Mwatambwa!

AMULIZYE

Mwatambwa!

Mwatambwa!

KUTAMBWA kuli? Ikwaakweendeenda kumaofesi aamitabi aa Bakamboni ba Jehova, aaitwa kuti Bbeteli. Oonse antoomwe ali 118 mumasena aayindene-indene. Ibeenzu balalumba kapati kumilimo njibabona iicitwa ku Bbeteli.

Umwi mwana wakali kwiiya Bbaibbele naakabona bantu kababelekela Jehova kabakkomene kuofesi yamutabi ku Mexico, wakaamba kuti: “Ino ncinzi ncondeelede kucita kutegwa kandikkala ookuno?” Wakaambilwa kuti: “Kusaanguna, weelede kubbapatizigwa. Wamana inga wabeleka mulimo wabupainiya—kukambauka makani aa Bwami lyoonse.” Ooyu mwana musankwa wakazitobela nzyaakaambilwa, amane nikwakainda myaka yobilo wakatambwa ku Bbeteli yaku Mexico kwalo nkwaabeleka kwamyaka iili 20 lino.

Ino Bbeteli Ninzi?

Muchihebrayo, “Beteli” yaamba “Ŋanda ya Leza.” (Matl. 28:19) Maanda aamitabi aaya abelesyegwa kusimba akumwaya ma Bbaibbele amabbuku apandulula Bbaibbele kutegwa bagwasye mbungano zya Bakamboni ba Jehova ziinda ku 100,000 nyika yoonse. Babelesi baku Bbeteli, bamakaintu abasankwa ibatandila ku 20,000 bazwa mumasena aayindene-indene amubukkale bwiindene-indene, balabeleka ciindi coonse ikubelekela Jehova abakamboninyina. Aabo ibabeleka ciindi cilamfwu mumulimo ooyu wa Bunakristo balabeleka antoomwe abana aabo bacili anguzu. Imangolezya alimwi akumamanino ansondo, bamukwasyi wa Bbeteli balaakukkomana kuunka kumbungano zili munsi-munsi kumiswaangano ya Bakamboni ba Jehova amumulimo wamumuunda. Alimwi balacibelesya ciindi cabo nobataunki kumiswaangano ikubala Bbaibbele, ikulikondelezya alimwi akucita milimo imwi.

Bamukwasyi wa Bbeteli balapegwa mali masyoonto aakuligwasya amwezi. Balapegwa cakulya ciyaka mubili amaanda aaboneka kabotu aasalazidwe kabotu. Maanda aa Bbeteli akayakilwa kuzuzikizya mulimo uuyandika, ikutali kusumpula bukkale ibudula. Icibagambya kapati beenzu baswaya, taali buyo maanda mabotu ngobabona naa mbobabeleka bantu, pele nkumvwana akubelekela antoomwe nkobacita. Boonse balabeleka canguzu alimwi balabikkilana maano. Ku Bbeteli taaku kusalana akaambo kakuti umwi uliyiide naa kulimvwa kuti ulisumpukide akaambo kamulimo ngwabeleka. Milimo yoonse ilayandika, taaku makani naa muntu ubeleka mulimo wakusalazya, kulima-lima, kujika naa mulimo wakusimba naa wamuofesi. Bakumutabi babelekela antoomwe kutegwa mulimo wamumuunda ngobacita Bakamboni ba Jehova uye ambele.—Kol. 3:23.

Mulakonzya Kubandika Abaku Bbeteli

Lino atubone ncotukonzya kuzyiba kubantu aaba bali mumukwasyi ooyu wanyika yoonse. Ino ncinzi cakapa kuti baunke kwaakubelekela ku Bbeteli? Atulange-lange kaambo kajatikizya ba Mario. Ciindi nibakaba Bakamboni ba Jehova, ba Mario bakali kubeleka mulimo uuvwolwa mali manji mukkampani mpati ku Germany alimwi bakali kulangilwa kusumpulwa mukkampani. Nikwakainda ciindi cisyoonto buyo kuzwa nibakabbapatizigwa, bakalisungula kwaakubelekela ku Bbeteli yamucisi cabo kwansondo yomwe. Bakapegwa mulimo wakubelekela muofesi iilanganya mayake. Ba Mario bakabona kuti kuli kwiindana akati kababelesi baku Bbeteli abaabo mbobabeleka limwi kukkampani. Aboobo bakalembela kuti batalike kubeleka ciindi coonse ku Bbeteli. Nokuba kuti basazinyina banji alimwi ababelesinyina tiibakauzumina muzeezo ooyu, ba Mario lino balikkomene kubelekela ku Bbeteli yaku Germany.

Banji balatalika kubeleka ku Bbeteli kabatajisi luzyibo lwakucita mulimo uuli woonse. Eeci ncicakacitika kuli ba Abel, ibabeleka kwamyaka iili 15 ku Bbeteli yaku Mexico. Baamba kuti: “Bbeteli cali cikolo cini kuli ndime. Ndaiya kubelesya muncini uukatazya kapati wakusimbya. Ndilizyi kuti kubelesya luzyibo oolu mukkampani ndilakonzya kujana mali manji, pele tandikonzyi kukkomana mbondikkomana okuno—kanditalibiliki naa katuzundana mbuli mbobacita banji ibabeleka mulimo wakumubili. Ndilimvwa kuti ndakaiya cikolo cibotu kapati calo cakandigwasya kukomena kumuuya akumubili. Ilwiiyo lwakumuuya luli boobu nindatakalujana kucikolo cipati.”

