Rogon ni Gagiyelnag Jesus Feni Mat’aw Got

“I pi’ Got Kristus Jesus ni rachaen ni map’ . . . e ir e nge yog ni nge n’ag Got fan e denen ko girdi’ riy, ni yira n’ag u daken e michan’ rorad ngak Kristus. I pi’ Got Kristus ni fan e nge yog ni dag rogon nib mat’aw nge rogon ni ma mat’awnag e girdi’ ngak.”​—ROM. 3:25.

1, 2. (a) Mang e be fil e Bible ngodad u murung’agen rarogon e girdi’? (b) Mang boch e deer ni yira weliy u lan e re thin ney?

 BOOR e girdi’ ni manang murung’agen e togopuluw nni tay u lan fare milay’ nu Eden ni faan bay u Bible. Gad gubin ni ke af wenegan e denen rok Adam ngodad. Bod rogon ni kan weliy ko pi thin ni baaray ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Rom. 5:12) Yugu aram rogon ni gad ma athamgil ni ngad rin’ed e tin nib fel’, machane ka gad ma oloboch, ere ba t’uf ni nge n’ag Got fan e denen rodad. Mus ngak apostal Paul ni ki gaar: “Dagur rin’ e tin nib fel’ ni ir e gub adag ni nggu rin’; machane gu be rin’ e tin nib kireb ni ir e dabug ni nggu rin’. Ere kar gu gafgow!”​—Rom. 7:19, 24.

² Ere bochan ni gad bogi tadenen, mab puluw ni ngad fithed e pi deer ni baaray: Mang e ke rin’ ma ke yog ni ngan gargeleg Jesus nu Nazareth nde af e denen ngak, ma mang fan ni kan taufenag? Uw rogon ni gagiyelnag Jesus feni mat’aw Jehovah ko pi n’en ni i rin’? Ma bin th’abi ga’ fan riy e mang e ke lebug u daken e yam’ ni tay Jesus?

Kan Togopuluw nga Mat’awun Got

3. Uw rogon ni bannag Satan Efa?

³ Gal ga’ rodad ni som’on ni Adam nge Efa e ra togopuluwgow nga mat’awun e gagiyeg rok Got, mar pagew “fare porchoyog ni ke kakrom, ni kan tunguy fithingan ni Moonyan’, ara Satan” ni nge gagiyegnagrow. (Rev. 12:9) Am lemnag rogon ni buch e re n’ey. I guy Satan rogon ni nge maruwar u wan’ Adam nge Efa rogon feni mat’aw e gagiyeg rok Jehovah Got. Aram fan ni fith ngak Efa ni gaar: “Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” Me sul Efa u daken e n’en ni tay Got chilen ngorow ni kemus ni taab ken e gek’iy u lan e gi milay’ nem e dab ra mathgow ngay, ya yow ra yim’. Ma aram me yog Satan ni ke ban Got ni gaar: “Gathi gimew ra yim’.” Ere ke guy rogon ni nge lemnag Efa ni bay ban’en nib fel’ ni ke tel Got rorow, ma faanra kay wom’engin fare ke gek’iy ma ra bod Got me yog ni par rok.​—Gen. 3:1-5.

4. Mang e rin’ me par e girdi’ u tan pa’ Satan?

⁴ Ba tamilang ni yog Satan nra felfelan’ e girdi’ ni faan yad ra par ni yad ba dar rok Got. I motoyil Adam ngak leengin, me un i kay wom’engin fare ke gek’iy ni kan tay chilen ndab ni kay, ma de fol u mat’awun e gagiyeg rok Got. Aram fan ndaki fel’ Adam u wan’ Got me pi’dad nga pa’ e denen nge yam’. Maku aram e ngiyal’ ni par e girdi’ nga tan pa’ Satan ni ir e “be gagiyegnag e girdi’ nu fayleng.”​—John 12:31; Rom. 7:14.

5. (a) Uw rogon nde thilyeg Jehovah e thin rok? (b) Mang athap e pi’ Got ngak pi fak Adam nge Efa?

