Imbitasyon Alang sa Tanan!

UNSA kana nga imbitasyon? Ang pagduaw sa usa sa mga sangang buhatan sa mga Saksi ni Jehova, nga sagad gitawag ug Bethel. Adunay 118 niini diha sa lainlaing kayutaan. Ang mga bisita sagad mopahayag sa ilang apresasyon sa ilang naobserbahan diha sa Bethel.

Sa dihang nakita sa usa ka batan-ong estudyante sa Bibliya ang kugihang mga boluntaryo nga malipayong nag-alagad kang Jehova sa sangang buhatan sa Mexico, siya nakadayeg pag-ayo ug nakapangutana: “Unsa may akong buhaton aron makapuyo dinhi?” Siya giingnan: “Una, kinahanglan kang magpabawtismo. Dayon, maayong magpayunir ka—usa ka bug-os-panahong magmamantala sa Gingharian.” Gisunod sa batan-on ang maong sugyot, ug duha ka tuig sa ulahi siya gidapit nga moalagad sa Bethel sa Mexico, diin siya nag-alagad karon sulod na sa 20 ka tuig.

Unsa ang Bethel?

Sa Hebreohanong pinulongan, ang “Bethel” nagkahulogang “Balay sa Diyos.” (Gen. 28:17, 19) Ang mga pasilidad sa lainlaing sangang buhatan gigamit sa pag-imprenta ug pag-apod-apod ug mga Bibliya ug literatura ug sa pagtaganag espirituwal nga tabang sa kapig 100,000 ka kongregasyon sa mga Saksi ni Jehova sa tibuok kalibotan. Duolag 20,000 ka boluntaryo sa Bethel—mga lalaki ug babaye nga lainlaig kagikan ug kultura—ang kinasingkasing ug bug-os panahong nag-alagad kang Jehova uban sa ilang mga igsoon sa pagtuo. Kauban sa dugay nang mga nag-alagad dinhi ang abtik nga mga batan-on. Sa gabii ug mga hinapos sa semana, ang mga membro sa pamilyang Bethel malipay nga makig-uban sa mga igsoon sa dug-ol nga kongregasyon diha sa mga tigom ug sa pagsangyaw. Gigamit usab nila ang ilang libreng panahon sa pagtuon sa Bibliya, paglingawlingaw, ug sa pag-atiman sa personal nga mga butang.

Ang mga membro sa pamilyang Bethel makadawat matag bulan ug gamayng kantidad nga makatabang sa galastohan. Sila gitagan-ag lamian ug sustansiyadong pagkaon ug nagpuyo sa hinlo ug komportableng mga lawak. Ang mga puy-anang Bethel wala gidisenyo nga samag mahalong mga hotel. Ang mga bisita nakadayeg sa maayong-pagkaatiman nga mga bilding ug nataran, hapsay nga trabaho, maingon man sa kalulot ug kooperasyon nga makita diha sa Bethel. Ang tanan makugihong nagtrabaho, apan dili sobra ka puliki nga wala nay panahon sa pagpakighigala. Sa Bethel, walay pagpihigpihig ug wala usay mobati nga  labaw siya sa uban tungod sa iyang trabaho. Ang matag trabaho hinungdanon, kini man pagpanglimpiyo, pag-atiman sa hardin, pagpangluto, o pagtrabaho sa imprentahan o sa opisina. Ang mga Bethelite, nga maoy tawag sa mga boluntaryo sa Bethel, nagtinabangay aron masuportahan ang ministeryo sa mga Saksi ni Jehova.—Col. 3:23.

Himamata ang Pipila ka Bethelite

Atong ilailahon ang pipila ka membro niining internasyonal nga pamilya. Unsay nagtukmod kanila sa pag-alagad sa Bethel? Tagda ang kasinatian ni Mario. Sa dihang na-Saksi siya, si Mario adunay dakog-suweldo nga trabaho diha sa usa ka inilang kompaniya sa sakyanan didto sa Germany ug dunay kahigayonan nga moasenso. Wala madugay human sa iyang bawtismo, miboluntaryo siyag usa ka semana sa Bethel. Didto siya giasayn sa printery. Iyang nakita ang dakong kalainan tali sa iyang mga kauban sa trabaho sa Bethel ug nianang sa iyang sekular nga trabaho. Busa miaplay siya nga moalagad sa Bethel sa bug-os panahon. Bisan tuod daghan sa iyang paryente ug kaubanan ang wala makasabot sa iyang desisyon, si Mario malipayong nag-alagad karon sa Bethel sa Germany.

Daghan ang misulod sa Bethel nga walay espesyal nga edukasyon o katakos. Ingon niana si Abel, kinsa nag-alagad sa Bethel sa Mexico sulod sa 15 ka tuig. “Daghan kaayo kog nakat-onan sa Bethel,” siya miingon. “Nakakat-on ko sa pagpaandar ug modernong mga makina sa pag-imprenta. Nahibalo ko nga sa akong nakamaohan, mokita kog dako sa gawas sa Bethel, apan dili nako matagamtam ang akong nabatonan dinhi—usa ka malinawon ug makapatagbawng kinabuhi nga walay kabalaka ug kompetisyon nga makita diha sa daghang komersiyal nga trabahoan. Akong gibati nga akong nadawat ang labing maayong edukasyon nga nakatabang nako nga makabatog katakos ug mouswag sa espirituwal. Dili nako kini mabatonan bisan sa kinamaayohang unibersidad.”

