“Ngilneihna Thu” Chuan I Lei Vêng Ṭha Rawh Se
“Ngilneihna Thu” Chuan I Lei Vêng Ṭha Rawh Se
“Finnain a kâ a âng a, a kâah chuan ngilneihna thu a awm.”—THUF. 31:26.
1, 2. (a) Jehova betute chu eng mizia nge nei tûra fuih an nih? (b) He thuziakah hian eng nge kan sawiho vang?
HMAN lai Lal Lemuela dawn a nu thuchahah chuan nupui ṭha ni tûra tlin ngai thu pawimawh tak a tel a. “Finnain a kâ a âng a, a kâah chuan ngilneihna thu a awm” tiin a hrilh a ni. (Thuf. 31:1, 10, 26) Ngilneihna chu hmeichhe fing leh Pathian Jehova tihlâwm duhtu zawng zawngte kâa awm atâna duhawm tak a ni. (Thufingte 19:22 chhiar rawh.) Ngilneihna chu Pathian betu dik zawng zawngte ṭawngkamah a lang chhuak tûr a ni.
2 Ngilneihna chu eng nge ni? Tu chungah nge lantîr a nih? “Ngilneihna thu” kan kaa awmtîr tûrin engin nge min ṭanpui ang? Engtin nge chutianga tihna chuan chhûngkaw mite leh Kristian unaute nêna kan inbiak pawhna a nghawng ang?
Hmangaihna Rinawmin A Chêttîr Ngilneihna
3, 4. (a) Ngilneihna chu eng nge ni? (b) Ngilneihna pângngai leh heta kan sawiho ngilneihna inan lohna eng nge?
3 Bible-a “ngilneihna” tia lehlin ṭhin atîra ziak thu mal hian awmze a nei zau hle a. Chutiang ngilneihnaah chuan mite chu anmahni hmangaihna avânga ngaihsakna lantîr leh chu chu ṭawngkam leh thiltiha lantîr mai aia tam a tel a. Thil engemaw tum nei rân chunga duhrêng vâng leh rinawm taka mi tuemaw nêna inzawm tlatna hi a ni.
4 Mihringte lantîr ṭhin tlângpui ngilneihna chu hmêl hriat lohte chungah pawh lantîr theih a ni a. Tirhkoh Paula leh lawng keh chhiat an tawn laia a hnêna awm mi dang 275 te chungah chuan Malta thliarkâra mite—hmuh pawh an la hmuh ngai lohte—chuan ngilneihna an lantîr a ni. (Tirh. 27:37–28:2) Mahse, heta ngilneihna kan sawiho mêk hi chu inṭhianna nei tawh sate inkâra rinawm taka inzawm tlatna a ni. * Chutiang chiah ngilneihna chu a ni, Ken-hovin ‘Israela thlahte zawng zawng Aigupta ram aṭanga an lo chhuah’ laia an chunga an lo lantîr chu.—1 Sam. 15:6.
Chhût Ngunna leh Ṭawngṭaina A Pawimawh
5. Engin nge kan lei vêng ṭha tûra min ṭanpui ang?
5 Ṭawngkama ngilneihna lantîr chu thil harsa tak a ni thei. Lei chungchâng sawiin zirtîr Jakoba chuan: “Tumahin an khawingam thei lo a ni; thihna hlova khat, sual awm hle hle thei lo a ni,” tiin a ziak a. (Jak. 3:8) He taksa pêng thunun har tak hi khawingam tûrin engin nge min ṭanpui thei ang? Sakhaw hruaitute hnêna Isua thusawi hian min ṭanpui theitu tûr chu min hriattîr a ni. Ani chuan: “Thinlunga khat liam chu kain a sawi ṭhin,” tiin a sawi. (Mt. 12:34) Ngilneihnain kan lei vêng ṭha tûr chuan, chu mizia chu kan thinlungah—kan chhûngrilah—kan tuh a ngai a ni. Tûnah chuan chhût ngunna leh ṭawngṭainain chutiang ti tûra min ṭanpui dân i lo en ang u.
6. Engvângin nge Pathian Jehova ngilneihna thiltihte chu ngaihlu taka kan chhût ṭhin ang?
6 Pathian Jehova chu “ngilneihna . . . ngah” a nih thu Bible chuan a sawi a. (Ex. 34:6) Fakna hla phuahtu pawh: “Aw LALPA, leilung hi i ngilneihnain a khat a ni,” tiin a zai bawk. (Sâm 119:64) Bible-ah hian Pathian Jehova’n amah betute chunga ngilneihna a lantîr dân chanchin tam tak a chuang a. Ngaihhlutna nêna Pathian Jehova “thiltihte” chhût ngunna chuan he Pathian mizia hi neih duhna min pe thei a ni.—Sâm 77:12 chhiar rawh.