⁵ De thilyeg Jehovah e thin rok, me turguy ni nge yim’ Adam nge Efa. (Gen. 3:16-19) Machane dawori thil e n’en nib m’agan’ Got ngay ko som’on. Nap’an ni turguy Jehovah e gechig rok Adam nge Efa, me pi’ ban’en nra yognag e athap ngak pi fakrow. I yog nra pi’ be’ ni  “fak” ara owchen nra k’ad Satan wurilen ay. Machane cha’nem nra mang owchen ni kan micheg e ra fas e maad’ad u wurilen ay, ngemu’ me ‘pirdiiy lolugen [Satan] nge maad’ad nib gel.’ (Gen. 3:15) Ke tamilangnag e Bible e re n’ey u nap’an ni weliy murung’agen Jesus Kristus ni gaar: “Ereray fan ni yib i m’ug Fak Got, ni bochan e nge kirebnag e maruwel rok e re moonyan’ nem.” (1 John 3:8) Machane uw rogon ni ke gagiyelnag Jesus feni mat’aw Got u rogon e ngongol rok nge yam’ ni tay?

Fan e Taufe ni Tay Jesus

6. Uw rogon ni kad nanged nde af e denen rok Adam ngak Jesus?

⁶ Nap’an ni ilal Jesus me yan i par ni ke taareb rogon ngak Adam u nap’an ni kab flont. (Rom. 5:14; 1 Kor. 15:45) Re n’ey e be yip’ fan nni gargeleg Jesus nib flont. Uw rogon ni buch e re n’em? Fare engel i Gabriel e yib i tamilangnag ngak Maria ni chitiningin Jesus ni gaar: “Fare [“gelngin Got nib thothup,” NW] e bay yib ngom, me yib i par gelngin Got ngom. Erera’ fan nre tir nem nib thothup e bay ni pining ni Fak Got.” (Luke 1:35) U tabolngin e yafas rok Jesus, me yog Maria ngak e n’en ni rin’ min diyennag. Aram fan nnap’an ni pirieg Maria nge Josef u tempel rok Got u nap’an ni kab bitir, me fithrow ni gaar: “Da mu nangew nthingar gub gu par nga naun rok e Chitamag?” (Luke 2:49) Ba tamilang ni kab bitir Jesus ma manang ni ir Fak Got. Ere rib ga’ fan u wan’ ni nge gagiyelnag feni mat’aw Got.

7. Mang e n’en ni bay rok Jesus nib ga’ fan?

⁷ I dag Jesus nib ga’ fan e tirok Got ban’en u wan’, ya ma un ko muulung ni gubin ngiyal’. Bochan nib flont, ma gubin ban’en ni i rung’ag ma i beeg u lan e Pi Babyor ko Bible nni Yoloy Som’on ni Thin ni Hebrew mab pey ni i mit ngak ma be nang fan. (Luke 4:16) Ku bay ban’en rok nib ga’ fan ni aram downgin nib flont ni ir e biyuliy e girdi’ ngay. Nap’an nni taufenag Jesus, ma dabisiy ni i lemnag fapi thin ko profet ni bay u Psalm 40:6-8.​—Luke 3:21; mu beeg e Hebrews 10:5-10. *

8. Mang fan ndabun John ni Tataufe ni nge taufenag Jesus?

⁸ Som’on e dabun John ni Tataufe ni nge taufenag Jesus. Mang fan? Bochan ni ma taufenag John piyu Jew ni kar kalgadngan’rad ko denen ni ur rin’ed nib togopuluw ko Motochiyel. Ba chugur e tha’ rorow Jesus, ere dabisiy ni manang ni ir be’ nib  mat’aw ma de t’uf ni nge kalngan’. Machane me yog Jesus ngak John nib puluw ni ngan taufenag. I gaar: “Ereray kanawoen ni gadow ra rin’ ma aram e kad rin’ew urngin e tin ni be finey Got.”​—Matt. 3:15.

