¿La limasiyalh Jesús pi Dios xalakatitum?

«Dios aya klhkawilinitta pi wa Jesús naxokgonani xpalakata kintalakgalhinkan akxni nastajtamakgan xkgalhni naniy. Chuna xlakapastaknit xampi Dios ankgalhin tlaway wantu xlilat.» (ROMANOS 3:25)

1, 2. 1) ¿Tuku kinkamasiyaniyan Biblia xlakata la wilakgolh latamanin? 2) ¿Tukuya takgalhskinin nakgalhtiyaw kʼuma artículo?

PUTUM likgalhtawakganitawa tuku wan Biblia akxni ni kgalhakgaxmatnika Dios kjardín xaʼEdén. Akinin lipatinamaw xlakata ni kgalhakgaxmatnalh Adán. Biblia wan: «Ntsukulh ntalakgalhin nkatuxawat nkaj xpalakata nchatum chixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin xampi paks lakgalhinankgolh» (Romanos 5:12). Maski lu fuersa natlawayaw xlakata nitsinu natlawayaw tuku nitlan, minkilhtamaku tlawayaw tuku nitlan wa xlakata skiniyaw Dios pi kakinkatapatin. Asta apóstol Pablo nitlan xmakgkatsi akxni wa: «Xampi ni wa ktlaway ntu xatlan wa ntu klakaskin; wampi wa ntu ni tlan wa ntu ni klakaskin, wa yuma ktlaway. “¡Koxuta nkit!”» (Romanos 7:19, 24).

² Xlakata uma tema, na tawilakgo makgapitsi takgalhskinin nema lu xlakaskinka. Xlakata putum lakgalhinanin akxni lakachinaw, ¿tuku xlakata Jesús ni lakgalhina xwanit akxni lakachilh? ¿Tuku xlakata tamunulh? ¿La limasiyalh kxlatamat Jesús pi Jehová xalakatitum? Chu tuku tlakg xlakaskinka, ¿tuku kitaxtulh xlakata nilh?

Wi tiku wan pi Dios ni xalakatitum

3. ¿La akgskgawilh Satanás Eva?

³ Xapulana kinatlatnikan ni lakapastaknankgolh akxni lakgmakgankgolh xTamapakgsin Dios chu wata kgalhakgaxmatkgolh «xamakgan luwa wa nti wanikan Akgskgawini, xawa Satanás» (Apocalipsis 12:9). ¿La chuna lalh? Pulana, Satanás limasiyaputulh pi Dios ni xalakatitum akxni kgalhskilh Eva komo xlikana Dios xkawaninit pi ni nawakgo «xtawakat putum kiwi nema yakgolh kjardín». Eva wanilh tuku Dios xkawaninit. Wanilh pi xtawat kaj kgantum kiwi ni xliwatkan xwanit, chu komo xwakgolh xnikgolh. Pero Satanás wanilh: «Ni katinitit», chuna xlimawakama pi Jehová xaʼakgsanina. Chuna tlawalh pi Eva nakanajla pi Dios wi tuku tlan ni xkamaxkiputun. Wanilh pi komo xwalh xtawakat ama kiwi la Dios xwa chu chuna tlan xakstu xlakapastakli tuku tlan chu tuku nitlan (Génesis 3:1-5).

4. ¿La kxmakan Satanás tawilakgolh putum latamanin?

⁴ Wantuku Akgskgawini xlimasiyaputun, pi latamanin tlakg tlan xtawilakgolh komo ni xkgalhakgaxmatnikgolh Jehová. Adán xtiwa pi xTamapakgsin Dios xalakatitum, pero wata kgaxmatnilh xpuskat chu walh xtawakat kiwi nema xkawanikanit pi ni nawakgo. Chuna nialhla tlan talalilh Dios chu kimputumkan kinkatamaknun ktalakgalhin chu klinin. Chuna putum latamanin tawilakgolh kxmakan uma xalixkajni «[x]mapakgsina nak uma kakilhtamaku», Satanás (2 Corintios 4:4; Xasasti Tamacatzinín, Romanos 7:14).

5. 1) ¿La makgantaxtilh Jehová xtachuwin 2) ¿La kamakgtayalh Jehová xkamanan Adán chu Eva?

