‘Tamatigut oqaluttarit ilumoorfiginnillutit tunniusimallutit’

“Oqalulersarpoq ilisimassuseqarluni, oqaaseqartarporlu inussiarnersunik ajoqersuussutinik [tamatigullu oqaluttarpoq ilumoorfiginnilluni tunniusimalluni, NV].” — USSATIT 31:26.

1, 2. (a) Jehovap kiffai pissuserineqartussamik sumik ineriartortsitsinissamut kajumissaarneqarpat? (b) Allaaserisami matumani suna sammineqassava?

ITSAQ kunngip Lemuelip anaanata ernini pingaarutilimmik ilinniartikkamiuk pissuseq pingaaruteqartoq arnamut pikkorissumut ilisarnaataasoq eqqartorpaa. Ima oqarpoq: “Oqalulersarpoq ilisimassuseqarluni, oqaaseqartarporlu inussiarnersunik ajoqersuussutinik [tamatigullu oqaluttarpoq ilumoorfiginnilluni tunniusimalluni, NV].” (Ussatit 31:1, 10, 26) Arnaq ilisimasusilik aamma Jehovamik Guutimik nuannaartitsiumasut allat tamarmik ilumoorfiginnillutik tunniusimaffiginnillutik oqalussasut kissaatiginarpoq. Biibilimi ima allassimavoq: “Inuup kajungernartua tassaavoq ilumoorfiginnilluni tunniusimanera.” (Ussatit 19:22, NV) Guutimut kiffartortut ilumoortut tamarmik ilumoorfiginnillutik tunniusimanertik oqalunnermikkut ersersittariaqarpaat.

² Ilumoorfiginnilluni tunniusimaneq qanoq paasisariaqarpa? Kikkunnut ersersinneqartariaqarpa? Tamatigut ilumoorfiginnilluta tunniusimalluta oqaluttarnissatsinnut suna iluaqutigisinnaavarput? Pissuserlu tamanna ilaquttatsinnut uppeqatitsinnullu attaveqarnitsinnut qanoq sunniuteqarsinnaava?

Ilumoorfiginnilluni tunniusimaneq asanninnermut inussiarnernermullu attuumassuteqarpoq

3, 4. (a) Ilumoorfiginnilluni tunniusimaneq qanoq paasisariaqarpa? (b) Ilumoorfiginnilluni tunniusimaneq asanninnermit inussiarnernermillu qanoq allaassuteqarpa?

³ Ilumoorfiginnilluni tunniusimaneq aamma asanninneq inussiarnernerlu assigiissuteqartupilussuupput. Asanninnermut inussiarnernermullu ilaapput allat qanoq atugaqarnerannik soqutiginninneq aamma oqalunnikkut iliuuseqarnikkullu taakkuninnga isumassuineq. Oqaaserli Hebræerisut ‘ilumoorfiginnilluni tunniusimaneq’-mik nutserneqartartoq asanninnermit inussiarnernermillu isumaqarneruvoq. Ilumoorfiginnilluni tunniusimaneq tassaavoq kajumilluni ilumoorfiginnillunilu inoqammut ajunngitsuliorneq, ajunngitsuliornerup siunertaata angunissaata tungaanut. *

⁴ Ilumoorfiginnilluni tunniusimaneq asanninnermit inussiarnernermillu allaassuteqarpoq. Allaat takornartat asannittuliorfigineqarsinnaapput inussiarnisaarfigineqarsinnaallutillu. Taamatut apustili Paulusi allallu 275-it umiiarsimasut Maltamiunit inunnit naapissimanngisaannakkaminnit inussiarnisaarfigineqarput. (Apustilit Suliaat 27:37–28:2) Biibilimili ilumoorfiginnilluni tunniusimaffiginninneq eqqartorneqaraangat imminnut ilisarisimalluareersut pineqartarput. * Kenikkut taamatut “Israelikkut Egyptenimit  majuarmata” ilumoorfiginnillutik tunniusimaffigisimavaat. — 1 Samueli 15:6.

