova li menm in fer ki nou tou nou larg nou fot lo sa enn. Se pour sa rezon ki mon pou donn li en par parmi plizyer e i pou al avek sa ki reste parmi bann ki pwisan parski i’n ofer son lavi pour mor e i’n ganny konte parmi bann ki komet lofans e li menm in anmenn pese bokou dimoun e i’n konmans entervenir pour bann ki komet lofans.”
^ par. 15 Proverb 27:11: “Vin saz, mon garson e rezwir mon leker, pour ki mon a kapab reponn sa enn ki pe provok mwan.”
^ par. 17 Psonm 34:3: “O glorifye Zeova avek mwan, zot lepep, e annou loue son non ansanm.”
Ki ou pou reponn?
• Ki mannyer ladrwatir Bondye ti ganny kestyonnen?
• Ki batenm Zezi ti reprezante?
• Ki lanmor Zezi ti akonplir?
[Kestyon]
[Portre lo paz 16]
Eski ou konnen ki batenm Zezi ti reprezante?