Kon Hesus Ta Engrandesé e Hustisia di Dios?

“Dios a hasi Kristu instrumento di pordon dor di lag’É drama su sanger. I e pordon ei nos ta alkansá pa medio di fe. Di e forma aki Dios ker a mustra kon hustu E ta.”​—ROM. 3:25, BPK.

1, 2. (a) Kiko Beibel ta siña nos tokante e kondishon di humanidat? (b) Ki pregunta nos lo kontestá den e artíkulo akí?

E RELATO bíbliko tokante e rebelion den hòfi di Edén ta bon konosí. Nos tur ta sinti e efektonan di Adam su piká, manera e siguiente palabranan ta trese dilanti: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Rom. 5:12) Apesar di tur nos esfuersonan pa hasi loke ta korekto, tòg nos ta faya, i nos tin ku pidi Dios pordon pa e fayonan ei. Asta apòstel Pablo a lamentá: “E bon ku mi ta deseá di hasi, mi no ta hasi; ma mi ta praktiká eksaktamente e maldat ku mi no ta deseá di hasi. Hende miserabel ku mi ta!”​—Rom. 7:​19, 24.

² Den e artíkulo akí nos lo konsiderá e siguiente preguntanan importante: Siendo ku di naturalesa nos tur ta pekadó, kon Hesus di Názarèt por a nase sin piká heredá? Pa ki motibu el a batisá? Kon e manera ku Hesus a hiba su bida a engrandesé e hustisia di Yehova? I mas importante ainda, kiko el a logra ku su morto?

E Hustisia di Dios Ta Ser Kuestioná

3. Kon Satanas a engañá Eva?

³ Nos promé mayornan, Adam ku Eva, a kometé e bobedat di rechasá e gobernashon soberano di Dios i a laga “e kolebra di antigwedat, kende ta wòrdu yamá Diabel i Satanas,” goberná nan. (Rev. 12:9) Kon esei a tuma lugá? Satanas a lanta duda enkuanto si Yehova ta un gobernante hustu, ora el a puntra Eva: “Di bèrdat Dios a bisa: ‘Bo no mag kome di ningun palu di e hòfi’?” Eva a ripití e mandamentu kla di Dios ku nan no tabatin mag di mishi ku un sierto palu, sino nan lo a muri. E ora ei Satanas a akusá Dios di ta mentiroso, bisando: “Siguramente boso lo no muri!” I el a laga Eva kere ku Dios a nenga di dun’é algu bon i ku si el a kome di e fruta, lo e por a bira meskos ku Dios i disidí pa su mes kiko ta bon i kiko ta malu.​—Gén. 3:​1-5.

4. Kon humanidat a bin kai bou di e gobernashon rival di Satanas?

⁴ Básikamente, Satanas a insinuá ku hende lo ta mas felis si nan ta independiente di Dios. En bes di defendé e hustisia di e gobernashon soberano di Dios, Adam a bai tras di loke su esposa a bis’é i e tambe a kome di e fruta prohibí. Asina Adam a pèrdè su relashon perfekto ku Yehova i a pone nos bou di e karga opresivo di piká i morto. Na mes momento, humanidat a bin kai bou di e gobernashon rival di Satanas, “e dios di e mundu akí.”​—2 Kor. 4:4; Rom. 7:14.

5. (a) Kon Yehova a kumpli ku su palabra? (b) Ki speransa Dios a duna e desendientenan di Adam ku Eva?

⁵ Yehova a kumpli ku su palabra infalibel, sentensiando Adam ku Eva na morto. (Gén. 3:​16-19) Pero esei no ke men ku su propósito a frakasá. Al kontrario! Na momento ku Yehova a sentensiá Adam ku Eva, el a duna nan futuro desendientenan un rayo di speransa. Esei tabata ora el a anunsiá su propósito di lanta un  “simia,” ku Satanas lo a heridá na su hilchi. Sinembargo, e Simia primintí ei lo a rekuperá for di e herida na su hilchi i “heridá [Satanas su] kabes.” (Gén. 3:15) Beibel ta amplia riba e tema akí, bisando lo siguiente tokante Hesukristu: “E Yu di Dios a aparesé pa e propósito akí, pa e destruí e obranan di Diabel.” (1 Juan 3:8) Pero kon e bida i morto di Hesus a engrandesé e hustisia di Dios?

