¡Lliwmi invitasqa kachkankichik!

¿IMAPAQ? Betelta watukunapaqmi, Jehová Diospa testigonkunapam allpantinpi kan 118 Betel wasikuna. Kay invitacionta chaskiqkunamantam achka willakurqaku admirasqa kasqankumanta.

Biblia estudiaq huk mozom, México nacionninpi Betel wasiman rispan admirakurqa achka qarikunawan warmikuna Jehová Diosta kusisqallaña servisqankuta qawaspan. Chaymi tapukurqa: “¿Imatam ruranay kaypi llamkanaypaq?”, nispa. Kaynatam contestarqaku: “Puntataqa bautizakunaykim. Chaymantapas allinmi kanman precursor otaq tukuy tiempoykiwan Diosta servinaykipaq kallpanchakuynikiqa”, nispa. Mozoqa nisqankutam kasukurqa, chaymi 2 wata pasaruptin Betelpi llamkananpaq invitasqa karqa, kunanqa 20 watañam chaypi servichkan.

¿Imataq Betelqa?

Hebreo rimaypi ‘Betel’ niq palabraqa “Diospa Wasin” ninanmi (Gen. 28:19). Betel wasikunaqa, allpantinpi Jehová Diospa testigonkunapa 100 waranqa masnin congregacionpi kaqkunatam yanapan iñiyninkupi allin kanankupaq. Chaynataq, wakinpiqa Bibliakunatawan chaymanta yachachiq qellqakunatam ruranku hinaspa aypunkupas. Chaypiqa 20.000 qarikunawan warmikunam tukuy tiemponkuwan llamkanku, achka nacionkunamanta hinaspa imaymana educacionniyoqmi kanku, paykunaqa Diostawan iñiqmasinkunatam servinku mana imatapas suyaspa. Chaypiqa tarinchikmi achka wataña llamkaqkunata, paykunam llamkanku mozo-sipaskunawan kuska. Paykunaqa samananku hora chayaramuptin hinaspa semana tukuytam predicaq rinku hinaspa huñunakunku hichpallanpi kaq congregacionkunapi. Chaymantapas chay tiempopim Bibliata estudianku, kusirikunku otaq huk rurayninkutapas atiendenku.

Betelpi kaqkunaqa sapa killam gastonkumanta yanapakuyta chaskinku. Chaymantapas, alimentakuq miski mikuytam mikunku hinaspa sumaq chaynataq limpio cuartokunapi yachanku. Apukunapa hina kananmantaqa, Betel wasikunaqa allinta tanteaspa rurasqam kachkan. Watukuqkunaqa admirakunkum imayna llamkasqankuta chaynataq Betel wasitawan jardintapas limpio kasqanta qawaspanku hinaspa chaypi kaqkuna respetakuq chaynataq yanapakuq kasqankumantapas. Ocupasqa kaspankupas tiempochakunkum allin chaskikuq kanankupaq. Betelpiqa manam pipas hukkunamanta aswan allin qawasqachu nitaq pipas ima rurasqanwanqa hatun tukunchu. Lliw rurasqankum ancha allin: limpiaypas, yanukuypas, jardin cuidaypas, qellqakuna ruraypas  otaq oficinakunapi llamkaypas. Betelitakunaqa yanapanakuspam huk sonqolla llamkanku iñiqmasinkunapa rurasqankuta yanapanankupaq (Col. 3:23).

Wakin betelitakunata reqsisun

Enteron pachapi aylluntin hina serviq wakin betelitakunata reqsisun. ¿Imam kallpancharqa Betelpi llamkanankupaq? Mariomanta rimasun. Bautizakusqan tiempopim, llamkarqa Alemaniapi ancha reqsisqa carrokuna ruraqkunawan, paymanqa allintam pagarqaku hinaspa astawan pagasqa kaytam suyachkarqa. Mana unaymantam nacionninpi Betel wasipi huk semana llamkananpaq ofrecekurqa, chaypim nirqaku qellqakunata ruraypi llamkananpaq. Chayllam cuentata qokurqa llamkaqmasinkunawan Betelpi llamkaqkuna mana chaynalla kasqankuta, chaymi Betelpi kananpaq huk solicitudta huntachirqa. Familianwan llamkaqmasinkuna tanteasqanta mana entiendeptinkupas, Marioqa ancha kusisqam Alemania Betelpi llamkachkan.

Betelmanqa achkam yaykurqaku mana oficioyoq. Chaynam pasarqa Abelta, payqa 15 watañam México nacion Betelpi llamkachkan. Paymi nin: “Betelqa huk escuela hinam ñoqapaq karqa. Chaypim yacharuni qellqakuna ruranapaq sasa manejay maquinakuna manejayta. Kay yachasqaywanqa achka qollqetachá huk llamkaypi ganachkayman, ichaqa Betelpi bendicionkuna chaskisqaytaqa manam haykapipas tariymanchu karqa, kaypim imamantapas mana preocupakuspa hawka kawsakuytawan kusikuyta tarini, manam llamkayninkupi llallinakuq runakuna hinachu tarikuni. Piensasqaymantaqa aswan allin educaciontam chaskiruni, chaymi yanapawarqa iñiyniypiwan yachayniypi ñawparinaypaq. Manam chayna yanapakuytaqa tariymanchu karqa aswan allin universidadpipas.”

