«Kalilatamaw tapaxkit nema ni makgxtakgnan» akxni nachuwinanaw
«Kalilatamaw tapaxkit nema ni makgxtakgnan» akxni nachuwinanaw
«Akxni chuwinan tasiya pi xaskgalala, putum kilhtamaku akxni chuwinan limasiya pi ni makgxtakgnan xlakata paxkinan.» (PROVERBIOS 31:26)
1, 2. 1) ¿Tuku tlan natlawayaw xlakskujnanin Jehová xlakata xatlan la nachuwinanaw? 2) ¿Tuku naʼakxilhaw kʼuma artículo?
MAKGASA xtse mapakgsina Lemuel wanilh uma tuku lu xlakaskinka, xlakata xtayat nema xlikgalhit tiku lu tlan puskat, wa umakgolh: «Akxni chuwinan tasiya pi xaskgalala, putum kilhtamaku akxni chuwinan limasiya pi ni makgxtakgnan xlakata paxkinan» (Proverbios 31:1, 10, 26). Xlikana, ni kajwatiya lakpuskatin tiku xalakgskgalalan talakaskin nalimasiyakgo pi ni makgxtakgnankgo xlakata paxkinankgo akxni chuwinankgo, wata putum tiku makgapaxuwaputunkgo Jehová chuna xlichuwinatkan (kalikgalhtawakga Proverbios 19:22). Chuna xlichuwinatkan putum tiku wankgo pi kstalanina Cristo.
2 Pero ¿tuku wamputun tapaxkit nema ni makgxtakgnan? Chu, ¿tiku chuna nakalikatsiniyaw? ¿Tuku natlawayaw xlakata putum kilhtamaku akxni nachuwinanaw napaxkinanaw chu ni namakgxtakgnanputunaw? La makgtayanan napaxkinanaw chu ni namakgxtakgnanputunaw xlakata tlan nakatalalinaw kifamiliajkan chu kcongregación?
Tlan likatsikan nema minacha ktapaxkit nema ni makgxtakgnankan
3, 4. 1) ¿Tuku tapaxkit nema ni makgxtakgnan? 2) Tapaxkit nema ni makgxtakgnan chu “tlan kalikatsinikan” latamanin, ¿tuku xlakata ni lakxtum?
3 Tapaxkit nema ni makgxtakgnan tlawa pi nakapaxkiyaw amakgapitsi, kalimasiyaniyaw kintachuwinkan chu wantuku tlawayaw, pi xlikana kamakgtayaputunaw. Ni kamakgxtakgaw xlakata kamakgtayaputunaw asta akxni makgantaxtiyaw la lakpuwanitaw pi namakgtayayaw.
4 Tapaxkit nema ni makgxtakgnan ni wa nema kalimasiyanika Pablo chu 275 latamanin tiku xtaʼankgo, xlakan kaj «tlan kalikatsinika» (Hechos 27:37–28:2). Pero tapaxkit nema ni makgxtakgnan wamputun ni lamakgxtakgkgo chu ni lamakgatsankgananikgo tiku tlan latalalinkgo. Akgtum liʼakxilhtit, akxni quenitas kalimasiyanikgolh israelitas tapaxkit nema ni makgxtakgnan «putum xkamanan Israel akxni taxtukgocha kʼEgipto» (1 Samuel 15:6).
Xlakaskinka nalilakapastakaw chu natlawayaw oración
5. ¿Tuku nakinkamakgtayayan ni akglakgwa nachuwinanaw?
