Konvite ba ema hotu!

KONVITE kona-ba saida? Konvite atu vizita sukursál Testemuña ba Jeová nian ida, baibain bolu nuʼudar Betel. Iha mundu tomak iha sukursál hamutuk 118. Baibain bainaka sira dehan sai katak sira hafolin tebes buat neʼebé sira haree iha Betel.

Kuandu estudante Bíblia ida vizita sukursál iha rai-Méxiku, nia haree oinsá mak ema barak ho kontente halo serbisu makaʼas ba Maromak Jeová, no ida-neʼe halo nia hakfodak toʼo nia husu: “Haʼu tenke halo saida atu bele hela no serbisu iha neʼe?” No ema hatete ba nia: “Ulukliu, Ita tenke hetan batizmu. Tuirmai, diʼak atu serbí nuʼudar pioneiru, katak serbí Maromak ba tempu tomak hodi haklaken lia-foun Reinu nian.” Mane-klosan neʼe halo tuir buat neʼebé nia rona, no tinan rua tuirmai nia hetan konvite atu serbí iha Betel iha rai-Méxiku, no agora nia serbí iha neʼebá ba tinan 20 ona.

Betel katak sá?

Iha lia-ebraiku, Betel katak “uma Maromak nian”. (Gên 28:17, 19) Buat hotu iha sukursál mak uza atu halo no fahe Bíblia no livru sira neʼebé koʼalia kona-ba Bíblia. Serbisu neʼebé halo iha Betel mak atu apoia kongregasaun Testemuña ba Jeová nian iha mundu tomak neʼebé hamutuk 100.000 atubele halaʼo sira-nia knaar ba Maromak. Iha mundu tomak maizumenus mane no feto hamutuk naʼin-20.000 neʼebé mai husi kultura no situasaun oioin mak serbisu iha Betel. Sira ho laran serbí Maromak Jeová no serbí sira-nia maluk ba tempu tomak. Sira neʼebé serbí tinan barak ona iha Betel kontente atu serbisu hamutuk ho joven sira. Iha kalan ka iha loron-sábadu no domingu sira neʼebé serbí iha Betel kontente hodi tuir reuniaun sira no hola parte iha serbisu haklaken hamutuk ho kongregasaun Testemuña ba Jeová nian neʼebé besik Betel. Sira mós uza tempu seluk neʼebé sira iha atu estuda Bíblia, atu halimar, ka halo buat seluk neʼebé sira presiza.

Ema neʼebé serbí iha Betel simu osan uitoan fulan-fulan atu bele uza ba buat neʼebé sira presiza. Sira haksolok ho hahán neʼebé gostu no diʼak ba saúde, no sira mós hela iha kuartu neʼebé moos no diʼak. Maski uma Betel mak simples deʼit, maibé neʼe mak fatin neʼebé diʼak atu hela no atu halaʼo serbisu. Bainaka sira kontente loos atu haree fatin sira-neʼe sempre moos no serbisu neʼebé halo iha neʼebá organiza ho didiʼak. Bainaka sira mós haree oinsá ema hotu hatudu laran-diʼak no apoia malu atu halaʼo sira-nia knaar iha Betel. Maski ema hotu serbisu ho badinas, maibé sira sei fó tempu atu hasé ema seluk. Iha Betel ema hotu hanesan deʼit no la iha ema ida neʼebé sente katak nia diʼak liu ema seluk maski sira-nia knaar la hanesan. Knaar hotu mak importante,  neʼe inklui knaar atu hamoos, tau matan jardín, teʼin, halo serbisu iha fatin halo livru sira ka iha edifísiu. Sira hotu iha Betel serbisu hamutuk atu apoia Testemuña ba Jeová hodi bele halaʼo knaar atu haklaken.—Kol 3:23.

