Ximodo bisihuinni Jesús jneza modo runi mandar Dios

«Gulaʼqui Dios gati be para quixe be irá ni huachee binni, ne tu guni cre bixhii be rini stibe pur laa la? zaca perdonar. Zacá biʼni Dios ti ihuinni jneza biʼni dxi caʼru gueeda Cristu.» (ROM. 3:25)

1, 2. 1) Xi rusiidiʼ Biblia laanu de modo nabani binni guidxilayú. 2) Xi guendarinabadiidxaʼ zacábinu lu tema riʼ.

 GUIRANU nánnanu relatu ni cuzeeteʼ bicaalú Adán ne Eva Dios ndaaniʼ jardín ni guyuu Edén. Ne yanna cadídinu stale guendanagana pur bichee Adán. Sicaríʼ na Biblia: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Rom. 5:12). Neca gúninu stipa pur gúninu ni jneza, peru qué rusaana de gucheʼnu, nga runi naquiiñeʼ guinábanu Dios gutiidilaʼdxiʼ stóndanu. Dede cayuubaʼ ladxidóʼ apóstol Pablu guníʼ ca diidxaʼ riʼ: «Qué rune ni jneza casi ñuuladxe ñuneʼ, sínuque ni cadi jneza ngue runeʼ, neca qué racaladxeʼ. [...] Pobre de naa. Nanna xi gueda iree xaʼyaʼ» (Rom. 7:19, 24-25).

² Ora guidúʼndanu tema riʼ, zucaani laanu guinabadiidxanu stale cosa risaca. Xiñee gunda gule Jesús de Nazaret sin donda pa guiráʼ binni guidxilayú binni ruchee laacaʼ yaʼ. Xiñee guyuunísabe. Ximodo bisihuinni Jesús lu xquendanabani jneza modo runi mandar Dios. Ne sti cosa jma risaca: xi guleendú guendaguti stibe yaʼ.

Guyuu tu bicaa binni guiníʼ ique pa jneza modo runi mandar Dios

3. Ximodo gudxite Binidxabaʼ ique Eva.

³ Ti guendahuati ngue biʼniʼ Adán ne Eva dxi maʼ qué ninacaʼ ñuni mandar Dios laacaʼ ne bidiicaʼ lugar guni mandar «beenda yooxho ni lá diablu ne binidxabaʼ» que laacaʼ (Apo. 12:9). Xipeʼ nga bizaaca yaʼ. Primé la? casi ora niníʼ Binidxabaʼ cadi naca Jiobá ti Rey nachaʼhuiʼ ora gunabadiidxabe Eva pa dxandíʼ gudxi Dios laacaʼ cadi gocaʼ «de guiráʼ ca cuananaxhi stiʼ ca yaga ni nuu ndaaniʼ jardín» que. Eva gudxi laabe cásipeʼ gudxi Dios laacaʼ. Gúdxibe laa nácani ti yaga ni qué zanda cánacabe, ne pa gúnicabe ni la? záticabe. Peru Binidxabaʼ gudxi laabe: «Qué zátiditu» ne ca diidxaʼ ca bisihuinni Binidxabaʼ casi ora cusiguii Jiobá. Gudxítebe ique Eva ngue runi bicaabe laa guni cré qué náʼ Dios gudii laa xiixa cosa ni galán. Ne gúdxibe laa zaca casi Dios pa gó cuananaxhi que ne maʼ laa si zanda guʼyaʼ gunáʼ nga ni jneza ne gunáʼ nga ni cadi jneza (Gén. 3:1-5).

4. Ximodo guyuu binni guidxilayú lu náʼ Binidxabaʼ.

⁴ Ni gucalaʼdxiʼ Binidxabaʼ niníʼ nga zabani binni jma nayecheʼ pa qué guni mandar Jiobá laacaʼ. Adán naquiiñeʼ nusihuinni jneza modo runi mandar Dios, peru lugar de ñúnibe zacá, bíʼnibe ni na xheelabe ne gudobe cuananaxhi ni gudxi Dios laacabe cadi gócabe. Ra bíʼnibe ngue, bixélebe de Dios ne guluube guiráʼ xixenu lu náʼ guendaruchee ne guendaguti. Guiráʼ binni guidxilayú riʼ biaanacabe lu náʼ ti rey ni naca xhenemigu Dios ne nga nga Binidxabaʼ, «dios stiʼ guidxilayú riʼ» (2 Cor. 4:4, Biblia de Jerusalén; Rom. 7:14).