5 Tuwa nalimasiyayaw tapaxkit akxni chuwinanaw chuna la wa Santiago: «Pero tama simakgat nipara chatum kristiano amakgatlajay, xla ni tamastay namakgatlajakan, xanchi porque lhuwa lixkajni xveneno kgalhi wantu malakgtsankgeyawanan» (Santiago 3:8, Xasasti Tamacatzinín). ¿Tuku nakinkamakgtayayan ni akglakgwa nachuwinanaw xlakata nila makaksakan simakgat? Jesús tiwa la tlan natlawayaw xlakata tuku kawanilh xpulalinanin takanajla: «¿Xampi chatum chixku wa lichuwinan kxkilhni wantu xtalakapastakni kgalhiy kxnaku?» (Mateo 12:34 Hua Xasasti Talaccaxlan 1999). Komo lakaskinaw pi tapaxkit nema ni makgxtakgnan kapulalilh kisimakgatkan akxni chuwinanaw pulana anta kiliwilitkan kkinakujkan o animajkan. Komo nawiliyaw kintalakapastaknikan chu natlawayaw oración kinkamakgtayakgoyan nawiliyaw kkinakujkan
6. ¿Tuku xlakata nalilakapastakaw la Jehová limasiyanit pi paxkinan chu ni makgxtakgnan?
6 Akgtum texto xalak Biblia wan pi Jehová lu «lhuwa kgalhiy tapaxkit nema ni makgxtakgnan» (Éxodo 34:6). Chu akgtum salmo wan pi «xtapaxkit nema ni makgxtakgnan limalakgatsamanit Katiyatni» (Salmo 119:64, NM). Nachuna, anta kBiblia lhuwa tuku tatsokgnit niku limasiya pi Jehová kalimasiyaninit xlakskujnin pi paxkinan chu ni makgxtakgnan. Komo nalimaxtuyaw kilhtamaku xlakata nalilakapastakaw la kakuentajtlawanit napaxtikatsiniyaw chu nachuna natlawaputunaw la tlawa (kalikgalhtawakga Salmo 77:12).
7, 8. 1) ¿La kalimasiyanilh Jehová, Lot chu xfamilia pi paxkinan chu ni makgxtakgnan? 2) ¿La makgkatsilh David xlakata Jehová limasiyanilh pi paxkilh chu ni makgxtakgli?
7 Kalichuwinaw akxni Jehová lakgmaxtulh Lot xpuxnimat Abrahán chu xfamilia. Akxni xtalakatsuwima namalakgsputukan Sodoma, ángeles tiku xkamalakgachakanit xlakata namakatsini malakapalilh pi xtaxtukgolh chu nachuna xfamilia. Wantuku tatsokgnit xlakata uma wan: «Xlakata ni xlakapala chu xlakata Jehová lakgalhamalh [ángeles] kamakgachipaxtukgolh chu katamakxtukgolh, asta kxkilhpan kachikin». Akxni likgalhtawakgayaw, ¿ni xlikana pi lu tlan limakgkatsi kinakujkan xlakata Jehová xkapaxki chu ni kamakgxtakgli? (Génesis 19:16, 19.)
8 Na kalakapastakwi akxni David kilhtlinilh: «[«Jehová», NM] wa kimatsankgenani [o kintapati] wakg kintalakgalhin». ¡Lu paxtikatsinilh uma mapakgsina pi Jehová tapatilh talakgalhin nema tatlawalh Bat-seba! Wa xlakata wa: «Porque la ixlitalhman akgapun lata nak katiyatni, chu jee kamalankinilh ixtalakgalhaman ti tajikuanij» (Salmo 103:3, 11). Akxni lilakapastakaw la Jehová kapaxkilh chu ni kamakgxtakgli lu paxtikatsiniyaw chu malankiputunaw. Chu akxni lu paxtikatsiniyaw nachuna likatsiputunaw la likatsi (Efesios 5:1).
9. ¿Tuku kinkamakgtayayan xlakskujni Jehová xlakata chali chali napaxkinanaw chu ni namakgxtakgnanaw?
