Hinyi Watela Kupulwisha Antu Anakudila Nakukeña Wakuyikwashaku?

“Eyi Nzambi, mwinki mwanta wuñaji weyi . . . Muloña wakamupulwisha wabula yuma hakadilayi.”—MAS. 72:1, 12.

1. Chumanyi chitwadizilaña kuwushona waNzambi wamutiyililiyi Davidi?

 AWA mazu asonekeliyi Mwanta Davidi wamuIsarela wakushankulu ekala akukolesha nankashi! Kumpinji yakunyima henohu kanda yasoneki awa mazu, waditoñesheli chikupu hamuloña wawuvumbi weliliyi naBatisheba. Haniyi mpinji, Davidi wamulembeleli Nzambi nindi: “Jimaku nyiloña yami mwomweseka wushona weyi wawuvulu. . . . ninshidi yami yidi kunukutala mesu ami mwaana wejima. . . . Mwalala ami anvweli mukuluwa, mama yami wañimitili munshidi.” (Mas. 51:1-5) Muloña wawushona windi, Yehova weluka nindi twaswana nshidi.

2. Nsona yaMasamu 72 yinateli kutukwasha ñahi?

² Yehova weluka yihuñu yitwamonaña. Kwesekeja nachashimwineñawu dehi, Mwanta wawayishewa atondawu kudi Nzambi “wakamupulwisha wabula yuma hakadilayi, wakapulwisha nikazweñi wabula wakumukwashaku. Niwazeya niwabula yuma wakayitiyila wushona, wakaamwina abula yuma.” (Mas. 72:12, 13) Hanu dinu akayipulwisha ñahi? Masamu 72 yatulejaña chakayipulwishawu.  Idi isamu adisonekeli kutalisha kuwanta wamwana kaDavidi Solomoni, nawa aka kamina kamwekesheleñahu dehi chiyuulu chaMwana kaNzambi, Yesu Kristu, chichamba kapulwisha antu muyihuñu.

Chiyuulu chaKristu Achimwekesheleñahu Dehi

3. Chumanyi chalombeliyi Solomoni, nawa Nzambi wamwinkeli yumanyi?

³ Hanyima yakuhosha nindi Solomoni amuswanyiki kwikala mwanta, Davidi wadiña washinakaja dehi wamulejeli nshimbi jateleli kulondelayi Solomoni nakashinshi. (1 Anya. 1:32-35; 2:1-3) Kuhiñahu Yehova wamulejeli Solomoni muchilota nindi: “Lombaku chinukukwinka.” Solomoni walombeli hohu chuma chimu nindi: “Anyinki ami kambuñeyi muchima wakwiluka maana akusompeshaña antu eyi, kulonda nakashinshikaña nimwamuwahi nimwatama.” Hamuloña wachuma chalombeliyi Solomoni mukudizoza, Nzambi wamwinkeli chuma chalombeliyi nawa wamulunjikililuhu yuma yayivulu.—1 Anya. 3:5, 9-13.

4. Indi chiyuulu chaSolomoni achilumbulwili ñahi kudi mukwawu mwanta?

⁴ Hamuloña wakumukiswila kudi Yehova, muchiyuulu chaSolomoni mwadiña kuwunda nimaheta akadi kumonañahu dehi munfulumendi yidi yejima yaheseki. (1 Anya. 4:25) Hakachi kawantu enjeli nakumona chadiña chiyuulu chaSolomoni himwanta wamumbanda wakwituña daSheba, hamu namukanka wawatulama twindi. Wamulejeli Solomoni nindi: “Chinatiyili mwituña dami mwashimwinuwu nimuwelaña ninsañu jamaana eyi, komana chalala . . . Komana hiyanshimwinini hela chibaluku; nimaana eyi nimaheteyi anabadiki mumpuhu yinatiyili.” (1 Anya. 10:1, 6, 7) Ilaña, Yesu diyi wamwekesheli maana abadika, watela kuditena yomweni nindi: “Talenu, kunu kudi wabadika Solomoni.”—Mat. 12:42.