Eqqarsaatiginneqqissaartarneq qinusarnerlu pingaaruteqarput

5. Oqqap aqunnissaanut suna iluaqutigisinnaavarput?

⁵ Ilumoorfiginnilluni tunniusimalluni oqalunnissaq imaannaasanngilaq. Ajoqersugaq Jaaku ima allappoq: “[Inoqanngilaq] oqqamik naalatsitsisinnaasumik. Oqaq ajortumeeriniartuartuuvoq toqunartumillu toqussutaasartumik ulikkaarluni.” (Jaaku 3:8) Oqqap aqukkuminaatsup aqunnissaanut suna iluaqutigisinnaavarput? Jiisusip nalimini upperisarsiornikkut siuttunut oqaasiini tamanna paasisinnaavarput. Ima oqarpoq: “[Uummatip] ulikkaarutaanik qaneq utsersortarpoq.” (Matthæusi 12:34) Ilumoorfiginnilluta tunniusimalluta oqaluttarsinnaaniassagatta uummatitsinni — qamuuna pissusitsinni — pissuseq tamanna ineriartortittariaqarparput. Eqqarsaatiginneqqissaartarneq qinusarnerlu qanoq iluaqutigisinnaanerivut sammilaariartigu.

6. Sooq qujamasulluta Jehovap ilumoorfiginnilluni tunniusimaffiginninneranik eqqarsaatiginneqqissaartariaqarpugut?

⁶ Biibilimi allassimavoq Jehova Guuti ‘kamajaatsuusoq ilumoorfiginnilluni tunniusimangaartoq’. (2 Mosesi 34:6, NV) Tussiaasiortoq erinarsorpoq Jehovap ilumoorfiginnilluni tunniusimanerata ‘nunarsuaq tamakkeraa’. (Tussiaat 119:64) Biibilimi oqaluttuarpassuaqarpoq Jehovap qanoq kiffaminik ilumoorfiginnilluni tunniusimaffiginninneranik. Qujamasulluta Jehovap ‘suliaanik tamanik’ eqqarsaatiginneqqissaartarutta pissuserineqartussamik tamatuminnga ineriartortitsinissamut tamanna kajumississutigisinnaavarput. — Atuaruk Tussiaat 77:13.

7, 8. (a) Jehovap Loti ilaqutaalu qanoq ilumoorfiginnilluni tunniusimaffigai? (b) Daavip qanoq Guutip ilumoorfiginnilluni tunniusimaneranik iluaqutiginnissimanini ersersippaa?

⁷ Assersuutigalugu eqqarsaatigeriaruk Jehovap Aaperaap jornguanik Lotimik taassumalu ilaqutaanik aniguisitsinera Sodoma illoqarfik najugaqarfigisaat suujunnaarsikkamiuk. Illoqarfik suujunnaarsinneqanngitsiartoq inngilit Lotimut ornigussimasut Loti oqarfigaat ilaquttanilu illoqarfik qimapallattariaqaraat. Biibilimi ima oqaluttarineqarpoq: “Lotili piumaataalermat [inngilit] Loti nulialu paniilu tasissiullugit illoqarfiup avataanukaappaat tassanilu inissillugit, [Jehovap] asattuukkumammagit.” Guutip ilumoorfiginnilluni tunniusimaneranut tamatuma ersiutaanera paasigatsigu killitsinnangaarami! Annaassiniarlunilu iliuuseqarnera tamanna eqqarsaatigigaangatsigu qamuuna attorneqaatigisarparput, ilaa? — 1 Mosesi 19:16, 19.

⁸ Aamma eqqarsaatigeriaruk Daavimik, Israelikkut kuungiannik, oqaluttuaq. Taanna ima erinarsorpoq: “[Jehovap] isumakkeerfigaatit ajortuliannik tamanik, nappaatitillu tamaasa katsorsarlugit.” Daavip Batsebamut tunngatillugu ajortuliani Jehovap isumakkeerfigimmagu Daavi qanormita qujamasutsigisimassava! Jehova ima unnersiutigaa: “Soorlu qilak nunamit qutsinnerungaartoq, taama atsigaaq nallittuinera [ilumoorfiginnilluni tunniusimanera, NV] mianerinnitsiminut.” (Tussiaat 103:3, 11) Tamakku Biibilimilu oqaluttuat allat isumaliutigeqqissaaraangatsigit Jehovap ilumoorfiginnilluni tunniusimanera qujamasuutigingaalertarparput, Jehovalu unnersiutigerusulertarlugulu qujaffigerusuttarparput. Qamuuna qujamasunneruleriartortilluta Guutimik ilumoortumik ilaarsilernissaq kissaatiginerujartuinnartarparput. — Efesosimiut 5:1.

