Imbitasyon Para sa Gabos!

IMBITASYON sa ano? Sa pagbisita sa saro sa mga sangang opisina kan Mga Saksi ni Jehova, na sa pangkagabsan inaapod na Bethel. Igwang 118 sangang opisina na nasa manlaenlaen na nasyon. Sa parate ipinapahayag kan mga bisita an saindang odok sa pusong pagpapahalaga sa naoobserbaran nindang nangyayari sa Bethel.

Pagkatapos maheling an dakol na mahigos na trabahador na maogmang naglilingkod ki Jehova sa sangang opisina sa Mejico, napahangang marhay an sarong hoben na inaadalan sa Biblia kaya ihinapot nia: “Ano an kaipuhan kong gibohon tanganing makapagtrabaho digdi?” Sinabihan sia: “Enot, kaipuhan mong magpabautismo. Dangan, marahay na maglingkod ka bilang payunir—sarong bilog na panahon na parabalangibog kan Kahadean.” Sinunod kan hoben na lalaki an mga sinabi sa saiya, asin pakalihis nin duwang taon inimbitaran siang maglingkod sa Bethel sa Mejico, na duman 20 taon na siang naglilingkod.

Ano an Bethel?

Sa Hebreo, an “Bethel” nangangahulogan na “Harong nin Dios.” (Gen. 28:19, nota sa ibaba) An mga pasilidad sa manlaenlaen na sangang opisina ginagamit sa pag-imprenta asin pagdistribwir nin mga Biblia asin babasahon sa Biblia patin sa pagtao nin espirituwal na tabang sa labing 100,000 na kongregasyon kan Mga Saksi ni Jehova sa bilog na kinaban. An haros 20,000 na nagtatrabaho sa Bethel—mga lalaki asin babae na laen-laen an pinaghalean na estado sa buhay asin kultura—daing kaimotan na naglilingkod nin bilog na panahon ki Jehova asin sa mga tugang ninda sa espirituwal. An makokosog na hoben kaibang nagtatrabaho kan mga dakol nang taon sa Kristianong gibohon na ini. Sa mga banggi asin sa mga katapusan kan semana, an mga miembro kan mga pamilyang Bethel maogmang nakikiasosyar sa kaharaning mga kongregasyon kan Mga Saksi ni Jehova sa mga pagtiripon asin Kristianong ministeryo. Ginagamit man ninda an saindang libreng oras sa pag-adal kan Biblia, pag-aling-aling, asin pag-asikaso sa personal na mga bagay.

Ibinabalik sa mga miembro kan pamilyang Bethel an dikit nindang nagastos kada bulan. Masiram asin masustansia an saindang kakanon patin malinig asin komportable an saindang istaran. Dai dinisenyo an mga erokan na Bethel tanganing magin luhoso. Minsan siring, praktikal an mga iyan. An mga bisita dai sana napapahanga sa namamantener na mga edipisyo asin palibot saka sa aregladong dalagan kan organisasyon kundi pati sa kabootan asin pagtarabangan kan mga nasa Bethel. An gabos mahigos na nagtatrabaho, pero makikatood sinda dawa sibot. Sa Bethel mayo nin pagpalaenlaen huli sa estado sa buhay o nin pakamate na an saro nakakalabi huli sa saiyang trabaho. Importante an lambang asignasyon, paglinig man iyan, paghardin, pagluto, o pagtrabaho sa  imprentahan o opisina. An mga naglilingkod sa Bethel, na inaapod na mga Bethelite, nagtatarabangan tanganing suportaran an ministeryo kan Mga Saksi ni Jehova.—Col. 3:23.