7, 8. (a) Pathian Jehova’n Lota leh a chhûngte chungah eng ngilneihna thiltih nge a lantîr? (b) Davida’n Pathian ngilneihna a dawn khân engtin nge a ngaih?
7 Entîr nân, Pathian Jehova’n Abrahama tupa Lota leh a chhûngte chu an chênna khawpui Sodom A tihchhiat dâwna a chhanchhuah dân kha han ngaihtuah teh. A hun a lo hnaih chuan, vântirhkohte chuan Lota chu a chhûngte hruai a, khawpui chhuahsan vat tûrin an tur a. Bible chuan heti hian a sawi: “A la muang hle si a; tichuan LALPAN amah a khawngaih avângin mite [vântirkohte] chuan a kutah leh a nupui kutah leh a fanute pahnih kutah chuan an chelh a, tichuan an hruai chhuak a, khaw pâwnah chuan an dah ta a,” tiin. Chutianga a chhanhimna thiltih kan chhût lêtna chuan kan thinlung a khawihin, chûng chu Pathian ngilneihna lantîrna a ni tih pawm tûrin min chêttîr a ni lâwm ni?—Gen. 19:16, 19.
8 “[Jehova chuan] i khawlohna zawng zawng a ngaidam ṭhîn a; i natna zawng zawng a tidam ṭhîn,” tia zaitu hmân lai Israel Lal Davida entîrna pawh hi ngaihtuah bawk teh. Davida chu Bat-Sebi nêna an thil sual tih ngaihdam a nih avângin a va lâwm dâwn êm! Ani chuan: “Vân khi lei chung sâng taka a awm angin, amah ṭihtute chunga a ngilneihna chu a nasa a ni,” tiin Pathian Jehova a chawimawi a ni. (Sâm 103:3, 11) Bible-a chuang hêng thute leh a dangte chhût chianna chuan Pathian Jehova ngilneihna avângin kan thinlung chu lâwmin a tikhat a, amah chawimawi tûr leh lâwmthu hrilh tûrin min chêttîr a ni. Kan thinlung lâwmnaa a khah zawh poh leh Pathian dik entawntu nih duhna chu kan nei tawlh tawlh ang.—Eph. 5:1.
9. Pathian Jehova betute’n an nî tin nuna ngilneihna an lantîrna tûr chhan ṭha tak eng nge awm?
9 Pathian Jehova chuan a ngilneihna—a hmangaihna rinawm—chu amah nêna inlaichînna ṭha nei tawh sate hnênah a lantîr ṭhîn tih Bible-a entîrnate chuan a târ lang a. A nih leh Pathian nung nêna inlaichînna hnai nei lote chungchâng hi eng nge ni ve ta ang? Anni chungah chuan Pathian Jehova chu a ṭha lo bîk tihna em ni? Ni lo ve. Luka 6:35 chuan: “[Pathian] chuan mi lâwm nachâng hre lote leh mi sualte a khawngaih ṭhîn,” a ti a. “Ani chuan mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn a ni.” (Mt. 5:45) Thutak kan zir a, kan nunpui hma chuan, Pathian ngilneihna, a nih loh leh ngilneihna pângngai mai kan dawng a. Mahse, amah betute kan nih tawh erawh chuan a hmangaihna rinawm—a ngilneihna nghet tak—dawngtute kan lo ni ta a ni. (Isaia 54:10 chhiar rawh.) Chu mi avâng chuan kan va lâwm tak êm! Chu bâkah, kan ṭawngkam leh nî tin nun kawng hrang hranga ngilneihna lantîr vena tûr chhan ṭha a va ni êm!
10. Ngilneihna chu kan mize pêng nihtîrnaah engvângin nge ṭawngṭaina chu ṭanpuitu hlu tak a nih?
10 Ngilneihna nei tûra min ṭanpuitu hlu tak chu ṭawngṭaina hi a ni a. Chutiang a nih chhan chu ngilneihna hi Pathian Jehova thlarau rah pêng pakhat a nih vâng a ni. (Gal. 5:22) Chu thlarau thununna hnuaia awmin, kan thinlungah ngilneihna kan nei thei a. Pathian Jehova thlarau thianghlim dawn theih dân bul ber chu ṭawngṭaia a hnêna dîl hi a ni. (Lk. 11:13) Pathian thlarau dîla kan ṭawngṭai ziah leh a kaihhruaina pawm chu a âwm a ni. Ni e, kâa ngilneihna thu nei tûr chuan chhût ngunna leh ṭawngṭaina a pawimawh a ni.