9. Jehovap kiffai oqaluttarnermikkut pissusilersornermikkullu ilumoorfiginnillutik tunniusimaffiginninnissaminnut sunik pissutissaqarluarpat?

⁹ Biibilimi oqaluttuanit ersersinneqarpoq Jehovamut akuerisaasumik attaveqareersut Taassuma ilumoorfiginnilluni tunniusimaffigigai — ilumoorfiginnilluni asannittuliorfigigai. Guutimummi uumasumut taamatut attaveqanngitsut? Jehova taakkununnga naakkittaallunilu inussiarniippa? Naamerluinnaq. Lukasi 6:35-mi ima allassimavoq: “[Guuti] qujasuitsunut ajortunullu ajunngitsuliortuuvoq”. Taassumami “seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu”. (Matthæusi 5:45) Sallusuissut ilinnialinngikkallaratsigu sulilu malerualernagu Guutip inuiannut tamanut inussiarnisaarnera iluaqutigaarput. Imminulli kiffanngoratta ilumoorfiginnilluni asannittuliorfigilerpaatigut, aap, ilumoorfiginnilluinnarluni tunniusimaffigilerpaatigut. (Atuaruk  Esaja 54:10). Tamanna qujamasuutigingaarsinnaavarput, ilaa? Oqaluttarnitsigut pissusilersornitsigullu ilumoorfiginnilluta tunniusimaffiginninnissatsinnut pissutissaqarluarpugut.

10. Sooq qinuneq ilumoorfiginnilluni tunniusimanerup inuttut pissuserilernissaanut iluaqutaalluinnarpa?

¹⁰ Qinuneq ilumoorfiginnilluni tunniusimanermik ineriartortitsinissamut iluaqutaalluinnarpoq. Ilumoorfiginnilluni tunniusimaneq asanninnermut inussiarnernermullu — Jehovap anersaavata illernartup inerititaanut ilaasunut — attuumassuteqarpoq. (Galatiamiut 5:22) Anersaamit tamatumannga sunnertinnitsigut ilumoorfiginnilluni tunniusimaneq uummatitsinni ineriartortissinnaavarput. Jehovap anersaavanik illernartumik toqqaannarnerpaamik pisinnaavugut taanna qinnutigigutsigu. (Lukasi 11:13) Ullut tamaasa Guuti anersaaminik tuneqqulluta qinnuigisariaqarparput anersaamillu tamatumannga siulersortittariaqarluta. Aap, ilumoorfiginnilluta tunniusimalluta oqaluttarsinnaaqqulluta eqqarsaatiginneqqissaarnissap qinusarnissallu piffissaqarfiginissaat pingaaruteqarpoq.

Aappariittut oqaloqatigiinnermi ilumoorfiginnilluni tunniusimaneq

11. (a) Qanoq nalunngilarput Jehovap naatsorsuutigigaa uiusup nuliaminik ilumoorfiginnilluni tunniusimaffiginninnissaa? (b) Uiusoq qanoq ililluni tamatigut ilumoorfiginnilluni tunniusimalluni oqaluttarsinnaava?

¹¹ Apustilip Paulusip uiusut ima kajumissaarpai: “Nuliasi asassavasi soorlu Kristusip ilagiit asagai imminullu tunniulluni taakku pillugit.” (Efesosimiut 5:25) Paulusip aamma eqqaasippai Jehovap Adamimut Evamullu oqaasiinik. Apustili ima allappoq: “Angutip ataatani anaananilu qimassavai nulianilu attavigalugu, taakkulu marluk uininngussapput ataaseq.” (Efesosimiut 5:31) Erseqqippoq Jehovap naatsorsuutigigaa uiusup nuliaminut attaveqartuarnissaa ilumoorfiginnillunilu tunniusimaffiginnittuarnissaa. Uiusup ilumoorfiginnilluni tunniusimalluni oqaluttartup nuliami kukkussutai inuit allat tusaaneranni oqaluuserinavianngilai nulianiluunniit nikassaarpalulluni oqaluuserinaviarnagu. Nersualaarusuppaa. (Ussatit 31:28) Aappariit arlaannik pissuteqartumik ajornartorsiuteqaleraluarpata uiusup nuliaminut ilumoorfiginnilluni tunniusimanini pissutigalugu nuliani nikanarsarnavianngilaa.