Nkisu Yakatambwila Antu muChiyuulu chaSolomoni Muneni

5. Indi Isamu 72 damwekeshaña yumanyi, nawa damwekesheleñahu dehi nyidimwinyi?

⁵ Tushinshikenu hamazu ekala muMasamu 72 kulonda twiluki nkisu jakekala muchiyuulu chaYesu Kristu, Solomoni Muneni. (Tañenu Masamu 72:1-4.) Idi isamu damwekeshaña Yehova chamonañayi “wanta” waMwanindi, “Kalamba wakuwunda,” Yesu Kristu. (Isa. 9:6, 7) Muwunlomboli waNzambi, Solomoni Muneni ‘wakayisompela atuzweñi nikwamwina anyana kawabula yuma.’ Muchiyuulu chindi mwakekala kuwunda nikuloña. Hampinji yadiñayi hamaseki, Yesu wamwekesheleñahu dehi nyidimu yakakoña Chiyuulu chindi Chekombakaji daNyaka chidi kumbidi.—Chim. 20:4.

6. Indi Yesu wamwekesheli ñahi nkisu yikekala muchiyuulu chaWanta?

⁶ Talenu nyidimu yakoñeliyi Yesu Kristu yatuleñelaña kumonañahu dehi nyidimu yakakoñelayi antu kulonda kushikija mazu ekala haMasamu 72. Twazañalalaña haluwi lwabadika lwatiyililiyi antu adiña nakukabakana. (Mat. 9:35, 36; 15:29-31) Chakutalilahu, iyala wadiña wakata mbumba wenjili kudi Yesu nakumulembelela nindi: “Neyi wuneteji, wunatweshi kuntookesha.” Yesu wakwili nindi: “Neteji, tookaku.” Nawa ona iyala amukili! (Maku 1:40-42) Nkumininaku, Yesu wabulakeni mumbanda nfwila wafwishili mwanindi weyala wasemuka kanka windi. Yesu “hakumutiyila  wushona,” hakumwila nindi, “Hindukaku” hohenohu mwanindi hakuhinduka. Wekalili cheñi wamumi!—Luka 7:11-15.

7, 8. Yumanyi yamwekesheli ñovu yaYesu yakuuka?

⁷ Yehova wamwinkeli Yesu ñovu yakukoña yihayamisha. Chumichi chamwekeni hampinji yokiliyi “mumbanda wumu wapwekelaña mashi nyaka ikumi nayiyedi.” Hela chakwila wadiña ‘wamona dehi kukala nayuma yayivulu yamweniyi kudi ayimbuki amavulu, namanishi dehi yuma yindi yejima to-o,’ ilaña waswejeleluku. Iwu mumbanda wadiñijili hezaza dawantu nakumukunka Yesu, wafumpili Nshimbi yalondeleleña muntu ‘wapwekeleña mashi.’ (Lev. 15:19, 25) Yesu welukili nindi ñovu jamumanini nawa wakeñeli kwiluka muntu wamukunkili. Dichi ona mumbanda “hakutiya woma nikuzaala . . . hakwinza nakudinata hamaseki kumesu indi, hakumuleja nsañu yejima.” Yesu chelukiliyi nindi Yehova namuuki ona mumbanda, wamukwokwejeli nawa wahosheli nindi: “Eyi mwanami, kukuhwelela kweyi kunakukoleshi dehi; yaña nakuwunda, musoñu weyi wukufumi.”—Maku 5:25-27, 30, 33, 34.

⁸ Ñovu yakuuka yamwinkeluwu Yesu kudi Nzambi yaleñeleli kuuka antu akata nawa wakwokweli niantu amweneña. Chakutalilahu, antu amavulu azañaleli hampinji yamwenuwu Yesu nakuuka antu henohu kanda yahani Mpanji yindi yaHampidi yaya mpuhu. (Luka 6:17-19) Yowanu Mpapatishu chatemesheliyi atuñanda ayedi kuya nakukeña wunsahu wamwekesheleña nawu Yesu wadiña diyi Mesiya, amuwanini Yesu ‘nakuuka antu amavulu adiñi nanyisoñu, niadiñi nayipupu, niadiñi nawademoni, hakutonesha niamputamesu amavulu.’ Dichi Yesu walejeli atuñanda ayedi nindi: “Yenu mwakamuleji Yowanu yuma yimunamoni niniyi yimunatiyi; amputamesu hiyakutona, akwakubalakata hiyakwenda chachiwahi, akwambumba hiyakutooka, ajika matu hiyakutiya, afu hiyakuyisañula, atuzweñi hiyakuyishimwina nsañu yayiwahi.” (Luka 7:19-22) Iyi nsañu yatela yamukolesheli Yowanu chikupu!

