Jiisusi Guutip naapertuilluarneranik qanoq erseqqissaasoq

“Guutip [Kristusi] aavatigut saammaannarsissutissamik pilliutinngortippaa, uppernikkut iluarnini [naapertuilluartuunini, NV] takutikkumallugu.” — ROMAMIUT 3:25.

1, 2. (a) Pissutsit inuiaat atugaat pillugit Biibilimi qanoq allassimasoqarpa? (b) Apeqqutit suut allaaserisami matumani sammineqassappat?

NAATSIIVIMMI Edenimi pikitsitsineq pillugu oqaluttuaq Biibilimiittoq ilisimaneqarluarpoq. Kikkut tamarmik Adamip ajortuliornerata kinguneri misigaat, soorlu tamanna ima nassuiarneqartoq: “Inukkut ataasiinnakkut ajorti silarsuarmut [tikiuppoq] ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” (Romamiut 5:12) Eqqortuliorniarluta qanorluunniit ilungersortigigaluaraangatta kukkusarpugut Guutimillu isumakkeerfigineqartariaqartarluta. Apustili Paulusi aamma ima maalaarpoq: “[Ajunngitsoq] piumasarigaluara iliuuserinngitsoortarpara ajortorli piumanngisara iliuuserisarlugu. Uangannguakkuluk!” — Romamiut 7:19, 24.

² Tamatta inunnguuserisatsinnik ajortiliugatta ima aperinissaq pissusissamisoorpoq: Jiisusi Nazaretimiu kingornuttakkamik ajorteqarnani qanoq ililluni inunngorsinnaava, aamma sooq kuisippa? Jiisusip inuunera Jehovap naapertuilluarneranut qanoq erseqqissaataava? Pingaarnerpaamillu, Kristusip toqunera qanoq sunniuteqarpa?

Guutip naapertuilluarnera apeqquserneqarpoq

3. Saatanip Eva qanoq salloqittarpaa?

³ Siuaasavut siulliit, Adami Evalu, sianiilliorluinnarlutik Guutip naalakkersuineranik ajattuipput ‘pulateriaarsutoqqamit Diaavulumik Saatanimillu taaneqartumit’ naalakkersorneqarumanerullutik. (Saqqummersitat 12:9) Tamanna qanoq pinersoq eqqarsaatigeriaruk. Saatanip Jehova Guuti naapertuilluartumik naalakkersuinersoq apeqquserpaa. Apeqqusiivoq Evap ima aperineratigut: “Ilumut Guuti oqarpa naatsiiviup orpii neriffigissanngikkisi?” Guutip orpimmik aalajangersimasumik attuinissamik inerteqqutaa paasiuminartoq Evap oqaluttuaraa. Attoraluarunikku toqusussaapput. Saatanip Guuti sallunerarpaa ima oqarluni: “Naamik, toqussanngivippusi!” Taava Eva salloqittarlugu isumaqalersippaa Guuti ajunngitsumik erliguussisoq aamma paarnamik nerinermigut Guutisut ilerumaartoq, ileqqussatigut oqartussaaffigineqarunnaarumaartoq. — 1 Mosesi 3:1-5.

4. Inuiaat qanoq ilillutik Saatanip unammillerluni naalakkersuineranut naalatsigitilerpat?

⁴ Saatanip ilumoortumik inuit Guutimit siulersorneqartinnatik pilluarnerulissanerarpai. Adamip Guutip naapertuilluartumik kisimi oqartussaaneranik illersuinani nuliani naalappaa namminerlu aamma paarnaq nereqqusaanngitsoq nerillugu. Taamaalilluni Adamip Jehovamut naapertuilluartumik attaveqarnini annaavaa ajortilu toqulu uagutsinnut nammaataritilerlugit oqimaaqisut. Aamma Adamip iliuusiata kingunerisaanik inuiaat Saatanip, ‘silarsuup matuma guutiata’, unammillerluni naalakkersuineranut naalatsigitilerput. — 2 Korinthimiut 4:4; Romamiut 7:14.

5. (a) Jehovap oqaatsini malillugit suna iliuuseraa? (b) Guuti Adamip Evallu kinguaassaannut qanoq neriuutissiiva?

