Ãnda n tõe n fãag sẽn kelemd-b n kot sõngrã?
Ãnda n tõe n fãag sẽn kelemd-b n kot sõngrã?
“Wẽnnaam, bɩ y kõ rĩmã yam t’a kao bʋʋd tɩrga . . . Yẽ na n fãaga nimbãan-ned sẽn kelemda, la naong soab sẽn ka tar sõngda.”—YƖƖL 72:1, 12.
1. A Davɩɩd kibarã wilgda tõnd bõe Wẽnnaam nimbãan-zoeerã wɛɛngẽ?
WÕNDA yaa pĩnd Israɛllã rĩm a Davɩɩd n gʋls gom-kãensã. * Yaa goam sẽn sɩd kengd raood hal wʋsgo! Yʋʋm a wãn sẽn deng t’a gʋls gom-kãensã, a sũur da sãama wʋsgo, a sẽn da yo ne a Batseba wã yĩnga. Wakat kãnga, a pʋʋsa Wẽnnaam n kos-a woto: “Wa sẽn zems yãmb nimbãan-zoeer sẽn yaa kãsengã, bɩ y yẽes mam kɩɩsgã. . . . Mam kongrã bee m taoor wakat fãa. . . . Gese, mam doga ne yel-wẽna m ma rɩka mam pʋg yel-wẽnã pʋgẽ.” (Yɩɩl 51:3-7) A Zeova zoeta tõnd nimbãanega, a sẽn tẽr tɩ d rogda ne yel-wẽndã, tɩ kɩt tɩ d yaa pãn-komsem dãmbã.
2. Bõe la Yɩɩl Sõamyã 72 soabã wilgd tõndo?
2 A Zeova mii zu-loeesã sẽn namsd tõnd to-to. La wa bãngr gomdã sẽn wilgã, rĩm ning Wẽnnaam sẽn yãkã “na n fãaga nimbãan-ned sẽn kelemda, la naong soab sẽn ka tar sõngda. Far soab ne nimbãan-ned nimbãaneg tara yẽnda, la yẽ na n fãaga nimbãan dãmbã vɩɩm.” (Yɩɩl 72:12, 13) Bõe la a na n maan n yols ãdem-biisã? Yɩɩl Sõamyã 72 soabã wilgda rẽ. B gʋlsa yɩɩn-kãng n wilg a Davɩɩd biig a Salomo sẽn na n dɩ a naamã to-to wã. La a wilgda Wẽnnaam Biig a Zezi Kirist naamã sẽn na n wa ne yolsg ning n kõ ãdem-biisã me.
Kiristã naam reng-n-lɛmbga
3. Bõe la a Salomo kos Wẽnnaam, la bõe me la Wẽnnaam kõ-a?
3 A Davɩɩd sẽn wa n kʋʋlã, a kõo noor tɩ b kɩt t’a Salomo lebg rĩma. Rẽ poore, a kõo a Salomo sagls a sẽn sak n tũ ne a sũur fãa. (1 Rĩm 1:32-35; 2:1-3) A Zeova wa n vẽenega a meng a Salomo zãmsd pʋgẽ, n yeel-a woto: “Wilg maam f sẽn dat tɩ m maan n kõ-fo.” La a Salomo kosa bũmb a ye bala, n yeel woto: “Bɩ y kõ maam yam tɩ m soog y nebã n bãng sẽn yaa sõma ne wẽng n bake.” A Salomo sẽn sik a meng n kõs woto wã yĩnga, Wẽnnaam kõ-a-la bũmb ning a sẽn kosã, la a kõ-a bũmb a taab me.—1 Rĩm 3:5, 9-13.
4. A Salomo naamã rɩɩb sasa, bõe la rĩm-poak a yembr yeel a Salomo naamã wɛɛngẽ?
4 A Zeova sẽn ning a Salomo naamã barkã yĩnga, kɩtame t’a nin-buiidã paam bãan la bark wʋsgo. Woto yaa bũmb goosneema baa a ye sẽn zɩ n tõog n maan tẽngã zugu. (1 Rĩm 5:5) Neb nins sẽn wa n na n ges a Salomo naamã sẽn da yaa to-to wã sʋka, d tõe n sõdga Seba rĩm-poakã ne neb kʋʋng sẽn tũ-a wã. Rĩm-poakã yeela a Salomo woto: “Mam sẽn da zĩnd m tẽngẽ wã n wʋm tɩ b gomd yãmb yamã yellã yaa sɩda. . . . Mam sẽn da wʋmã ka ta pʋɩ-sʋk ye. Yãmb yamã ne y arzɛgs yɩɩda mam sẽn da wʋmã.” (1 Rĩm 10:1, 6, 7) La baasgo, a Zezi yamã yɩɩda a Salomo rẽndã zĩig sẽn zãre. A Zezi bee bʋʋm la a sẽn gom a meng yell n yeel woto wã: “Gese, sẽn yɩɩd a Salomo bee ka.”—Mat. 12:42.