9. Yihayamisha yakoñeliyi Yesu yamwekesheleñahu dehi yumanyi?

⁹ Eñañi, nyidimu yakoñeliyi Yesu yakukwasha antu adiña nakukabakana hampinji yazatileñayi mudimu wakushimwina hamaseki yadiña hohu yakampinji kantesha. Antu okiliyi hela asañwiliyi afwili cheñi. Ilaña, yihayamisha yakoñeliyi Yesu hampinji yadiñayi hamaseki yamwekesheleñahu dehi nkisu yahaya nyaka yakatambwilawu antu muchiyuulu chaMesiya.

Iseki Dejima Dakekala Paradisa Kumbidi!

10, 11. (a) Indi nkisu yikaleta Wanta yikatwalekahu ñahi, nawa chiyuulu chaYesu chikekala ñahi? (b) Hinyi wukekala naKristu muParadisa, nawa wukatwesha ñahi kushakama haya nyaka?

¹⁰ Fwikijenu chakekala chihandilu muParadisa hamaseki. (Tañenu Masamu 72:5-9.) Akwakudifukula aNzambi walala wumu hohu akadiluñisha wumi muParadisa nyaka yejima yakekalaña itañwa nikakweji, haya nyaka! Mwanta Yesu Kristu wakatunookeshaña, “neyi chikwanvula yikunokela mwanakesuwu matahu; chikwanvula jazoweshaña heseki.”

¹¹ Chimukufwikijaña kushikijewa kwanidi isamu, komana muchima wenu hiwunasañumuki naniku kuchiñeja kwakushakama haya nyaka muparadisa hamasekiku? Eñani mukwanyiloña wapopeluwu wazañaleli chamulejeluwu kudi Yesu nindi: ‘Chalala Nakuleji lelu nami, Wukekala nanami muParadisa.’ (Luka 23:30-43) Muchiyuulu chaYesu Chekombakaji daYaaka, iwu iyala akamusañula. Neyi yovwahila chiyuulu chaKristu, wukashakama hamaseki haya nyaka namujimba wawanina nawa namuzañalu.

12. Muchiyuulu chaKristu Chekombakaji daYaaka, kukoolekanyi kwakenkawu antu abula kuloña akasañulawu?

¹² Muchiyuulu chaSolomoni Muneni, Yesu Kristu, “mukwakuloña wakashakama chachiwahi.” (Mas. 72:7) Kukeña kwaKristu nikwakamena kwakaswejelaku, neyi chikwadiña hampinji yadiñayi hamaseki. Mwituña daNzambi dadiha dakanayi, ‘aloña’ akasañulawu akekala cheñi nakukooleka kwakwovwahila nshimbi jaYehova nawa  akahanda. (Yil. 24:15) Ilaña, antu akaanaña kwovwahila nshimbi jaNzambi hiyakayiteja kutwalekahu kushakama nakuluwañesha kuwunda kwakekala mwituña dadihaku.

13. Indi chiyuulu chaWanta chakayuula nakushika mudihi, nawa muloñadi chimwakekala kuwunda kwakabula kuluwañeshawu?

¹³ Chiyuulu chaSolomoni Muneni chikatanda iseki dejima achimwekesha munawa mazu akwila nawu: “Wakayula kufumisha kukaluñalwiji, ndo nikukaluñalwiji kakwawu, kufumisha nikuKaloña [Yufurati], ndo nikwakumina maseki. Ashakama mumakuna akamufukamina, niayilumbu jindi akalasha lunkuñu.” (Mas. 72:8, 9) Eñañi, Yesu Kristu wukayuula iseki dejima. (Zek. 9:9, 10) Antu eluka nikulemesha chiyuulu chindi “akamufukamina” nakumwovwahila chikupu. Ilaña, akwanshidi abulaña kubalumuka akayijilumuna, neyi kwiji “munyaka nkulakaji.” (Isa. 65:20) “Akalasha lunkuñu.”