⁵ Jehovap oqaatsini malillugit iliorluni Adamimut Evamullu toqumut eqqartuussut nalunaarutigaa. (1 Mosesi 3:16-19) Imaanngilarli Guutip siunertaa maangaannartoq. Maangaannanngilluinnarpormi! Jehovap Adamimut Evamullu eqqartuussutini nalunaarutigigamiuk kinguaassaasa neriuuteqalissutigiumaagaannik oqaaseqarpoq. Nalunaarutigaa ‘kinguaassamik’ kimmimmigut  Saatanimit aserorterneqarumaartumik pilersitsiumaarnini. Kinguaassalli neriorsuutigisap kimmimmigut ikia ajorunnaarsitaassaaq, kinguaassallu Saatanip ‘niaqua aserortissavaa’. (1 Mosesi 3:15, NV) Tamanna Biibilimi nassuiarneqarpoq Jiisusi Kristusi pillugu ima allassimasoqarami: “Guutip ernera saqqummersinneqarpoq: Diaavulup suliai suujunnaarsissagamigit.” (1 Johannesi 3:8) Jiisusilli pissusilersornera toquneralu Guutip naapertuilluarneranut qanoq erseqqissaataappat?

Jiisusip kuisinnerata isumaa

6. Qanoq ililluta nalunngilarput Jiisusi Adamip ajortaanik kingornussisimanngitsoq?

⁶ Jiisusi inersimasunngoruni Adamitut, taassuma naammalluinnassutsiminik annaasaqanngikkallarneratoqqissaaq, ittussaavoq. (Romamiut 5:14; 1 Korinthimiut 15:45) Jiisusi taamaassaguni naammalluinnartuulluni inunngortariaqarpoq. Qanoq ililluni taamatut inunngorsinnaagami? Inngili Gabrieli Jiisusip anaanaanut, Mariamut, paasiuminartumik ima nassuiaavoq: “Anersaaq Illernartoq ilinnut piumaarpoq, Qutsinnerussaartullu pissaanerata ulikkumaarpaatit. Taamaattumik meeraq erniusussaq taaneqassaaq Illernartumik, Guutip erneranik.” (Lukasi 1:35) Mariap Jiisusip inuunerani siusissukkut taanna inunngornera pillugu aalajangersimasunik oqaluttuussimasinnaavaa. Ilaanni Jiisusi inuusuttuaraalluni Mariap ataatarsiamilu, Josefip, Guutip naalaffiani nanimmanni ima oqarpoq: “Nalugassiuk Ataatanniittariaqartunga?” (Lukasi 2:49) Nalunanngitsumik Jiisusip tamaanimiilli nalunngilaa Guutimut ernerulluni. Taamaattumik Guutip naapertuilluarneranik erseqqissaanissani pingaartittorujussuuaa.

7. Jiisusi naleqangaartumik sumik peqarpa?

⁷ Jiisusi anersaakkut ittunik soqutiginningaarnerminik ersersitsivoq ataatsimiinnernut Guutimik pallorfiginniffiusunut najuuttuartarnermigut. Naammalluinnartumik isumaqarami Allakkat Hebræerisuut pillugit tusakkani taakkunanilu atuakkani tamaasa paasilluinnarsinnaasimassavai. (Lukasi 4:16) Naleqangaartumik allamik aamma peqarpoq — naammalluinnartumik timeqarpoq inuiaat iluaqutissaannut pilliutigineqarsinnaasumik. Jiisusi kuisikkami Ataataminut qinuvoq qinutillunilu immaqa oqaatsit siulittuutaasut Tussiaat 40:7-9-miittut eqqarsaatigalugit. — Lukasi 3:21; atuakkit Hebræerit 10:5-10. *

8. Sooq Johannesip Kuisisup Jiisusi kuiumanngikkaluarpaa?

⁸ Johannesip Kuisisup aallaqqaammut Jiisusi kuiumanngikkaluarpaa. Sooq? Johannesip juutit kuissummik Mosesip inatsisaanik unioqqutitsisimanermik peqqissimissutiginninnermut  assersuutaasumik kuisaramigit. Johannesip Jiisusi qanigisarigamiuk nalusimassanngilaa Jiisusi naapertuilluartuusoq taamaattumillu allamik isumataartariaqanngitsoq. Jiisusip Johannesi paasiteqqissaarpaa kuisikkuni eqqortuliussalluni. Jiisusi ima nassuiaavoq: “Taamatummi iluartussaq tamarmiusoq naammassisariaqarparput.” — Matthæusi 3:15.

