Indlela Jesu Lagcamisa Ngayo Kulunga KwaNkulunkulu

“Nkulunkulu wamnikelela kutsi abe yinhlawulo ngengati yakhe; lenhlawulo-ke yemukeleka ngekukholwa. Ngalendlela Nkulunkulu sewubonakalise kulunga kwakhe.”—ROM. 3:25.

1, 2. (a) Lifundzisani liBhayibheli ngesimo bantfu labakuso? (b) Ngumiphi imibuto letawudzingidvwa kulesihloko?

 KULANDZISA kweliBhayibheli ngekuhlubuka lokwenteka ensimini yase-Edeni, kuyindzaba letse citsisaka. Bonkhe bantfu bayawuva umphumela wesono sa-Adamu, lochazwa nganayi indlela: “Sono sangena ngemuntfu munye emhlabeni, sangena nekufa, kufa kwase kwendlulela kubo bonkhe bantfu, njengobe bonkhe bonile.” (Rom. 5:12) Siwa sivuka setama kwenta kahle kodvwa siyaphandleka, sente emaphutsa lasenta sidzinge kutsetselelwa nguNkulunkulu. Nemphostoli Pawula yamtfwalisa imikhono enhloko lendzaba nakatsi: “Ngobe lokulungile lengitsandza kukwenta, angikwenti, kodvwa lokubi lengingafuni kukwenta, ngiyakwenta. Maye kimi! Mine sihlupheki!”—Rom. 7:19, 24.

² Njengobe sonkhe sikudla kwesono, nayi imibuto lebalulekile lokufanele sitibute yona: Bekungenteka njani kutsi Jesu wekudzabuka eNazaretha atalwe ete sono, futsi kungani abhajatiswa? Indlela Jesu labephila ngayo, yakugcamisa njani kulunga kwaJehova? Kufa kwaKhristu kwafezani?

Kulunga KwaNkulunkulu Kubekelwa Insayeya

3. Sathane wamkhohlisa njani Eva?

³ Batali betfu bekucala bo-Adamu na-Eva, bakwala ngemabomu kutitfoba ekubusweni nguNkulunkulu. Bakhetsa kubuswa ‘yinyoka yasemandvulo lebitwa ngekutsi nguMhlebi nome nguSathane.’ (Semb. 12:9) Nayi indlela lokwenteka ngayo. Sathane wabekela insayeya indlela lelungile yaNkulunkulu Jehova yekubusa. Loko wakwenta ngekubuta Eva umbuto lotsi: “Kodvwa ngempela Nkulunkulu ushito yini kutsi: ‘Ningadli nome ngusinye nje sitselo setihlahla letisensimini’?” Imphendvulo ya-Eva yaveta ngalokusebaleni umyalo waNkulunkulu lotsi bekufanele bangadli sitselo lesitsite kute bangafi. Sathane wahlasela Nkulunkulu, watsi ucambe emanga laluhlata klaba nakatsi: “Ningeke nife.” Waphindze wakhohlisa Eva watsi kukhona lokumnanjana labekabema kona Nkulunkulu. Wachubeka watsi nabangasidla lesitselo bebatawufana nse naNkulunkulu batentele matsandza.—Gen. 3:1-5.

4. Bantfu bangena njani ngephansi kwelikhwapha lembuso longadlelani naNkulunkulu loholwa nguSathane?

⁴ Kafishane nje inkhulumo yaSathane yayigudlisela kutsi bantfu bangaphila ncono nabangamlaleli Nkulunkulu. Kunekutsi abambelele atsi nko kuNkulunkulu longumbusi wendzawo yonkhe, Adamu wadvoswa ngelikhala ngumfati wakhe. Ngaleyo ndlela wase uyasidla lesitselo. Ngekwenta njalo, Adamu walahla kuba ngumuntfu lote simo sekuba bete sono emehlweni aJehova, wase utselela bonkhe bantfu lukhwekhwe lesono nekufa. Lomunye umphumela wekona kwa-Adamu kutsi bonkhe bantfu base bangena ngephansi kwelikhwapha lembuso longadlelani naNkulunkulu loholwa nguSathane lochazwa ngekutsi ‘ungunkulunkulu walomhlaba.’—2 Khor. 4:4; Rom. 7:14.

