Epanọ Jesu Ọ Rọ Kpare Ẹrẹreokie Ọghẹnẹ Kpehru
Epanọ Jesu Ọ Rọ Kpare Ẹrẹreokie Ọghẹnẹ Kpehru
“Ọghẹnẹ [ọ rọ Kristi] dhearo re ọ rọ fiki azẹ riẹ jọ ikiofu, re ahwo a rehọ ẹrọwọ rehọ iẹe. Onana, re u dhesẹ ẹrẹreokie Ọghẹnẹ.”—ROM 3:25.
1, 2. (a) Eme Ebaibol i wuhrẹ omai kpahe uyero ahwo-akpọ? (b) Enọ vẹ a te kuyo rai evaọ uzoẹme nana?
MAI kpobi ma riẹ ikuigbe Ebaibol nọ e ta kpahe ọwọsuọ nọ ọ roma via evaọ ọgbọ Idẹn. Uzioraha Adamu na u kpomahọ omai kpobi, wọhọ epanọ ikere na e ta, inọ: “Umuomu orọ fiki omọvo vaha ruọ akpọ na, gbe uwhu fiki izieraha, fikiere uwhu u te zite ahwo kpobi . . . keme ahwo kpobi a raha uzi.” (Rom 5:12) Makọ epanọ ma daoma te kẹhẹ re ma ru oware ezi, ma re ru thọ, fikiere ma gwọlọ erọvrẹ Ọghẹnẹ. Pọl ukọ na dede o bruenu inọ: “Uwoma nọ omẹ jẹ iroro nọ me re ruẹ me ru hu, rekọ eyoma nọ o rọ eva mẹ hẹ oyeọvo me ru. O! Ovuogho nọ omẹ rọ!”—Rom 7:19, 24.
2 Fikinọ mai kpobi erahaizi, ma sae nọ enọ nana nọ i wuzou na, inọ: Ẹvẹ o sae rọ lọhọ re a yẹ Jesu ohwo Nazarẹt na ababọ uzioraha, kọ fikieme ọ rọ họ-ame? Ẹvẹ uzuazọ nọ Jesu o yeri o rọ kpare ẹrẹreokie Jihova kpehru? Tubẹ mai wuzou, eme uwhu Kristi u rugba?
A Fi Avro họ Ẹrẹreokie Ọghẹnẹ
3. Oghẹrẹ vẹ Setan ọ rọ viẹ Ivi họ?
3 Ọsẹgboni ọsosuọ mai, Adamu avọ Ivi, a rehọ ugheghẹ siọ esuo Ọghẹnẹ, a tẹ jẹ esuo “oriọvọ anwae na ọnọ a re se Ukumuomu gbe Setan na” rehọ. (Evia. 12:9) Dai roro kpahe oghẹrẹ nọ onana o rọ via. Setan o fi avro h’otọ sọ Jihova Ọghẹnẹ ọ be rehọ ẹrẹreokie su. O ru ere nọ ọ nọ Ivi inọ: “Kọ Ọghẹnẹ ọ ghinẹ ta nọ wha re ubi-ure ovuovo eva ogba na ha?” Ivi ọ tẹ wariẹ uzi nọ Ọghẹnẹ o jie kẹ ae inọ a re ubi-ure jọ họ evaọ ọgbọ na, re a seba ewhu. Setan ọ tẹ ta nọ Ọghẹnẹ ọ ta erue. Ọ ta nọ: “Wha re ti whuẹ hẹ.” Ọ tẹ viẹ Ivi họ rọwo inọ Ọghẹnẹ ọ be gbọe omamọ oware jọ, inọ ọ tẹ re ubi-ure na, ọ te jọ wọhọ Ọghẹnẹ, jẹ sai su omobọ riẹ.—Emu. 3:1-5.
