Kinsay Makaluwas Niadtong Nagatuaw Alang sa Tabang?

“Oh Diyos, ihatag ang imong hudisyal nga mga hukom ngadto sa hari . . . Kay pagaluwason niya ang kabos nga nagatuaw alang sa tabang.”—SAL. 72:1, 12.

1. Sa kahimtang ni David, unsay atong makat-onan bahin sa kaluoy sa Diyos?

 PAGKAMAKAPADASIG nianang mga pulonga, nga lagmit gisulat ni Haring David! Daghang katuigan una niya kana isulat, siya nagbasol sa iyang pagpanapaw uban kang Batseba. Nianang higayona, si David nangaliyupo sa Diyos: “Sumala sa kadagaya sa imong mga kaluoy palaa ang akong mga kalapasan. . . . Ang akong sala anaa kanunay sa akong atubangan. . . . Tan-awa! Sa kasaypanan ako natawo uban sa mga kasakit sa pagpanganak, ug sa sala ako gipanamkon sa akong inahan.” (Sal. 51:1-5) Sa kamaluluy-on, si Jehova naghunahuna sa atong pagkamakasasala.

2. Unsay atong makat-onan sa Salmo 72?

² Si Jehova nakasabot sa atong makaluluoy nga kahimtang. Apan ingon sa gitagna, ang dinihogang Hari sa Diyos ‘magluwas sa kabos nga nagatuaw alang sa tabang, ingon man sa sinakit ug kang bisan kinsa nga walay magtatabang. Maluoy siya sa timawa ug sa kabos, ug magluwas sa mga kalag sa mga kabos.’ (Sal. 72:12, 13) Sa unsang paagi itagana ang kahupayan? Ang Salmo 72 nagtug-an kanato. Kini nga awit, nga naghisgot bahin sa paghari sa anak ni David nga si Solomon, naghatag ug pasiunang pagtan-aw kon sa unsang paagi ang pagmando sa Anak sa Diyos, nga si Jesu-Kristo, maghupay sa kagul-anan sa katawhan.

 Pasiunang Pagtan-aw sa Pagmando ni Kristo

3. Unsay gipangayo ni Solomon, ug unsay gihatag sa Diyos kaniya?

³ Human magsugo nga himoong hari si Solomon, ang tigulang nga si David naghatag kaniyag espesipikong instruksiyon nga gisunod ni Solomon. (1 Hari 1:32-35; 2:1-3) Sa ulahi, si Jehova nagpakita kang Solomon diha sa damgo ug miingon: “Hangyo kon unsay akong ihatag kanimo.” Usa ray gipangayo ni Solomon: “Hatagi ang imong alagad ug usa ka kasingkasing nga masinugtanon aron sa paghukom sa imong katawhan, sa pag-ila tali sa maayo ug sa daotan.” Ingong resulta sa mapainubsanong hangyo ni Solomon, ang Diyos naghatag sa iyang gipangayo ug gidugangan pa kana.—1 Hari 3:5, 9-13.

4. Giunsa paghubit sa usa ka magmamando nianang panahona ang paghari ni Solomon?

⁴ Tungod sa panalangin ni Jehova, ang paghari ni Solomon mao ang labing malinawon ug mauswagon sa tibuok kasaysayan. (1 Hari 4:25) Lakip niadtong gustong makakita kon sama sa unsa ang pagmando ni Solomon mao ang rayna sa Sheba, nga miabot kauban sa daghan kaayong sakop. Siya miingon kang Solomon: “Matuod ang pulong nga akong nadunggan sa akong yuta . . . Wala sa katunga ang nasaysay kanako. Imong nalabwan sa kaalam ug kauswagan ang mga butang nga nadungog.” (1 Hari 10:1, 6, 7) Apan, mas dako pang kaalam ang gipakita ni Jesus, kinsa hustong makaingon bahin sa iyang kaugalingon: “Tan-awa! ania ang usa nga labaw pa kay kang Solomon.”—Mat. 12:42.