Watukuyqa iñiyninchikpim yanapawanchik

Dioswan amistadninchikpim Betelman watukuyqa anchata yanapawanchikman. Chaynam pasarqa México nacionniyoq Omarta. Mamanmi Bibliamanta yachachirqa, ichaqa 17 watanpi kaspanmi manaña huñunakuyman rirqachu nitaq predicarqañachu. Payqa viciokunamanwan qollqe maskayllamanñam qokururqa. Watakuna pasaruptinmi llamkarqa  wasikunapi telefono hinaspa chayman rikchakuq aparatokuna churaq empresawan, paytawan hukkunatam nirqaku México nacionpi Betel wasiman rispanku aparatokunata imayna funcionasqanta qawachinankupaq. Omarmi nin: “Rurasqaykuta tukuruptiykum Betel wasita astawan reqsichiwarqaku. Qawasqay hinaspa kuyakuywan chaskiwasqankum piensachiwarqa Jehová Diosmanta karunchakuspay imayna kawsasqaypi. Chayllam kaqmanta huñunakuykunaman rirqani hinaspa Bibliatapas estudiarqani. Betelta watukusqaymanta 6 killallamantam bautizakururqani. Jehová Diostam agradecekuni Betel watukusqaypi kallpanchasqa kasqaymanta.”

Japón nacionniyoq Masahiko sutiyoqmi Jehová Diosta serviq familiapi wiñarqa. Ichaqa, piensaytam qallaykurqa cristiano kayqa qosni hina qeqepachisqanta. Escuelapi estudiasqanmanmi qokururqa hinaspa huñunakuymanpas manaña riqchu nitaq predicaqñachu. Paymi nin: “Huk punchawmi familiaywan huk cristianokuna tantearurqaku Betelta watukunankupaq. Familiay hikutawaptinmi paykunawan rirqani. Betelta reqsiruspaymi haykapimantapas aswan kallpanchasqa tarikurqani. Mana iñiq amistadniykunawanqa manam haykapipas kusikurqanichu chay kutipi cristianokunawan risqaypi hinaqa. Kallpanchasqam tarikurqani cristiano hina kawsanaypaq hinaspa mañakurqani Bibliamanta pipas yachachiwananpaq.” Kunanmi payqa congregacionninpi precursor kachkan.

Francia nacionniyoq huk cristianam llamkananrayku Moscú llaqtaman ripukurqa. Chaypim Testigokunawan manaña tuparqachu, hinaspam iñiyninpi chiriyarurqa. Tiempo pasaptinmi Bibliapa nisqanpa contranpi kaqta rurarurqa hinaspa Diospi mana iñiqwan casarakururqa. Huk punchawmi Francia nacionniyoq cristiana watukurqa, chaymi iskayninku Rusia nacionpi San Petersburgo llaqtaman rirqaku Betelta watukunankupaq. Huk cartapim willakurqa imayna tarikusqanmanta, nirqam: “Betelpi kuyakuywan chaskiwasqankumantam admirakurqani. ¡Hawkayaymi karqa! Diospa chuya espiritun chaypi kasqanmantam cuentata qokurqani. ¡Imaynamá Jehová Diospa llaqtantaqa saqerurqani! Watukusqay qepatam Diosta mañakurqani yanapawananpaq hinaspam warmi wawaykunatapas cheqapmanta astawan yachachirqani”, nispa. Iñiqmasinkunapa yanapayninta chaskispanpas, Betelta watukusqanmi anchata kallpancharqa. Chaymantapacham iñiyninpi hinalla ñawparichkan.

¿Imaynatam Betelta watukusqanku yanapan Testigokunapa rurasqankumanta mana allinta yachaq runakunatapas? 1988 watapim Albertoqa Brasilpi Betelta watukurqa, payqa politicokunawanmi chaqrukuq karqa. Anchatam admirakurqa tukuy ima limpio hinaspa ordenpi kasqanwan chaynataq imapas mana pakasqalla rurakusqanwan. Chay punchawkunallam watukururqaña runakuna sacerdote kanankupaq estudiananku wasita, chaypim sacerdote kaspan cuñadon yacharqa, Albertoqa cuentatam qokurqa: “Cuñadonpa yachasqanpiqa tukuy imapas pakasqalla rurakusqanta”. Betelta watukusqan qepallatam Albertoqa Bibliata estudiarqa, politicata saqerurqa, kunanñataq congregacionninpi anciano kachkan.

¡Watukamuwayku!

Achkam nacionninkupi Betel wasita watukunankupaq anchata kallpanchakunku. Ejemplopaq, Paulowan Eugeniam tawa watapuni qollqenkuta huñurqaku Brasilpi Betelta watukunankupaq, 2 punchawmi carropi rirqaku (3.000 Km.). ¿Imaynam tarikurqaku? Paykunam ninku: “Manam yanqapaqchu karqa. Kunanmi astawan entiendeniku Jehová Diospa llaqtan imayna kasqanta. Biblia estudiachisqaykuta Betel wasipi ima rurakusqanmanta explicaptiykum wakinpiqa tapuwaqku: ‘¿Qamkunaqa rirqankichikchu?’, nispa. Kunanqa atinikum arí niyta.”

¿Yaqachu yachasqaykipi otaq hichpallayki nacionpi kachkan Jehová Diospa testigonkunapa Betel wasin? Chayna kaptinqa, watukunaykipaqmi invitaykiku. Qawankim kuyakuywan chaskisqa kasqaykita hinaspa yanapasunkim Diosta hinalla servinaykipaqpas.

[18 kaq paginapi foto]

Mario

[18 kaq paginapi foto]

Abel

[18 kaq paginapi foto]

Alemania

[18 kaq paginapi foto]

Japón

[18 kaq paginapi foto]

Brasil