?Hu i Save Sevem Ol Man We Oli Stap Singaot Blong Kasem Help?

“God. Plis yu tijim king blong mifala blong bambae hem i save jajem man long stret fasin blong yu. . . . Hem bambae i stap sevem ol puaman we oli stap singaot i go long hem.”—SAM 72:1, 12.

1. ?Yumi lanem wanem long saed blong sore blong God from fasin we hem i mekem long Deved?

!OL TOK ya oli mekem yumi harem gud tumas! I luk olsem se King Deved blong Isrel bifo i raetemdaon ol tok ya. Plante yia bifo we hem i raetem ol tok ya, hem i harem nogud from rabis fasin we hem i mekem wetem Batseba, we i woman blong wan narafala man. Long taem ya, Deved i plis long God, se: “Fasin blong yu blong gat sore long man i bigwan tumas, plis yu ravemaot ol sin blong mi. . . . Oltaem mi mi savegud ol sin blong mi. . . . Mi mi man nogud, i stat long taem we mi mi bon. Fasin blong mi i nogud, i stat long taem we mi stap yet long bel blong mama blong mi.” (Sam 51:1-5) Jeova i sore long yumi mo hem i tingbaot we yumi sinman finis taem yumi bon.

2. ?Ol Sam 72 i tokbaot wanem samting?

² Jeova i luksave we yumi stap harem nogud long laef long wol ya. Mo hem i talemaot finis se King ya we hem i jusumaot bambae i “sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting.” (Sam 72:12, 13) ?Olsem wanem bambae king ya i givhan long ol man? Ansa i stap long Ol Sam 72. Hemia wan singsing we i stap tokbaot rul blong Solomon we i pikinini blong Deved. Be ol samting we singsing ya i tokbaot oli pija blong rul blong Jisas Kraes, Pikinini blong God, we bambae i finisim trabol blong ol man.

 Rul Blong Solomon i Pija Blong Rul Blong Kraes

3. ?Solomon i askem wanem samting long God? ?Mo God i givim wanem long hem?

³ Deved i givim oda blong oli putumap Solomon i kam king. Samtaem biaen, olfala Deved i talem sam samting long Solomon we hem i mas mekem, mo Solomon i mekem olgeta samting ya we papa blong hem i talem. (1 King 1:32-35; 2:1-3) Biaen, Jeova i kamtru long Solomon long wan drim, mo i talem se: “Sipos yu wantem wanem samting, mi bambae mi givim long yu.” Solomon i askem wan samting nomo long Jeova, i se: “Plis yu givim waes long mi blong mi save rulum olgeta long stret fasin. Mi mi wantem blong yu mekem mi mi waes, blong mi save makemgud wanem fasin i stret mo wanem fasin i no stret.” Samting ya we Solomon i askem i soemaot we hem i gat tingting daon, taswe God i givim samting we hem i askem, mo i givim plante narafala samting tu long hem.—1 King 3:5, 9-13.

4. ?Wan kwin long taem blong Solomon, i talem wanem long saed blong rul blong Solomon?

⁴ Jeova i blesem rul blong Solomon, mekem se ol man oli stap long pis mo oli gat plante samting, i bitim olgeta narafala taem we ol gavman blong man oli rul long wol. (1 King 4:25) Wan long olgeta we oli kam blong luk rul blong Solomon, hemia kwin blong Seba wetem ol man blong hem we oli plante we oli plante. Kwin ya i talem long Solomon se: “!King, tru! Nius blong wok blong yu mo waes blong yu we mi harem taem mi stap long kantri blong mi, hem i tru tumas. . . . Yu yu waes moa, mo yu rij moa, i bitim we ol man oli talem long mi longwe. Mi mi harem smol haf nomo.” (1 King 10:1, 6, 7) Be Jisas i gat waes we i bigwan moa long Solomon. Ol tok blong hem i stret nomo taem hem i talem se: “Yufala i luk, mi mi waes moa long King Solomon.”—Mat. 12:42.

Harem Gud Aninit Long Rul Blong Bigfala Solomon

5. ?Taem yumi ridim Ol Sam 72, yumi luksave wanem? ?Mo ol samting we Jisas i mekem taem hem i stap long wol, oli pija blong wanem samting?