4. Oghẹrẹ vẹ ahwo-akpọ a rọ ziọ otọ esuo Setan?
4 Setan ọ rọ etata eme riẹ dhesẹ inọ ahwo-akpọ a te mae wereva nọ a gbẹ rrọ otọ esuo Ọghẹnẹ hẹ. Ukpenọ Adamu o re ru onọ Ọghẹnẹ ọ ta kẹe, ọ tẹ gaviezọ kẹ aye riẹ je kuomagbei re ubi-ure nọ a ta kẹ ae nọ a re he. Enẹ Adamu o ro ku ẹgbagba riẹ fiẹ, o te fi omai họ igbo uzioraha gbe uwhu. Onana o tẹ whae ze nọ ahwo-akpọ kpobi a rọ ziọ otọ esuo Setan, “ọghẹnẹ akpọ nana.”—2 Kọr. 4:4; Rom 7:14.
5. (a) Ẹvẹ Jihova o ro ru epanọ ọ ta gba? (b) Didi ẹruore Ọghẹnẹ ọ kẹ emọ Adamu avọ Ivi?
5 Nwane wọhọ epanọ Jihova ọ ta no vẹre, o te bruoziẹ uwhu kpe Adamu avọ Ivi. (Emu. 3:16-19) Rekọ oyena u dhesẹ nọ ẹjiroro Ọghẹnẹ ọ raha no ho. Vievie. Nọ Jihova o je bruoziẹ kpe Adamu avọ Ivi, ọ kẹ emọ nọ a ti yẹ uvi ẹruore. O ru ere nọ ọ ta inọ o ti vi ‘ubi’ jọ ze, ọnọ Setan ọ te nwa-oma ithihrawọ. Rekọ oma nọ ọ te nwa Ubi na u ti kpo, kẹsena ubi na ọ vẹ te “nwa [Setan] uzou.” (Emu. 3:15) Ebaibol i fiẹgba họ ẹme yena nọ e ta kpahe Jesu Kristi inọ: “Oware nọ o lẹliẹ Ọmọ Ọghẹnẹ na nọ ọ jẹ via [họ], re ọ ruẹse te raha iruo ukumuomu na.” (1 Jọn 3:8) Rekọ oghẹrẹ vẹ uruemu Jesu gbe uwhu riẹ e rọ kpare ẹrẹreokie Ọghẹnẹ kpehru?
Oware nọ Ame-Ọhọ Jesu U Dhesẹ
6. Ẹvẹ ma rọ riẹ inọ Jesu ọ reuku uzioraha no obọ Adamu ze he?
6 Nọ Jesu ọ tẹ rro te ohwo no, o gwọlọ inọ ọ rẹ jọ wọhọ epanọ Adamu ọ jọ taure ọ tẹ te raha uzi. (Rom 5:14; 1 Kọr. 15:45) Onana o gwọlọ inọ a re yẹ Jesu gbagba. Kọ ẹvẹ o te sae rọ lọhọ? Gebriẹl ẹnjẹle na ọ ta vevẹ kẹ Meri, oni Jesu, inọ: “Ẹzi Ẹri na o re ti bru owhẹ tha, ogaga Oride na ọ rẹ te rehọ uwoho ruru owhẹ; fiki ere, ọmọ nọ a re ti yẹ na, a re ti sei Ọrẹri, Ọmọ Ọghẹnẹ.” (Luk 1:35) O wọhọ nọ okenọ Jesu ọ jọ ọmaha, Meri o gbiku kẹe kpahe oghẹrẹ nọ o ro dieva riẹ họ. Agbẹta nọ Jesu ọ rọ ta kẹ Meri avọ Josẹf ẹdẹjọ nọ a gwọlọ ku ei evaọ obọ etẹmpol, inọ: “Wha gbẹ riẹ nọ mẹ rẹ jọ eva uwou Ọsẹ mẹ?” (Luk 2:49) U muẹro inọ no emaha ze, Jesu ọ riẹ nọ ọye yọ Ọmọ Ọghẹnẹ. Fikiere, o jariẹ oja gaga re ọ kpare ẹrẹreokie Ọghẹnẹ kpehru.