Esperiénsia husi ema iha Betel

Ema neʼebé serbí iha Betel mak hanesan família ida iha mundu tomak. Saida mak book sira balu atu serbí iha Betel? Hanoin toʼok kona-ba Mario nia esperiénsia. Kuandu nia sai Testemuña ba Jeová ida, nia iha serbisu neʼebé diʼak tebes hamutuk ho kompañia karreta nian ida neʼebé iha naran-boot iha rai-Alemaña no nia iha oportunidade atu hetan pozisaun neʼebé diʼak liu. Lakleur depois nia hetan batizmu, nia halo serbisu voluntáriu iha Betel iha ninia rai ba semana ida. Nia hetan knaar atu serbisu iha fatin neʼebé halo livru sira. Mario bele haree katak ninia maluk serbisu iha Betel la hanesan duni ho ninia maluk iha serbisu-fatin. Entaun nia hatama formuláriu atu serbí iha Betel ba tempu tomak. Maski ninia família no kolega sira bilán ho ninia desizaun, maibé agora nia kontente loos hodi serbí iha Betel iha rai-Alemaña.

Ema barak neʼebé tama iha Betel la iha edukasaun aas ka la iha matenek espesiál kona-ba serbisu ruma. Ida-neʼe akontese ba Abel neʼebé agora serbí iha Betel iha rai-Méxiku ba tinan 15 ona. Nia hatete: “Haʼu aprende buat barak iha Betel. Haʼu aprende oinsá mak uza didiʼak no tau matan ba mákina modernu sira neʼebé uza atu halo livru sira. Haʼu hatene katak ho esperiénsia sira-neʼe, haʼu bele hetan osan barak iha fatin seluk. Maski nuneʼe, haʼu hatene katak ida-neʼe sei la fó ksolok mai haʼu se kompara ho ksolok neʼebé haʼu hetan iha Betel. Haʼu iha moris neʼebé nakonu ho ksolok no la hanoin barak, no mós ema iha Betel la hadau malu atu sai naran-boot hanesan iha serbisu-fatin seluk. Haʼu sente katak haʼu hetan ona hanorin neʼebé diʼak liu hotu, hanorin neʼebé ajuda haʼu atu iha relasaun diʼak ho Maromak no atu iha matenek kona-ba buat oioin. Haʼu la bele hetan buat diʼak sira-neʼe iha universidade neʼebé diʼak liu hotu.”

Vizita Betel bele fó laran-manas

Vizita Betel mós bele ajuda ita atu bele haburas relasaun diʼak ho Maromak. Omar husi rai-Méxiku iha esperiénsia hanesan neʼe. Ninia inan hanorin nia lia-loos husi Bíblia. Maibé  kuandu nia tinan 17, Omar para atu tuir reuniaun sira no atu halo serbisu haklaken. Ikusmai, nia envolve an iha moris neʼebé la diʼak no buka deʼit rikusoin. Kuandu Omar serbisu ho kompañia ida, nia bá hamutuk ho grupu neʼebé vizita Betel iha rai-Méxiku atu hatudu kona-ba sira-nia ekipamentu. Omar hatete: “Kuandu ami halo hotu ona ami-nia serbisu, irmaun sira lori ami atu haree buat hotu neʼebé sira halo iha Betel. Buat neʼebé haʼu haree no laran-diʼak neʼebé sira hatudu halo haʼu hanoin fali haʼu-nia dalan moris nian neʼebé dook husi Maromak Jeová. Haʼu hahú kedas atu tuir fali reuniaun sira no atu estuda Bíblia. Fulan neen depois haʼu vizita Betel, haʼu hetan batizmu. Haʼu agradese tebes ba Maromak Jeová tanba laran-manas neʼebé haʼu hetan kuandu vizita Betel.”

Masahiko husi rai-Japaun mós sai boot iha família neʼebé adora Maromak Jeová. Maski nuneʼe, nia komesa hanoin katak susar tebes atu moris nuʼudar ema kristaun. Tan neʼe nia envolve an barak liután iha atividade eskola nian no para atu tuir reuniaun sira no mós atu halo serbisu haklaken. Masahiko hanoin fali hodi hatete: “Loron ida haʼu-nia família no kolega kristaun balu deside atu bá vizita Betel. Tanba haʼu-nia família hakarak duni haʼu atu tuir, entaun haʼu tuir deʼit. Kuandu ami iha Betel haʼu sente laran-manas fali. Ksolok neʼebé haʼu sente tanba ransu ho maluk kristaun kuandu ami laʼo hamutuk atu vizita Betel mak esperiénsia neʼebé haʼu nunka hetan se haʼu ransu ho kolega sira neʼebé laʼós Testemuña. Haʼu-nia hakarak atu moris tuir dalan kristaun nian komesa sai buras fali, no haʼu halo desizaun atu estuda Bíblia fali.” Agora Masahiko serbí Maromak ba tempu tomak hamutuk ho ninia kongregasaun.