5. 1) Ximodo biʼniʼ Jiobá ni guníʼ. 2) Xi gudixhe ique Jiobá guni para ca xiiñiʼ Adán ne Eva ni gale despué.

⁵ Jiobá dxandipeʼ runi ni guiníʼ. Nga runi guniʼbe zati Adán ne Eva (Gén. 3:16-19). Peru qué riníʼ diʼ nga maʼ qué zaca ni gudixhe íquebe gúnibe que. Ora guníʼ Jiobá xi chiguizaaca  Adán ne Eva que, bisihuínnibe nuu ti cosa sicarú para ca xiiñicaʼ ni gale despué. Jiobá guníʼ maʼ gudixhe ique guindisaʼ ti binni ni za de ti gunaa ne neca guniná Binidxabaʼ xatiniñeebe, ziásabe ne zuxhatañeebe ique (Gén. 3:15). Biblia cusiene chaahuiʼ tema riʼ ora ruzeeteʼ ni de Jesucristu ne ca diidxaʼ riʼ: «Nga runi beeda Xiiñi Dios, beda uchiá xhiiña binidxabaʼ» (1 Juan 3:8). Yanna, ximodo zacané guendanabani ne guendaguti stiʼ Jesús guihuinni jneza modo runi mandar Jiobá yaʼ.

Xi pur guyuunisa Jesús

6. Xiñee nánnanu qué ñalené Jesús donda bisaanané Adán laanu.

⁶ Gudixhe Dios gaca Jesús ti hombre ni qué gapa donda ora guiniisi, cásica guca Adán ante guchee (Rom. 5:14; 1 Cor. 15:45). Para gaca nga naquiiñeʼ gálebe sin donda. Ximodo gunda guca ngue yaʼ. Ángel Gabriel bisiene ni María, jñaa Jesús, ne ca diidxaʼ riʼ: «Zeeda Espíritu Santu luguiá luʼ ne zutaagu enda nandxóʼ sti Dios lii. Nga runi zaree chu badu huiini ca para Dios, ne zabi cabe laa Xiiñi Dios» (Luc. 1:35). Dxi guca Jesús nahuiiniʼ, zándaca gudxi María laabe xi guiráʼ bizaaca para beeda gálebe. Ngue runi, dxi bidxela María ne José laabe ndaaniʼ yuʼduʼ que gúdxibe laacaʼ: «Ñee qué ganna tu pa naquiiñe gune xhiiña Bixhoze la?» (Luc. 2:49). Zanda guininu maca nanna Jesús Xiiñiʼ Dios laa dede dxi nahuiiniruʼ. Ngue runi para laabe risácapeʼ ngue gusihuínnibe jneza modo runi mandar Dios.

7. Xi ti cosa nabé risaca gupa Jesús.

⁷ Jesús bisihuinni nabé riuulaʼdxiʼ ganna de ca cosa ni zeeda de Dios, purtiʼ qué nusaanabe de ñebe ca guendaridagulisaa ni gupa xquidxi Dios. Cumu qué ñalené Jesús donda la? ngue runi gunda biaanané xquendabiaanibe guiráʼ ni binadiágabe ne ni biindabe lu Stiidxaʼ Dios ni gucuá lu diidxaʼ hebreu (Luc. 4:16). Ne cumu cadi binni ruchee laabe la? zanda gudiibe xcuérpube pur binni. Ne biáʼsipeʼ ndiʼ ne ni na ca diidxaʼ ni zeeda lu Salmo 40:6-8 ne zándaca ca diidxaʼ ca nga caníʼ ique Jesús ora biʼniʼ orar Jiobá despué de guyuunisa (Luc. 3:21; biindaʼ Hebreos 10:5-10). a

8. Xiñee qué ninagá Juan niguunisa Jesús.

⁸ Dxi guyé Jesús ra nuu Juan para chúʼnisa, qué ninagá Juan ñúnini. Xiñee yaʼ. Purtiʼ caguunísabe ca judíu que para gusihuínnicaʼ maʼ guca arrepentircaʼ de ca donda sticaʼ ne pur bicheenecaʼ Ley. Cumu familia  gaxha stiʼ Juan nga Jesús la? nánnabe qué gapa diʼ Jesús donda ne pur nga cadi caquiiñeʼ gaca arrepentir. Peru Jesús gudxi laabe zaa uguunísabe laa purtiʼ jneza ni. Sicaríʼ gúdxibe Juan: «Jma naquiiñe guni nu irá ni gudixhe Dios gacaʼ» (Mat. 3:15).