7. Eware eghaghae vẹ Jesu o wo?
7 Jesu o dhesẹ nnọ o se eware abọ-ẹzi gboja ẹkwoma eria egagọ nọ ọ jẹ hai kpohọ ẹsikpobi. Nọ o wo iroro egbagba na, o je wo otoriẹ eware kpobi nọ o yo je se no Ikereakere Hibru na ze. (Luk 4:16) O te je wo oware oghaghae ọfa jọ, oyehọ ugboma ọgbagba nọ ọ rẹ sai ro dheidhe fiki ahwo-akpọ. Okenọ Jesu ọ jẹ họ-ame, ọ jẹ lẹ yọ ẹsejọhọ o bi roro kpahe eme nọ e rrọ Olezi 40:6-8 na.—Luk 3:21; se Ahwo Hibru 10:5-10. *
8. Fikieme Jọn Ọhọahwo-Ame na ọ jẹ rọ gwọlọ whaha Jesu ame-ọhọ?
8 Jọn Ọhọahwo-Ame na ọ jẹ gwọlọ whaha Jesu ame-ọhọ. Fikieme? Keme Jọn ọ jẹ họ ahwo Ju ame ro dhesẹ inọ a kurẹriẹ no izieraha rai no. Fikinọ Jọn avọ Jesu yọ imoni, u muẹro inọ ọ riẹ nnọ Jesu o kiẹrẹe, fikiere ọ gwọlọ ekurẹriẹ hẹ. Jesu ọ tẹ ta kẹ Jọn inọ u fo re Jọn ọ họe ame. Jesu o ru rie vẹ inọ: “Ere u fo omai re ma ru eware kpobi nọ u kiete gba.”—Mat. 3:15.
9. Eme ame-ọhọ Jesu u dikihẹ kẹ?
9 Jesu ọ hai roro inọ fikinọ ọ rrọ gbagba wọhọ Adamu, ọ rẹ sai yẹ emọ egbagba. Ghele na, Jesu o wo isiuru itieye na ha keme ọ riẹ inọ oreva Ọghẹnẹ rọ kẹe oye he. Ọghẹnẹ o vi Jesu ziọ otọakpọ re ọ jọ Ubi eyaa na, koyehọ Mesaya na. Oyena u kugbe uzuazọ ogbagba Jesu nọ o re ro dheidhe. (Se Aizaya 53:5, 6, 12.) Ginọ uzẹme inọ oware nọ ame-ọhọ Jesu u dikihẹ kẹ u wo ohẹriẹ no ọmai. Jesu ọ roma mudhe kẹ Jihova ha, keme orẹwho Izrẹl nọ o roma mudhe kẹ Ọghẹnẹ no o noze. Ukpoye, ame-ọhọ riẹ u dhesẹ inọ ọ roma riẹ kẹ eruo oreva Ọghẹnẹ wọhọ epanọ a jọ ikere na ruẹaro riẹ kpahe Mesaya na.
10. Eme o gwọlọ mi Mesaya na re o ru oreva Ọghẹnẹ, kọ ẹvẹ o jọ Jesu oma re o ru onana?
10 Oreva Jihova kẹ Jesu họ re ọ ta usiuwoma Uvie Ọghẹnẹ, ru ilele, je wuhrẹ ilele na kẹ iruo usiuwoma ota na. Oma nọ Jesu ọ rọ kẹ na u kugbe ukpokpoma nọ o ti thihakọ riẹ o ve je whu uwhu oja ro dhesẹ inọ ọ roma riẹ kpobi kẹ esuo okiẹrẹe Jihova Ọghẹnẹ. Fikinọ Jesu o you Ọsẹ obọ odhiwu riẹ, o were riẹ re o ru oreva riẹ, u te je noi eva ze re ọ rehọ ugboma riẹ dheidhe. (Jọn 14:31) O tẹ jẹ were iẹe inọ ọ te rọ uzuazọ ogbagba riẹ ta omai no igbo uzioraha gbe uwhu. Kọ Ọghẹnẹ ọ jẹ oma nọ Jesu ọ rọ kẹ re o ru ikpeware nana rehọ? Ee!