Yesu Watutiyilaña Wushona Chikupu

14, 15. Tweluka ñahi netu Yesu wamonaña chakabakanañawu antu nawa “wakapulwisha nikazweñi wabula wakumukwashaku”?

¹⁴ Antu akwanshidi adi mwihuñu deneni nawa anakukeña wakuyikwasha. Ilaña tukweti kuchiñeja. (Tañenu Masamu 72:12-14.) Yesu, Solomoni Muneni, watutiyilaña wushona muloña weluka nindi hitwawaninaku. Kubombelahu, Yesu wayandili kukoola kuloña, nawa Nzambi wamulekeli nindi yamoni kweseka kankawindi. Yesu wayandili chikupu muyitoñojoka nawa “masulwilindi hiyakwila kafwampi neyi malekileki amashi aweni hiyakuholokela hamaseki.” (Luka 22:44) Kuhiñahu, chamupopeluwu hamutondu wakuyandishila, wabileleli nezu dañovu nindi: “Nzambi yami, Nzambi yami, wunanshiyilidi kanka wami?” (Mat. 27:45, 46) Hela chakwila wayandili, nawa Satana wafwilileña chikupu kumufumisha kukabadi kaYehova, Yesu watwalekeluhu washinshika kudi Yehova Nzambi.

¹⁵ Tuneluki netu Yesu wamonaña chitwakabakanaña nawa “wakamupulwisha wabula yuma hakadilayi, wakapulwisha nikazweñi wabula wakumukwashaku.” Hamuloña wakwakamena neyi chakamenañayi Tata yindi, Yesu ‘wakatiya atuzweñi’ nawa ‘wakakuswisha abaluka nyichima; wakakasa hayilonda yawu.’ (Mas. 69:33; 147:3) Yesu natweshi “kutiya wushona chitwazeyazeyañetu,” muloña “niyena amwesekeli muyuma yejima neyi chatwesekañawu etu.” (Heb. 4:15) Twazañalalaña chikupu hakwiluka netu Mwanta Yesu Kristu nakuyuula mwiwulu nawa nakufwila kupulwisha antu anakukabakana!

16. Muloñadi Solomoni chatiyilileñayi antu jindi wushona?

¹⁶ Chakadi nikujina Solomoni ‘watiyilili atuzweñi wushona,’ muloña wadiña namaana nikashinshi. Hela chochu, muchihandilu chindi waneñeleña nikumona yuma yomisha mbaña. Mana kwindi Aminoni wamukwatili muhelindi Tamari nakwila nindi wuvumbi, nawa mana kwaSolomoni Abisalomi wamujahili Aminoni hamuloña wakoñeliyi. (2 Sam. 13:1, 14, 28, 29) Abisalomi wakeñeleña kuhukula itanda daDavidi, ilaña wakañenyi, nawa amujahili kudi Yowabi. (2 Sam. 15:10, 14; 18:9, 14) Nkumininaku, mana kwaSolomoni Adoniya wakeñeleña kutambula wanta. Neyi watwesheli, chiña Solomoni amujahili. (1 Anya. 1:5) Chinamwekani hatooka chikupu nawu Solomoni welukili chayandileñawu antu muloña wamazu ahosheliyi mukulomba hampinji yashinkwileñawu tembeli yaYehova. Mwanta walombeleluku antu jindi nindi: “Mwakelukilawu yipupu yamunyichima yawu wejima wawu niyihuñu yawu . . . [Eyi Yehova] wakayanakenaña, wakayilaña antu ejima, iwu mwaneliyi, iwu mwaneliyi.”—2 Kushi. 6:29, 30.

17, 18. Yihuñwinyi yomikañawu ambuña aNzambi amakwawu, nawa yumanyi yayikwashaña kuumika?

 ¹⁷ ‘Yihuñu yetu’ yinateli kufuma kuyuma yatumwekeneni muwumi wetu kumpinji yakunyima. Mary, * Chinsahu chaYehova wudi muyaaka yamuma 30, wasonekeli nindi: “Nakeñaña kwikala wamuzañalu, ilaña yuma yamwekeneni kumpinji yakunyima yantiyishaña nsonyi nichikela. Chanleñelaña kuneña nankashi, nawa nakeñaña nikudila, neyi kwiji yuma yejimiyi yamwekana dahaloshi. Yitoñojoka yashalaña mumutu yaleñelaña kudimona neyi wudi wamukunkulwayi nawa neyi wudi namuloña.”