9. Mang e be yip’ fan e taufe ni un Jesus ngay?

⁹ Bochan nib flont Jesus ni bod Adam, ma rayog ni nge lemnag ni ku rayog rok ni nge fakay e bitir nib flont. Machane gathi aram e n’en ni i lemnag Jesus ni nge rin’ ni bochan e gathi aram e n’en nib m’agan’ Jehovah ngay. Ke l’og Got Jesus ni nge lebguy e maruwel rok ni ir Owchen ni kan micheg ara fare Messiah. Re n’ey e ba muun ngay e yafas rok nra pi’ nib maligach. (Mu beeg e Isaiah 53:5, 6, 12.) Taufe ni tay Jesus e de taareb fan ko taufe ni gad ma un ngay. De ognag ir ngak Jehovah ni bochan e ir bang ko fare nam nu Israel ni kan ognagrad ngak Got. Aram fan ni un Jesus ko taufe ya nge dag ni ke pi’ ir ni nge rin’ e tin nib m’agan’ Got ngay nrogon ni kan yiiynag u Bible.

10. (a) Mang e ba muun ko n’en nib m’agan’ Got ngay ni nge rin’ Jesus ni ir fare Messiah? (b) Uw rogon e re n’ey u wan’ Jesus?

¹⁰ N’en nib m’agan’ Jehovah ngay ni fan ngak Jesus e ba muun ngay ni nge machibnag fare thin nib fel’ ni murung’agen Gil’ilungun Got, me pingeg e girdi’ ngar manged pi gachalpen, me fal’eg rogorad ni fan ko fare maruwel ni machib. Ki m’agan’ ngay ni nge k’adan’ u fithik’ e gafgow ni un tay ngak nge mada’ ko ngiyal’ ni yim’ ni bochan e be tay tanggin e gagiyeg rok Jehovah nib mat’aw. Bochan nrib t’uf e Chitamangin nu tharmiy rok, ma aram fan nib felfelan’ ngay ni nge rin’ e n’en nib m’agan’ Got ngay me pi’ ir ni maligach. (John 14:31) Kub felfelan’ ngay nrayog ni nge pi’ e yafas rok nib flont ngak Got ni nge mang biyul ni nge chuwegdad ko sib ko denen nge yam’. I m’agan’ Got ngay ni nge ognag Jesus ir ni nge rin’ e pi maruwel ney, fa? Arrogon.

11. Uw rogon ni dag Jehovah ni ke m’agan’ ngay ni nge mang Jesus fare Messiah ara Kristus?

¹¹ Fa aningeg i Gospel nni yoloy e goo ni weliy riy e n’en ni yog Jehovah u nap’an ni yib Jesus u fithik’ e ran nga talang ko fare lul’ nu Jordan u tomuren ni kan taufenag. I yog John ni Tataufe ni gaar: “Gguy [“gelngin Got nib thothup,” NW] ni yib ni gowa bbulogol u lan e lang nga but’ nge yib i par nga daken [Jesus] . . . Kug guy, ere gu be yog ngomed ni ir faanem ni Fak Got ir.” (John 1:32-34) Maku aram e ngiyal’ ni gaar Jehovah: “Ereray Fakag nib t’uf rog ni kari felan’ug ngak.”​—Matt. 3:17; Mark 1:11; Luke 3:22.

I Yul’yul’ nge Mada’ ko Yam’

12. Mang e i rin’ Jesus u lan fa dalip nge baley e duw u tomuren ni kan taufenag?

¹² U lan fa dalip nge baley e duw ni immoy Jesus u fayleng ma i machibnag murung’agen e Chitamangin ngak e girdi’ nge gagiyeg rok nib mat’aw. I milekag nib n’uw woen u lan fare Nam ni Kan Micheg, machane dariy ban’en ni taleg ni nge dab ki machibnag fare thin riyul’. (John 4:6, 34; 18:37) I weliy Jesus murung’agen Gil’ilungun Got ngak e girdi’. M’ar ni i golnag, nge girdi’ ni i duruw’iy, nge yam’ ni i faseg, e be dag e n’en nra rin’ Gil’ilungun Got ni fan ko girdi’ boch nga m’on.​—Matt. 11:4, 5. 

