Ubwite Kuli Bonse!

UBWITE nshi? Ubwa kuyatandalila amaofeshi ya Nte sha kwa Yehova, ayo beta ati Bethel. Ifi fifulo fyonse pamo fyaba 118 mu fyalo fyalekanalekana. Abatandalila ayo maofeshi balatasha sana nga bamona ificitika pa Bethel.

Umulumendo umo uwalesambilila Baibolo, ilyo atandele pa Bethel mu Mexico no kumona abantu balebombela Yehova no mutima onse ne nsansa, alitemenwe sana kabili aipwishe ukuti: “Finshi mfwile ukucita pa kuti na ine nkese pano?” Bamwebele ukuti: “Ukabale ukubatishiwe. Lyena, kuti cawama walabombako na bupainiya, ukulashimikila pa Bufumu inshita iikalamba lyonse.” Uyu mulumendo acitile filya fine bamwebele, kabili pa numa ya myaka ibili balimwitile mu kubombela pa Bethel mu Mexico. Ino nshita nabombapo imyaka 20.

Bethel Cinshi?

Mu ciHebere, ishiwi lya kuti “Bethel” lipilibula “Ing’anda ya kwa Lesa.” (Ukute. 28:17, 19) Pali aya maofeshi ya Nte sha kwa Yehova mu fyalo fyalekanalekana e po bapulintila no kusabankanya amaBaibolo ne mpapulo e lyo no kwafwa ifilonganino fya Nte sha kwa Yehova mwi sonde lyonse ifyacila pali 100,000. Ababombela pa Bethel bonse pamo ababa mupepi na 20,000, abaume na banakashi abafuma ku fyalo fyalekanalekana kabili abakwata inkulilo shalekanalekana, balaipeelesha ukubombela Yehova na bamunyinabo inshita yonse. Ababomba imyaka iingi pa Bethel balabombela pamo na bacaice abali na maka. Mu nshita ya cungulo na pa Cibelushi na pa Mulungu abekala pa Bethel balalongana na bamunyinabo mu filonganino fya Nte sha kwa Yehova ifyabela mupepi kabili balabombela pamo umulimo wa kushimikila. Ilyo bashilebomba, balaisambilisha Baibolo, balangalako no kucitako na fimbi ifya pa lwabo.

Ababombela pa Bethel balabapeelako kandalama cila mweshi akakubafwako muli tumo tumo. Balalya ifya kulya ifisuma no kwikala mu miputule iisuma kabili iya busaka. Amaofeshi ya Nte sha kwa Yehova tabayapangila ukuti yabe aya lulumbi. Lelo, yaba fye ayalinga. Abatandala pali aya maofeshi tabatasha fye pa fyo ifikuulwa ne ncende fimoneka bwino ne fyo ifintu ficitwa mu muyano, lelo balatasha na pa cikuuku ababa pa Bethel bakwata e lyo na pa fyo baikatana. Bonse balabombesha, lelo tabapamfiwa ica kuti bafilwa ukulanga ukutemwa kuli bambi. Mu Bethel tamwaba kapaatulula nelyo ukuibililika pa mulandu ne milimo umo abomba. Imilimo yonse yalicindama, nampo nga ya kuwamya mu kati ka fikuulwa nelyo pa nse, ukwipika, nangu ukupulinta impapulo nelyo ukubombela mu ofeshi. Ababa pa Bethel babombela pamo  mu kutungilila umulimo wa kushimikila uwa Nte sha kwa Yehova.—Kol. 3:23.

Natulandeko Pali Bamo Ababa pa Bethel

Lekeni twishibepo fimo fimo pa baba muli ulu lupwa lwa mwi sonde lyonse. Cinshi calengele bafwaye ukubombela pa Bethel? Natulande pali ba Mario. Ilyo ba Mario basangwike Inte ya kwa Yehova, ninshi kale kale balabomba incito iisuma sana mu kampani ka myotoka akalepanga sana indalama mu German kabili balikwete ne shuko lya kubapeela icifulo icikalamba. Tapakokwele ukutula apo babatishiwilwe, basalile ukuyabombako pa Bethel umulungu umo mu calo bekala. Babebele ukubombela uko bapulintila impapulo. Ba Mario balimwene ubupusano bwali pa bo balebomba nabo mu Bethel na balya balebomba nabo mu kampani ka myotoka. E ico, balipwishe ukuti bakalebombela pa Bethel inshita yonse. Nangu ca kuti balupwa abengi ne fibusa tabatemenwe ifyo ba Mario basalile ukucita, pali ino nshita ba Mario babombela pa Bethel mu Germany kabili baliba ne nsansa.

Abengi abaya mu kubombela pa Bethel tabakwata amasambililo ya pa muulu nangu ukwishibisha imilimo imo. E fyo cali na kuli munyinefwe Abel, uwabombela pa Bethel mu Mexico pa myaka 15. Atila: “Nalisambilila ifintu ifingi pa Bethel. Nalishiba ifya kubomfya fimashini ifikalamba sana ifya kupulintilako impapulo. Nalishiba ukuti iyi milimo momba, kuti yangafwa ukupanga sana indalama nga nalifumine pa Bethel. Na lyo line nga naile mu kubomba mu calo, te kuti mbe ne nsansa no mutende ifyo nakwata. Pano nshikwata amasakamika ya mikalile, kabili tapaba kucimfyanya pa ncito. Nalimona ukuti ifyo nasambilila filangafwa, fyalinenga ukuba uwalamuka mu mibombele na mu fya kwa Lesa. Na ku yuniversiti fye iya pa muulu te kuti nsambilile ifyo nasambilila pali Lesa na pali uyu mulimo.”