9. Xi pur guyuunisa Jesús.

⁹ Dxi guyuu Jesús lu Guidxilayú riʼ gúcabe ti binni ni qué gapa donda cásica guca Adán. Ngue runi, ñándaca niníʼ íquebe ñápabe xiiñibe ni qué ñalené donda. Peru qué ñuu dxi niníʼ íquebe ñúnibe ngue, purtiʼ cadi para ngue biseendaʼ Jiobá laabe. Biseendaʼ Dios laabe para gácabe Mesías, ni za de ti gunaa, ne para gaca nga naquiiñeʼ gudiibe xquendanabánibe sin donda para guilá binni (biindaʼ Isaías 53:5, 6, 12). Peru naquiiñeʼ gánnanu gadxé razón gupa Jesús para guyuunisa ne gadxé razón nápanu para chúʼnisanu. Qué ñunidibe ni para gusihuínnibe maʼ bidiibe laabe Jiobá, purtiʼ nácabe de guidxi Israel, ne guidxi ca maca bidiicaʼ laacaʼ Jiobá. Laabe bíʼnibe ni para gusihuínnibe maʼ chiguibánibe para gúnibe ni na Dios, casi modo bizeeteʼ ca diidxaʼ riguixhená ni caníʼ de Mesías que.

10. Xi guiráʼ biʼniʼ Mesías que para bihuinni cayuni ni na Jiobá, ne ximodo biʼniʼ sentirbe ora gucuaabe ca dxiiñaʼ risaca que.

¹⁰ Jesús biʼniʼ ni na Dios, ne para bíʼnibe ni bicheechebe ca diidxaʼ nacubi ne galán que, gucanebe binni gaca discípulo ne laaca gucanebe laacaʼ para cadi gusaana de gusiidicaʼ binni. Peru ora bisihuinni Jesús maʼ chiguibani para guni ni na Jiobá la? laaca bihuinni nuube listu para sanándacabe ne guuticabe laabe, ne zacá bisihuínnibe napa Dios derechu de guni mandar. Laabe nabé gunnaxhiibe Bixhózebe, ngue runi bíʼnibe ni na ne stale guendanayecheʼ ne gútibe pur binni guidxilayú (Juan 14:31). Laaca biéchebe purtiʼ nánnabe zanda iquiiñeʼ Dios guendanabani sin donda stibe para cuee laanu de lu náʼ guendaruchee ne de lu náʼ guendaguti. Yanna ora bisihuinni Jesús zanda guni ca dxiiñaʼ risaca riʼ, ñee guyuulaʼdxiʼ Dios gúnibe ni la? ¡Guyuulaʼdxiʼ pue!

11. Ximodo bisihuinni Jiobá guyuulaʼdxiʼ cani biʼniʼ Cristu, Mesías ni bieeteʼ gueeda que.

¹¹ Guidapaʼ Evangeliu ca cusiene cani bisihuinni Jiobá guyuulaʼdxiʼ cani biʼniʼ Jesús ora biree de ndaaniʼ nisa stiʼ guiiguʼ Jordán que. Juan ni Riguunisa guníʼ zacá gúcani ne ca diidxaʼ riʼ: «Biiya zeda yete Espíritu Santu de ibáʼ casi ti paloma ne biaana dxí luguiá [Jesús]. [...] Naa biiya laabe ne ma gudxe binni deque laabe nga Xiiñi Dios» (Juan 1:32-34). Jiobá peʼ guníʼ ca diidxaʼ riʼ dxi que: «Ndi nga Xiiñe ni nadxiee ne ni rusieche naa» (Mat. 3:17; Mar. 1:11; Luc. 3:22).

Qué nucheenebe Dios dede dxi gútibe

12. Xi biʼniʼ Jesús lu chonna iza arondaʼ despué de guyuunisa.

¹² Lu chonna iza arondaʼ qué nusaana Jesús de nusiidiʼ binni de Bixhoze ne nusihuinni napa Dios derechu de guni mandar. Nabé bidxágabe ora guzabe lu Layú ni Bizabiruaa Dios gudii ca xpinni, peru qué nudiibe lugar nucueeza xiixa laabe de niniʼbe stiidxaʼ Dios (Juan 4:6, 34; 18:37). Cadi bicheechesibe diidxaʼ, sínuque laaca bisiándabe binni huará, biyaanabe stale binni ne dede gundísabe gueʼtuʼ. Ne ca milagru bíʼnibe ca bisihuínnibe ni chiguni gobiernu stiʼ Dios para binni guidxilayú (Mat. 11:4, 5).