⁵ Naoia i gud yumi lukluk long Ol Sam 72 blong lanem moa long saed blong ol blesing blong rul blong Bigfala Solomon ya, Jisas Kraes. (Ridim Ol Sam 72:1-4.) Taem yumi ridim Sam ya, yumi luksave tingting blong Jeova long saed blong ‘rul blong pikinini boe’ blong hem, Jisas Kraes. Jisas i “Pikinini ya blong King, we Hem i Stamba blong Pis.” (Aes. 9:6, 7) Aninit long paoa blong God, Bigfala Solomon ya bambae i ‘mekem i stret gud long ol puaman mo i stap halpem ol man we oli sot long ol samting.’ Aninit long rul blong hem, bambae i gat pis mo stret fasin. Ol samting we Jisas i mekem taem hem i stap long wol, oli pija blong ol samting we bambae hem i mekem long Taosen Yia Rul blong hem.—Rev. 20:4.

6. ?Wanem ol blesing blong rul blong Kingdom we Jisas i soemaot taem hem i stap long wol?

⁶ Tingbaot sam wok we Jisas Kraes i mekem taem hem i stap long wol we i soemaot samting we bambae hem i mekem long olgeta man, folem ol tok blong Ol Sam 72. I stret nomo we yumi sapraes long bigfala sore we hem i gat long ol man we oli harem nogud. (Mat. 9:35, 36; 15:29-31) Yumi luk samting ya taem wan man we i gat sik ya leprosi i kam long Jisas mo i krae long hem se: “Plis, sipos yu yu wantem, mi mi save se yu yu gat paoa blong mekem mi mi gud bakegen.” Jisas i ansa long hem se: “Yes, mi mi wantem. !Yu klin!” !Ale man ya i kam gud bakegen! (Mak 1:40-42) Biaen, Jisas i luk wan wido woman we i gat wan boe blong hem nomo, mo boe ya i ded. Jisas i “sore tumas long hem,” nao i talem long pikinini blong woman ya se, “!Yang man! !Mi mi talem long yu, yu girap!” Nao pikinini blong woman ya i girap. !Hem i laef bakegen!—Luk 7:11-15.

7, 8. Traem talem stori blong sam sikman we Jisas i mekem olgeta oli kamgud bakegen.

⁷ Jeova i givim paoa long Jisas blong mekem ol merikel. Tingbaot samting we Jisas i mekem long wan woman “we sik ya [blong woman] i stap long  hem oltaem gogo kasem twelef yia, we i no finis nating.” Woman ya i “pas long plante dokta finis, i lusum ol mane blong hem,” be sik ya i stap kam mowas. Woman ya i go joen long hip man we oli stap folem Jisas mo hem i tajem Jisas. Loa i talem se i tabu blong ‘wan woman we i gat sik blong woman’ i mekem samting ya. (Lev. 15:19, 25) Jisas i haremsave se paoa i goaot long hem, taswe i askem long ol man se hu i tajem hem. Woman ya i “fraet, mo i seksek, i nildaon long fes blong hem, nao i talemaot stret wanem we i hapen long hem, mo stori blong sik blong hem.” Jisas i luksave se Jeova i mekem woman ya i kamgud bakegen, taswe hem i kaen long woman ya mo i talem long hem se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.”—Mak 5:25-27, 30, 33, 34.

⁸ Paoa we God i givim long Jisas i mekem ol sikman oli kamgud bakegen, mo ating taem ol man oli luk ol merikel ya oli sapraes tumas. Bifo we Jisas i mekem Bigfala Toktok blong hem antap long Hil, hem i mekem ol sikman oli kamgud bakegen. Ating samting ya i mekem ol man oli sapraes bigwan. (Luk 6:17-19) Jon Baptaes i sanem tu man blong hem i kam luk Jisas blong faenemaot sipos Jisas nao hem i Mesaea. Ale taem tufala ya i kamtru long Jisas, hem “i stap mekem plante sikman oli gud bakegen. Sam long olgeta oli gat sik, mo sam oli gat ol soa, mo sam oli gat devel i stap long olgeta. Mo ol blaenman tu, hem i mekem olgeta oli save lukluk.” Nao Jisas i talem long tufala se: “Yutufala i gobak, yutufala i talemaot long Jon ol samting ya we yutufala i luk, mo we yutufala i harem. Ol blaenman, naoia oli save lukluk, mo ol man we leg blong olgeta i nogud, naoia oli save wokbaot gud. Ol man we oli gat rabis sik blong skin, naoia bodi blong olgeta i klin, mo ol man we sora blong olgeta i fas, naoia sora blong olgeta i open. Ol dedman, naoia oli laef bakegen, mo ol puaman, naoia i gat man i stap talemaot gud nius long olgeta.” (Luk 7:19-22) !Tru ya, ating ol tok ya i mekem Jon i harem gud tumas!