Nga Mwatandala pa Bethel Mukakoseleshiwa

Ukutandala pa Bethel fye kweka kuti kwalenga mwatontonkanya pali bucibusa bwenu na Lesa. E fyo cali kuli Omar, mu Mexico. Banyina balimusambilishe icine caba mu Baibolo. Nomba ilyo ali ne myaka 17, Omar alilekele ukulongana no kushimikila. Asukile atendeka no kucita  ifyabipa no kulafwaisha sana icuma. Ilyo alebomba ku kampani kamo ifi, Omar ali pe bumba lyalebomba kuli ilya kampani ilyaile mu kulanga aba pa Bethel mu Mexico ifya kubomfya bamashini bamo. Omar alandile ati: “Ilyo twapwishishe ifyo twaendeele, abatwitile balitutandeshe mu fikuulwa. Ifyo namwene ne cileela ca ba pa Bethel fyalengele ntontonkanyepo pa fyo nalecita mu bumi, ifyo Yehova ashatemenwe. Bwangu bwangu natendeke ukusangwa mu kulongana no kusambilila Baibolo. Ilyo papitile imyeshi 6, pa numa ya kutandala pa Bethel, nalibatishiwe. Ndatasha Yehova pa fyo nakoseleshiwe ilyo natandele pa Bethel.”

Ba Masahiko abekala ku Japan, nabo bakuliile mu lupwa lwa ba Nte. Lelo, batendeke ukulamona kwati ukuba Umwina Kristu kwalengele baba abasha. Batampile ukwangala sana ifyangalo fya pa sukulu kabili balilekele ukulongana no kushimikila. Ba Masahiko batila: “Bushiku bumo ulupwa lwandi ne fibusa fimo Abena Kristu bapekenye ukuya mu kutandala ku Bethel. Ba lupwa lwandi balimpatikishe ukuya, e ico nalibakonkele. Ilyo natandele pa Bethel, nalyumfwile bwino sana ifyo nshabalile ng’umfwapo. Nalikwete sana insansa ilyo nali na Bena Kristu twaile nabo, isho nshabalile nkwata ilyo naleba ne fibusa abashili ba Nte. Natampile ukufwaya sana ukuba ne mibele ya Mwina Kristu, kabili napingwilepo ukufwaya aba kunsambilisha Baibolo.” Ba Masahiko nomba ni bapainiya ba nshita yonse mu cilonganino.

Inte umo afumine ku France no kuya ku Moscow ku ncito. Ilyo ali kulya talemonana na bantu ba kwa Yehova na bucibusa bwakwe na Yehova bwalibwelele pa nshi. Asukile acita ulubembu no kuupwa ku ushili Nte. Lyena, nkashi umo uwafumine ku France alimutandalile, kabili bonse babili balimine no kuya ku St. Petersburg, mu Russia ku kutandala pa Bethel ya muli cilya calo. Nkashi uwali uwanaka alembele ukuti: “Balitupokelele bwino pa Bethel, ne ci calimfikile pa mutima. Twasangile abantu abomfwana icine cine. Nalimwene ukuti mupashi wa kwa Yehova ulenga baleumfwana. Calengele ukuti njiluke ukutila nalilufyenye sana ukufuma mu kuteyanya kwa kwa Yehova. Pa numa ya kutandala pa Bethel, nalipepele ukuti Yehova angafwe kabili natendeke ukusambilisha abana bandi Baibolo lyonse.” Uyu nkashi balimwafwile ukukosa na kabili no kulunduluka. Na lyo line, icalengele sana akose no kulunduluka mu kupepa, kutandala ku Bethel.

Inga balya abashaishiba ifyo ba Nte baba, bena bomfwa shani nga batandala pa Bethel? Mu 1988, ba Alberto abaipoosele sana mu fikansa fya calo bailetandala pa Bethel mu Brazil. Balitemenwe sana ilyo bamwene ubusaka, umuyano, ne fyo umulimo walebombwa fye ukwabula ukufishilisha icili conse. Ilyo bailetandala pa Bethel, ninshi tapakokwele sana apo batandalile mulamu wabo uwalesambilila ifya bushimapepo pa sukulu basambilisha ifya mipepele. Ba Alberto balimwene ubupusano. Batile: “Fyonse fyalecitwa mu nkama pali ili sukulu.” Tapakokwele apo batandalile pa Bethel, ba Alberto balisumine ukusambilila Baibolo, baleka na mapolitiki, kabili nomba ni baeluda mu cilonganino.

Iseni Mutandale pa Bethel!

Abengi balesha na maka ukupekanya pa kuti bakayetandala pa maofeshi ya Nte sha kwa Yehova mu calo cabo. Ku ca kumwenako, mu Brazil, ba Paulo na ba Eugenia balisungile indalama pa myaka 4 isha kulipila pa kuti bakayetandala pa Bethel yaba mu calo mu mwabo apa kwenda inshiku shibili na basi kabili apaba bakilomita 3,000. Batila: “Twalitemenwe ifyo twacitile. Nomba twalishiba bwino ukuteyanya kwa kwa Yehova. Nga tulelondolwela abo tusambilisha Baibolo pa milimo ibombwa pa Bethel, limo balatwipusha ati, ‘Bushe mwaliyako?’ Ino nshita twasuka ati ee.”

Bushe mu calo cenu mwaliba amaofeshi ya Nte sha kwa Yehova nangu Bethel? Tulemukoselesha ukuti kabiyeni katandalenipo. Ukwabula no kutwishika bakamupokelela bwino kabili mukakoseleshiwa ukutwalilila ukubombela Yehova nga mwatandala pa Bethel.

[Icikope pe bula 18]

Ba Mario

[Icikope pe bula 18]

Ba Abel

[Icikope pe bula 18]

Germany

[Icikope pe bula 18]

Japan

[Icikope pe bula 18]

Brazil