Kahupayan Ilalom sa Pagmando ni Solomon

5. Unsay gipadayag sa Salmo 72, ug unsang pasiunang pagtan-aw ang gihatag niini?

⁵ Atong susihon ang ika-72 nga Salmo aron atong masayran ang mga panalangin nga atong matagamtam ilalom sa pagmando ni Jesu-Kristo, ang Dakong Solomon. (Basaha ang Salmo 72:1-4.) Gipadayag niini nga salmo kon unsay pagbati ni Jehova sa “prinsipenhong pagmando” sa iyang Anak, ang “Prinsipe sa Pakigdait,” si Jesu-Kristo. (Isa. 9:6, 7) Ilalom sa pagtultol sa Diyos, ‘labanan sa Dakong Solomon ang kawsa sa mga sinakit ug luwason ang mga anak sa kabos.’ Sa iyang pagmando molungtad ang pakigdait ug pagkamatarong. Sa dinhi pa si Jesus sa yuta, iyang gipakita kon unsay iyang himoon sa iyang Usa ka Libo ka Tuig nga Pagmando.—Pin. 20:4.

6. Unsay gihimo ni Jesus nga nagpakita kon unsang mga panalangin ang madawat ilalom sa pagmando sa Gingharian?

⁶ Tagda ang pipila ka butang nga gihimo ni Jesu-Kristo nga nagpakita kon unsay iyang buhaton alang sa katawhan ingong katumanan sa Salmo 72. Matandog gayod kita sa iyang pagkamaluluy-on niadtong nag-antos. (Mat. 9:35, 36; 15:29-31) Pananglitan, usa ka sanlahon ang miduol kang Jesus ug nangaliyupo: “Kon buot mo lamang, ikaw makahinlo kanako.” Si Jesus mitubag: “Buot ko. Mamahinlo ka.” Ug ang tawo naayo! (Mar. 1:40-42) Sa ulahi, nahibalag ni Jesus ang usa ka babayeng balo kansang bugtong anak nga lalaki namatay. Kay “giabot ug kaluoy,” si Jesus miingon, “Bangon!” ug ang iyang anak mibangon. Siya nabuhi pag-usab!—Luc. 7:11-15.

7, 8. Paghatag ug pipila ka pananglitan diin gipasundayag ni Jesus ang iyang gahom sa pagpang-ayo.

⁷ Si Jehova naghatag kang Jesus ug gahom  sa paghimog mga milagro. Gipakita kini sa nahitabo sa “usa ka babaye nga gitalinug-an sulod na sa napulog-duha ka tuig. . . . Gipaantos siyag daghang kasakit sa daghang mananambal ug nagasto na ang tanan niyang kahinguhaan,” apan siya migrabe hinuon. Siya misiot sa panon sa katawhan ug mihikap kang Jesus—usa ka paglapas sa Balaod kay siya may ‘inagas nga dugo.’ (Lev. 15:19, 25) Nabatyagan ni Jesus nga may gahom nga migawas kaniya ug busa nangutana siya kon kinsay mihikap kaniya. Kay “nalisang ug nangurog,” ang babaye “mihapa sa iyang atubangan ug gisultihan siya sa tibuok kamatuoran.” Nahibalo si Jesus nga giayo ni Jehova ang babaye, busa nagpakita siyag kalulot niini ug miingon: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.”—Mar. 5:25-27, 30, 33, 34.

⁸ Ang hinatag-sa-Diyos nga gahom ni Jesus wala lamang mag-ayo sa mga masakiton kondili may dakong epekto usab sa mga nakakita. Pananglitan, seguradong daghan ang nakadayeg sa pagkakita nila kang Jesus nga nag-ayo sa mga masakiton una pa sa iyang gibantog nga Wali sa Bukid. (Luc. 6:17-19) Sa dihang si Juan Bawtista nagsugo ug duha ka tawo aron sa pagtino nga si Jesus ang Mesiyas, ilang naabtan Siya nga nag-ayo sa mga masakiton, nagpagulag daotang mga espiritu, ug nag-ayo sa mga buta. Dayon giingnan ni Jesus ang duha ka tawo: “Itaho kang Juan ang inyong nakita ug nadungog: ang mga buta makakita na, ang mga bakol makalakaw na, ug ang mga sanlahon ginahinloan ug ang mga bungol makadungog na, ang mga patay gipamangon, ang mga kabos ginasangyawan sa maayong balita.” (Luc. 7:19-22) Seguradong nadasig si Juan sa maong mensahe!