5. (a) Jehova wakubonisa njani kuba liciniso kwelivi lakhe? (b) Nkulunkulu wayitsembisani intalo ya-Adamu na-Eva?

⁵ Ngekuhambisana nelivi lakhe lelingashayi phansi, Jehova wagwebela bo-Adamu na-Eva kufa. (Gen. 3:16-19) Loko kwakusho kwehluleka  kwenhloso yaNkulunkulu yini? Akunjalo. Nakagweba bo-Adamu na-Eva, Jehova wanika intalelwane yabo dvolocina. Loko wakwenta ngekumemetela inhloso yakhe yekuveta “intalo” lebeyitawulunywa sitsendze nguSathane. Intalo letsenjisiwe beyitawelulama kulelo nceba, bese ngemuva kwaloko ‘ifihlita inhloko yakhe [Sathane].’ (Gen. 3:15) LiBhayibheli liyenaba kulendzaba ngekutsi lisho naku ngaJesu Khristu: “INdvodzana yaNkulunkulu yetela kona loko, kucitsa imisebenti yaSathane.” (1 Joh. 3:8) Indlela Jesu latiphatsa ngayo kanye nekufa kwakhe, kwakukhatimulisa njani kulunga kwaNkulunkulu?

Lokuchazwa Kubhajatiswa KwaJesu

6. Sinabuphi bufakazi bekutsi Jesu akasitfolanga sono sa-Adamu?

⁶ Nase angene esigabeni sebudvodza ngeminyaka, Jesu abefana ncamashi na-Adamu. (Rom. 5:14; 1 Khor. 15:45) Nakatalwa bekete sono. Kwenteka njani loko? Ingilosi Gabhriyeli yakuchaza loku kuMariya make waJesu, yatsi: ‘Umoya longcwele uyakwehlela kuwe, emandla aNkulunkulu Losetikwako Konkhe akusibekele. Ngako-ke lomntfwana Longcwele lotawutalwa nguwe uyawubitwa ngekutsi yiNdvodzana yaNkulunkulu.’ (Luk. 1:35) Ngalesikhatsi Jesu asemncane, Mariya wamvetela emaciniso laphatselene nekutalwa kwakhe. Ngalelinye lilanga Mariya kanye naJosefa, longubabe wasemhlabeni waJesu, bakhandza Jesu ethempelini. Ngaleso sikhatsi Jesu wabuta batali bakhe umbuto lotsi: “Beningati yini kutsi kufanele ngibesemsebentini waBabe?” (Luk. 2:49) Loyo mbuto wakwenta kwakhanya bha kutsi kusukela asemncane, Jesu bekati kutsi uyiNdvodzana yaNkulunkulu. Intfo lemcoka kuye, bekukwenta bungcwele nekulunga kwaNkulunkulu kwatiwe.

7 Yini lebeyiligugu Jesu labenayo?

⁷ Jesu wakhombisa kutsi unelilukuluku ngetintfo takamoya ngekuba khona njalo emihlanganweni yekukhonta Jehova. Njengemuntfu lote sono futsi longacabangi ngetintfo letimbi, kungenteka kutsi bekavisisa konkhe labekakuva kanye naloko bekakufundza emiBhalweni yesiHebheru. (Luk. 4:16) Kukhona lokunye lokuligugu labenako—umtimba lote sono lebekatawunikela ngawo kute ube ngumhlatjelo lotawusindzisa bantfu bonkhe. Ngalesikhatsi abhajatiswa, Jesu abethandaza futsi kungenteka abecabanga ngemavi lasiphrofetho latfolakala kuTihlabelelo 40:6-8.—Luk. 3:21; fundza Hebheru 10:5-10. a

8. Kungani Johane uMbhabhatisi etama kuvimba Jesu kutsi abhajatiswe?

⁸ Johane uMbhabhatisi wetama kuvimba Jesu kutsi abhajatiswe. Kungani  enta njalo? Kungobe Johane abebhabhatisa emaJuda labekaphendvuke etonweni tawo lebetiphambene neMtsetfo. Njengesihlobo saJesu, Johane bekati kutsi Jesu bekungumuntfu lolungile futsi besingekho sizatfu sekutsi aphendvuke esonweni. Ngako-ke, Jesu wacinisekisa Johane kutsi bekufanele abhajatiswe. Watsi: “Ngobe kufanele sigcwalise kanjalo intsandvo yaNkulunkulu.”—Mat. 3:15.