⁵ Jehová xlikana makgantaxti xtachuwin. Wa xlakata kawanilh Adán chu Eva pi xnikgolh (Génesis 3:16-19). Pero uma ni wamputun pi Dios nialhla xmakgantaxtilh tuku xlakapastaknit natlawa. Wantuku Dios kawanilh Adán chu Eva limasiyalh pi xkamanan tlan xtamakgtayakgolh. Jehová wa pi wi tiku xʼama makamin  chu maski Satanás xʼama tsankxkiti uma lakapara xpaksli chu wata xʼama aktayami xtalamakgasitsin (Génesis 3:15). Biblia limasiya tuku xama la xlakata Jesucristo akxni wa: «Wacha yuma ntilitasiyulh xKam Dios, lakimpi namalakgsputuy xtatlaw akgskgawini» (1 Juan 3:8). Pero xlakata Jesús latamalh chu nilh, ¿la makgtayanalh natamalanki pi Jehová xalakatitum?

¿Tuku xwamputun xlakata Jesús tamunulh?

6. ¿Tuku likatsiyaw pi Jesús ni makglhtinalh talakgalhin?

⁶ Wantuku xlakata xmakaminkanit Jesús, xlakata akxni lankata xwa chuna xwa la Adán akxni nina xlakgalhinan (Romanos 5:14; 1 Corintios 15:45). Xtalakaskin pi akxni xlakachilh ni lakgalhina xwa. ¿La tlawalh Dios? Ángel Gabriel wanilh María, xtse Jesús umakgolh tachuwin: «Espíritu Santo nalakgminan, chu xlitliwakga Dios nakgmiliyan [...], wa xpalakata yama xasantujlani skgata wanti nalakachin, [...] xKam Dios nalimapakuwikan» (Lucas 1:35; Hua Xasasti Talaccaxlan, 1999). Akxni Jesús aktsinajku xwanit, max María wanilh la lakachilh. Wa xlakata, akxni María chu xchixku José, kitekgskgolh ktemplo, kawanilh: «¿Latla pi ni katsiyatit pi kit anta unu kxtemplo kintlat kimininiy naktawilay?» (Lucas 2:49). Wa uma limasiya pi akxni aktsinaku xwanit Jesús xkatsi pi xKgawasa Dios xwanit. Wa xlakata Jesús lu xlakaskinka xʼakxilha natakatsi pi Dios xalakatitum.

7. ¿Tuku lu xlakaskinka nema Jesús xkgalhi?

⁷ Jesús limasiyalh pi lu xpaxki xtachuwin Dios ni xmakgxtakga tamakxtumit nema xtatlawa kxkachikin Dios. Xla lu tlan xʼakgatekgsa o xmakgachakgxi xlakata ni lakgalhina xwanit, chu na lu xtamakgxtakga kxtalakapastakni tuku xlikgalhtawakga kTatsokgni xaHebreo (Lucas 4:16). Wantuku na lu lhuwa kxtapalh nema xkgalhi Jesús: wa xmakni nema ni xkgalhi talakgalhin nema tlan xmakamastalh xlakata xkalakgmaxtulh latamanin. Chu xlakata uma kSalmo 40:6-8 nachuna xwan wantuku max Jesús xlakpuwama akxni wanilh kxʼoración nema tlawanilh xTlat akxni xmunumaka (Lucas 3:21; kalikgalhtawakga Hebreos 10:5-10). *

8. ¿Tuku xlakata Juan ni xmunuputun Jesús?

⁸ Akxni Jesús lakgalh Juan xlakata namunu, ni xmunuputun. Xlakata Juan kajwatiya xkamunu judíos tiku nitlan xlimakgkatsikgo xtalakgalhinkan xlakata xlakatsalakgonit Limapakgasin. Chu xlakata Juan xpariente Jesús xwanit, xkatsi pi ni xkgalhi  talakgalhin chu ni xtalakaskin namakgxtakga tuku nitlan xtlawama. Pero Jesús skinilh xmunulh chu wanilh: «Chuna kinkamininiyan namakgantaxtiyaw xlipaks wantu Dios lhkawilinit» (Mateo 3:15).