Loke e Boutismo di Hesus A Nifiká

6. Kon nos por sa ku Hesus no a heredá e piká di Adam?

⁶ Komo un hòmber adulto, Hesus lo mester tabata e ekivalente eksakto di Adam, promé ku esaki a peka. (Rom. 5:14; 1 Kor. 15:45) Esei ta nifiká ku Hesus mester a nase perfekto. Kon esei tabata posibel? Angel Gabriel a splika Maria, mama di Hesus, ku e simpel palabranan akí: “Spiritu Santu lo baha riba bo i poder di Altísimo lo tapa bo manera un sombra. P’esei e yu ku lo bo trese na mundu lo ta santu i nan lo yam’é ‘Yu di Dios.’” (Luk. 1:35, BPK) Aparentemente, tempu Hesus tabata chikitu, Maria lo mester a kont’é algun kos tokante su nasementu. P’esei mes na un okashon, tempu ku e tabata mucha, ora Maria ku Hosé—su tata di kriansa—a hañ’é den e tèmpel di Dios, el a puntra nan: “Boso no tabata sa ku mi mester tabata den e kas di mi Tata?” (Luk. 2:49) Ta bisto anto ku for di chikí Hesus tabata sa ku e tabata Yu di Dios. P’esei, pa Hesus, tabata masha importante p’e engrandesé e hustisia di Dios.

7. Kiko ta e kosnan sumamente balioso ku Hesus tabatin?

⁷ Hesus a demostrá su interes profundo den asuntunan spiritual, asistiendo regularmente na e reunionnan ku nan tabata tene pa rindi adorashon. Ku su mente perfekto, lo e mester a apsorbá tur loke el a tende i lesa den e Skritura Hebreo. (Luk. 4:16) E tabatin algu mas ku tabata sumamente balioso: un kurpa humano perfekto ku e por a sakrifiká na fabor di humanidat. Na momento ku Hesus a batisá, e tabata hasi orashon, kisas pensando riba e palabranan profétiko di Salmo 40:​6-8.​—Luk. 3:21; lesa Hebreonan 10:​5-10. *

8. Pakiko Juan Boutista no kier a batisá Hesus?

⁸ Na promé instante, Juan Boutista no kier a batisá Hesus. Pakiko? Pasobra Juan tabata batisá e hudiunan komo símbolo di nan repentimentu  pa motibu ku nan a peka kontra Lei. Komo famia yegá di Hesus, Juan mester tabata sa ku Hesus tabata un hòmber hustu i p’esei no tabatin nodi di repentí. Tòg Hesus a sigurá Juan ku tabata na su lugá pa Juan batis’é. El a splik’é: “Di e manera akí ta toka nos di kumpli ku tur hustisia.”​—Mat. 3:15.

9. Kiko Hesus su boutismo a simbolisá?

⁹ Hesus por a pensa ku komo hende perfekto, meskos ku Adam, e tabatin un bon chèns di bira tata di un rasa humano perfekto. Ma nunka Hesus no a deseá un futuro asina, pasobra esei no tabata e boluntat di Yehova p’e. Dios a mand’é na tera pa kumpli ku e papel di e Simia primintí, òf Mesias, lokual a enserá ku e mester a sakrifiká su bida humano perfekto. (Lesa Isaias 53:​5, 6 i 12.) Naturalmente, e boutismo di Hesus no tabatin e mesun nifikashon ku esun di nos. Su boutismo no a simbolisá su dedikashon na Yehova, ya ku Hesus tabata parti di e nashon di Israel ku tabata dediká kaba na Dios. Mas bien, esei a nifiká ku el a presentá su mes na Dios pa hasi su boluntat, manera e Skritura a bisa ku e Mesias lo a hasi.

10. Kiko e boluntat di Dios pa e Mesias a enserá, i kiko Hesus tabata pensa di esaki?

¹⁰ E boluntat di Yehova pa Hesus a enserá prediká e bon notisia di e Reino di Dios, hasi disipel i prepará esakinan pa nan por a sigui ku e trabou di hasi disipel. E echo ku el a presentá su mes na Yehova a indiká tambe ku e tabata dispuesto pa wanta persekushon i sufri un morto kruel pa defendé e gobernashon hustu i soberano di Yehova Dios. Komo ku Hesus tabatin un amor profundo pa su Tata selestial, tabata un delisia p’e di por hasi e boluntat di Dios, i el a haña un satisfakshon profundo di por presentá su kurpa komo un sakrifisio. (Juan 14:31) Tambe tabata un plaser p’e di sa ku e por a reskatá nos for di sklabitut na piká i morto, ofresiendo na Dios e balor di su bida perfekto. Ora Hesus a presentá su mes pa asumí e responsabilidatnan serio akí, el a haña e aprobashon di Dios? Sigur ku sí!