9. Jiisusip kuissutaa sumut assersuutaava?

⁹ Inuk naammalluinnartoq Jiisusi isummersinnaagaluarpoq Adamitut inuiannut naammalluinnartunut siuaasanngorsinnaalluni. Jiisusilli taamaaliornissani kissaatiginngilaa tamanna Jehovap piumasaanut naapertuutinngimmat. Guutip Jiisusi nunarsuarmut aallartippaa kinguaassaasussanngortillugu, imaluunniit Missiarsiusussanngortillugu, neriorsuutigisaq. Suliassamut tamatumunnga ilaavoq Jiisusip inuunerminik naammalluinnartumik pilliutiginninnissaa. (Atuakkit Esaja 53:5, 6, 12). Soorunami Jiisusip kuissutaa uagut kuissutitsitut isumaqanngilaq. Jiisusi Jehovamut tunniulluinnartariaqanngilaq inuiaqatigiinnut Israelikkunnut tunniulluinnareersimasunut ilaareerami. Kuissutaa Guutip piumasaatut iliorniarluni sassarneranut assersuutaavoq, soorlu tamanna Allakkani Missiarsi pillugu siulittuutigineqartoq.

10. Missiarsiulluni Guutip piumasaatut iliornermut suut ilaappat, Jiisusillu suliassaq tamanna qanoq isigaa?

¹⁰ Jehovap Jiisusimut tunngatillugu piumasaanut ilaapput taassuma Guutip naalagaaffia pillugu nutaarsiassamik nuannersumik oqaluussissutiginninnissaa, ajoqersuganngortitsiortornissaa taakkuninngalu piginnaanngorsaanissaa siunissami oqaluussisoqarnissaa eqqarsaatigalugu. Jiisusip aamma Guutimut sassarnermigut ersersippaa malersorneqarnerup naammagalugu atornissaanut Jehovallu kisimi oqartussaaneranik naapertuilluartumik tapersersuiumalluni peqqarniitsumik toqutaanissamut piumassuseqarluni. Jiisusi Ataataminik qilammiusumik qamannga pisumik asannikkami piumaqaluni taassuma piumasaatut iliorpoq timiminillu pilliutitut sassaassinerminik nalerisimaarutiginningaarluni. (Johannesi 14:31) Aamma nuannaarutigaa nalunagu inuunermi naammalluinnartup nalinga utertitsissutitut ajortimut toqumullu uagutsinnik inussiaajunnaarsitsisinnaasutut Guutimut sassaanneqarsinnaasoq. Jiisusip akisussaaffimmik angisuumik tamatuminnga isumaginninniarluni sassarnera Guutip akueraa? Aap, akuerilluinnarpaa!

11. Jehovap qanoq ililluni takutippaa Jiisusi Missiarsitut, imaluunniit Kristusitut, neriorsuutigisatut akueralugu?

¹¹ Iivangkiiliumik allattut sisamat tamarmik Jehovap Guutip Jiisusi Jordanip kuussuata ernganit qaqimmat taassuminnga akuerinninnera uppernarsarpaat. Johannesi Kuisisoq ima uppernarsaavoq: “Takuara Anersaaq tuisut illuni qilammit aqqartoq [Jiisusilu qulangersimajualerlugu] . . . Tamanna takuara, nalunaajaatigaaralu taanna tassaasoq Guutip ernera.” (Johannesi 1:32-34) Pisumi tamatumani Jehova ima oqarpoq: “Tassa ernera asasara, nuannarisara.” — Matthæusi 3:17; Markusi 1:11; Lukasi 3:22.

Toqumut allaat aalajaatsoq

12. Jiisusip ukiut pingasut affarlu kuisinnermi kingorna suut ulapputigai?

¹² Ukiuni pingasuni affarmilu tulliuttuni Jiisusip inuit allat Ataatani taassumalu naapertuilluartumik kisimi oqartussaanera pillugit oqaluttuunnissaat aallulluinnarpaa. Nunami neriorsuutigisami pisulluni angalasarnini pissutigalugu qasulluinnartarpoq, sallusuissulli pillugu peqqissaartumik nalunaajaanissamut sumilluunniit akornuteqarumanngilaq. (Johannesi 4:6, 34; 18:37) Jiisusip inuit allat Guutip naalagaaffia pillugu oqaluttuuttarpai. Tupinnartuliornikkut napparsimasunik ajorunnaarsitsisarnermigut, inuppassuarnik kaattunik nerlersuisarnermigut allaallu toqusimasunik makititsisarnermigut ersersippaa Guutip naalagaaffia inuiannut qanoq iluaqutaassanersoq. — Matthæusi 11:4, 5.