11. Ẹvẹ Jihova o ro dhesẹ nọ ọ jẹ Jesu rehọ wọhọ Mesaya nọ a ya eyaa riẹ na, hayo Kristi na?
11 Enọ i kere ebe Usiuwoma ene na kpobi a kere inọ Jihova Ọghẹnẹ ọ ta via vevẹ inọ ọ jẹ Jesu rehọ evaọ okenọ ọ va no Ethẹ Jọdan ze. Jọn Ọhọahwo-Ame na ọ ta nọ: “Mẹ ruẹ Ẹzi na nọ o no obọ ehru ze wọhọ erueruẹ; o te dikihẹ ehru [Jesu] . . . Mẹ tẹ ruẹ, me te sisẹi, nọ: Ọnana họ Ọmọ Ọghẹnẹ na.” (Jọn 1:32-34) Ofariẹ, evaọ oke ovona Jihova o whowho nọ: “Ọnana họ Ọmọ oyoyou mẹ, ọnọ ọ were omẹ hrọ.”—Mat. 3:17; Mak 1:11; Luk 3:22.
O Kru Ẹrọwọ Riẹ Rite Uwhu
12. Nọ Jesu ọ họ-ame no, eme o ru evaọ ikpe esa gbe ubro?
12 Evaọ ikpe esa gbe ubro nọ i lele i rie, Jesu ọ rọ ajọwha ta usiuwoma kẹ ahwo kpahe Ọsẹ riẹ gbe esuo okiẹrẹe Ọghẹnẹ. Dede nọ oma o rrọ riẹ ẹsejọ nọ ọ jẹ rọ owotọ nya Ẹkwotọ Eyaa na duwu na, u ru rie siọ iruo usiuwoma ota na ba ha. (Jọn 4:6, 34; 18:37) Jesu o wuhrẹ ahwo kpahe Uvie Ọghẹnẹ. Ọ rehọ edhere igbunu nọ o je ro siwi ahwo, kuọ enọ ohọo u je kpe, jẹ tubẹ kpare iwhuowhu ro dhesẹ oware nọ Uvie na u ti rugba.—Mat. 11:4, 5.
13. Eme Jesu o wuhrẹ omai kpahe olẹ?
13 Jesu ọ rehọ iwuhrẹ gbe iruo igbunu riẹ wha orro se omobọ riẹ hẹ, ukpoye ọ rọ omaurokpotọ kpeze ujiro kpobi se Jihova. (Jọn 5:19; 11:41-44) Jesu o te je dhesẹ kẹ omai eware nọ e mai wuzou nọ ma rẹ lẹ kpahe. Ma rẹ jọ elẹ mai yare re odẹ Ọghẹnẹ, koyehọ Jihova, “ojọ ọrẹri,” ma vẹ jẹ lẹ re esuo okiẹrẹe Ọghẹnẹ o nwene ọrọ omuomu Setan re ‘epanọ a rọ obọ odhiwu ru oreva Ọghẹnẹ na, a jọ akpọ na ru ere re.’ (Mat. 6:9, 10) Jesu o te je wuhrẹ omai nọ ma ru lele olẹ yena ẹkwoma ‘Uvie Ọghẹnẹ gbe ẹrẹreokie riẹ nọ ma rẹ kake gwọlọ.’—Mat. 6:33.