11. Kon Yehova a demostrá ku el a aprobá Hesus komo e Mesias primintí, òf Kristu?

¹¹ Tur e kuater eskritornan di Evangelio ta konfirmá ku Yehova a manifestá su aprobashon bon kla ora ku Hesus a sali for di awa di Riu Hordan. Juan Boutista a deklará: “Mi a mira e spiritu ta baha for di shelu manera un palomba, i el a keda riba [Hesus] . . . I mi a mira i a duna testimonio ku esaki ta e Yu di Dios.” (Juan 1:​32-34) Ademas, na e okashon ei Yehova mes a deklará: “Esaki ta mi Yu stimá, den kende mi tin goso [òf, “kende mi a aprobá,” NW].”​—Mat. 3:17; Mar. 1:11; Luk. 3:22.

Fiel te na Morto

12. Kiko Hesus a hasi durante tres aña i mei despues di su boutismo?

¹² Durante e siguiente tres añanan i mei, Hesus a dediká su mes kompletamente na siña hende tokante su Tata i na defendé e hustisia di Dios su gobernashon soberano. El a hasi esei na pia, pasando dor di henter e Tera Primintí. Ounke el a keda basta kansá, nada no por a stòp e di duna testimonio kabal di e bèrdat. (Juan 4:​6, 34; 18:37) Hesus a siña e hendenan tokante e Reino di Dios. Pa medio di e milagernan ku el a hasi—manera kura hende malu, alimentá multitut di hende ku hamber i asta lanta morto—el a demostrá kiko e Reino lo hasi pa humanidat.​—Mat. 11:​4, 5.

13. Kiko Hesus a siña nos relashoná ku orashon?

¹³ Hesus no a tuma e mérito pa su siñansanan i obranan di kurashon; mas bien, el a pone un ehèmpel sobresaliente di humildat, dirigiendo tur alabansa na Yehova. (Juan 5:19; 11:​41-44) Ademas, Hesus a indiká kiko ta e kosnan di mas  importante ku nos mester inkluí den nos orashonnan. Nos mester pidi pa e nòmber di Dios, Yehova, ‘ser santifiká’ i pa su gobernashon hustu remplasá e gobernashon malbado di Satanas, pa asina Dios su “boluntat sosodé na tera meskos ku den shelu.” (Mat. 6:​9, 10) Tambe Hesus a urgi nos pa aktua na armonia ku e orashonnan ei i pa “buska promé e reino di Dios i Su hustisia.”​—Mat. 6:33.

14. Ounke Hesus tabata perfekto, pakiko e tabatin ku hasi esfuerso pa kumpli ku su papel den e propósito di Dios?

¹⁴ Segun ku e dia ku Hesus mester a ofresé su bida komo sakrifisio tabata yegando serka, el a sinti mas i mas tantu e peso di responsabilidat ku e tabata karga. E propósito i reputashon di su Tata lo a dependé di su perseveransia durante un huisio inhustu i un morto kruel. Sinku dia promé ku su morto, el a bisa den orashon: “Awor mi alma a bira intrankil, i kiko lo mi bisa: ‘Tata, libra mi di e ora akí’?” Despues ku el a ekspresá e sintimentunan humano natural ei, e no a sigui enfoká riba su mes, sino a bai konsentrá riba loke tabata mas importante i a sigui bisa den orashon: “Ma ta pa e propósito akí mi a bini na e ora akí. Tata, glorifiká bo nòmber.” Mesora Yehova a kontest’é: “Ya mi a glorifik’é, i lo mi bolbe glorifik’é.” (Juan 12:​27, 28) Sí, Hesus tabata dispuesto pa pasa e prueba di integridat di mas grandi ku un ser humano lo mester a enfrentá. Pero nos por ta sigur ku ora Hesus a tende e palabranan ei di su Tata selestial, esaki a fortalesé e konfiansa ku e tabatin di por logra engrandesé Yehova su hustisia i defendé su derecho di goberná. I en bèrdat el a logra esei!

