Í Lôhô Hanmaor Cii!

Í LÔHÔ hanmaor cii ér nana er nyi? Ér nana za hen ma afishi a branci a Mbashiada mba Yehova, a i hembe yilan ér Betel la. I maa afishi a branci ne sha ityar kposo kposo kuma 118. Ashighe kpishi mbavannya ka vea nenge kwagh u i eren hen afishi ne yô, ve wuese kpishi.

Gumor ugen u henen Bibilo yange nengen er mbatomov kpishi mba lun a gbashima lu eren Yehova tom saan saan hen afishi a branci a ken tar u Mexico la yô, a pine ér: “Kanyi me er ve me fatyô u lun heene?” I kaa a na ér: “Hiihii yô, gba u ú er batisema. U been yô, doo u ú er tom pania, u lu or u pasen kwagh u Tartor hanma shighe.” Gumor ne er kwagh u i kaa un ne, nahan anyom ahar nga kar yô, i yila un ér a za er tom shin Betel u ken tar u Mexico la, a er tom her hegen kuma anyom 20.

Inja i Betel Ér Nyi?

Inja i ishember i “Betel” ken zwa u Heberu yô ér “Iyou i Aôndo.” (Gen. 28:19) Ka i yar tom a afishi a branci agen sha u gberen shi samber a ukôpi mba Bibilo man ityakerada i pasen Bibilo shi nan atôônanongo a Mbashiada mba Yehova sha tar cii a hemban 100,000 la iwasen i ken jijingi. Mbatomov mba nomso man mba kasev mba ve eren tom shin Betel sha tar cii yô zurum 20,000, mba ve eren tom sha ci u Yehova man anmgbianev vev mba nomso man mba kasev mba ken jijingi, a iyol i tangen shio yô. Mbamlu man aeren a ityôô a mbatomov mban kaha. Ve mba ve tse ken tom u Mbakristu ne anyom kpishi yô, mba eren u ken mzough vea agumaior a lun a agee iyol. Sha iyange i Sati man Lahadi man ayange agen aikighe cii, ka i doo icombor i Betel u zan mbamkombo shi duen kwaghpasen vea atôônanongo a Mbashiada mba Yehova aa a lu ikyua a ve la. Shi ka ve yar tom a ian ve i gbilinigh sha u henen Bibilo shi eren anumbe shi nengen sha akaa a ve.

Hanma uwer yô, ka i na mba shin Betel inyaregh kpuaa ki vea za ijende ve yô. Ka ve ya iwer i nyohon shi ve tsa ken ayou a wang, a kundun iyol. I maa iyaav mbi Betel er iyaav mbi uzegembaiorov ga. Nahan kpa, nga sha ashe tsembelee. Mbavannya ka vea za hen iyaagh ki Betel yô, ka ayou a lun sha ashe tsembelee kua tembe u doon ashe man tom u i eren sha inja sha inja la tseegh ka ve nenge i doo ve ga, ieren i kundu kundu man ijoughave i anmgbianev la kpa ka i doo ve. Hanmaor ka nan eren tom sha gbashima, kpa or môm nan tum ityough ken tom je kwagh kera gbe nan a orgen ga ze. Shin Betel yô, or môm nan henen ér nan hemba orgen sha ci u tom u nan eren ga, shi mpav kpa ngu hen ato u mbalun a kwagh ave man mbalun a mi ga la ga. Hanma tom cii ngu hange hange, a lu tom u esen ayou shin môôr faluwa shin yôron iwer shin gberen ityakerada shin yaren ken afishi kpaa. Mbaeren tom u Betel mba i yer ve ér “Mba  Shin Betel” mbara, mba eren tom ken ijoughave sha u suen tom u pasen kwagh, u Mbashiada mba Yehova ve eren la.—Kol. 3:23.