Kawppuite Kaa Ngilneihna A Awm Theih Dân
11. (a) Pathian Jehova’n pasalte chu an nupuite chunga ngilneihna lantîr tûrin a beisei tih engtin nge kan hriat? (b) Eng kawngin nge ngilneihna dân chuan pasal chu a kâ vêng ṭha tûra a ṭanpui?
11 Tirhkoh Paula chuan pasalte chu heti hian a fuih a ni: “In nupuite hmangaih rawh u, Kristan kohhranho a hmangaih a, an aia mahni a inpe ang khân,” tiin. (Eph. 5:25) Ani chuan Adama leh Evi hnêna Pathian Jehova thusawi pawh a hrilh nawn bawk a ni. Heti hian a ziak a: “Mipain a nu leh pa kalsanin a nupui a vuan ang a, tin, an pahnih chuan tisa pumkhat an lo ni tawh ang,” tiin. (Eph. 5:31) Pathian Jehova chuan pasalte chu an nupuite chunga rinawm tlat a, ngilneihna lantîr reng tûrin a beisei tih a chiang hle a ni. Hmangaihna rinawmin a kâ a thunun pasal chuan, mite hmaah a nupui tlin lohnate a hai lang lovin, a sawichhe lo vang a. A nupui fak chu nuam a ti zâwk ang. (Thuf. 31:28) Engemaw avângin an inkârah buaina a chhuak a nih pawhin, ngilneihna chuan pasal chu a nupui timualpho lo tûra a kâ vêng tûrin a chêttîr ang.
12. Engtin nge nupui ṭawngkam chhuak chuan ngilneihna thuin a kâ a thununzia a lantîr theih?
12 Ngilneihna thu chuan nupui kâ pawh a thunun tûr a ni a. A ṭawngkam chhuak chu khawvêl thlarauvin a thunun tûr a ni lo. “A pasal hlau thiam,” a nih loh leh zah thiamin, mite hmaah a fak mawi ṭhîn a, mite’n amah zahna an lo neih tawh chu a tipung ṭhîn. (Eph. 5:33) Naupangte’n an pa an zahna a tlâk hniam a duh loh avângin, fate hmaa a pasal thusawi emaw, ngaih dân emaw kalh chu a duh ngai lo va. A hrangin a tîtîpui zâwk ṭhîn. Bible chuan: “Hmeichhe fing zawng zawngin in an sa,” tiin a sawi a. (Thuf. 14:1) A in chu chhûngkaw mi zawng zawng tâna chênna hmun nuam takah a siam a ni.
13. Ngilneihna thu chu a bîk takin khawi hmuna hman tûr nge ni a, chu chu engtia tih theih nge a nih?
13 An in chhûngah pawh nupate chuan an inzahthiam tawn tih târ lang tûr zâwngin an kâ an hmang chhunzawm tûr a ni. Paula chuan: “Hêng zawng zawng, tauhna te, thinurna te, huatna te, sawichhiatna te, in kaa chhuak ṭawng zahmawhte hi tibo rawh u,” a ti a. “Lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, . . . hmangaihna inbel rawh u, chu chu phuar famkimna a ni,” tiin a sawi belh a ni. (Kol. 3:8, 12-14) Naupangte’n in lama an nu leh pate ṭawngkam ngilnei tak an hriat ṭhan chuan an tih dân chu entawn an tum ngei a rinawm a ni.
14. Eng kawngin nge chhûngkaw lûte chuan an enkawlna hnuaia awmte thlamuan nâna an kâ an hman theih?
14 Fakna hla phuahtu chuan Pathian Jehova chungchâng chu hetiang hian a ziak a ni: “Khawngaih takin i ngilneihna chu ka thlamuanna tûr ni rawh se,” tiin. (Sâm 119:76) Pathian Jehova’n a mite a thlamuan dân kawng langsâr tak chu fuihna leh kaihhruaina pêk hi a ni. (Sâm 119:105) Engtin nge chhûngkaw lûte chuan kan Pa vâna mi entawn tûr siam chu hlâwkpui a, an enkawlna hnuaia awmte thlamuan nâna an kâ an hman ve theih? A ṭûl anga kaihhruaina leh fuihna pein chu chu an ti thei a ni. Chhûngkuaa Pathian Biakna neih zân chu Bible hriatna hlu tak neih theihna hun ṭha a va ni êm!—Thuf. 24:4.
Rinpuite Chungah Hmangaihna Rinawm Lantîr Rawh
15. Engtin nge Kristian upate leh thlarau lama puitling dangte chuan kohhran mite vênhim nâna an kâ an hman ang?
15 “I ngilneihna leh i takna chuan mi humhim fo rawh se,” tiin Lal Davida chu a ṭawngṭai a. (Sâm 40:11) Engtin nge he mi chungchângah hian Kristian upate leh kohhrana thlarau lama puitling dangte chuan Pathian Jehova an entawn ang? Mi dangte Pathian Thu lam ngaihtuahtîr tûr zâwnga lei hman chu ngilneihna thiltih a ni tak zet a ni.—Thuf. 17:17.