12. Nuliaasoq qanoq ililluni tamatigut ilumoorfiginnilluni tunniusimalluni oqaluttarsinnaava?

¹² Aamma nuliaasoq tamatigut ilumoorfiginnilluni tunniusimalluni oqaluttariaqarpoq. Oqaloriaasia silarsuup anersaavanit sunnersimaneqartussaanngilaq. ‘Uini ataqqingaaramiuk’ ajunngitsumik oqaluuserissavaa taamaalillunilu inuit allat uiminik ataqqinnereersut suli ataqqinninnerulersissallugit. (Efesosimiut 5:33, NV) Nuliaasullu meeqqami ataataminnik ataqqinnittuarnissaat kissaatigigamiuk meeqqat tusaatillugit uini akerlilernavianngilaa oqalliseqatigilernaviarnagulu. Kisimiitsillutilli oqaloqatigissavaa. ‘Arnat ilisimatuut illu ineriartortittaraat.’ (Ussatit 14:1, 1900) ‘Illua’, imaluunniit angerlasimaffia, ilaqutariinnut tamanut toqqissisimanartuuvoq najoruminartuullunilu.

13. Ingammik sumi aamma qanoq ilumoorfiginnilluni tunniusimalluni oqaloqatigiittoqartariaqarpa?

¹³ Aappariit angerlasimaffimminni imminnut ataqqeqatigiillutik oqaloqatigiinniartariaqarput. Paulusi ima allappoq: “Tamaasa iperassavasi: Kamanneq, puffajaneq, ajussuseq, mitaatilliineq kanngunartunillu oqalunneq.” Ima nangippoq: “Atiniarsigit nallittuingaarneq, ajunngissuseq  [inussiarnisaarneq, NV], nikanartinneq, qanilaarneq naammagittassuserlu. . . . Atiniarsiuk asanninneq.” (Kolossemiut 3:8, 12-14) Angajoqqaat angerlasimaffimminni asannittumik inussiarnersumillu oqaloqatigiittarpata meeqqat ilorrisimaassapput angajoqqaamillu oqaloqatigeriaasiat ilaaqqajaanerussallugu.

14. Ilaqutariinni ittuusut qanoq ilaquttaminnut tuppallersaataasinnaappat?

¹⁴ Tussiaasiortup qinnutigaa Jehovap ilumoorfiginnilluni tunniusimanerata ‘tuppallersaatiginissaa’. (Tussiaat 119:76) Jehovap innuttaminik tuppallersaariaasiisa ilagaat kajumissaarineq siunnersuinerlu. (Tussiaat 119:105) Ilaqutariinni ittuusut qanoq Ataatarput qilammiusoq ilaarsinnaavaat ilaquttaminnullu tuppallersaataallutik? Taamaaliorsinnaapput ilaquttamik pisariaqartitaat naapertorlugit qiimmassartarlugillu siunnersortarlugit. Angajoqqaat meeqqallu unnummi ilaqutariittut anersaakkut ittunik sammisaqarfimmi anersaakkut erlinnartuutinik nassaarnissaminnut periarfissaqarluarput. — Ussatit 24:4.

Uppeqatitit ilumoorfiginnillutit tunniusimaffigikkit

15. Utoqqaanertat ilagiinnilu anersaakkut inersimalluartut allat qanoq oqalunnermikkut ilagiinniittut allat ‘sernissorsinnaavaat’?

¹⁵ Kunngip Daavip qinnutigaa Guutip ilumoorfiginnilluni tunniusimanerata ‘sernissortigiuarnissaa’. (Tussiaat 40:12) Kristumiut utoqqaanertat ilagiinnilu anersaakkut inersimalluartut allat qanoq Jehova ilaarlugu ‘sernissuisinnaappat’? Biibilimi siunnersuutinik eqqumaffiginneqqusinermikkut. Tamanna ilumoorfiginnillutik tunniusimanerannut ersiutaalluinnarpoq. — Ussatit 17:17.

16, 17. Qanoq ililluta tamatigut ilumoorfiginnilluta tunniusimalluta oqaluttarsinnaavugut?