Kuswaya Kulakonzya Kugwasya

Ikuswaya buyo ku Bbeteli kulakonzya kugwasya muntu kuti abe acilongwe a Leza. Eeci ncicakacitika kuli ba Omar, baku Mexico. Banyina bakabayiisya kasimpe kamu Bbaibbele. Pele nibakaba amyaka iili 17, ba Omar bakaleka kuunka kumiswaangano akukambauka. Mpoonya, bakatalika kutamvwa akuyanda zyintu zyakumubili. Mukuya kwaciindi, nibakali kubeleka kukkampani yakutambikizyanya mibandi, ba Omar bakali akati kankamu yabantu bakaunka ku Bbeteli yaku Mexico ikuya kutondezya mboibeleka mincini yabo. Ba Omar baamba kuti: “Nitwakamana kubatondezya mincini, ibakatutambula bakatweenzyeenzya kutegwa tubone busena. Nzindakabona ambobakatutambula cakandipa kuti ndibulange-lange buumi mbondakali kupona butamukkomanisyi Jehova. Cakutasowa ciindi, ndakatalika alimwi kuunka kumiswaangano akutalika kwiiya Bbaibbele. Nikwakainda myezi iili cisambomwe kuzwa nindakaswaya ku Bbeteli, ndakabbapatizigwa. Ndilamulumba Jehova akaambo kakukulwaizyigwa nkondakajana nindakaswaya ku Bbeteli.”

Ba Masahiko baku Japan abalo bakakomezyegwa mumukwasyi wa Bakamboni. Pele bakatalika kuyeeya kuti kuba Munakristo kulakatazya kapati. Bakajisi bubi acikolo, bakaleka kuunka kumiswaangano akukukambauka. Ba Masahiko baamba kuti: “Bumwi buzuba bamukwasyi wangu abeenzuma Banakristo bakaunka kwaakuswaya ku Bbeteli. Akaambo kakuti bakandisinikizya, andime ndakaunka. Kuunka ku Bbeteli kwakandikulwaizya kapati. Lweendo oolu a Banakristoma lwakandikkomanisya kapati kwiinda mbondikkomana nondili abeenzuma batali Bakamboni. Ndakayeeya kuti nditalike kuswaangana a Banakristoma, aboobo eeci cakandipa kuti nditalike kwiiya Bbaibbele.” Ba Masahiko lino balabeleka mulimo wabupainiya bwaciindi coonse mumbungano yabo.

Kamboni waku France wakalongela ku Moscow kwaakubeleka. Ooko nkwaakalongela kwakanyina Bakamboni, aboobo wakafwa kumuuya. Wakatalika kucita zyintu zibi amane wakakwatwa kumuntu utali Kamboni. Kumane mucizyi Kamboni wakazwa ku France wakamuswaya mpoonya bakaunka ku St. Petersburg mu Russia kutegwa bakaswaye ku Bbeteli. Wakalemba kuti: “Bakatutambula kabotu alimwi cakandikkomanisya. Kwakali luumuno. Ndakabona kuti muuya wa Jehova nkouli. Ino ncinzi cakandipa kuti ndizwe mumbunga ya Jehova? Nindakaswaya ku Bbeteli, ndakapaila kuti Jehova andipe nguzu zyakubayiisya Bbaibbele bana bangu amuzeezo mupya.” Ikuyungizya kukugwasigwa nkwaakagwasigwa kumuuya mucizyi ooyu, wakakulwaizigwa naakaswaya ku Bbeteli alimwi wakatalika kucita kabotu.

Ino mbuti aabo batali Bakamboni ba Jehova mbobakubona ku Bbeteli nobaswaya? Mu 1988, ba Alberto, ibakali mutwaambo twacisi, bakaunka kwaakuswaya ku Bbeteli yaku Brazil. Ibulondo, mbobazyeendelezya zyintu alimwi ambobabeleka cakutasisikizya cakabakkomanisya kapati. Kabatanaswaya ku Bbeteli, ba Alberto bakaswaya cikolo cabapaizi nkwaakali kubeleka mulamu wabo iwakali mupaizi. Ba Alberto bakakubona kwiindana. Baamba kuti: “Zyoonse zyakali kucitwa kucikolo eeci zyakali kusisikizigwa.” Nikwakainda ciindi cisyoonto kuzwa nibakaswaya ku Bbeteli, bakatalika kwiiya Bbaibbele akuleka twaambo twacisi, lino mbaalu mumbungano.

Kamuboola Muswaye ku Bbeteli

Banji balasoleka kapati kujana ciindi cakuswaya ku ofesi yamutabi iili mucisi cabo. Mucikozyanyo, ba Paulo aba Eugenia baku Brazil, bakali kuyobola mali kwamyaka yone kutegwa bakakkwezye kuya ku Bbeteli iili mucisi cabo kulampa makilomita aali 3,000, kwalo kwakali kweendwa mazuba obilo. Baamba kuti: “Cakabota kuti twakaunka. Lino twaizyiba kabotu mboibeleka mbunga ya Jehova. Netupandulula mulimo uucitwa ku Bbeteli kuli baabo mbotuyiisya Bbaibbele, balatubuzya kuti, ‘Sena kuli nomwakaunkide?’ Aano mazuba tulakonzya kwaamba kuti inzya.”

Sena kuli ofesi yamutabi alimwi a Bbeteli mucisi canu naa mucisi cili afwaafwi? Twamutamba kuti mukaswaye ku Bbeteli. Cakutadooneka muyakutambulwa amaanza obilo alimwi ciyakumuyumya kumuuya kutegwa muzumanane kumubelekela Jehova.