13. Mang e ke yog Jesus u murung’agen e meybil?

¹³ Da i gay Jesus rogon ni nga nog e sorok ngak ko machib nge maang’ang ni i ngongliy, ya i guy rogon ni nge mang Jehovah e nga nog e sorok ngak. (John 5:19; 11:41-44) Ki tamilangnag Jesus boch ban’en nib ga’ fan ni ngad uneged ko meybil rodad. Thingar ud yibilayed ni ngan “tay fan” fithingan Got ni Jehovah nib thothup, ma gagiyeg rok nib mat’aw e nge  yan nga lon e gagiyeg rok Satan nib kireb ya nge yog ni ngan ‘rin’ e tin nib m’agan’ ngay u roy u but’ ni bod rogon ni yibe rin’ u tharmiy.’ (Matt. 6:9, 10) Ki yog Jesus nthingar kud ngongolgad nib puluw ko meybil rodad ni aram e ngad ‘mon’eged u wan’dad e gagiyeg rok Got nge tin nib m’agan’ ngay ni ngad rin’ed.’​—Matt. 6:33.

14. Yugu aram rogon nib flont Jesus, ma mang fan nib t’uf ni nge athamgil nge lebguy e n’en nib milfan ngak?

¹⁴ Nap’an ni chugur ni nge yim’ Jesus mi ri magafan’ nib gel ni bochan e n’en ni bay nib milfan ngak ni nge rin’. Rogon nra lebug e n’en nib m’agan’ e Chitamangin ngay nge rogon nra un weliy thin e Chitamangin e be yan u rogon e k’adan’ nra tay u fithik’ e skeng nge yam’ nra tay. Lal e rran u m’on ni nge yim’ me meybil ni gaar: “Chiney e ke magaf lanin’ug​—susun e mang e nggog? Chitamag, dab mpag e re awa ney nge yib ngog? Machane ara’ fag ni ku gub.” Tomuren ni yog Jesus e pi thin ney me thilyeg e lem rok nge lemnag e tin nib ga’ fan, me meybil ni gaar: “Chitamag, mu ta’ fan fithingam!” Me fulweg Jehovah ni gaar: “Kug ta’ fan ma bay kug rin’ bayay.” (John 12:27, 28) Arrogon, ba m’agan’ Jesus ngay ni nge athamgiliy e bin th’abi mo’maw’ e skeng ni yib ngak. Machane, nap’an ni rung’ag fapi thin ni yog e Chitamangin nu tharmiy ma dariy e maruwar riy nri pagan’ nrayog ni nge gagiyelnag me tayfan e gagiyeg rok Jehovah. Me rin’ ni aram rogon!

N’en ni Lebug u Daken e Yam’ ni Tay Jesus

15. U m’on ni yim’ Jesus, ma mang fan ni gaar: “Ke libug!”?

¹⁵ Nap’an ni be n’en ni nge yim’ Jesus u daken fare ley i gek’iy, me gaar: “Ke libug!” (John 19:30) Boor ban’en ni lebguy Jesus u daken e ayuw rok Got u lan fa dalip nge baley e duw, ni tabab u tomuren ni un ko taufe nge mada’ ko yam’ ni tay! Nap’an ni yim’ me yib ba durru’ nib gel ni ir e k’aring e en nib ga’ ko salthaw nu Roma ni nge yog ni gaar: “Riyul’ ni ir Fak Got!” (Matt. 27:54) Ba tamilang ni ke guy e re salthaw nem e moning ni un tay ngak Jesus ni bochan e be yog ni ir Fak Got. Yugu aram rogon feni gel e gafgow ni un tay ngak, me par nib yul’yul’ me micheg ni Satan e rib malulfith l’igin. Baaray e n’en ni ke yog Satan u murung’agen e piin ni yad ma tayfan e gagiyeg rok Got nib tolang: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) Yul’yul’ ni tay Jesus e be dag ni ku rayog ni nge par Adam nge Efa ni yow ba yul’yul’ ko skeng nib mom ni yib ngorow. Bin th’abi ga’ fan riy e rogon e yafas rok Jesus nge yam’ ni tay e gagiyelnag feni mat’aw e gagiyeg rok Jehovah. (Mu beeg e Proverbs 27:11.) Ku bay boch ban’en ni lebug u daken e yam’ ni tay Jesus, fa? Arrogon!