Zua Ishigh a Mba Shin Betel Mbagenev

De se seer henen kwagh u ior mba ve lu tsombor u Betel sha tar cii la. Kanyi yange i mgbegha ve u eren tom shin Betele? Time ase sha kwagh u Mario. Shighe u Mario hingir Orshiada u Yehova la, lu eren tom ugen u i kimbin un inyaregh kpishi yô hen zege kômpeni u eren mato ugen ken tar u Jamani, shi lu sha ian i una za hemen kpaa. Yange i er un batisema ica i gba ga cii maa na iyol na u za eren tom shin Betel u ken tar na la kasua môm. I na un tom u eren, lu wasen tom hen ijiir i gberen ityakerada. Mario nenge a mkposo hen ato u mba er tom a ve shin Betel man mba eren tom a ve ken won la. Nahan a nger apelekeshen u za eren tom shin Betel hanma shighe. Hegen Mario ngu eren tom saan saan shin Betel ken tar u Jamani, shin er yange taver anmgbianev nav man mbaaboki nav kpishi u kaven er hii ve tsua u eren tom la nahan kpaa.

Mbaeren tom shin Betel kpishi vande zan makeranta shin henen tomaveegh ga. Kape kwagh u Abel kpa lu je la, a er tom shin Betel u ken tar u Mexico la kuma anyom 15 hegen. A kaa ér: “Betel hingir mo makeranta jim jim. M hen u bughun akeke a vesen a gberen ityakerada. M fa er mfe ne una nam inyaregh kpishi ken won yô, kpa me zua a msaanyol er heen nahan ga, gadia m zua a bem man mkom ken uma hen ape akaa a nan ishimayinan kua gesa u sha ajiir a i eren ityom i keren inyaregh la ve lu ga yô. M nenge mer m hen makeranta u hemban doon cii u u wasem u seer mkav shi vesen ken jijingi yô. Mea ze yunivasiti i hemban cii je kpa, ma m fetyô u zuan a mbamtsera mba ken jijingi mban ga.”

Aluer u Za yô, U Zua a Ishimataver

Aluer or za a za zende shin Betel tseegh kpa, kwagh la una lu nan a iwasen ken ikyar i nan ye vea Aôndo la. Kwagh ne yange er orgen ken tar u Mexico, mba yer iti na ér Omar. Ngô na yange tese un akaa a mimi a ken Bibilo. Kpa Omar va kom anyom 17 yô, a de u zan mbamkombo mba Mbakristu shi duen kwaghpasen. Ken masejime yô, a nyôr iyol ken aferakaa a eren shi a tume ityough ken inyaregh ki keren. Shighe kar yô, kômpeni ugen u nengen sha kwagh u  iliam i sha ahumbe, ú Omar lu eren tom a ú la tsua un vea mbatomov mbagenev tindi ve shin Betel u ken tar u Mexico la, ve za tese anar ugen u kômpeni la var yô. Omar kaa ér: “Yange se mba tesen anar la se mba been yô, ior mbagenev hemen se ningir a vese sha, se nenge iyaagh ki Betel. Akaa a m nenge a mi kua erdoo u i er a mo la na yô, m gba henen sha uma wam u m lu eren akaa a sha ishima i Yehova ga la. Fele fele je maa m hii u zan mbamkombo shi henen Bibilo. Yange m za zende shin Betel iwer ngi kar ataratar yô, i erem batisema. M sugh Yehova sha ishimataver i m zua a mi sha zende u m za shin Betel la.”

Shi orgen ken tar u Japan, u i yer un ér Masahiko yô, yange vese hen tsombor u Mbashiada. Nahan kpa, va hii u henen ér gbenda u Orkristu nan eren kwagh ken uma la hoghol yum. Nahan a hingir u tumen ityough ken makeranta u henen shi a de mbamkombo mba zan kua kwaghpasen kpaa. Masahiko kaa wener: “Iyange igen yô, tsombor wase man mbaaboki asev mba ken Kristu mbagenev kpuaa tsua u za nengen iyaagh ki Betel. Er tsombor wam sendegh ér m za vea ve yô, m za a ve imôngo. M zenden m nengen iyaagh ki Betel yô, m zua ishimataver i mayange m lu a vande zuan a mi ga yô. Mkom u m zua a mi sha u lun imôngo vea Mbakristu mbagenev shighe u se za zende ne la lu kwagh u mayange m lu a vande zuan a mi hen mbaaboki av mba ve lu Mbashiada ga la ga yô. Isharen i eren kwagh sha gbenda u Orkristu la maa ta tombo ken a mo, nahan m kaa mer i hen Bibilo a mo.” Masahiko ngu eren tom u pasen kwagh hanma shighe hegen ken tiônnongo na.