9. Bekusho kutsini kubhajatiswa kwaJesu?

⁹ Njengemuntfu lote sono, kungenteka kutsi Jesu wasonga lendzaba ngekutsi yena njenga-Adamu, abengaba ngubabe webantfu labete sono. Nobe kunjalo, Jesu akazange abe nesifiso lesinjalo, ngobe bekungesiyo intsandvo yaJehova kutsi ente njalo. Nkulunkulu watfuma Jesu emhlabeni kutsi atewufeza indzima yeNtalo letsenjisiwe nobe yaMesiya. Loku bekufaka ekhatsi kutsi Jesu anikele ngemtimba wakhe lote sono. (Fundza Isaya 53:5, 6, 12.) Kuliciniso kutsi kubhajatiswa kwaJesu bekungafanani nekwetfu. Besingekho sidzingo sekutsi atinikele kuJehova, ngobe abeyincenye yesive saka-Israyeli lebesivele sitinikele kuNkulunkulu. Kunaloko, kubhajatiswa kwaJesu bekusho kutsi utimisele kwenta intsandvo yaNkulunkulu lebeyivetwe emiBhalweni lekhuluma ngaMesiya.

10. Kwenta kwaJesu intsandvo yaNkulunkulu njengaMesiya bekufaka ekhatsi ini, futsi Jesu abetiva njani ngekwenta loko?

¹⁰ Intsandvo yaJehova ngaJesu beyifaka ekhatsi kushumayela tindzaba letinhle ngeMbuso waNkulunkulu. Ngetulu kwaloko, bekufanele kutsi ente bantfu babe bafundzi, aphindze abafundzise ngenjongo yekutsi nabo babe bafundzisi bebantfu esikhatsini lesitako. Kutinikela kwaJesu bekuphindze kusho kutsi utimisele kubeketelela kushushiswa kanye nekufa lobekutawubonisa kutsi usekela kubusa lokulungile kwaNkulunkulu Jehova. Ngesizatfu sekutsi Jesu abemtsandza Babe wakhe wasezulwini, abetimisele kwenta intsandvo yaNkulunkulu futsi wakujabulela nekunikela ngemtimba wakhe kute ube sihlengo. (Joh. 14:31) Kwamjabulisa nekwati kutsi umtimba wakhe lote sono bewutawunikelwa kuNkulunkulu njengesihlengo sekukhulula bantfu ekugcilatweni sono kanye nekufa. Nkulunkulu wakwemukela yini kutinikela kwaJesu lobekukhombisa kutsi utawukwati kwenta lomsebenti lomkhulu kangaka? Yebo wakwemukela!

11. Jehova wakubonisa njani kutsi uyakwemukela kutinikela kwaJesu njengaMesiya lotsenjisiwe nobe Khristu?

¹¹ Babhali bemaVangeli lamane babonisa indlela Nkulunkulu lamemukela ngayo Jesu. Loko kwenteka ngesikhatsi aphuma eMfuleni iJordani. Johane uMbhabhatisi wafakaza watsi: ‘Ngiwubonile umoya wehla ezulwini njengelituba, wahlala etikwakhe [Jesu] . . . Ngiwubonile, ngingufakazi wekutsi: “Lona yiNdvodzana yaNkulunkulu.”’ (Joh. 1:32-34) Ngetulu kwaloko, ngalo lelolanga Jehova watsi: “Lena yiNdvodzana yami, letsandzekako, lengijabula ngayo.”—Mat. 3:17; Mak. 1:11; Luk. 3:22.

Wetsembeka Kwaze Kwaba Sekufeni

12. Yini Jesu layenta eminyakeni lemitsatfu nesigamu abhajatisiwe?

¹² Eminyakeni lemitsatfu kanye nesigamu, Jesu watinikela ngalokuphelele ekufundziseni bantfu ngaBabe wakhe kanye nangekulunga kwebukhosi baNkulunkulu. Wahamba libanga lelidze ngetinyawo aya Eveni Lesetsembiso, futsi kute lokwamenta wangafakazi ngemaciniso eliBhayibheli. (Joh. 4:6, 34; 18:37) Jesu wafundzisa labanye ngeMbuso waNkulunkulu. Ngesimangaliso welapha labagulako, wesutsisa labalambile waphindze wavusa ngisho nalabafile. Ngekwenta konkhe loko, abebonisa loko uMbuso lotakwentela bonkhe bantfu.—Mat. 11:4, 5.