16, 17. (a) Mang fan ni ke yog ni nge fel’ boch e tapigpig rok Jehovah u wan’ kakrom ni ur moyed u m’on ko tin som’on e Kristiano? (b) Uw rogon ni tow’athnag Jehovah e yul’yul’ ni tay Fak? (c) Mang e ka be rin’ Jesus Kristus e chiney?

¹⁶ Boor e tapigpig rok Jehovah ni ur moyed u m’on ku Jesus. Ur pared ni yad ba mat’aw u mit Got ma aram min tow’athnagrad ko athap ko fas ko yam’. (Isa. 25:8; Dan. 12:13) Machane uw rogon nrayog ni nge tow’athnag Jehovah ni reb e Got nib thothup e girdi’ ni tadenen ni aram rogon? Be weliy e Bible ni gaar: “I pi’ Got Kristus Jesus ni rachaen ni map’ . . . e ir e nge yog ni nge n’ag Got fan e denen ko girdi’ riy, ni yira n’ag u daken e michan’ rorad ngak Kristus. I pi’ Got Kristus ni fan e nge yog ni dag rogon nib mat’aw nge rogon ni ma mat’awnag e girdi’ ngak. Kakrom e gum’an’nag Got ir, ngi i fek owchen ko denen rok e girdi’; machane chiney e ke rin’ ban’en ni fan ko denen ni ke ngongliy e girdi’ ni nge micheg ni ma  mat’awnag e girdi’ ngak. Erera’ kanawoen ni ke dag Got ni ir be’ nib mat’aw ma ra mat’awnag ngak urngin e piin nra mich Jesus u wun’rad.”​—Rom. 3:25, 26. *

¹⁷ I tow’athnag Jehovah Jesus ni aram e faseg ko yam’ me tay nga reb e liw ni kab tolang ko bin baaram ni immoy riy u m’on ni nge yib nga fayleng. Ere chiney e bay Jesus u tharmiy ni ir reb e kan nib tolang e liw rok. (Heb. 1:3) Bochan ni ir e Prist nib Tolang nge Pilung, ma ka be ulul be ayuweg pi gachalpen ni ngar gagiyelnaged feni mat’aw Got. Gad be pining e magar ngak e Chitamangidad nu tharmiy ni ma tow’athnag e piin ni yad ma pigpig ngak u fithik’ e yul’yul’ ni yad be folwok rok Fak!​—Mu beeg e Psalm 34:3; Hebrews 11:6.

18. Mang e yira weliy ko bin migid e thin?

¹⁸ Pi tapigpig rok Got ni yad ba yul’yul’ ni tabab ku Abel e rib fel’ e tha’ u thilrad Jehovah ni bochan e ur maruweliyed e michan’ rorad ngak ma ba pagan’rad ngak faen ni Owchen ni ke micheg. Manang Jehovah nra par Fak nib yul’yul’ ngak, ma yam’ nra tay e ra upunguy e denen rok e “girdi’ nu fayleng.” (John 1:29) Yam’ ni tay Jesus e ku bay angin ngak e girdi’ e ngiyal’ ney. (Rom. 3:26) Ere mang boch e tow’ath nra yog ngom ni bochan fare biyul ni pi’ Kristus? Aram e n’en ni yira weliy ko bin migid e thin.

[Footnotes]

Uw Rogon ni Ga Ra Fulweg?

• Uw rogon ni kan togopuluw nga mat’awun e gagiyeg rok Got?

• Mang e be yip’ fan e taufe ni un Jesus ngay?

• Mang e ke lebug u daken e yam’ ni tay Jesus?

[Study Questions]

[Picture on page 10]

Ga manang ko mang e be yip’ fan e taufe ni un Jesus ngay?