9. ¿Tuku xwamputun xtamunut Jesús?

⁹ Jesús max xkatsi pi xlakata ni xkgalhi talakgalhin chuna la Adán, tlan xtikgalhilh kamanan nema ni xkgalhikgolh talakgalhin. Pero nikxni chuna lakpuwa, xlakata xkatsi pi ni wa xtalakaskin Jehová xwanit. Dios xlimakaminit xlakata Mesías xwa, wantiku xwankanit pi namin, chu xtalakaskin pi xmakamastalh xlatamat nema ni xkgalhi talakgalhin unu katiyatni (kalikgalhtawakga Isaías 53:5, 6, 12). Akinin katsiyaw pi xtamunut Jesús ni xwamputun la akxni akinin tamunuyaw. Ni xwamputun pi xtamakamastanima Jehová, xlakata kachikin Israel niku xtapakgsi Jesús xtamakamastaninitta kiMalakatsukinakan. Wata, xmima wani Dios pi xʼama tlawa xtalakaskin, chuna la xtsokgwilikanitta tuku xtlawalh Mesías.

10. ¿Tuku xlitlawat xwanit Mesías xlakata xmakgantaxtilh xtalakaskin Dios, chu la tlawalh Jesús uma tuku lu tuwa xlakgayawakanit?

¹⁰ Jesús tlawalh xtalakaskin Dios, maski uma xwamputun pi xʼama lichuwinan xalakwan xalaksasti tamakatsin chu xkamakgalhtawakgalh latamanin xlakata na chuntiya xkamasiyanikgolh amakgapitsin. Pero akxni tamunulh na limasiyalh pi maski xputsastalanika chu xpatinalh asta xnilh chuna xtlawalh, chuna xlimasiyama pi ni xmakgxtakga xTamapakgsin Dios nema xalakatitum. Jesús lu xpaxki xTlat. Wa xlakata, komo xmakamastalh xmakni lu xlipaxuwa chu xlimasiyama pi xtlawa xtalakaskin xTlat (Juan 14:31). Na lu xlipaxuwa pi tlan xkalilakgmaxtulh latamanin xmakni nema ni xkgalhi talakgalhin anta ktalakgalhin chu klinin. Akxni tamunulh xlakata natlawa uma tuwa nema xlakgayawakanit, ¿tlan akxilhli Jehová? ¡Xlikana pi tlan akxilhli!

11. ¿La limasiyalh Jehová pi xmakgamalhtinan Jesús la Cristo, Mesías nema xwankanit pi namin?

¹¹ Pulaktati Evangelios limasiyakgo pi Jehová lu lakgatilh akxni Jesús tamunulh kJordán. Juan, tiku xMununan wa pi chuna lalh, xla wa: «Kukxilhli Spiritu, xtaktamachi nkakgapun xtachuna ntijtimput, na anta jaxli kxaʼkpun xaʼkgxakga [Jesús]. [...] Cha nchu nkit, kuʼkxilhli, na kmastanit ntalulokgtat mpi wa yuma, xKam Dios» (Juan 1:32-34). Chu akxni Jesús tamunulh Jehová wa: «Wa yuma nkinKam nti luwa kpaxkiy, wanti luwa klimakgapaxuwakan» (Mateo 3:17; Marcos 1:11; Lucas 3:22).

Ni makgxtakgli Dios maski limakgnika

12. ¿Tuku tlawalh Jesús akgtutu kata aʼitat nema latamalh akxni xtamununitta?

¹² Akgtutu kata aʼitat akxni Jesús xtamununitta, xliputum kilhtamaku xkamasiyani latamanin xlakata xTlat chu xmasiya pi xTamapakgsin xalakatitum. Maski lu tuwa xwanit xtlawankan xlikalanka Katiyatni nema xKawanikanit Nakamaxkikan israelitas, pero uma ni tlawalh ni nakalitachuwinan tuku xaxlikana (Juan 4:6, 34; 18:37). Ni kajwatiya lichuwinalh xTamapakgsin Dios, na kamakuchilh latamanin, kamaxkilh tuku nawakgo chu asta kamalakastakwanilh tiku xnikgonitta. Uma tuku nila tamakanajla nema Jesús tlawalh limasiya tuku natlawa xTamapakgsin Dios xpalakata latamanin (Mateo 11:4, 5).