Makapadasig ang Pagduaw

Bisan ang pagduaw lang sa Bethel adunay maayong epekto sa espirituwalidad sa usa. Mao kini ang nahitabo kang Omar, nga taga-Mexico. Siya natudloan sa iyang inahan bahin sa kamatuoran  sa Bibliya. Apan pag-edad niyag 17, si Omar mihunong pagtambong sa tigom ug sa pagsangyaw sa kanataran. Sa ngadtongadto, nalangkit siya sa mga bisyo ug sa materyalistikong paagi sa pagkinabuhi. Sa ulahi, sa dihang nagtrabaho siya sa usa ka kompaniya, usa siya sa gipadala ngadto sa Bethel sa Mexico aron ipakita kon unsaon paggamit ang pipila ka makinarya. Si Omar miingon: “Human niana, nag-tour mi sa mga pasilidad. Tungod sa akong nakita ug sa ilang maayong tinagdan nako, nakapamalandong ko bahin sa akong pagkinabuhi nga bulag kang Jehova. Misugod dayon ko pagtambong pag-usab sa mga tigom ug sa pagtuon sa Bibliya. Unom ka bulan human sa akong pagduaw sa Bethel, ako nabawtismohan. Nagpasalamat ko kang Jehova sa pagdasig nga akong nadawat tungod sa akong pagduaw sa Bethel.”

Si Masahiko, nga taga-Japan, nagdako usab sa Saksi nga pamilya. Apan, gibati niya nga estrikto ra kaayo ang Kristohanong paagi sa pagkinabuhi. Dayon, siya napuliki sa mga kalihokan sa eskuylahan ug mihunong pagtambong sa mga tigom maingon man sa pagsangyaw. Si Masahiko nahinumdom: “Usa ka adlaw niana ang among pamilya kauban sa pipila ka Kristohanong mga higala nakadesisyon nga mag-tour sa Bethel. Kay namugos man ang akong pamilya, miuban na lang ko. Nadasig kaayo ko sa among pag-tour. Ang kalipay nga akong gibati gumikan sa pagpakig-uban sa mga Kristohanon nga kauban namo sa biyahe wala gayod nako masinati sa akong dili-Saksing mga higala. Miturok ang akong tinguha nga magkinabuhi sa Kristohanong paagi, ug midesisyon ko nga magtuon sa Bibliya.” Sa pagkakaron, si Masahiko nag-alagad na ingong bug-os-panahong ministro sa iyang kongregasyon.

Usa ka Saksi sa France ang mibalhin sa Moscow aron motrabaho. Didto wala na siyay kontak sa mga Saksi ug naluya sa espirituwal. Siya nakasala ug sa ngadtongadto naminyo ug dili Saksi. Dayon usa ka sister sa France ang miduaw kaniya, ug nangadto sila sa St. Petersburg, Russia, aron mag-tour sa Bethel. Siya misulat: “Sa Bethel mainiton kaming giabiabi, ug natandog ako niini. Malinawon kaayo sa Bethel. Akong gibati nga anaa niana ang espiritu ni Jehova. Nagmahay ko nga mipalayo ko sa organisasyon ni Jehova. Human sa akong pagduaw sa Bethel, ako nag-ampo nga unta tabangan ko ni Jehova, ug uban ang determinasyon gisugdan nako pagtudlo ang akong mga anak bahin sa Bibliya.” Gawas pa sa ubang espirituwal nga tabang nga nadawat niining Saksi nga naluya sa espirituwal, siya napalig-on gayod sa iyang pagduaw sa Bethel ug human niana siya miuswag.

Komosta man kadtong miduaw sa Bethel nga dili sinati sa mga Saksi ni Jehova? Niadtong 1988, si Alberto, nga usa ka politiko, miduaw sa Bethel sa Brazil. Nakadayeg kaayo siya sa kahinlo ug kahapsay sa Bethel, ilabina gayod kay walay sekreto sa mga trabaho didto. Sa wala pa siya mag-tour sa Bethel, miduaw si Alberto sa seminaryo diin ang iyang bayaw nag-alagad ingong pari. Namatikdan ni Alberto ang kalainan. “Ang tanan diha sa seminaryo gihimo sa tago,” miingon si Alberto. Wala madugay human sa iyang pagduaw sa Bethel, siya midawat ug pagtuon sa Bibliya, mibiya sa politika, ug karon nag-alagad na ingong ansiyano sa kongregasyon.

Duaw Kamo sa Bethel!

Daghan ang naningkamot pag-ayo aron makaduaw sa sangang buhatan sa ilang nasod. Pananglitan, si Paulo ug Eugenia sa Brazil nagtigom ug salapi sulod sa upat ka tuig aron makaduaw sa Bethel nga may gilay-ong 3,000 kilometros ug biyaheon sa bus ug duha ka adlaw. Sila miingon: “Wala gayod makawang ang among paningkamot. Karon mas nasabtan namo ang organisasyon ni Jehova. Sa dihang among isaysay ang buluhaton sa Bethel sa among mga estudyante sa Bibliya, usahay mangutana sila, ‘Nakaadto na ba mo didto?’ Karon, makatubag na mig oo.”

Duna bay sangang buhatan ug puy-anang Bethel sa inyong nasod o sa sikbit nga nasod? Kamo gidapit sa pagduaw niana. Segurado nga kamo mainitong abiabihon ug makadawat ug dakong espirituwal nga kaayohan gumikan sa pagduaw sa Bethel.

[Hulagway sa panid 18]

Si Mario

[Hulagway sa panid 18]

Si Abel

[Hulagway sa panid 18]

Germany

[Hulagway sa panid 18]

Japan

[Hulagway sa panid 18]

Brazil