9. Unsay gipakita sa mga milagro ni Jesus alang sa umaabot?

⁹ Tinuod, temporaryo lang ang kahupayan nga gitagana ni Jesus panahon sa iyang ministeryo. Kadtong iyang giayo o gibanhaw nangamatay ra sa ulahi. Apan, ang mga milagro nga gihimo ni Jesus maoy pasiuna lamang sa dumalayong kahupayan nga matagamtam sa katawhan ilalom sa iyang Mesiyanikong pagmando.

Tibuok-Yutang Paraiso sa Umaabot!

10, 11. (a) Hangtod kanus-a matagamtam ang mga panalangin sa Gingharian, ug sama unya sa unsa ang pagmando ni Jesus? (b) Kinsay makauban ni Kristo sa Paraiso, ug sa unsang paagi siya mahimong mabuhi sa walay kataposan?

¹⁰ Handurawa kon sama sa unsa ang kinabuhi sa Paraiso. (Basaha ang Salmo 72:5-9.) Ang mga magsisimba sa bugtong matuod nga Diyos makatagamtam sa kinabuhi sa Paraiso samtang anaa ang adlaw ug ang bulan—sa ato pa, sa walay kataposan! Ang haring si Jesu-Kristo maghatag ug kahayahay, ‘ingon sa ulan ibabaw sa gigalaban nga balili ug sa dagayang taligsik nga nagbasa sa yuta.’

¹¹ Samtang imong handurawon ang katumanan niini nga salmo, dili ba matandog ang imong kasingkasing sa paglaom nga mabuhi sa walay kataposan sa paraisong yuta? Seguradong nalipay ang gilansang nga mamumuhat ug daotan sa dihang giingnan siya ni Jesus: “Ikaw makauban nako sa Paraiso.” (Luc. 23:43) Sa Usa ka Libo ka Tuig nga Pagmando ni Jesus, ang maong tawo pagabanhawon. Kon magpasakop siya sa pagmando ni Kristo, mahimo siyang mabuhi sa yuta sa walay kataposan uban ang hingpit nga panglawas ug kalipay.

12. Sa Usa ka Libo ka Tuig nga Pagmando ni Kristo, unsang kahigayonan ang bukas alang sa mga dili-matarong nga pagabanhawon?

¹² Ilalom sa pagmando sa Dakong Solomon, si Jesu-Kristo, “molambo ang matarong,” sa ato pa, modagaya o mouswag. (Sal. 72:7) Nianang panahona, modagaya ang gugma ug malumong pag-atiman ni Kristo sama niadtong dinhi pa siya sa yuta. Sa bag-ong kalibotan nga gisaad sa Diyos, bisan ang “mga dili-matarong” nga pagabanhawon hatagan ug kahigayonan nga mosunod sa mga sukdanan ni Jehova ug mabuhi. (Buh. 24:15) Siyempre, kadtong modumili sa pagkinabuhi nga kaharmonya sa mga balaod sa Diyos pagalaglagon aron dili nila matugaw ang pakigdait ug kalinaw sa bag-ong kalibotan.

13. Unsa ka masangkaron ang pagmando sa Gingharian, ug nganong dili matugaw ang kalinaw niana?

 ¹³ Gipakita sa Bibliya kon unsa ka masangkaron ang pagmando sa Dakong Solomon: “Aduna unya siyay mga sakop gikan sa usa ka dagat ngadto sa laing dagat ug gikan sa Suba [Euprates] hangtod sa mga kinatumyan sa yuta. Ang mga molupyo sa walay-tubig nga mga rehiyon moyukbo sa atubangan niya, ug ang iyang mga kaaway motila sa abog.” (Sal. 72:8, 9) Oo, si Jesu-Kristo magmando sa tibuok yuta. (Zac. 9:9, 10) Kadtong magpabili sa iyang pagmando ug sa mga panalangin niini “moyukbo” aron sa pagpasakop kaniya. Sa laing bahin, ang dili-mahinulsolong mga makasasala pagaputlon, ingnon ta, bisag “usa ka gatos ka tuig ang [ilang] panuigon.” (Isa. 65:20) Sila “motila sa abog.”