¹⁸ Ambuña aNzambi amavulu niwena dichatiyañawu, ilaña chumanyi chatela kuyikwasha hakwila ekali nañovu yakuumika? Mary wahosheli nindi: “Amabwambu alala niamana kwetu niahela amuchipompelu diwu azañaleshaña. Nafwilaña cheñi kushinshika hayuma yatukanayi Yehova kumbidi, nawa nakuhwelelaña nami madilu ami amba kaleta muzañalu.” (Mas. 126:5) Twatela kukuhwelela mudi Mwana kaNzambi wahanayi, Nyuuli yindi watondayi. Ashimwineñahu dehi kutalisha hadi yena nawu: “Niwazeya niwabula yuma wakayitiyila wushona, wakaamwina abula yuma. Wakayikuula mwayidimbilañawu nimwayikabishilañawu; mashi awu wakayimona kulema.” (Mas. 72:13, 14) Ichi chatukoleshaña nankashi!

Tunakutalila Ituña Dadiha Mwakekala Yuma Yayivulu

19, 20. (a) Neyi chinashimuni mukanda waMasamu 72, kukalanyi kwakamanisha chiyuulu chaWanta? (b) Hinyi watela kuhamekawu hamuloña wachiyuulu chaKristu, nawa mwatiyaña ñahi hayuma yiwukakoña?

¹⁹ Esekenu cheñi kufwikija chakekala chihandilu chawantu aloña mwituña dadiha daNzambi muchiyuulu chaSolomoni Muneni. Atukana nawu: ‘Hanu hamaseki hansa jampidi jamaneni hakavula kudya kwansaachi, kusoña kwayu kwakanyinkesha.’ (Mas. 72:16) Chineli yakudya yansaachi hiyayidimaña hewulu dampiduku, awa mazu amwekeshaña iseki chidakedishaña yakudya chikupu. Dakasoña “neyi chikwaLebanoni,” iluña dasoñeleña yakudya yayivulu muchiyuulu chaSolomoni. Toñojokenu! Hikwakekala kukankila yakudyaku, kwosi wakakosa nanzala, kwosi wakafwa nanzalaku! Antu ejima akadiluñisha “chawija chambiji januna.”—Isa. 25:6-8; 35:1, 2.

²⁰ Hinyi akahamekawu hankisu jejimiji? Yehova Nzambi Mwanta waHaya Nyaka, nawa Nyuuli Wayuma Yejima, diyi akahamekawu hohu. Nawa, wonsu wetu twakembila hamu mazu akukumishaku anaka kamina kakawahi nawa kakuzañalesha kakwila nawu: “Ijina dindi [daMwanta Yesu Kristu] dakekala kwoku haya nyaka; ijina dindi hidakajiya nyaka yejima yamba kekalaña itañwaku; antu akakoolekela hadi yena; nyuza yejima yakamwila nawu wakooleka. Kisu kisu Yehova Nzambi, diyi Nzambi yaIsarela, diyi welaña yuma yakuhayamisha hohu kanka windi. Ijina dindi daya mpuhu adikiswili nkisu haya nyaka; iseki dejima diinzali nakulema kwindi to-o. Amena naAmena.”—Mas. 72:17-19.

[Tumazu twaheshina]

Mukwakula Nenudi?

• Mazu awuprofwetu ekala haMasamu 72 amwekesheleñahu dehi yumanyi?

• Indi Solomoni Muneni hinyi, nawa chiyuulu chindi chikashika kudihi?

• Yumanyi yimunakeñeshi hankisu yashimwineñawu dehi munsona yaMasamu 72?

[Malwihu aKuzatisha haKudiza]

[Mwevulu wudi hefu 29]

Indi kuwunda kwadiluñishiluwu muchiyuulu chaSolomoni kwamwekesheleñahu dehi chumanyi?

[Mwevulu wudi hefu 32]

Twatela kuzata nañovu kulonda tukatambwili wumi muParadisa muchiyuulu chaSolomoni Muneni