Midbidon an Nagkapira sa mga Bethelite

Midbidon niato nin orog pa an mga miembro kan internasyonal na pamilyang ini. Ano an nagpahiro sa sainda na magmawot na maglingkod sa Bethel? Helinga an halimbawa ni Mario. Kan sia magin Saksi ni Jehova, halangkaw an sueldo nia sa sarong midbid na kompanya nin auto sa Alemania asin may oportunidad siang umasenso. Dai nahaloy pakabautismohi sa saiya, nagboluntaryo sia nin sarong semana sa Bethel sa saiyang nasyon. Pinatabang sia sa imprentahan. Naheling ni Mario an risang-risang pagkakalaen kan mga katrabaho nia sa Bethel asin kan mga yaon sa saiyang sekular na trabaho. Kaya nag-aplay sia na maglingkod sa Bethel nin bilog na panahon. Minsan ngani daing gayo naintindihan kan dakol sa mga paryente asin katrabaho nia an saiyang desisyon, si Mario maogmang naglilingkod ngonyan sa Bethel sa Alemania.

Dakol an naglilingkod sa Bethel na kan enot mayo nin ano man na espesyal na inadalan o kakayahan. Totoo iyan ki Abel, na 15 taon nang naglilingkod sa Bethel sa Mejico. “An Bethel nagin garo eskuelahan para sa sako,” an sabi nia. “Nakanood akong magpaandar nin komplikadong marhay na mga imprentahan. Aram ko na paagi sa kaaraman na ini, puede akong magkaigwa nin dakol na kuarta kun magluwas ako sa Bethel, alagad dai ako magkakaigwa kan nakakamtan ko digdi—sarong trangkilo asin nakakakontentong buhay na mayo kan mga kahaditan asin pakipagkompetensia na yaon sa dakol na trabahong pangkomersio. Naniniwala ako na nagkaigwa ako kan pinakamarahay na edukasyon na mapupuede, na nakatabang sa sako na umoswag sa espirituwal sagkod intelektuwal na paagi. Dai ko makakamtan an siring na espirituwal na mga pakinabang dawa sa pinakamarahay na unibersidad.”

An Pagbisita Puedeng Makaparigon

Dawa an pagbisita sana sa Bethel puedeng magkaigwa nin positibong epekto sa espirituwalidad nin saro. Iyan an nangyari ki Omar na taga Mejico. Tinokdoan sia kan saiyang ina kan mga katotoohan sa Biblia. Alagad kan si Omar 17 anyos na, puminondo sia sa pag-atender sa Kristianong mga pagtiripon asin sa pakikikabtang sa pampublikong  ministeryo. Nag-abot an panahon na nagkaigwa sia nin mga bisyo asin nagin materyalistiko an pamumuhay nia. Dangan, mantang sia nagtatrabaho sa sarong kompanya nin komunikasyon, kaiba si Omar sa grupong ipinadara sa Bethel sa Mejico tanganing idemonstrar an paggamit nin nagkapirang aparato. Si Omar nagsabi: “Pagkatapos kan pagdemonstrar mi, an mga nag-aasikaso sa samo ilinibot kami sa mga pasilidad. Huli sa naheling ko asin sa marahay na pagtratar sa sako, hinorophorop ko an sakong pamumuhay, na siblag ki Jehova. Tolos-tolos na pinonan kong mag-atender giraray sa mga pagtiripon asin mag-adal sa Biblia. Anom na bulan pakalihis kan sakong pagbisita sa Bethel, nabautismohan ako. Nagpapasalamat ako ki Jehova huli sa motibasyon na inako ko paagi sa pagbisitang iyan sa Bethel.”

Si Masahiko na taga Hapon nagdakula man sa pamilyang Saksi. Minsan siring, nagpoon siang mag-isip na kadakol kan bawal sa pagigin Kristiano. Sia nagin aktibo nanggad sa mga aktibidad sa eskuelahan asin nagpondong mag-atender sa mga pagtiripon saka makikabtang sa paghuhulit. Nagigirumdoman ni Masahiko: “Sarong aldaw, an samong pamilya asin pirang Kristianong katood nagdesisyon na magbisita sa Bethel. Huli sa pamimirit kan sakong pamilya, uminiba ako. Sa paglibot sa Bethel, nagkaigwa ako nin kaginhawahan na kaidto ko sana namatean. An kaogmahan na namatean ko sa pakikiasosyar sa ibang mga Kristiano sa lakaw na idto sarong bagay na dai ko noarin man naeksperyensiahan sa mga katood ko na bakong Saksi. Nagkaigwa ako nin pagmawot na mamuhay sa Kristianong paagi, asin nagdesisyon ako na makipag-adal sa Biblia.” Ngonyan, si Masahiko saro nang bilog na panahon na ministro sa saindang kongregasyon.