13. ¿Tuku masiyalh Jesús xlakata tuku naskinaw akxni natlawayaw oración?

¹³ Maski Jesús lhuwa tuku masiyalh chu kamakuchilh latamanin wililh lu tlan liʼakxilhtit xlakata kajwatiya Jehová limalankilh xlakata tuku tlawalh (Juan 5:19; 11:41-44). Na limasiyalh tuku tlakg xlakaskinka tuku naskinaw akxni natlawayaw oración. Xtukuwani Dios «xlitaʼakxilhat pi xasanto» chu xTamapakgsin nema xalakatitum wa katawilalh chu ni wa xtamapakgsin  Satanás nema lu lixkajni wi, chu kakgantaxtulh xtalakaskin Dios «xtachuna lantla nkakgapun, na chuna kawa nkatiyatna» (Mateo 6:9, 10; nota). Nachuna, Jesús kinkawaniyan pi chuna katlawaw la skinaw kkiʼoracionkan: «Xapulana kaputsatit wa ntu xlimapakgsin Dios, chu wa xtalakaskin» (Mateo 6:33).

14. Maski Jesús ni xkgalhi talakgalhin, ¿tuku xlakata na tuwa makgkatsilh natlawa xtalakaskin Dios nema xlimakaminkanit?

¹⁴ Chuna la xtalakatsuwima kilhtamaku akxni xlimakamastat xwanit xlatamat. Jesús tlakg lu tuwa xmakgkatsima namakgantaxti tuku xliyawakanit. Komo Jesús xtayanilh uma tuku xʼama lipatinan nema ni xminini chu asta xnilh, uma xtlawalh pi xkgantaxtulh xtalakaskin xTlat chu xlimasiyalh pi ni xlikana tuku xlimawakakanit Jehová. Akxni xtsankga akgkitsis kilhtamaku namakgnikan tlawalh uma oración: «Wa nchiyu, akglitwananit nkinaku, ¿la nakwan? ¿[...] Tataj, kakimalakgtaxti yuma ktalakaputsit? Wampi luwa watiya kliminit». Xlakata na lataman xwanit wa xlakata chuna makgkatsilh. Pero ni wa lakpuwa xlakata la xpatinama wata wa: «Kamatlanki mintukuwini». Chu Jehová kgalhtilh: «Kmatlankinitta, nakmatlankipalay amakgtum» (Juan 12:27, 28). Jesús liwanata xlakapastaknit natayani tuku tuwa xʼama titaxtu nema nipara chatum chixku axtitaxtu. Pero umakgolh tachuwin nema wanilh xTlat xalak akgapun matliwakglhli, xlakata tlan xmalankilh chu xlimasiyalh pi xTlat xalakatitum mapakgsina. ¡Chu makgantaxtilh!

¿Tuku kitaxtulh xlakata Jesús nilh?

15. Akxni nina xniy Jesús, ¿tuku xlakata wa: «Paksa kgantaxtunit»?

¹⁵ Anta kkiwi niku kxtokgowakakanit, akxni awatiya xʼama jaxanan Jesús wa: «Paksa kgantaxtunit» (Juan 19:30). Xlakata makgtayalh Dios, ¡lu lhuwa tuku tlawalh Jesús akgtutu kata aʼitat nema titaxtulh akxni xtamununitta asta akxni nilh! Akxni nilh, lu lipekua tachikilh tiyat chu soldado xalak Roma tiku xmakuentajtlawimaka wa: «Luwa xlikana mpi xKam Dios yuma nchixku» (Mateo 27:54). Uma soldado xakxilhnit tuku nitlan tlawanikgolh Jesús, xlakata xwan pi xKgawasa Dios xwanit, max wa xlakata chuna wa. Jesús nikxni makgxtakgli Dios maski lu patinalh chuna limasiyalh pi Satanás xaʼakgsanina. Kalakapastakwi pi akglhuwa siglos nema titaxtulha, Akgskgawini uma tuku xkalimawakanit tiku tatayakgo xTamapakgsin Dios: «Chatum chixku paks natlawa tuku natalakaskin xlakata nalilakgmaxtu xlatamat» (Job 2:4, Traducción en lenguaje actual). Wantuku Jesús tlawalh limasiyalh pi Adán chu Eva na tlan ni xmakgatsankgananikgolh Dios xlakata xlakan ni lu tuwa tuku xkawanikanit ni natlawakgo. Chu tuku tlakg xlakaskinka, xlatamat Jesús chu akxni makgnika limasiyalh pi Jehová xalakatitum akxni mapakgsinan (kalikgalhtawakga Proverbios 27:11). Pero ¿wi atanu tuku tlan kitaxtulh xlakata makgnika Jesús? ¡Chuna!