9 Uma chu amakgapitsi liʼakxilhtit xalak kBiblia masiya pi Jehová kapaxki chu ni kamakgxtakga tiku tlan wilakgolh kxlakatin. Pero ¿la kalikatsini tiku ni katalalin? ¿Lixkajni kalikatsini? Nila chuna nawanaw. «Xampi lakgalhamankgoy [...] nti ni mastakoy mpaxkatsinit, chu nti ni lakwan chuxkuwin», wa xlakata «machichiniy kxokgspunkan wa nti ni lakwan chixkuwin, chu wanti ntlan chixkuwin, chu na makamininkgoy sin wanti xatlan, chu wanti ni tlan xtayat» (Lucas 6:35; Mateo 5:45). Akxni nina xlakgapasaw xaxlikana takanajla, Jehová xkinkapaxkiyan chuna la kapaxki amakgapitsi latamanin. Pero akxni xlakskujni litaxtuw, lipaxuwayaw xlakata kinkapaxkiyan chu ni kinkamakgxtakgan (kalikgalhtawakga Isaías 54:10). ¡Lu paxtikatsiniyaw! Chu xlakata paxtikatsiniyaw kinkamakgtayayan xlakata chuna nalikatsiyaw akxni katakgalhchuwinanaw amakgapitsi.
10. Komo lakaskinaw pi nakinkalilakgapaskanan pi lu kgalhiyaw tapaxkit nema ni makgxtakgnan, ¿tuku xlakata xlakaskinka naskiniyaw Jehová pi kakinkamaxkin?
10 Oración lu xatlan tamakgtay xlakata tlakg napaxkinanaw chu ni namakgxtakgnanaw. Kalakapastakwi pi paxkinanaw chu ni namakgxtakgnankan na anta makgtaxtuy kxtatlaw espíritu santo (Gálatas 5:22). Wa xlakata komo nakgalhiyaw uma litliwakga xla Dios, akxni napaxkinanaw chu ni makgxtakgnanaw tlan nastaka kkinakujkan. ¿La namakglhtinanaw espíritu santo? Naskiniyaw Jehová pi kakinkamaxkin (Lucas 11:13). ¡Lu xlakaskinka pi putum kilhtamaku naskiniyaw pi kakinkamaxkin xlitliwakga Dios chu wa kakinkapulalin! Chuna la akxilhaw akxni lilakapastakaw chu tlawayaw oración lu xlakaskinka xlakata tapaxkit nema ni makgxtakgnan napulalin akxni chuwinanaw.
Kalimasiya pi paxkiya chu ni makgxtakgputuna mi puskat o chixku akxni natachuwinana
11. 1) ¿La likatsiyaw pi Jehová lakaskin pi xachixku tlan kalikatsinilh xpuskat? 2) ¿La makgtaya xachixku akxni nachuwinan pi putum kilhtamaku napaxkinan chu ni namakgxtakgnamputun?
11 Pablo kawani wantiku tamakgaxtokgkgonit: «Wixin mpuchuwa chixkuwin, kapaxkitit mimpuskatkan, xtachuna lantla mpaxkilh nCristo kgamputum nkanajlanin [o «congregación», NM] chu na tiʼakstumastalh xpalakatakan» (Efesios 5:25). Apóstol na kamalakapastaka tuku wanilh Jehová Adán chu Eva: «Wa cha xpalakata, nalimakaxtakga nchixku xtlat, chu xtsi, nawa natatalakgxtumiy xpuskat, lakimpi mana watiya akxtum liwa nawankgoy xchatuykan» (Efesios 5:31). Lu xlikana Dios lakaskin pi xachixku putum kilhtamaku tlan nalikatsini xpuskat chu ni atanu tiku nalakgati. Komo napaxki chu ni namakgxtakgputun ni nakawani amakgapitsi tuku nitlan xlakata xpuskat o namaktujuputun. Wata nawan tuku lu tlan xlakata xpuskat (Proverbios 31:28). Chu maski namin kilhtamaku ni lakxtum tuku nalakapastakkgo, xlakata lapaxkikgo chu ni lamakgxtakgputunkgo uma natlawa pi ni nalawanikgo tuku nitlan nalamamakgakatsini.
12. ¿La limasiya xapuskat akxni chuwinan pi paxkinan chu ni makgxtakgnanputun?