9. ?Ol merikel we Jisas i mekem oli soemaot wanem samting?

⁹ I tru, ol samting we Jisas i mekem taem hem i stap long wol, blong givhan long ol man we oli stap harem nogud, i blong smol taem nomo. Olgeta we hem i mekem oli laef bakegen, biaen oli ded. Be ol merikel ya we Jisas i mekem, oli soemaot samting we bambae hem i mekem olsem Mesaea we i rul. Bambae hem i finisim blong olwe, olgeta trabol blong ol man.

!I No Longtaem Bambae i Gat Paradaes Long Fulwol!

10, 11. (a) ?Ol blesing blong Kingdom bambae oli stap kasem wetaem? ?Mo bambae rul blong Jisas i mekem wanem long ol man? (b) ?Hu bambae i stap wetem Kraes long Paradaes? ?Mo hem i mas mekem wanem blong kasem laef blong olwe?

¹⁰ Traem tingbaot se yu yu laef long Paradaes long wol. (Ridim Ol Sam 72:5-9.) Ol man we oli wosipim God ya nomo we i tru bambae oli save harem gud olwe long laef long Paradaes, olsem we san mo mun, tufala i stap saen oltaem, tufala i no save lus. Fasin blong King ya Jisas Kraes, bambae i mekem ol man oli harem gud tumas, “olsem ren we i folfoldaon long garen we man i jes planem, i mekem graon blong hem i wetwet.”

¹¹ ?Taem yu tingting long ol tok blong Sam ya, yu yu harem gud tumas? ?Yu yu wantem tumas blong laef olwe long paradaes long wol? Ating man blong brekem loa we i hang long pos klosap long Jisas, i harem gud tumas taem Jisas i talem long hem se: “Bambae yu yu stap wetem mi long Paradaes.” (Luk 23:43, NW) Long taem blong Taosen Yia Rul blong Jisas, bambae Jisas i mekem man ya i laef bakegen. Nao sipos man ya i putum hem i stap daon aninit long rul blong Kraes, bambae hem i save laef olwe long wol, we hem i glad nomo mo i no moa sik samtaem.

12. ?Long Taosen Yia Rul blong Kraes, taem ol man we oli no stret oli laef bakegen, bambae oli gat janis blong mekem wanem?

¹² Aninit long rul blong Jisas Kraes we i Bigfala Solomon, “bambae stret fasin i kam bigwan.” Yes, ol man we oli gat stret fasin bambae oli stap gud, mo bambae oli gat gudfala laef. (Sam 72:7) Bambae Kraes i lavem tumas ol man mo i lukaot gud long olgeta, olsem we hem i mekem taem hem i stap long wol. Long niufala wol we God i promes blong mekem i kamtru, “ol man we oli no stret” we God i mekem olgeta oli laef bakegen, olgeta tu bambae oli gat janis blong folem ol loa blong Jeova mo kasem laef. (Wok 24:15) Be olgeta we oli no wantem mekem samting we God i talem, bambae oli no save stap laef, mo spolem pis mo kwaet fasin long niufala wol.

13. ?Rul blong Kingdom bambae i kasem weples? ?Mo from wanem bambae i no gat man we i save spolem pis long wol?

¹³ Rul blong Bigfala Solomon bambae i kasem olgeta ples long wol. Samting ya i kamaot klia long ol tok ya se: “Bambae hem i king long olgeta ples, i stat  long solwota narasaed, i go kasem solwota narasaed, i stat long Yufretes Reva, i go kasem en blong wol. Ol man blong draeples bambae oli bodaon long fes blong hem. Ol enemi blong hem bambae oli foldaon long graon.” (Sam 72:8, 9) Yes, Jisas Kraes bambae i rul long fulwol. (Sek. 9:9, 10) Ol man we oli luksave rul blong hem mo ol blesing blong rul ya, bambae oli “bodaon” from we oli glad blong stap daon aninit long hem. Be ol man blong mekem sin we oli no wantem tanem tingting blong olgeta, bambae oli lus, nating se “oli gat handred yia blong olgeta.” (Aes. 65:20) !Yes, “bambae oli foldaon long graon”!