14. Dede nọ Jesu ọ jọ gbagba, fikieme o rọ gwọlọ omodawọ mi ei re ọ sai ru oreva Ọghẹnẹ gba?
14 Okenọ uwhu Jesu o kẹle no, o te ti vuhumu ziezi epanọ owha-iruo nọ o rrọ uzou riẹ o gbẹdẹ te. Erugba ẹjiroro Ọsẹ riẹ gbe erufuọ odẹ Ọsẹ na o roma hwa ẹdhoguo okienyẹ gbe uwhu oja nọ Jesu o re thihakọ rai. Edẹ isoi taure Jesu o te ti whu, ọ lẹ nọ: “Whaọ ẹzi mẹ ọ be rova enẹna; kẹvẹ mẹ rẹ ta? Rekọ fiki onana mẹ jẹ nyaze oke nana.” Nọ Jesu ọ ta eme nana no, ọ tẹ tẹrovi oware nọ o mae r’oja nọ ọ lẹ nọ: “Ọsẹ kẹ odẹ ra oro.” Jihova ọ tẹ nwani yo kẹe inọ: “Mẹ kẹ riẹ oro uno, mẹ jẹ te wariẹ kẹ e oro.” (Jọn 12:27, 28) Ẹhẹ, u no Jesu eva ze re o thihakọ odawọ nọ o mae ga nọ uvumọ ohwo-akpọ ọfa o ri thihakọ riẹ hẹ. Rekọ o rẹ sai mu omai ẹro inọ eme Ọsẹ obọ odhiwu riẹ nọ o yo na e kẹ riẹ imuẹro inọ ọ te ginẹ sae kpare esuo Jihova kpehru. Yọ ere o ginẹ jọ!
Oware nọ Uwhu Jesu U Rugba
15. Taure Jesu o te ti se ẹwẹ họ, fikieme ọ rọ ta nọ: “U re no”?
15 Taure Jesu o te ti se ẹwẹ họ evaọ ehru ure oja na, ọ ta nọ: “U re no” koyehọ, o ru eware kpobi gba no. (Jọn 19:30) Eware nọ Jesu ọ rehọ obufihọ Ọghẹnẹ rugba evaọ etoke ikpe esa gbe ubro, koyehọ no oke ame-ọhọ riẹ rite oke uwhu riẹ, i bu kẹhẹ. Okenọ Jesu o whu, otọ o nuhu gaga, oma o tẹ wọ olori isoja ọgbaẹmo Rom nọ o wuzou ikpakpe na ta nọ: “[Uzẹme,] ọnana họ Ọmọ Ọghẹnẹ.” (Mat. 27:54) Ababọ avro, olori isoja na ọ ruẹ nọ a je se Jesu ẹkoko inọ o se oma riẹ Ọmọ Ọghẹnẹ. Ghelọ uye kpobi nọ Jesu ọ ruẹ, o kru ẹgbakiete riẹ je dhesẹ Setan fihọ ọtọrue. Setan ọ ta kpahe enọ e gwọlọ jọ abọ esuo Ọghẹnẹ kpobi inọ: “Eware kpobi nọ ohwo o wo o re ro nwene uzuazọ riẹ.” (Job 2:4) Jesu ọ rọ ẹgbakiete riẹ dhesẹ inọ Adamu avọ Ivi a hae sai kru ẹgbakiete rai keme odawọ nọ u te rai u tulo ho. Mai wuzou, uzuazọ gbe uwhu Jesu e kpare esuo okiẹrẹe Jihova kpehru. (Se Itẹ 27:11.) Kọ oware ofa jọ o riẹ nọ uwhu Jesu u rugba? Ee!
16, 17. (a) Eme u ru rie lọhọ kẹ idibo Jihova nọ e rria no taure Jesu ọ tẹ te ziọ otọakpọ nọ a ro wo emamọ edikihẹ kugbe Jihova? (b) Ẹvẹ Jihova ọ rọ hwosa kẹ Ọmọ riẹ, kọ eme Jesu Kristi Olori na o gbe bi ru?