12 Wantiku xatlan puskat putum tuku nawan nalimasiya pi paxkinan chu ni makgxtakgnan, chu ni chuna chuwinan la chuwinankgo xalak kakilhtamaku. Limasiya pi «lakgachixkuwili xchixku» tlan lichuwinan, chu makgtayanan xlakata amakgapitsi napaxkikgo (Efesios 5:33). Xlakata ni lakaskin pi xkamanan nialh nakgalhakgaxmatkgo, ni wan tuku nitlan akxilha xlakata xchixku kxlakatinkan xkamanan. Wata, akxni xakstukan wilakgolh wani xchixku tuku nitlan akxilha. Chuna la wan Biblia «lu xaskgalala puskat liwana lakkaxwilima xchiki» (Proverbios 14:1). Tlawa pi xatapaxuwan natawila xfamilia.
13. ¿Niku tlakg kilimasiyatkan xlakata tapaxkit nema ni makgxtakgnan, chu la tlan natlawayaw?
13 Xlikana, akxni xachixku chu xapuskat xakstukan wilakgolh kxchikkan liwana nalatachuwinan. Chuna la wa Pablo xlimakgxtakgatkan «tasitsin, takgaw, taIalikgaman, chu ntamaxkawalin, chu ntu nkaj akglakgwaj tachuwin». Na «xalakgalhamananin, luwa tsatata mintalakapastaknakan nakgalhiyatit, chu xasmalhwan nawanatit». Chu tuku tlakg kilikgalhitkan wa «ntapaxkit, xampi wa yuma ntu lakatanks makxtum tlawanan» (Colosenses 3: 8, 12-14). Komo lakkamanan naʼakxilhkgo pi xalaktlat liwana latachuwinankgo chu natakgaxmata pi lapaxki, ni kajwatiya tlakg napaxuwakgo, max na chuna natlawakgo.
14. ¿Laknatlatni la tlan nakalimakgtaya xtachuwin xfamilia?
14 Salmista wanilh Jehová: «Chi kakimasini talakgalhaman xlakata nakilimakgtsija» (Salmo 119:76). Pulaktum la kinTlatkan xalak akgapun kinkamatliwakglhan wa akxni kinkapulalinan (Salmo 119:105). Wantiku xalaktlat lu tlan komo nachuna natlawakgo. ¿La tlan nakalimatliwakglha xtachuwin tiku xalak kxfamilia? Napulalinkgo chu nakamatliwakglha akxni: Kakninanikan Dios kFamilia, akxtum natekgskgo tuku lu xlakaskinka la akxni tekgskan oro (Proverbios 24:4).
Nakapaxkiyaw chu ni nakamakgxtakgaw kinatalankan
15. ¿La tlan nalimaklakaskinkgo lakgkgolotsin ksimakgatkan xlakata nalikuentajtlawakgo tiku xalak congregación?
15 «Tapaxkit nema ni makgxtakgnan chu xaxlikana kakinkuentajtlawakgolh», chuna tlawalh xʼoración mapakgsina David (Salmo 40:11, NM). ¿La na tlan chuna natlawakgo lakgkgolotsin chu amakgapitsi natalan tiku makgasa skujnanimakgolh chu tliwakga wi xtakanajlakan chuna la xasmalhwa kuentajtlawanan Jehová? Nakawanikgo natalan xalak congregación tuku masiya Biblia. Xlikana pulaktu la tlan nalimasiyakgo tapaxkit nema ni makgxtakgnan wa ni nakawanikgo tuku nitlan nalimakgkatsikgo (Proverbios 17:17).
16, 17. ¿La tlan na nalimasiyayaw pi paxkinanaw chu ni makgxtakgnanaw?