Jisas i Tingbaot Yumi Mo i Sore Long Yumi

14, 15. ?Olsem wanem yumi save se Jisas i kasem save long ol filing blong yumi ol man? ?Mo olsem wanem yumi save se bambae hem i “sevem ol puaman we oli stap singaot i go long hem”?

¹⁴ Olgeta man oli sinman mo oli stap trabol tumas. Olgeta oli nidim help tumas. Be i gat promes i stap we yumi save putum tingting blong yumi i stap strong long hem. (Ridim Ol Sam 72:12-14.) Jisas we i Bigfala Solomon, hem i sore long yumi from we hem i kasem save se yumi sinman. Ol man oli mekem i nogud tumas long Jisas taem hem i mekem fasin we i stret, mo God i letem Jisas i fesem ol trabol ya hem wan. !Tru ya, Jisas i harem nogud tumas long ol filing blong hem, gogo “swet blong hem i stap folfoldaon long graon olsem blad nomo”! (Luk 22:44) Biaen, taem hem i stap hang long pos, hem i singaot bigwan se: “God blong mi, God blong mi. ?From wanem yu lego mi mi stap olsem ya?” (Mat. 27:45, 46) Setan i traem bes blong hem blong pulum Jisas blong lego Jeova, be long olgeta samting ya we oli mekem Jisas i harem nogud, hem i holemstrong long Jeova God.

¹⁵ Yumi save se Jisas i luk yumi taem yumi stap harem nogud. Mo bambae hem i “sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta.” Jisas i tingbaot ol man olsem we Papa blong hem i tingbaot olgeta. Taswe bambae hem i “lesin long olgeta we oli sot long ol samting” mo bambae hem i “mekem olgeta we oli harem nogud, oli harem gud bakegen, mo i stap fasem ol soa blong olgeta.” (Sam 69:33; 147:3) Jisas i “savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis.” (Hib. 4:15) !Yes yumi glad tumas blong save se King blong yumi, Jisas Kraes, i stap rul naoia long heven, mo hem i wantem tumas blong finisim olgeta samting we oli mekem ol man oli harem nogud!

16. ?From wanem Solomon i gat sore long ol man we oli stap aninit long paoa blong hem?

¹⁶ Solomon i gat waes mo fasin luksave, taswe hem i “gat sore long ol puaman.” Mo tu, i gat plante nogud samting i hapen long laef blong Solomon we oli mekem hem i harem nogud. Amnon we i brata blong Solomon, i fosem sista blong hem, Tamara, blong slip wetem hem. Ale narafala brata blong Solomon we nem blong hem Absalom, i talem long ol man blong oli kilim Amnon i ded. (2 Saml. 13:1, 14, 28, 29) Absalom i traem sakemaot Deved we i king mo tekem ples blong hem, be plan blong hem i foldaon. Nao Joab i kilim Absalom i ded. (2 Saml. 15:10, 14; 18:9, 14) Biaen, Adonia we i wan narafala brata blong Solomon, hem i traem putumap hem wan i kam king. Sipos plan blong hem i bin wok, bambae hem i kilim Solomon i ded. (1 King 1:5) Prea blong Solomon long opening blong haos blong Jeova, i soemaot we hem i kasem save long filing blong ol man we oli harem nogud mo oli trabol. King ya i talem long saed blong ol man we oli stap aninit long rul blong hem se: ‘Sam long mifala oli harem nogud long tingting blong olgeta. Plis [Jeova] yu fogivim olgeta, yu tekemaot ol sin blong olgeta, mo yu givhan long olgeta.’—2 Kron. 6:29, 30.

17, 18. ?Olsem wanem sam man blong God oli stap harem nogud tumas long tingting blong olgeta? ?Mo wanem i givhan long olgeta blong stanap strong?