13. Yini Jesu layifundzisa mayelana nemthandazo?

¹³ Esikhundleni sekutsi atikhukhumete ngendlela labefundzisa ngayo kanye nangekwelapha labekwenta, Jesu wabeka sibonelo lesihle ngekutsi ayise ludvumo kuJehova. (Joh. 5:19; 11:41-44) Jesu waphindze wasifundzisa ngetintfo letibalulekile  lokufanele sitithandazele. Imithandazo yetfu kufanele ifake ekhatsi kucelela libito laNkulunkulu lelitsi Jehova kutsi ‘lingcweliswe.’ Kufanele siphindze sithandazele nekutsi bukhosi bakhe lobulungile butsatsele sikhundla kubusa kwaSathane kute ‘intsandvo yakhe yentiwe emhlabeni njengobe yentiwa ezulwini.’ (Mat. 6:9, 10) Jesu waphindze wasincenga kutsi sente ngekuvumelana nemithandazo yetfu ngekutsi ‘sifune kucala umbuso waNkulunkulu kanye nekulunga kwakhe.’—Mat. 6:33.

14. Nanobe Jesu abete sono, kungani kwakudzingeka kutsi afake umfutfo kute afeze indzima yakhe enjongweni yaNkulunkulu?

¹⁴ Njengobe sikhatsi sekutsi abulawe sasisondzela, Jesu wawubona ngalokukhanya bha umtfwalo labenawo. Inhloso yaBabe wakhe kanye nelidvumela lakhe, kwakusime ekutseni abeketelele kuvivinywa kanye nekubulawa ngesibhuku. Sekusele nje emalanga lasihlanu ngembikwekuba abulawe, Jesu wathandaza: “Manje inhlitiyo yami ilusizi. Ngitawutsini nje? Ngitsi: ‘Babe, ngisindzise kulomzuzu’? Cha, phela lapha emhlabeni ngetela lomzuzu.” Ngemuva kwekuba asakuvetile emthandazweni wakhe loko lokwakusekujuleni kwenhlitiyo yakhe, wase utsintsa indzaba lebaluleke kakhulu. Wathandaza watsi: “Babe, dvumisa ligama lakho.” Ngekushesha lokukhulu Jehova waphendvula: “Sengilidvumisile, ngisetalidvumisa futsi.” (Joh. 12:27, 28) Jesu abetimisele kuvivinywa ngesizatfu sekugcina kwakhe bucotfo ngelizinga lelendlula nobe ngabe ngukuphi kuvivinywa umuntfu phaca lake wabhekana nako. Siyaciniseka kutsi kuva emavi aBabe wakhe wasezulwini, kwamniketa letsemba lekutsi utawuphumelela ekuphakamiseni kanye nasekulweleni bukhosi baJehova. Nembala waphumelela!

Loko Lokwafezwa Kufa KwaJesu

15. Ngembikwekuba nje afe, kungani Jesu atsi: “Kuphelele”?

¹⁵ Ngalesikhatsi Jesu abetselwe elugodvweni lekuhlushwa, sekatawuphefumula kwekugcina watsi: “Kuphelele.” (Joh. 19:30) Cabanga nje ngetintfo letinyenti lakhona kutifeza ngelusito lwaNkulunkulu eminyakeni lemitsatfu nesigamu kusukela ngalesikhatsi abhajatiswa kute kube sekufeni kwakhe. Ngalesikhatsi Jesu afa, kwaba nekutamatama lokukhulu kwemhlaba futsi lisotja laseRoma lebelimgadzile latsi: “Ngempela lomuntfu abeyiNdvodzana yaNkulunkulu!” (Mat. 27:54) Lelisotja belisandza kubona kuhlekiswa ngaJesu ngesizatfu sekutsi watsi uyiNdvodzana yaNkulunkulu. Nanobe abhekana nekuhlupheka lokukhulu, Jesu wahlala acotfo futsi wakwenta kwaba sebaleni kutsi Sathane ucala emanga. Kubo bonkhe labasekela bukhosi baNkulunkulu, Sathane wagomela watsi: “Umuntfu angalahlekelwa nguko konkhe lanako ngenca yemphilo yakhe.” (Jobe 2:4) Ngesizatfu sekutsi abetsembekile, Jesu wakhombisa kutsi bo-Adamu na-Eva bebangahlala betsembekile kulokuvivinywa lokungatseni lababhekana nako. Lokubaluleke kakhulu kutsi kuphila kanye nekufa kwaJesu, kwaphakamisa bukhosi baJehova lobunekulunga. (Fundza Taga 27:11.) Tikhona yini letinye tintfo letafezwa kufa kwaJesu? Yebo tikhona!