16 ¿Tuku natlawayaw komo naʼakxilhaw pi achatum kstalanina Cristo tiyama nitlan tiji? ¿Ni xlikana pi komo paxkiyaw nawaniyaw pi nitlan tuku tlawama? (Salmo 141:5.) Komo nakatsiyaw pi chatum tala tlawanit lanka talakgalhin, xlakata paxkiyaw chu ni makgxtakgaw nawaniyaw pi kakawanilh «lakgkgolotsin xalak congregación» xlakata «natatlawakan oración, kxtukuwani Jehová naʼakmawakakan aceite» (Santiago 5:14, NM). Chu komo ni nakawani tuku nitlan tlawanit, akinin ni paxkiyaw komo na nitu nawanaw. Nachuna, wilakgolh tiku nitlan makgkatsikgo xlakata xakstukan wilakgolh, o makgkatsikgo pi nitula tlawakgo, akxni wi tuku kamaxlajanima xtakanajlakan o wi tuku nitlan kakitaxtunilh. “Namakgpuwantiniyaw wanti” nitlan makgkatsikgo, tiku patinamakgolh lu limasiyayaw tapaxkit nema ni makgxtakgnan (1 Tesalonicenses 5:14).
17 Komo tiku ni kinkaʼakxilhputunan nawan pi chatum kintalakan tlawama tuku nitlan chu nipara anan tuku nalimasiya pi xaxlikana, ¿tuku natlawayaw? Wata nialh namastayaw talakaskin tlakg nakinkawaniyan xlakata akinin katsiyaw pi kintalakan ni tlawalh tuku limawakamaka, chu komo ni taʼakglhuwi tlan kakinkawanin tuku likatsi pi lu xaxlikana tuku kilhwama. Nachuna, komo tiku ni kaʼakxilhputun xkachikin Jehová putsastalanima chatum kintalakan xlakata tlawaniputuma tuku nitlan, xlakata paxkiyaw kintalakan ni katimakamastaw (Proverbios 18:24).
Namakglhtinan latamat wantiku «paxkinan chu ni makgxtakgnan»
18, 19. Akxni katachuwinanaw kinatalankan, ¿tuku xlakata xlitakgaxmatat pi kapaxkiyaw chu ni kamakgxtakgputunaw?
18 Xlakata kapaxkiyaw chu ni kamakgxtakgputnaw kinatalankan putum kilhtamaku nakuentajtlawayaw ni nakawaniyaw tuku nitlan nalimakgkatsikgo, maski lu tuwa wi taʼakglhuwit nawan. Kalakapastakwi pi Jehová lu katsanilh akxni akxilhli pi israelitas nialh xpaxkinankgo chu xmakgxtakgonit Jehová, xwankgonit «la akxni monkganat lakapara skaka tsisa» (Oseas 6:4, 6). Wata Jehová lu lakgati akxni xlakskujnin limasiyakgo uma tayat, chu kasikulunatlawa. ¿La tlawa?
19Proverbios 21:21 wan: «Wantiku tlawaputun tuku xaʼakgstitum paxkinan chu ni makgxtakgnan, namakglhtinan latamat tuku xaʼakgstitum chu lilanka». Chuna la akxilhaw, wantiku paxkinan chu ni makgxtakgnan namaxkikan latamat, akglhuwa kata nalatama xliputum kilhtamaku. Xlikana, Jehová namakgtaya xlakata namakglhtinan «xaxlikana latamat» (1 Timoteo 6:12, 19, NM). Xlakata tuku akxilhwi, lu xlakaskinka pi putum akinin «tlan nalalikatsiniyaw chu ni nalamakgxtakgputunaw chu nalalakgalhamanaw» (Zacarías 7:9).
¿La xkgalhtinanti?
• ¿Tuku wamputun tapaxkit nema ni makgxtakgnan?
• ¿La natlawayaw xlakata akxni nachuwinanaw nalimasiyayaw pi paxkinanaw chu ni makgxtakgnamputunaw?
• ¿La tlan nalimasiyakgo akxni nalatachuwinan pi kgalhikgo tapaxkit nema ni makgxtakgnan tiku tamakgaxtokgkgonit?
• ¿Tuku nalitasiya pi paxkinanaw chu ni kamakgxtakgputunaw kinatalankan akxni katachuwinanaw?
[Takgalhskinin]
[Epígrafe xla página 25]
David lu tlan lichuwinalh xlakata Jehová paxkinan chu ni makgxtakgnan
[Epígrafe xla página 26]
¿Kakninaniyaw Dios kfamilia akgatunu semana?