16, 17. Eng kawng ṭhenkhatin nge kan ṭawngkam chhuak chu ngilneihna thuin a thunun tih kan lantîr theih?
16 Kristian pakhat chuan Bible thu bul kalh zâwngin thil a ti tih hre ta ila, engtin nge kan tih ang? Ngilneihna chuan amah siam ṭhat nâna kan kâ hmang tûrin min chêttîr dâwn lâwm ni? (Sâm 141:5) Kan rinpui tuemawin sual khûnkhân tak a ti tih kan hriat chuan, hmangaihna rinawm chuan thil sual titu chu ‘Lalpa hminga hriak hnawiha a chunga a ṭawngṭai theih nân’ ‘kohhran upa ko’ tûra fuih tûrin min chêttîr ang. (Jak. 5:14) Thil sual tituin upate a koh duh loh chuan, upate hnêna hriattîr loh chu hmangaih lohna leh ngilneih lohna a ni ang. Kan zînga ṭhenkhat chu kan lunghnual emaw, mal kan inti ngawih ngawih emaw, ṭangkai lo kan inti emaw, a nih loh leh kan beidawng hle pawh a ni thei. Kan kâah ngilneihna thu a awm tih târ lanna kawng ṭha ber chu “mi beidawngte . . . thlamuan” hi a ni.—1 Thes. 5:14, C.L. Re-edited.
17 Pathian hmêlmate’n kan rinpuite chanchin dik lo theh darh ta se engtin nge kan chhân lêt ang? Kan unaute rinhlelh nghâl mai ai chuan, kan ngawih bosan mai emaw, a theih chuan, a puhtu chu a thusawi a hriatna chian leh chian loh emaw chu i zâwt thei a. Pathian hmêlmate’n tihnat tum rân chunga kan Kristian unaute awmna min zawh chuan kan unaute kan hmangaihna rinawm chuan an chanchin engmah hrilh lo tûrin min vêng ang.—Thuf. 18:24.
‘Ngilneihna Zuitu Chuan Nunna A Hmu Ang’
18, 19. Engvângin nge Pathian kan biakpuite kan dâwrnaah ngilneihna thu chuan kan kâ a chhuahsan loh vang?
18 Hmangaihna rinawm chu Pathian Jehova kan biakpuite kan dâwrnaah a lang chhuak tûr a ni a. Dinhmun harsa tak hnuaiah pawh ngilneihna thu chuan kan kâ a chuahsan tûr a ni lo. Israel fate ngilneihna chu “dai ral ta thuai ṭhîn ang” a lo nih khân Pathian Jehova a lâwm lo va. (Hos. 6:4, 6) Ngilneihna lantîr rengnaah erawh chuan a lâwm a ni. Chutianga ti zêltute mal a sâwm dân hi ngaihtuah teh.
19 Thufingte 21:21 chuan: “Felna leh zahngaihna [“ngilneihna,” New World Translation] zuitute chuan nunna te, felna te, chawimawinate an hmu ang,” tiin a sawi a. Chutiang miin malsâwmna a dawn tûrte zîngah chuan nunna a tel a ni—nun tawitê ni lo, tâwp thei lo nunna chu. Pathian Jehova chuan chutiang mi chu ‘nunna tak tak vuan’ tûrin a ṭanpui ang. (1 Tim. 6:12, 19) Chuvângin, “ngilneihna i inlantîr tawn zêl” ang u.—Zak. 7:9, NW. (w10-E 08/15)
[Footnote]
^ par. 4 Ngilneihna chu rinawmna leh hmangaihna laka a danglam dân hriat chian lehzual nân May 1, 2002, Vênnainsâng phêk 22-23, 28-29 en rawh.
Kan Hrilhfiah Thei Em?
• Engtin nge ngilneihna chu i hrilhfiah ang?
• Kan kâa ngilneihna thu a awm theih nân engin nge min ṭanpui ang?
• Engtin nge kawppui neite chuan an ṭawngkam chhuakah hmangaihna rinawm an lantîr theih?
• Pathian kan biakpuite kan dâwrnaah ngilneihna thu kan kâah a awm tih engin nge târ lang?
[Zirlai Atâna Zawhnate]
[Phêk 23-naa milem]
Davida chuan Pathian Jehova ngilneihna a chawimawi
[Phêk 24-naa milem]
Chhûngkuaa Pathian Biak zân chu in hmang ziah em?