13. Jiisusi qinuneq pillugu qanoq oqarpa?

¹³ Jiisusi ilinniartitsinerminik tupinnartuliornikkullu ajorunnaarsitsisarnerminik nammineq ataqqinaatissamisut isiginninnani maniguulluni sunik tamanik Jehovamut ataqqinaataatitsinermigut maligassaalluarpoq.  (Johannesi 5:19; 11:41-44) Jiisusip aamma uagutsinnut paasitippaa suut qinunitsinni pingaarnerpaatissagivut. Ilaatigut qinnutigisariaqarpavut Guutip aqqata, Jehovap, ‘illernartitaanissaa’, aamma Guutip naapertuilluartumik naalakkersuinerata Saatanip ajortumik naalakkersuineranik taarsiinissaa, Guutip ‘piumasaa qilammisut nunamissaaq piniassammat’. (Matthæusi 6:9, 10) Jiisusip aamma kajumissaarpaatigut qinnutinut tamakkununnga naapertuuttumik iliuuseqartaqqulluta ‘Guutip naalagaaffiata iluarneratalu ujaqqaarnerisigut’. — Matthæusi 6:33.

14. Jiisusi naammalluinnartuugaluarluni Guutip imminut tunngatillugu piumasaanik sooq naammassinnikkuminaatsitsisimassava?

¹⁴ Pilliutitut toqunissani qanilliartortillugu Jiisusip akisussaaffini annertooq pissutigalugu misigissutsikkut annertuumik tatineqalerpoq. Ataatani tusaamasaalluassappat taassumalu siunertaa naammassineqassappat naapertuilluanngitsumik eqqartuunneqarnissaq peqqarniitsumillu toqutaanissaq naammagalugit atorsinnaasariaqarpai. Ullut tallimat qaangiuppata toqusussaalluni Jiisusi qinnummini ima oqarpoq: “Maanna tarnikkut aalaterneqaqaanga, qanorlu oqassaanga? Ataataq, atugassannit tamatumannga annaatinnga? Naagga, atugassara taanna tikittussaavara.” Misigissutsilli inuppalaartut pissusissamisoortut taakku ersersereerlugit Jiisusi pingaaruteqarnerungaartumik namminissarsiornani aalajangiusimannippoq. Ima nangippoq: “Ataataq, aqqit naalannarsisiguk!” Jehova ingerlaannaq ima akivoq: “Naalannarsisereerpara, naalannarsiseqqikkumaarparalu.” (Johannesi 12:27, 28) Aap, Jiisusip inuup misigisimasaanik artornarnerpaamik uppernikkut misilinneqarnissani akueraa. Ataatamili qilammiusup oqaasii taakku tusarlugit qularnanngitsumik qulariunnaarluinnarsimassavaa Jehovap kisimi oqartussaaneranik erseqqissaasinnaallunilu akitsisitsisinnaanini. Taamaaliorsinnaasimavorlu!