16 Idibo Jihova buobu e rria no taure Jesu ọ tẹ te ziọ otọakpọ. A wo emamọ usu kugbe Ọghẹnẹ, yọ a wo ẹruore ẹkparomatha. (Aiz. 25:8; Dan. 12:13) Kọ fikieme Jihova, Ọghẹnẹ ọrẹri na ọ rọ kẹ ahwo-akpọ nọ a gba ha obọdẹ ẹruore otiọye? Ebaibol e ta nọ: “Ọghẹnẹ [ọ rọ Jesu Kristi] dhearo re ọ rọ fiki azẹ riẹ jọ ikiofu, re ahwo a rehọ ẹrọwọ rehọ iẹe. Onana, re u dhesẹ ẹrẹreokie Ọghẹnẹ, keme eva akothiho riẹ Ọghẹnẹ ọ jẹ kpare iroro vrẹ izieraha ọsosuọ; eva oke nana a je vuhu ei muẹ nọ ọye oma riẹ o ghine kiẹrẹe ọ vẹ jẹ rọ unuzou kẹ ohwo nọ o fievahọ Jesu.”—Rom 3:25, 26. *
17 Nọ Jihova ọ kpare Jesu no, ọ tẹ kẹe ọkwa nọ ọ rro vi ọnọ o wo taure ọ tẹ te ziọ otọakpọ. Enẹna, Jesu ọ rrọ omama ezi nọ ọ be reawere sebaewhuo. (Hib. 1:3) Jesu Kristi Olori na, ọnọ ọ rrọ Ozerẹ Okpehru gbe Ovie no enẹna, o gbe bi fi obọ họ kẹ ilele riẹ kpare ẹrẹreokie Ọghẹnẹ kpehru. Yọ eva e rẹ were omai gaga inọ Jihova, Ọsẹ obọ odhiwu mai, ọ rẹ hwosa kẹ enọ i ru ere kpobi jẹ gọe te urere wọhọ epanọ Ọmọ riẹ o ru.—Se Olezi 34:3; Ahwo Hibru 11:6.
18. Eme ma te ta kpahe evaọ uzoẹme nọ o rrọ aro na?
18 Ahwo-akpọ nọ i wo ẹrọwọ no oke Ebẹle ze a wo emamọ usu kugbe Jihova fikinọ a fi ẹrọwọ họ Ubi nọ a ya eyaa riẹ na. Jihova ọ riẹ inọ Ọmọ riẹ o ti kru ẹgbakiete gbe nnọ uwhu riẹ o te “wha izieraha akpọ na vrẹ!” (Jọn 1:29) Uwhu Jesu o tẹ jẹ rrọ erere kẹ enọ e rrọ uzuazọ nẹnẹ. (Rom 3:26) Kọ didi eghale idhe ẹtanigbo Kristi o rẹ sae wha se owhẹ? Ma te ta kpahe onana evaọ uzoẹme nọ o rrọ aro na.
[Oruvẹ-obotọ]
^ edhe-ẹme 7 Pọl ukọ na ọ be jọ etenẹ wariẹ eme nọ e rrọ Olezi 40:6-8 na wọhọ epanọ e rrọ evaọ efafa Septuagint ọrọ Griki na inọ “whọ ruẹrẹ ugboma họ kẹ omẹ.” Eme nana e rrọ iko anwae erọ Ikereakere Hibru na ha.
^ edhe-ẹme 16 Rri “Enọ Ahwo nọ A s’Ebe” evaọ ẹwẹ-obe avọ 6 avọ 7.
Ẹvẹ Whọ te k’Uyo?
• Oghẹrẹ vẹ a ro fi avro họ ẹrẹreokie Ọghẹnẹ?
• Eme ame-ọhọ Jesu u dhesẹ?
• Eme uwhu Jesu u rugba?
[Enọ Uwuhrẹ]
[Uwoho nọ o rrọ ẹwẹ-obe avọ 9]
Kọ whọ riẹ oware nọ ame-ọhọ Jesu u dhesẹ?