Kwaseshiada ugen mough ken tar u France yem hen gar u Moscow sha u za eren tom. Za nyer hen gar ne yô, kera za ikyua a ior mba Yehova ga, nahan a hingir u vôron ken jijingi. A gba ken isholibo, shi shighe kar yô, a vôso or u lu Orshiada ga yô. Anmgbian u kwase ugen ken tar u France ve sha u va nengen a na yô, ve er zende ve yem hen gar u St. Petersburg, ken tar u Russia, sha u za nengen iyaagh ki Betel ki ki lu her la. Anmgbian u kwase u vôr ken jijingi la nger wener: “Yange i ngohol se shin Betel doo doo, shi kwagh ne bende a mo kpishi. Bem yange lu her kpishi. Jijingi u Yehova er tom ken a mo. Er nan jim yange m er kwagh sha lan m undu nongo u Yehovaa? M hidi hen ya yô, m er msen mer Yehova a wasem shi m hii u tesen mbayev av Bibilo a ishima yam i môm.” Dugh iwasen igen i alaghga yange i na anmgbian u kwase u vôr ken jijingi ne kera yô, mze u za shin Betel la taver un ishima kpishi, nahan shighe kar yô, a hingir u zan hemen ken jijingi doo doo.

Hide iwasen i alaghga mba ve fe Mbashiada mba Yehova i kom ve ga la vea zua a mi sha u zan zende shin Betel la di ye? Ken inyom 1988 la, Alberto, orgen u tume ityough ken pati u eren yô, za shin Betel u ken tar u Brazil la. Er nenge ijiir la lu wang shi i lu eren tom sha inja sha inja man ken igbar yô, doo un kpishi. Alberto yange vande zan zende hen makeranta u henen tom u fada ape won na lu pristi la, ica lu a gba ga. Kwagh u Alberto nenge a mi shin Betel la lu kposo. Alberto kaa ér: “Hanma kwagh hen makeranta u henen tom fada cii yange i eren ken myer.” Yange hidi shin Betel ica i gbe ga yô, a lumun ér i hen Bibilo a na, shi de pati u eren, hegen ngu ortamen ken tiônnongo.

Er Zende Va Shin Betel!

Ior kpishi nôngo kwagh kpoghuloo ve ve kercio u zan hen afishi a branci a ken tar ve la ye. Ikyav i tesen yô, ken tar u Brazil, Paulo man Eugenia yange ve koso inyaregh anyom a inyiin sha er vea er zende u kilomita 3,000, ken ayange ahar, vea za nenge iyaagh ki Betel ki ken tar la yô. Ve kaa ér: “Yange iniôngon yase saa se ishe ga. Hegen se hemba kaven kwagh u nongo u Yehova tsembelee. Zum u ka sea pase mba se henen Bibilo a ve kwagh u tom u i eren shin Betel la yô, ashighe agen ve pine se ér, ‘I lu nahan ne za hen ijiir la vee?’ Hegen se fatyô u nan ve mlumun ser, een.”

Iyaagh ki Betel man afishi a branci nga hen tar wou shin ken tar ugen u ú lu ikyua aa tar wou kpa? Se mba lôhôn we ser za hen iyaagh ki Betel. Aluer u va shin Betel yô, a ngohol we doo doo shi ishima ia taver we, u za hemen u civir Yehova.

[Foto u sha peeji 18]

Mario

[Foto u sha peeji 18]

Abel

[Foto u sha peeji 18]

Jamani

[Foto u sha peeji 18]

Japan

[Foto u sha peeji 18]

Brazil