Jiisusip toqunera qanoq sunniuteqartoq

15. Sooq Jiisusi toqunngitsiarluni ima oqarpa: “Naammassivoq”?

¹⁵ Jiisusi nappakkami anniartitaaffimmiitilluni anniangaarluni anerningingajalerluni ima oqarpoq: “Naammassivoq.” (Johannesi 19:30) Ilumullumi Jiisusi ukiuni pingasuni affarmilu kuisinnerminit toqussi tikillugu Guutip ikiuineratigut naammassisaqangaarpoq! Jiisusi toqummat nuna sajorujussuarpoq, tamannalu pissutigalugu Romamiut sakkutuuisa naalagaat kikiattuinermut akisussaatitaasoq ima oqarpoq: “Ilumut taanna Guutip erneraa.” (Matthæusi 27:54) Sakkutuut naalagaat Jiisusip Guutimut ernerunerarnini pissutigalugu mitaatigineqarneranik takunnittuusimagunarpoq. Jiisusi tamakkuninnga tamanik nalaataqaraluarluni assuarnaattuarpoq Saatanillu sallutunersuanik uppernarsaalluni. Guutip kisimi oqartussaaneranik tapersersuisut eqqarsaatigalugit Saatani ima unammillerpoq: “[Inuup] pigisani tamaasa akigeriaannaasarpai inuunini annaajumanagu.” (Jobi 2:4) Jiisusip aalajaannermigut uppernarsarpaa Adami Evalu artornannginnerungaartumik misilinneqarnerminni aalajaattuarsinnaasimagaluartut. Pingaarnerpaamillu, Jiisusip inuunera toquneralu Jehovap naapertuilluartumik kisimi oqartussaaneranut erseqqissaataallutillu unnersiutiginnissutaapput. (Atuaruk Ussatit 27:11). Jiisusip toqunera suli allatigut sunniuteqarpa? Aap, ilaana!

16, 17. (a) Jehovamut nalunaajaasut kristumiut sioqqullugit inuusut qanoq ilillutik taassumannga naapertuilluartutut isigineqarsinnaagamik? (b) Jehovap ernini aalajaannera pillugu qanoq akissarsisippaa, Naalagarlu Jiisusi Kristusi sujuarpa?

¹⁶ Jehovamut kiffaasut ilarpassui Jiisusip nunarsuarmukannginnerani inuupput. Guutip taakku naapertuilluartutut isigai toqusunillu makititaanissamik neriuutissillugit. (Esaja 25:8; Danieli 12:13) Inatsisilli suut tunngavigalugit Guuti illernartoq, Jehova, inunnik ajortilinnik taama nuannertigisumik pilluaqqusisinnaava? Biibilimi ima nassuiarneqarpoq: “Guutip [Jiisusi Kristusi] aavatigut saammaannarsissutissamik pilliutinngortippaa, uppernikkut iluarnini  takutikkumallugu, tamatuma siornatigut kamaginninnermigut ajortuliat pillaatissinngitsoortaraluaramigit ulluni makkunani iluarnini takutinniarlugu nammineq iluartuugami Jiisusimullu uppertoq iluartuutikkumagamiuk.” — Romamiut 3:25, 26. *

¹⁷ Jehovap Jiisusi akissarsisippaa makitinneratigut nunarsuarmukanngikkallarneranillu qaffasinnerusumik inissisimaffilerneratigut. Jiisusi maanna pinngortitatut anersaatut naalannassuseqarluni toqujuitsuuvoq. (Hebræerit 1:3) Naalakkap Jiisusip Kristusip palasiunerullunilu kunngiugami ajoqersukkani Guutip naapertuilluarneranik erseqqissaallutillu unnersiutiginninnissaannut ikiortuarpai. Ataatatta qilammiusup, Jehovap, taamaaliortunik imminillu ilumoorfiginnillutik kiffartornermikkut ernerminik ilaarsisunik tamanik akissarsisitsisarnera qujamasuutigingaarparput! — Atuakkit Tussiaat 34:4; Hebræerit 11:6.

18. Allaaserisami atuaqqissaaqatigiissutissami tulliuttumi suna sammineqassava?

¹⁸ Abelip nalaaniilli inuit aalajaatsut Jehovamut qanittumik attaveqartarput kinguaassaq neriorsuutigisaq pillugu taassuma neriorsuutaa upperigamikku. Jehovap nalunngilaa ernini aalajaattuarumaartoq toquneralu “silarsuup ajortaanik” piiaalluinnarumaartoq. (Johannesi 1:29) Jiisusip toqunera aamma inunnut ullumikkut inuusunut iluaqutaavoq. (Romamiut 3:26) Kristusip utertitsissutitut pilliutaa ilinnut qanoq iluaqutaasinnaava? Allaaserisami atuaqqissaaqatigiissutissami tulliuttumi tamanna sammineqassaaq.

[Quppernerup ataani ilanngussat]

Qanoq akissavit?

• Guutip naapertuilluarnera qanoq ililluni apeqquserneqarpa?

• Jiisusip kuissutaa sumut assersuutaava?

• Jiisusip toqunera qanoq sunniuteqarpa?

[Atuaqqissaarnermi apeqqutit]

[Qupp. 15-mi assiliartaq]

Jiisusip kuissutaa sumut assersuutaava?