Sarong tugang na babae sa Pransia an nagbalyo sa Moscow tanganing magtrabaho. Duman nawaran sia nin kontak sa mga Saksi ni Jehova asin luminuya an saiyang espirituwalidad. Sia naimbuelto sa salang gibo asin pag-abot nin panahon naagom nin bakong Saksi. Dangan sarong espirituwal na tugang na babae hale sa Pransia an nagdalaw sa saiya, asin magkaibanan sindang nagbiahe pasiring sa St. Petersburg, Russia, tanganing magbisita sa erokan na Bethel. Isinurat nia: “Mamomoton kaming inako sa Bethel asin napahiro kaini an boot ko. Igwa nanggad nin katoninongan duman. Namate ko an espiritu ni Jehova. Paano ko nagibong rumayo sa organisasyon ni Jehova? Pagkatapos kong magbisita sa Bethel, namibi ako para sa tabang ni Jehova asin may bagong determinasyon na pinonan kong tokdoan sa Biblia an sakong mga aki.” Apuera sa iba pang tabang sa espirituwal na tibaad inako kan Saksing ini na dating maluya sa espirituwal, naparigon siang marhay kan pagbisita nia sa Bethel asin nagin marahay an pag-oswag nia poon kaidto.

Ano an puede man na magin epekto kan pagbisita sa Bethel sa mga bakong pamilyar sa Mga Saksi ni Jehova? Kan 1988, si Alberto, na imbueltong marhay sa politika, nagbisita sa Bethel sa Brazil. Talagang napahanga sia sa kalinigan, pagigin areglado, asin partikularmente na sa pagigin hayag kan trabaho duman. Bago si Alberto magduman sa Bethel, nagbisita pa sana sia sa seminaryo na duman naglilingkod an saiyang bayaw bilang padi. Narisa ni Alberto an pagkakalaen. “An gabos sa seminaryo ginigibo nin patago,” an sabi ni Alberto. Dai nahaloy pakabisita nia sa Bethel, nag-ako sia nin pag-adal sa Biblia, binayaan nia an politika, asin ngonyan saro na siang magurang sa kongregasyon.

Magbisita Kamo sa Bethel!

Pambihirang mga paghihingoa an ginibo nin dakol tanganing makabisita sa sangang opisina sa saindang nasyon. Halimbawa, sa Brazil, apat na taon na nagtipon nin pamasahe si Paulo asin Eugenia para sa 3,000 kilometros na biahe sa bus, sa laog nin duwang aldaw, tanganing maheling an mga pasilidad kan Bethel sa nasyon na iyan. Sinda nagsabi: “Bawi an gabos na paghihingoa. Mas mahiwas na ngonyan an pagmansay mi sa organisasyon ni Jehova. Kun ipinapaliwanag mi sa samong mga inaadalan sa Biblia an gibohon sa Bethel, kun minsan naghahapot sinda, ‘Nakaduman na kamo?’ Ngonyan masasabi mi nang iyo.”

Igwa daw nin sangang opisina asin erokan na Bethel sa nasyon nindo o sa kaharaning nasyon? Iniimbitaran mi kamo na magbisita sa mga pasilidad. Siertong mamomoton kamong aakoon asin magkakaigwa kamo nin dakulang espirituwal na pakinabang sa pagbisita sa Bethel.

[Ritrato sa pahina 18]

Mario

[Ritrato sa pahina 18]

Abel

[Ritrato sa pahina 18]

Alemania

[Ritrato sa pahina 18]

Hapon

[Ritrato sa pahina 18]

Brazil