Si Jesus Mobati Kanato

14, 15. Giunsa nato pagkahibalo nga si Jesus nakasabot sa tawhanong pagbati ug ‘magluwas sa mga kabos nga nagatuaw alang sa tabang’?

¹⁴ Ang kahimtang sa makasasalang katawhan makaluluoy ug nagkinahanglag tabang. Apan duna kitay paglaom. (Basaha ang Salmo 72:12-14.) Si Jesus, ang Dakong Solomon mobati kanato tungod kay nakasabot siya sa atong pagkadili-hingpit. Dugang pa, si Jesus nag-antos tungod sa pagkamatarong, ug ang Diyos nagtugot nga siya pagasulayan. Aw, si Jesus nakaagom ug hilabihang kasakit nga “ang iyang singot nahimong sama sa mga tinulo sa dugo nga nangatagak sa yuta.” (Luc. 22:44) Sa ulahi, diha sa estaka sa pagsakit, siya mituaw: “Diyos ko, Diyos ko, nganong gitalikdan mo ako?” (Mat. 27:45, 46) Bisan pa sa tanan niyang giantos ug sa paningkamot ni Satanas nga patalikdon siya sa Diyos, si Jesus nagmatinumanon kang Jehova.

¹⁵ Makaseguro kita nga nakita ni Jesus ang atong mga kasakit ug “pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang.” Kay adunay mahigugmaong kahingawa sama sa iyang Amahan, si Jesus ‘magpatalinghog sa mga kabos’ ug ‘magaayo sa mga gun-ob ug kasingkasing ug magabugkos sa ilang masakit nga mga bahin.’ (Sal. 69:33; 147:3) Si Jesus “mobati sa atong mga kaluyahon,” kay siya “nasulayan sa tanang paagi sama kanato.” (Heb. 4:15) Makapadasig gayod ang pagkahibalo nga ang haring si Jesu-Kristo nagmando na sa langit ug nagtinguha sa paghupay sa mga tawo nga nag-antos!

16. Nganong nakapakitag simpatiya si Solomon sa iyang mga sakop?

¹⁶ Tungod kay si Solomon dunay kaalam ug hait nga pagsabot, walay duhaduha nga ‘naluoy siya sa timawa.’ Gawas pa, nakasinati usab siyag makapasubong mga panghitabo. Ang iyang igsoong si Amnon naglugos sa iyang igsoon nga si Tamar, ug tungod niana ang iyang igsoon nga si Absalom nagpatay kang Amnon. (2 Sam. 13:1, 14, 28, 29) Giilog ni Absalom ang trono ni David, apan napakyas siya, ug sa ulahi gipatay siya ni Joab. (2 Sam. 15:10, 14; 18:9, 14) Dayon, ang igsoon ni Solomon nga si Adonias misulay pag-ilog sa trono. Kon milampos siya, walay duhaduha nga patyon niya si Solomon. (1 Hari 1:5) Dayag nga nakasabot si Solomon sa pag-antos sa mga tawo tungod sa gisulti niya sa iyang pag-ampo panahon sa inagurasyon sa templo ni Jehova. Maylabot sa iyang mga sakop, ang hari miampo: “Matag usa kanila nahibalo sa iyang hampak ug sa iyang kasakit . . . Ikaw [Jehova] magapasaylo ug mohatag sa matag usa sumala sa tanan niyang mga dalan.”—2 Cron. 6:29, 30.

17, 18. Unsang kasakit ang gisagubang sa pipila ka alagad sa Diyos, ug unsay nakatabang kanila sa paglahutay?

¹⁷ Mahimong mobati kitag “kasakit” tungod  sa mga hitabo sa atong kinabuhi. Si Mary, a usa ka Saksi ni Jehova nga nag-edad ug kapin sa 30, misulat: “Daghan kog rason nga malipay, apan sagad mobati kog kaulaw ug kayugot sa dihang mahinumdom ko sa akong kagahapon. Maguol kaayo ko ug mohilak, nga samag bag-o lang kining nahitabo. Tungod sa akong mapait nga kagahapon, ako mobati gihapon nga walay-pulos ug sad-an.”