¹⁶ Kristumioqaterput najoqqutassianut Biibilimiittunut naapertuutinngitsumik iliuuseqartalersimasoq paasigutsigu qanoq iliussaagut? Eqqortulioqqilernissaanut ikiorniarlugu ilumoorfiginnilluta tunniusimalluta saaffigissavarput, ilaa? (Tussiaat 141:5, 1900) Uppeqat ingasattumik ajortuliorsimasoq paasigutsigu taanna ilumoorfiginnilluta asannittuliorfigalugu kajumissaassavarput ‘ilagiit utoqqaanertaat qaaqqoqqullugit’, taakkualu taanna ‘qinnutissavaat uuliamik tanillugu, Jehovap aqqani’. (Jaaku 5:14) Unioqqutitsisoq utoqqaanertanut saaffiginninngippat uagut utoqqaanertat nalunaarfigissavavut, saaffiginninngikkutta ilumoorfiginnilluta tunniusimasimassanngilagut. Arlarput nikallortoorsinnaavoq, kiserliorsinnaavoq, qinngaqquttutut misigisinnaavoq pakatsissuterpassuaqarsinnaalluniluunniit. Ilumoorfiginnilluta tunniusimanitsinnik ersersitsilluarsinnaavugut ‘nikallortunik tuppallersaasarnitsigut’. — 1 Thessalonikamiut 5:14.

¹⁷ Guutip akeraasa uppeqatitsinnik oqaatissuaaneri qanoq periarfigissavavut? Qatanngutitta aalajaannerat apeqqusernagu oqaatissuaanerit  tusarnaarnaveersaartariaqarpavut, imaluunniit oqaatissuaasimasoq piviusorsiortuuppat oqaatsiminut pissutissaqarnersoq aperisinnaavarput. Guutip innuttaanut akeraasut ajoqusiinissamik siunertaqarlutik qatanngutivut kristumiut pillugit paasissutissanik perusuppata paasissutissiinaveersaassaagut uppeqativut ilumoorfiginnilluta tunniusimaffigigatsigit. — Ussatit 18:24.

‘Ilumoorfiginnilluni tunniusimanermik noqqaassutiginnittup inuuneq pissarsiarissavaa’

18, 19. Sooq uppeqatitsinnut tamatigut ilumoorfiginnilluta tunniusimalluta oqaluttariaqarpugut?

¹⁸ Uppeqativut ilumoorfiginnilluta asannittuliorfigisariaqarpavut. Allaat pissutsini unamminiarnartuni tamatigut ilumoorfiginnilluta tunniusimalluta oqaluttariaqarpugut. Israelikkut ilumoorfiginnillutik tunniusimanerat ‘kanernertut nungujaartartutut’ ilermat tamanna Jehovap iluarinngilaa. (Hosea 6:4, 6) Ilumoorfiginnillunili tunniusimajuarneq Jehovap iluaraa. Pissuserineqartussamik tamatuminnga noqqaassutiginnittut qanoq pilluaqqusarpai?

¹⁹ Ussatit 21:21-mi ima allassimavoq: “Naapertuilluassusermik ilumoorfiginnillunilu tunniusimanermik noqqaassutiginnittup inuuneq, naapertuilluassuseq nersornaallu pissarsiarissavai.” (NV) Taamaaliornikkut pilluaqqussutit ilaat pissarsiarineqartartoq tassaavoq inuuneq — inuuneq naassaanngitsoq. Jehovap ilumoorfiginnilluni tunniusimanermik noqqaassutiginnittoq ikiussavaa ‘inuunivik’ tigulluartitaaqqullugu. (1 Timotheusi 6:12, 19) Taamaattumik ‘ilumoorfiginnilluta tunniusimaffigeqatigiittuarisa’. — Zakaria 7:9, NV.

[Quppernerup ataani ilanngussat]

Uku nassuiarsinnaavigit?

• Ilumoorfiginnilluni tunniusimaneq qanoq nassuiassaviuk?

• Tamatigut ilumoorfiginnilluta tunniusimalluta oqaluttarnissatsinnut suna iluaqutigisinnaavarput?

• Aappariit oqaloqatigiinnerminni qanoq ilumoorfiginnillutik tunniusimanertik ersersissinnaavaat?

• Qanoq uppeqatitsinnut tamatigut ilumoorfiginnilluta tunniusimalluta oqaluttarsinnaavugut?

[Atuaqqissaarnermi apeqqutit]

[Qupp. 25-mi assiliartaq]

Daavip Jehovap ilumoorfiginnilluni tunniusimanera qujamasuutigaa

[Qupp. 26-mi assiliartaq]

Sapaatip akunneranoortumik ilaqutariittut anersaakkut ittunik sammisaqartarpisi?