Testemuña ida husi rai-Fransa muda ba sidade Moskovu atu serbisu. Iha neʼebá nia la hasoru Maromak Jeová nia povu no tan neʼe ninia relasaun ho Maromak sai fraku. Nia komesa envolve an iha hahalok neʼebé sala no ikusmai kaben ho mane ida neʼebé laʼós Testemuña ba Jeová. Depois neʼe irmán ida husi rai-Fransa bá atu vizita nia no sira naʼin-rua halo viajen ba sidade Saun Peterzburgu, iha rai-Rúsia atu vizita uma Betel iha neʼebá. Nia hakerek: “Iha Betel, sira simu ami ho laran-diʼak no ida-neʼe kona loos haʼu-nia laran. Iha duni dame iha neʼebá. Haʼu bele sente Maromak Jeová nia espíritu. Haʼu komesa hanoin kona-ba tansá mak haʼu hadook haʼu-nia an husi Maromak Jeová nia organizasaun. Depois haʼu-nia vizita ba Betel, haʼu halo orasaun atu husu Maromak Jeová nia ajuda no ho laran-manas haʼu komesa hanorin haʼu-nia oan sira kona-ba Bíblia.” Ho ajuda oioin neʼebé nia simu atu hadiʼa ninia relasaun ho Maromak Jeová, no mós laran-manas neʼebé nia hetan kuandu nia vizita Betel, ida-neʼe ajuda nia atu laʼo ba oin.

Maibé oinsá ho ema neʼebé laʼós Testemuña ba Jeová neʼebé halo vizita ba Betel? Saida mak sira sente? Iha tinan 1988, polítiku-naʼin ida, naran Alberto, halo vizita ba Betel iha rai-Brazíl. Kuandu Alberto haree kona-ba fatin neʼebé moos, buat hotu organiza ho diʼak no liuliu sira la subar buat ida, neʼe book duni ninia laran. Lakleur antes Alberto vizita Betel, nia mós vizita semináriu ida, tanba iha semináriu neʼe ninia kuñadu mós serbí nuʼudar padre ida. Alberto haree katak fatin rua neʼe la hanesan. Alberto hatete: “Buat hotu neʼebé sira halo iha semináriu mak segredu.” Lakleur depois nia vizita Betel, nia hahú estuda Bíblia, husik tiha polítiku, no agora nia serbí nuʼudar katuas kongregasaun nian ida.

Mai vizita Betel!

Ema barak hakaʼas an atu vizita sukursál iha sira-nia rai. Porezemplu, Paulo no Eugenia husi rai-Brazíl rai osan ba tinan haat hodi sira bele halo viajen ho bís ba loron rua no dook kilómetru 3.000 atu bele vizita Betel iha sira-nia rai. Sira hatete: “Ami-nia hakaʼas-an la saugati deʼit. Agora ami komprende diʼak liután kona-ba Maromak Jeová nia organizasaun. Kuandu ami esplika ba ami-nia estudante Bíblia kona-ba serbisu sira neʼebé halo iha Betel, dala ruma sira husu: ‘Imi bá vizita Betel tiha ona?’ Agora ami bele dehan katak ami bá ona.”

Iha sukursál no uma Betel iha ita-nia rai ka iha rai seluk neʼebé besik ita, ka lae? Ami konvida ita atu vizita fatin sira-neʼe. Ami fiar katak kuandu ita vizita Betel, sira neʼebé serbí iha neʼebá sei simu ita ho laran-diʼak no katak ita mós sei hetan laran-manas liután atu kontinua serbí Maromak Jeová.

[Dezeñu iha pájina 18]

Mario

[Dezeñu iha pájina 18]

Abel

[Dezeñu iha pájina 18]

Rai-Alemaña

[Dezeñu iha pájina 18]

Rai-Japaun

[Dezeñu iha pájina 18]

Rai-Brazíl