¹⁸ Daghan sa mga alagad ni Jehova ang makasabot nianang mga pagbatia, apan unsay makahatag kanilag kusog aron makalahutay? “Ang tinuod nga mga higala ug mga igsoon sa pagtuo nakahatag kanakog kalipay,” miingon si Mary. “Kanunay sab kong maghunahuna sa mga saad ni Jehova sa umaabot, ug masaligon ako nga ang akong pagtuaw alang sa tabang mahimong hugyaw sa kalipay.” (Sal. 126:5) Kinahanglan kitang molaom sa gitagana sa Diyos kanato—ang iyang Anak ug tinudlong Hari. Bahin kaniya, kini gitagna: “Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.” (Sal. 72:13, 14) Makapadasig gayod kana!

Mabungahon nga Bag-ong Kalibotan sa Umaabot

19, 20. (a) Ingon sa gipakita sa Salmo 72, unsang problema ang pagasulbaron sa pagmando sa Gingharian? (b) Kinsay pangunang dayegon tungod sa pagmando ni Kristo, ug unsay imong pagbati sa pagabuhaton unya niana?

¹⁹ Handurawa pag-usab ang kaugmaon sa mga matarong didto sa bag-ong kalibotan sa Diyos ilalom sa pagmando sa Dakong Solomon. “Aduna unyay dagayang lugas sa ibabaw sa yuta,” ang Diyos nagsaad. “Sa tumoy sa kabukiran adunay pagsugwak.” (Sal. 72:16) Kasagaran, dili mananom ug lugas sa tumoy sa kabukiran, busa kining mga pulonga nagpasiugda kon unsa gayod kamabungahon ang yuta sa umaabot. Kini “mahisama nianang sa Lebanon,” usa ka dapit nga nagpatunghag dagayang pagkaon panahon sa paghari ni Solomon. Hunahunaa kini! Wala nay kanihit sa pagkaon, kakulang sa sustansiya, ug kagutom! Ang tanan makatagamtam sa “usa ka bangkete sa mantikaon kaayo nga pagkaon.”—Isa. 25:6-8; 35:1, 2.

²⁰ Kinsa ang takos dayegon tungod niining tanang panalangin? Sa panguna, takos dayegon ang Walay-Kataposang Hari ug Magmamando sa Uniberso, si Jehova nga Diyos. Unya kitang tanan malipayong moduyog sa pag-awit sa hinapos nga bahin niining maanindot ug makapadasig nga salmo: “Ang iyang ngalan [sa haring si Jesu-Kristo] molungtad unta hangtod sa panahong walay tino; ang iyang ngalan mouswag unta sa atubangan sa adlaw, ug pinaagi kaniya panalanginan unta nila ang ilang kaugalingon; ang tanang kanasoran magapahayag unta kaniya nga malipayon. Dalayegon si Jehova nga Diyos, ang Diyos sa Israel, nga mao lamang ang nagabuhat ug katingalahang mga buhat. Ug dalayegon ang iyang mahimayaong ngalan hangtod sa panahong walay tino, ug pagapun-on unta ang tibuok nga yuta sa iyang himaya. Amen ug Amen.”—Sal. 72:17-19.

[Footnote]

Unsay Imong Tubag?

• Unsang kahimtang sa umaabot ang gitagna sa Salmo 72?

• Kinsa ang Dakong Solomon, ug unsa ka masangkaron ang iyang pagmando?

• Unsay ilabinang nakapadani kanimo sa mga panalangin nga gitagna sa ika-72 nga Salmo?

[Mga Pangutana sa Pagtuon]

[Hulagway sa panid 29]

Unsay gihulagwayan sa kadagaya nga natagamtam panahon sa paghari ni Solomon?

[Hulagway sa panid 32]

Dili makawang ang atong paningkamot nga mabuhi sa Paraiso ilalom sa pagmando sa Dakong Solomon