16, 17. 1) ¿Tuku makgtayanalh xlakata Jehová tlan katalalilh xlakskujnin tiku latamakgolh akxni nina xmin Cristo? 2) ¿La sikulunatlawalh Jehová xKgawasa, chu tuku chuntiya tlawama la uku kiMalanakan Jesucristo?

¹⁶ Jehová tlan katalalilh lhuwa kskujnin tiku latamakgolh akxni nina xmin Jesús, unu Katiyatni chu putum nakamalakastakwani (Isaías 25:8; Daniel 12:13). Pero xlakata tlan nakamaxki latamanin tiku xalakgalhinanin uma lu lilakgatit tasikulunalin, xtalakaskin pi wi tuku xlakkaxwililh Jehová. ¿Tuku lakkaxwililh Jehová? Biblia kgalhtinan: «Dios [...] liwililh nCristo nakinkapalakgaxokoyan xpalakata kintalakgalhinkan lantla stajtamakgalh xkgalhni, na wa yuma likgalhiyaw lantla nkanajlaniyaw. Chuna limasiyulh Dios ntalulokgtat ntu ntlaway, sampi wa Dios  xpalakata xtapaxuwanaliyan, kaj chuna ti lipaxuwanaliyalh xpalakata wa ntu xapulanaj xtalakgalhinkan nchixkuwin. Chu na wa ntlawalh mpi nalikatsiyaw nchiyuj kilhtamaku mpi lhuwa talulokgtat xla, chu mpi malulokgniy wa nti nkgalhiniy ntakanajla Jesús» (Romanos 3:25, 26).

¹⁷ Xlakata Jesús chuna tlawalh, Jehová malakastakwanilh chu na tlakg lanka litaxtulh nixawa akxni nina xmin Katiyatni. Uku Jesús lu lanka espíritu nema nikxni katinilh (Hebreos 1:3). Chu xlakata xaPuxku Sacerdote chu Mapakgsina, kiMalanakan Jesucristo tlan nakamakgtaya kstalaninanin chuntiya namasiyakgo pi Jehová xalakatitum. ¡Lu paxtikatsiniyaw kinTlatikan xalak akgapun xlakata nakasikulanatlawa putum tiku nachuna tlawakgo la Jesús tlawalh chu nikxni makgxtakgkgo! (Kalikgalhtawakga Salmo 34:3 chu Hebreos 11:6.)

18. ¿Tukuya takgalhskinin nakgalhti artículo nema aku mima?

¹⁸ Kaj xlakata xtakanajlakan chu xlakata xlipawankgo tiku xwankanit pi namin lhuwa xlakskujnin Dios la Abel tlan talalinkgolh Jehová. Dios xkatsi pi xKgawasa ni xmakgatsankgananilh asta xnilh chu uma tlan xlixokgolh «xtalakgalhin ntachixkuwitat» (Juan 1:29). Talakgmaxtut nema Cristo mastalh kamakgtaya latamanin asta la uku (Romanos 3:26). ¿La natlan nalakgmaxtuyan? Uma takgalhskinin natakgalhti kʼartículo nema mima.

[Notas nema wilakgo kpágina]

¿La xkgalhtinanti?

• ¿La limawakaka Dios pi ni xalakatitum?

• ¿Tuku xwamputun xtamunut Jesús?

• ¿Tuku kitaxtulh xlakata Jesús nilh?

[Takgalhskinin]

[Epígrafe xla página 13]

¿Katsiya tuku xwamputun xtamunut Jesús?