16, 17. (a) Kungani kwakungeke kube lukhuni ngemaKhristu asendvulo aJehova kutsi abe nekuthula naye? (b) Jehova wayibusisa njani iNdvodzana yakhe ngekwetsembeka kwayo, futsi yini iNkhosi Jesu Khristu lechubeka iyenta?

¹⁶ Letinyenti tinceku taJehova taphila ngalesikhatsi Jesu asengaketi emhlabeni. Taba nebudlelwane lobuhle naNkulunkulu, futsi tanikwa nelitsemba leluvuko. (Isa. 25:8; Dan. 12:13) Kodvwa kungenteka njani ngaNkulunkulu longcwele, Jehova, kutsi abusise bantfu labanesono ngendlela lenhle kangaka? LiBhayibheli liyachaza: “Nkulunkulu wamnika [Jesu Khristu] kutsi abeyinhlawulo yengati yakhe; lenhlawulo-ke yemukeleka ngekukholwa. Ngalendlela  Nkulunkulu sewubonakalise kulunga kwakhe ngekutsi ngaJesu ahlawule tono letatentiwe kadzeni Nkulunkulu angakatehluleli, ngenca yekubeketela kwakhe. Kodvwa kwanyalo Nkulunkulu sewubonakalise kulunga kwakhe, kuze kukhanye kutsi yena ulungile nekutsi wonkhe umuntfu lokholwa nguJesu uyamemukela kutsi ulungile.”—Rom. 3:25, 26.

¹⁷ Jehova wahlomelisa Jesu ngekumvusela esikhundleni lesiphakeme lesendlula ngisho leso abenaso ngembikwekuta kwakhe emhlabeni. Nyalo Jesu ujabulela kuphila lokute kufa njengesidalwa semoya. (Heb. 1:3) NjengemPhristi Lophakeme neNkhosi, iNkhosi lenguJesu Khristu iyachubeka isita balandzeli bayo kutsi baphakamise kulunga kwaNkulunkulu. Siyabonga kutsi Babe wetfu wasezulwini, Jehova, nguMbusisi wabo bonkhe labenta njalo nalabamkhonta ngekwetsembeka balingisa iNdvodzana yakhe.—Fundza Tihlabelelo 34:3; Hebheru 11:6.

18. Sitawucoca ngani esihlokweni lesilandzelako?

¹⁸ Bantfu labetsembekile kusukela ku-Abela, bajabulela budlelwane lobuhle naJehova ngobe banekukholwa, futsi banelitemba kuleNtalo letsenjisiwe. Jehova bekati kamhlophe kutsi iNdvodzana yakhe itawubugcina bucotfo, nekutsi kufa kwayo ‘kutawususa sono selive.’ (Joh. 1:29) Kufa kwaJesu kuphindze kuzuzise ngisho nalabo labaphila esikhatsini salamuhla. (Rom. 3:26) Ngako-ke, ngutiphi tibusiso umhlatjelo waKhristu longakuletsela tona? Sihloko lesilandzelako sitawucoca ngalendzaba.

[Umbhalo longentasi]

Ungaphendvula Njani?

• Kulunga kwaNkulunkulu kwabekelwa njani insayeya?

• Kubhajatiswa kwaJesu kwakusho kutsini?

• Yini leyafezwa kufa kwaJesu?

[Imibuto Yesihloko Lesifundvwako]

[Sitfombe ekhasini 15]

Uyati yini kutsi kubhajatiswa kwaJesu kwakusho kutsini?