13. Ximodo bisiidiʼ Jesús binni guni orar.

¹³ Lugar de nuyubi Jesús nusisaca binni laa pur cani cusiidiʼ ne ca milagru cayuni la? biyúbibe modo gusisaca binni Jiobá pur laacani, zacá bisihuínnibe nácabe ti ejemplu ra qué nudxiibabe laca laabe (Juan 5:19; 11:41-44). Laaca bisiidibe xi jma naquiiñeʼ guinábanu Dios ora guni orarnu laa. Naquiiñeʼ guinábanu gusisaca guiráʼ binni lá Dios ne guni mandar gobiernu ni runi jneza stiʼ Dios lugar stiʼ Binidxabaʼ, «ne gaca ni na  [Dios]. Cásica raca ni ibáʼ, zaqueca gaca ni ndaani guidxilayú» (Mat. 6:9, 10). Laaca cayábibe laanu gúninu stipa para gúninu ni canábanu Dios. Laabe guniʼbe: «Guyúbitu primeru reinu stiʼ Dios ne gúnitu ni jneza ni rinabaʼ Dios laatu» (Mat. 6:33, NM).

14. Xiñee guca nagana para Jesús guni ni na Jiobá neca guca ti binni sin donda.

¹⁴ Ra jma maʼ zidxiña dxi gudii Jesús xquendanabani pur binni la? biiyabe jma nagana ni nexheʼ gúnibe que. Ne nápabe razón para guni sentirbe zaqué, purtiʼ zaca ni naguixhe ique Bixhózebe ne zaníʼcabe galán de laa pa gudiibe lugar guni juzgárcabe laabe neca qué gápabe donda ne guuticabe laabe. Gaayuʼ gubidxa ante gátibe biʼniʼ orarbe Dios ne ca diidxaʼ riʼ: «Ma nuu yuuba ladxiduáʼ. Yanna xi iniéʼ. Ñee zabe Bixhoze ulá naa de ni chi tide ri la? Coʼ, purti para tide ni nga runi bidxiña dede raríʼ». Cumu binni laabe la? biʼniʼ sentirbe zaqué. Peru lugar de niníʼ íquebe de laabe, guníʼ íquebe de ni jma risaca ne guniʼbe: «Bixhozeʼ, bisisaca lá lu jma». Oraqueca bicabi Jiobá laabe ne na: «Ma bisisaca ni, ne zusisaca ruaʼ ni sti tiru» (Juan 12:27, 28). Jesús maʼ nuu listu para guidxaagalú ti guendanagana ni zucaa laa gusihuinni pa qué zucheené Dios ne ni chiguidxaalube ca qué huayuu dxi tiidiʼ ti binni guidxilayú ni. Peru ca diidxaʼ ni gudxi Bixhózebe laabe que nabé gucaneni laabe gánnabe zanda gusisácabe laa ne gusihuínnibe laasi nga napa derechu de guni mandar. ¡Ne dxandíʼ gunda bíʼnibe ni!

Xi guleendú Jesús ora guti

15. Xiñee guníʼ Jesús «Ma biluxe ni» ante gati.

¹⁵ Dxi cá Jesús lu yaga que guníʼ ca diidxaʼ riʼ maʼ para gati: «Ma biluxe ni» (Juan 19:30). ¡Stale cosa sicarú nga biʼniʼ Jesús ra gucané Dios laa lu chonna iza arondaʼ bibani lu guidxilayú riʼ dede dxi guyuunisa hasta dxi guti! Cásipeʼ gútibe guca ti xu roʼ ne xaíque stiʼ ca soldadu stiʼ Roma ni nexheʼ guʼyaʼ gátibe que guníʼ: «Dxandí Xiiñi Dios ndiʼ» (Mat. 27:54). Zándaca guníʼ soldadu que zaqué purtiʼ biiyaʼ ximodo biʼniʼ búrlacabe laabe ora guniʼbe Xiiñiʼ Dios laabe. Neca gudiʼdiʼ Jesús stale guendananá qué nusaanabe de ñúnibe ni na Dios dede gútibe ne bisihuínnibe nabé rusiguii Binidxabaʼ. Guietenaláʼdxinu, maca stale iza ante guníʼ Binidxabaʼ ca diidxaʼ riʼ de ca binni ni na napa Dios derechu de guni mandar: «Guiráʼ ni napa binni zudii ni pur xhialma» (Job 2:4). Peru ra qué nucheené Jesús Dios bisihuínnibe ñanda nudxiilú Adán ne Eva ca guendanagana ni bidxagalucaʼ, purtiʼ cadi naganapeʼ ni gudíʼdicaʼ. Ne ni jma risaca nga dxi bibani Jesús ne ora guti gunda bisihuinni jneza modo runi mandar Jiobá, Dios ni nandxóʼ (biindaʼ Proverbios 27:11). Yanna, ñee nuuruʼ xiixa ni guleendú Jesús ora guti la? ¡Nuu pue!