Loke Hesus A Logra ku Su Morto

15. Dikon Hesus a bisa djis promé ku el a muri: “Ta kumplí!”?

¹⁵ Djis promé ku Hesus a hala su último rosea, ora e tabata kologá na e staka di tormento, el a bisa: “Ta kumplí!” (Juan 19:30) Sí, pensa riba e kosnan grandi ku Hesus a logra ku yudansa di Dios durante e tres añanan i mei ku a pasa for di su boutismo te na su morto! Ora Hesus a muri, tabatin un temblor violento, i e ofisial di ehérsito romano na enkargo di e ehekushon a hañ’é ta atmití: “Di bèrdat esaki tabata e Yu di Dios!” (Mat. 27:54) Aparentemente, e ofisial a bisa esei pasobra el a mira nan hasi bofon di Hesus pa motibu ku el a bisa ku e ta Yu di Dios. Apesar di tur loke Hesus a sufri, el a mantené su integridat i a demostrá ku Satanas ta un gañadó despresiabel. Satanas a bisa di tur hende ku ta defendé e gobernashon di Dios: “Un hende ta dispuesto na sakrifiká tur kos kon tal di salba su bida.” (Jòb 2:4, BPK) Ma Hesus, ku su fieldat, a demostrá ku Adam ku Eva por a keda fiel na Dios bou di nan prueba ku tabata muchu mas fásil. E kos di mas importante ta ku e bida i morto di Hesus a engrandesé e hustisia di Yehova i defendé su derecho di goberná. (Lesa Proverbionan 27:11.) Awor bon, Hesus a logra algu mas ku su morto? Sigur ku sí!

16, 17. (a) Kiko a hasi posibel ku e testigunan di Yehova ku a biba promé ku Kristu por tabatin un posishon hustu dilanti di Yehova? (b) Kon Yehova a rekompensá e fieldat di su Yu, i kiko nos Señor Hesukristu ta sigui hasi te awe?

¹⁶ Hopi sirbidó di Yehova ku a biba promé ku Hesus a bini na tera tabatin un posishon hustu dilanti di Dios, i Dios a duna nan tur e speransa di resurekshon. (Isa. 25:8; Dan. 12:13) Pero riba ki base legal Yehova, nos Dios santu, por a bendishoná hende imperfekto den un manera asina maravioso? Beibel ta splika esei ku e siguiente palabranan: “Dios a hasi Kristu instrumento di pordon dor di lag’É drama su sanger. I e pordon ei nos ta  alkansá pa medio di fe. Di e forma aki Dios ker a mustra kon hustu E ta dor di pordoná nos pikánan di ántes, pasobra E ta tolerante. Pero den e tempu aki Dios ker a demostrá, ku E ta hustu i ta aseptá hende ku ta kere den Kristu komo hustu.”​—Rom. 3:​25, 26, BPK. *

¹⁷ Komo rekompensa, Yehova a resusitá Hesus na un posishon mas haltu ku esun ku e tabatin promé ku el a bini na tera. Awor Hesus ta gosa di inmortalidat komo un glorioso kriatura spiritual. (Heb. 1:3) Komo Sumo Saserdote i Rei, nos Señor Hesukristu ta sigui yuda su siguidónan engrandesé e hustisia di Dios. I nos por ta hopi gradisidu ku nos Tata selestial, Yehova, ta rekompensá tur hende ku ta hasi esaki i ku ta sirbié lealmente meskos ku su Yu.​—Lesa Salmo 34:3; Hebreonan 11:6.

18. Ki pregunta e siguiente artíkulo lo kontestá?

¹⁸ For di tempu di Abel bini ariba, hende fiel a disfrutá di un bon relashon ku Yehova pa motibu di nan fe i konfiansa den e Simia primintí. Yehova tabata sa ku su Yu lo a mantené integridat i ku su morto tabata un medio perfekto pa kita e “piká di mundu.” (Juan 1:29) E morto di Kristu ta benefisiá tambe hende ku ta na bida awe. (Rom. 3:26) Pues, kon e reskate di Kristu por benefisiá bo? E siguiente artíkulo lo kontestá esaki.

[Nota]

Kon Lo Bo Kontestá?

• Kon e hustisia di Dios a ser kuestioná?

• Kiko Hesus su boutismo a simbolisá?

• Kiko Hesus su morto a logra?

[Preguntanan di Estudio]

[Plachi na página 15]

Bo sa kiko e boutismo di Hesus a simbolisá?