E Patianga na te Katoatoa!
E Patianga na te Katoatoa!
E PATIANGA na te katoatoa ki teaa? Ei atoro atu i tetai opati manga o te Au Kite o Iehova, tei matauia e ko te Betela. E 118 o teia au ngai i roto i te au enua tukeke. E akaari ua ana te au manuiri i to ratou ngakau rekareka no ta ratou i kite e raveia ra i Betela.
I muri ake i te kite anga i te maata o te aronga angaanga e tavini mataora ra ia Iehova i ko i te opati manga i Meiko, kua umere tikai tetai mapu e apii ra i te Pipiria, e kua ui aia e: “Eaa taku ka anoanoia kia rave kia noo e kia angaanga i konei?” Kua akakiteia kiaia e: “Mea mua, kia papetitoia koe. Aru mai, e mea meitaki kia tavini ei painia—ei tangata tutu tamou i te Patireia.” Kua rave te tamaiti mapu i tei akakiteia kiaia, e e rua mataiti i muri mai kua patiia aia kia tavini i Betela i Meiko, te ngai i tavini ei aia e 20 mataiti i topa.
Eaa ra a Betela?
I roto i te reo Epera, te aiteanga o “Betela” koia oki “te Are o te Atua.” (Gene. 28:19, tataanga i te matamata.) Te au apinga angaanga i ko i te au opati manga tukeke, e taangaangaia ana no te nenei e te tua anga i te au Pipiria e te au puka Pipiria, e no te oronga i te tauturu pae vaerua ki te au putuputuanga tere atu i te 100,000 o te Au Kite o Iehova i te ao katoa nei. Vaitata atu ki te 20,000 aronga angaanga i Betela—au tane e te au vaine no te au tu oraanga e te au tu peu tukeke—tei akaatinga ia ratou uaorai i te tavini tamou ia Iehova e to ratou au taeake e te au tuaine pae vaerua. Te aronga tei roa te au mataiti i roto i teia angaanga Kerititiano, te tavini kapiti ra e te au mapu matutu. I te au aiai e te au openga epetoma, e piri mataora ana te au mema o te au pamiri Betela ki te au putuputuanga a te Au Kite o Iehova tei vaitata ua mai, no te au uipaanga e te angaanga orometua Kerititiano. E akapou katoa ana ratou i to ratou taime va no te apii Pipiria, te tamataora, e te akono i te au mea i anoanoia no ratou uaorai.
E manga moni tauturu ta te au mema o Betela e rauka ana i te marama. Meitaki ta ratou kai e te ma i te ngai nooanga e te tau. Kare a Betela i maaniia mei te au otera oko maata rai. E au ngai tau ua ra. E umere ana te au manuiri, no tei akono meitakiia te au are e te aua, te mako i te akaaere anga i te angaanga, pera katoa no te tu takinga meitaki e te taokotai i Betela. Noatu e angaanga pakari ana te katoatoa, e va ua ana ratou no te au manuiri. I Betela, aiteite ua te katoatoa, e kare tetai e akateitei iaia ki runga ake i tetai no te mea e e tuke rai tana angaanga e rave ra. E puapinga te au tuanga angaanga katoatoa, noatu e tama, e tanu tiare, e tunu kai, me kore me te angaanga ra i roto i te ngai nenei puka e i roto i tetai opati. Te au taeake i Betela, e angaanga taokotai ana ratou i te turuturu i te angaanga orometua a te Au Kite o Iehova.—Kolo. 3:23.
Aravei i te Au Taeake i Betela
Ka akara ana tatou e koai ma tetai au taeake i roto i teia pamiri i te ao katoa nei. Eaa tei akakeu ia ratou kia inangaro i te tavini i Betela? Akamanako ana i te turanga o Mario. Te riro anga aia ei Kite no Iehova, e ngai angaanga meitaki tikai ta Mario i ko i tetai kamupani Tiamani rongonui i te maani matini motoka, e tei roto aia i tetai turanga te ka akapuapinga roa atu iaia. I muri ua mai i tona papetitoanga, kua inangaro aia i te akapou e tai epetoma i Betela i tona enua. Kua tukuia aia kia tauturu i te angaanga i roto i te ngai nenei anga puka. Kua kite meitaki tikai a Mario i te tuke i tona au oa angaanga i Betela e tona au oa i ko i tana ngai angaanga moni. No reira kua akaki aia i te pepa kia angaanga tamou i Betela. Noatu e kua ngata i te maataanga o tona kopu tangata e te au oa angaanga i te marama i tana ikianga, te mataora nei rai a Mario i te tavini i Betela i Tiamani.
E maata te tavini ra i Betela kare ratou i tereniia ana e kare e tareni. To Abel turanga te reira, kua tavini aia i Betela i Meiko e 15 mataiti. “E maata taku i kite i Betela,” i karanga ai aia. “Kua kite au i te taangaanga i te au matini neneianga ou o teia tuatau. Kua kite au e e maata taku moni ka rauka mai i vao ake i Betela no teia kite i rauka iaku, naringa kare, kare e rauka iaku te rekareka taku e kite nei—te oraanga maru e te ponuiaau, kare te au manamanata e te tu akarere mei te au ngai angaanga pitiniti rai. I toku manako kua rauka iaku te apii puapinga roa atu, tei tauturu iaku kia tupu i te pae vaerua e te kite noa ua nei. Naringa au i aere ki te apii teitei meitaki roa atu, kare e rauka iaku teia au akameitakianga pae vaerua.”