16, 17. 1) Xiñee gunda guníʼ Jiobá nachaʼhuiʼ ca binni ni bibani ante gueeda Cristu lu Guidxilayú. 2) Xi premiu bidii Jiobá Xiiñiʼ purtiʼ qué nusaana de ñuni ni na, ne xi cayúniruʼ Señor Jesucristu ca dxi riʼ.

¹⁶ Jiobá biiyaʼ stale de ca xpinni casi binni ni nachaʼhuiʼ ante gueeda Jesús lu Guidxilayú riʼ, ne Dios guníʼ zandisaʼ guirácabe de lade gueʼtuʼ (Isa. 25:8; Dan. 12:13). Jiobá naquiiñeʼ guni ni na ca ley stiʼ para ganda uguu ndaayaʼ ca binni guidxilayú. Xi nga bíʼnibe yaʼ. Biblia bicabi sicaríʼ: «Gulaʼqui Dios gati [Cristu] para quixe [...] irá ni huachee binni, ne tu guni cre bixhii be rini stibe pur laa la? zaca perdonar. Zacá biʼni Dios ti ihuinni jneza biʼni dxi caʼru gueeda Cristu, ra qué nixhacalaʼdxi be binni, qué nuquixe be laacaʼ ni bichee caʼ, ne laca ti ihuinni jneza cayuni be yanna, purti yáquexa ma gudixe Cristu irá pecadu la? jneza runi be, ruxhá be stonda tutiica guni cre laa» (Rom. 3:25, 26). b

 ¹⁷ Ti premiu ni bidii Jiobá Xiiñiʼ nga gundísabe laa de lade gueʼtuʼ ne bidiibe laa ti puestu jma risaca que ni gupa ante gueeda lu Guidxilayú. Yanna maʼ naca Jesús ti espíritu ni qué zanda gati (Heb. 1:3). Yanna, ra maʼ naca Jesucristu Xaíque stiʼ cani ruzaaquiʼ guʼxhuʼ ne Rey, zándaruʼ gacanebe ca xpínnibe gusihuínnicaʼ jneza modo runi mandar Dios. ¡Nabé rudiʼnu xquíxepeʼ Bixhózenu ni nuu guibáʼ purtiʼ riguu ndaayaʼ cani rusisaca laa ne cani qué rusaana de guni ni na cásica biʼniʼ Xiiñiʼ! (Biindaʼ Salmo 34:3 ne Hebreos 11:6.)

18. Xi guendarinabadiidxaʼ zacábinu lu sti tema ca.

¹⁸ Dede dxi bibani Abel, guiráʼ binni guidxilayú ni qué rusaana de guni ni na Jiobá huayaca xhamígucaʼ laabe purtiʼ bisihuínnicaʼ nápacaʼ fe binni ni chigale de gunaa que. Dios nanna qué zucheené Xiiñiʼ laa ne ora gátibe zaguíxebe guiráʼ xixé «xpecadu binni guidxilayú» (Juan 1:29). Guendaguti stiʼ Cristu laaca racaneni ca binni nabani yanna riʼ (Rom. 3:26). Ximodo zanda gacaneni lii yaʼ. Zacábinu guendarinabadiidxaʼ riʼ lu sti tema ca.

[Cani cá ñee yaza]

Xi nicábiluʼ

• Xi bicaa binni guiníʼ ique pa jneza modo runi mandar Dios.

• Xi pur guyuunisa Jesús.

• Xi guleendú Jesús ora guti.

[Guendarinabadiidxaʼ stiʼ párrafo]

[Dibuju/foto ni zeeda lu yaza 9]

Ñee nánnaluʼ xi pur guyuunisa Jesús la?