¹⁷ Maet ‘yumi harem nogud long tingting blong yumi’ from sam samting we i hapen long laef blong yumi bifo. Mary * i wan Witnes blong Jeova we i gat samwe long 30 yia blong hem. Hem i  raetem se: “I gat plante samting long laef blong mi we oli givim glad long mi. Be plante taem, ol samting we oli hapen long laef blong mi bifo, oli mekem mi mi sem mo mi tingting nogud long mi wan. Ale mi harem nogud we mi harem nogud, mo mi krae, olsem se ol nogud samting ya oli hapen yestede nomo. Ol memori ya oli stap long tingting blong mi oltaem, mo oli mekem mi mi harem se mi nating nomo mo mi nogud olgeta.”

¹⁸ Plante man blong God oli gat filing olsem sista ya.?Be wanem i save givhan long olgeta blong kasem paoa blong stanap strong? Mary i talem se: “Naoia ol tru fren mo ol Kristin brata sista, oli mekem mi mi harem gud tumas. Mo tu, mi traem putum tingting blong mi i stap long ol promes blong Jeova we bambae oli kamtru. Mi save se long taem ya, bambae mi no moa singaot strong from we mi nidim help, be bambae mi singaot strong from we mi mi glad tumas.” (Sam 126:5) Yumi mas putum tingting blong yumi i stap strong long Pikinini blong God, Man ya we God i putumap hem blong Rulum yumi. Profet tok long saed blong hem i talem se: “Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.” (Sam 72:13, 14) !Ol tok ya i leftemap tingting blong yumi bigwan!

Wan Niufala Wol We i Gat Plante Kakae Long Hem

19, 20. (a) ?Ol Sam 72 i soemaot se rul blong Kingdom bambae i finisim wanem problem? (b) ?Hu ya nambawan man we bambae yumi leftemap from rul blong Kraes? ?Mo yu yu harem olsem wanem long ol samting we Kingdom ya bambae i mekem?

¹⁹ Traem tingbaot bakegen, laef blong ol stret man long niufala wol we God bambae i mekem, taem oli stap aninit long rul blong Bigfala Solomon. God i mekem promes ya se: “Bambae i gat plante kakae long ples ya, we bambae ol hil oli fulap gud long hem.” (Sam 72:16) Ol tok ya oli soemaot we ol kakae bambae oli gru gud mo oli plante we oli plante. Bambae graon i karem plante kakae “olsem gudfala graon ya Lebanon.” Long taem we Solomon i rul, Lebanon i wan ples we graon blong hem i karem plante kakae. !Traem tingbaot! !Bambae i no moa gat man we i sot long kakae, mo man we i sik from i no kakae gud, mo man we i ded from hanggri! Bambae olgeta man oli harem gud long ‘wan bigfala lafet, we oli kakae ol nambawan kakae.’—Aes. 25:6-8; 35:1, 2.

²⁰ ?Bambae yumi leftemap hu from ol nambawan blesing ya? Faswan man we bambae yumi leftemap, hemia Jeova God, we hem nao i King blong Olwe, mo Hae Rula blong heven mo wol. Yes, bambae yumi evriwan i glad, bambae yumi singsing long naesfala sing ya we ol lastok blong hem se: “Yu mekem we ol man bambae oli no save fogetem nem blong king ya [Jisas Kraes] samtaem, mo we hae nem blong hem bambae i stap oltaem, olsem we san i stap oltaem. Yu mekem we olgeta man long wol bambae oli stap askem long yu blong yu blesem olgeta, olsem we yu stap blesem king ya. Hae God, yu yu God blong . . . ol laen blong Isrel, mo mifala i presem yu. Yu nomo yu save mekem ol bigbigfala wok ya. Oltaem bambae mifala i stap presem hae nem blong yu, gogo i no save finis. Mifala i wantem we bigfala paoa blong yu we yu yu King, bambae i kavremap olgeta ples long wol ya. !Amen! !Amen!”—Sam 72:17-19.

[Futnot]

?Bambae Yu Yu Ansa Olsem Wanem?

• Ol Sam 72 i wan profet tok we i soemaot wanem samting we bambae i kamtru?

• ?Hu ya Bigfala Solomon? ?Mo bambae rul blong hem i kasem weples?

• ?Weswan long ol blesing long Ol Sam 72 we yu yu wantem tumas blong kasem?

[Kwestin]

[Tok blong pija long pej 29]

?Gudfala laef we ol man oli gat aninit long rul blong Solomon, hem i pija blong wanem?

[Tok blong pija long pej 32]

Yumi mas mekem evri samting we yumi naf blong mekem, blong kasem laef long Paradaes aninit long rul blong Bigfala Solomon