Riro te Atoroanga ei Akamaroiroianga
Te atoro ua nei i te Betela, ka riro ei akakeuanga meitaki no te turanga pae vaerua o tetai tangata. To Omar turanga teia, i Meiko. Kua apii tona mama iaia i te au tuatua mou o te Pipiria. Inara i te tae anga tona mataiti ki te 17, kua akamutu a Omar i te aere ki te au uipaanga Kerititiano e te piri atu ki roto i te angaanga orometua. Tei tupu mai, kua o atu aia ki roto i te au angaanga kino e te tu oraanga no te inangaro i te au mea materia. Muri mai, iaia e angaanga ra no tetai kamupani komunikeitianga, ko Omar tetai tei atoro i te Betela i Meiko i te akaari e akapeea me taangaanga i tetai au apinga. Kua karanga a Omar e: “Muri ake i te akaariarianga, kua apai atu te au taeake ia matou i te turoto i te au ngai i reira. Taku i kite e te tu takinga meitaki tei akaariia mai kiaku, kua riro ei akamanakoanga naku i te tu o toku oraanga, takake mei ia Iehova. Kua akamata au i reira i te aere akaou ki te au uipaanga e te apii i te Pipiria. E ono marama i muri mai i toku atoro anga i Betela, kua papetitoia au. Te akameitaki nei au ia Iehova no te akamaroiroianga tei rauka iaku no taua atoroanga i te Betela.”
I Tiapani, ko Masahiko tetai tei utuutuia mai i roto i tetai pamiri Kite. Tera ra, kua akamata aia i te manako e e maata roa te arairaianga o te oraanga Kerititiano. Kua o atu aia ki roto i te au angaanga a te apii e kua akamutu i te aere ki te au uipaanga e te piri ki roto i te angaanga tutu aere. Kua akakite a Masahiko e: “Tetai ra kua inangaro toku pamiri e tetai au taeake Kerititiano i te turoto i te Betela. No te raurau a toku pamiri, kua aru atu au. Te turoto anga i te Betela, kua akamaroiroi pakariia au. Te tu mataora taku i kite mei te piri atu anga ki tetai au Kerititiano i taua tere ra, tetai mea kare rava au i kite ana mei toku au oa kare i te au Kite. Kua tupu toku inangaro no te oraanga Kerititiano, e kua manako au i te pati kia apii i te Pipiria.” Teianei te tavini nei a Masahiko ei orometua tamou i roto i tona putuputuanga.
Kua neke atu tetai Kite mei Varani mai ki Moscow no te angaanga. I reira, kare aia i kite akaou ana i te iti tangata o Iehova e kua paruparu tona turanga pae vaerua. Kua o atu aia ki roto i te au angaanga tau kore e i te openga kua akaipoipo i tetai tane kare i te Kite. Ina kua aere atu tetai tuaine Kite mei Varani mai i te atoro iaia, e kua aere kapiti raua ki St. Petersburg i Rutia, i te atoro i te Betela i reira. Kua tata aia e: “I te Betela, kua ariki pumaanaia maua, e kua tukia toku ngakau. E ngai au tikai. Kua kite au i te vaerua o Iehova. I akapeea ra au i aere ke ei mei te akaaerenga o Iehova? Muri ake i toku atoroanga i te Betela, kua pure au kia Iehova no te tauturu, e kua akamata i te apii i taku tamariki i te Pipiria, ma te akakoroanga ngaueue kore.” Kapiti mai ki tetai atu au tauturu pae vaerua tei rauka i teia Kite paruparu i taua taime ra, i teianei kua akamatutu roaia atu aia i te atoro anga i te Betela e i muri ake i te reira kua meitaki tona turanga pae vaerua.
Eaa ra te manako o te aronga kare i matau ki te Au Kite o Iehova, i to ratou atoro anga i te Betela? I te mataiti 1988, te piri maroiroi ra rai a Alberto ki roto i te angaanga poritiki i te atoro anga aia i te Betela i Paratiri. Kua riro te tu ma, te tu mako, e te tu atea ua e raveia ra te angaanga, ei akakeuanga maata ki runga iaia. I mua ua ake ka atoro ei i te Betela, kua aere ana a Alberto ki te ngai e tereni ra tona taokete tane ei orometua. Kua kite a Alberto i te tuke. “E mea muna te au angaanga e raveia ra i roto i te ngai terenianga,” i akakite ei a Alberto. Muri poto ua ake i tona atoroanga i te Betela, kua ariki aia i te apii i te Pipiria, kua akaruke i te au angaanga poritiki, e i teianei te tavini nei aia ei tangata pakari no te putuputuanga.
Aere Mai Atoro i te Betela!
Manganui tei tauta pakari tikai i te atoro i te opati manga i to ratou enua. I Paratiri ei akaraanga, e a mataiti te akaputu anga a Paulo e Eugenia i ta raua moni no te aere e rua ra na runga i te bus, e 3,000 kiro mita te mamao, i te akara i te au ngai angaanga o te Betela i taua enua ra. Kua karanga raua e: “Paunaia tikai te maroiroi. Teianei e maata ta maua e marama nei no runga i te akaaerenga a Iehova. Me akakite atu maua no runga i te angaanga e raveia ra i te Betela ki ta maua aronga apiipii Pipiria, tetai taime ka ui mai ratou e, ‘I aere ana koe ki reira?’ Teianei ka rauka ia maua i te karanga e, ae.”
E opati manga rai tetai e te Betela i toou enua me kore i tetai enua vaitata mai? Te pati atu mei matou ia koe kia atoro atu i taua au ngai ra. Papu roa e ka ariki pumaanaia mai koe e ka rauka ia koe te akameitakianga maata pae vaerua me atoro i te Betela.
[Tutu i te kapi 18]
Mario
[Tutu i te kapi 18]
Abel
[Tutu i te kapi 18]
Tiamani
[Tutu i te kapi 18]
Tiapani
[Tutu i te kapi 18]
Paratiri