Salomo kãsengã na n waa ne yolsgo
5. Bõe la Yɩɩl Sõamyã 72 soabã wilgda, la rẽ sõngda tõnd tɩ d bãng bõe?
5 Bɩ d vaees Yɩɩl Sõamyã 72 soabã goam kẽere, n bãng a Zezi Kirist sẽn yaa Salomo kãsengã naamã rɩɩb sẽn na n wa ne bark ninsã. (Karm-y Yɩɩl Sõamyã 72:1-4.) Yɩɩn-kãng wilgda a Zeova tagsg sẽn yaa a soaba, a Bi-ribl a Zezi Kirist sẽn yaa “Laafɩ-naabã” sẽn na n ‘soog Soolmã’ to-to wã zugu. (Ezai 9:5, 6) Wẽnnaam na n wilga Salomo kãsengã sor t’a ‘bʋ Wẽnnaam nebã yɛlã ne tɩrlem n kao bʋʋd sẽn zems naong rãmbã yĩnga.’ A naamã rɩɩb na n waa ne bãan la tɩrlem. A Zezi sẽn wa n be tẽngã zugã, a maana yɛl wʋsg n wilg a naamã sẽn na n kaoos yʋʋm tusrã sẽn na n wa ne bark ninsã.—Wil. 20:4.
6. Bõe la a Zezi maan n wilg bark nins d sẽn na n paam a naamã rɩɩb sasa wã?
6 Bɩ d ges yɛl kẽer a Zezi Kirist sẽn maane, tɩ wilgd a sẽn na n wa maan bũmb nins ãdem-biisã neer yĩnga, n pids Yɩɩl Sõamyã 72 soabã sẽn yetã. A sẽn da zoet neb nins sẽn da namsdã nimbãaneg to-to wã sɩd kengda pɛlga. (Mat. 9:35, 36; 15:29-31) Wala makre, daar a ye, rao sẽn da yaa wãoor wa n kosa a Zezi woto: “Yãmb sã n data yãmb tõe n maaga maam tɩ m yɩ yɩlemde.” A Zezi leok-a-la woto: “Mam datame. Bɩ f paam f menga n yɩ yɩlemde.” Zĩig pʋgẽ, raoã wãoodã saame! (Mark 1:40-42) Rẽ poore, a Zezi wa n sega pʋg-kõore, t’a bi-yendã ra maan kaalem. A Zezi zoea pagã “nimbãanega,” n yeel biigã woto: “Yiki!” Biigã sɩd vʋʋgame n yiki!—Luk 7:11-15.
7, 8. Bõe la a Zezi maan n wilg t’a tara pãng n tõe n maag bãad-rãmba?
7 A Zeova kõo a Zezi pãng t’a tõog n maan yel-soalma. Pag ning sẽn da tar bãag “hal yʋʋm piig la a yiib” tɩ zɩɩm yitã kibar sɩd wilgda rẽnda. Baa a sẽn “da nams wʋsg tɩpdb wʋsg nengẽ tɩ b reeg a sẽn tarã fãa” wã, a bãagã ra ket n tara paasg bala. A Zezi sẽn wa n be kʋʋng sʋka, pagã kẽe nebã sʋk n soos n sɩɩs-a. Woto ra kɩɩsda Tõogã sẽn wilgd bũmb ning pag zɩɩm sẽn yit sẽn pa segd n maanã. (Maan. 15:19, 25) A Zezi bãngame tɩ pãng n yi yẽ nengẽ, t’a sok n dat n bãng ned ning sẽn sɩɩs-a wã. Biiblã wilga woto: “La rabeem yõka pagã t’a rigda . . . A wa n yĩgimda a Zezi taoore, n pelg a pʋgã fãa n togs bãmba.” A Zezi sẽn bãng t’a Zeova maaga pagã baagã, a bʋka a meng n yeel-a woto: “M biiga, fo tẽeb n maag foom. Kẽng ne laafɩ n paam f meng ne bãag ningã sẽn tar foomã.”—Mark 5:25-27, 30, 33, 34.
8 Wẽnnaam sẽn kõ a Zezi pãng ningã kɩtame t’a tõog n maag bãad-rãmba. La yaa vẽeneg tɩ ra lingda nebã me. Wala makre, nand t’a sõs ne nebã tãngã zugã, a maaga kẽer bãase. Nebã sẽn yã rẽ wã segd n ling-b-la wʋsgo. (Luk 6:17-19) A Zãmbatiis sẽn wa n tʋm neb a yiib tɩ b tɩ sok a Zezi n ges a sã n sɩd yaa Mesi wã, b taa n mikame t’a ‘Zezi ra maagd neb wʋsg bãase, la koms rãmba, la a rigd zĩn dãmba, la a pukd zoens wʋsg nini.’ Rẽ poore, a Zezi yeela a Zãmbatiis nebã woto: “Kẽng-y n tɩ togs-y-yã a Zã bũmb nins yãmb sẽn yã la y wʋmã, zoens yãtame, põe kẽndame, wãoob paamda maagre, wʋms wʋmdame, kũum vʋʋgdame, la koe-noogã moonda naong rãmb sʋka.” (Luk 7:19-22) Sãmbg sẽn ka be, gom-kãensã kenga a Zãmbatiis raoodo!
9. Yel-soalem nins a Zezi sẽn maanã wilgda bõe?
9 A Zezi sẽn yols nebã a sẽn wa n be tẽng zugã, yɩɩ wakat bilf yĩng bala. Sɩd me, neb nins a sẽn maag b bãasã, la a sẽn vʋʋg-b rãmbã wa n kiime. La yel-soalem nins fãa a sẽn maan a sẽn wa n be tẽngã zugã ra wilgdame tɩ Mesi wã naamã rɩɩb sasa, ãdem-biisã na n paama yolsg hakɩk wakat fãa yĩnga.
Tẽngã gill na n wa lebga arzãna
10, 11. a) Bark nins Rĩungã sẽn na n wa ne wã na n kaoosa wakat a wãna, la a Zezi naamã rɩɩb sasa na n yɩɩ wãn to? b) Ãnda me n na n zĩnd arzãnã pʋgẽ ne Kiristã, la a na n maana wãn n paam n vɩɩmd wakat sẽn ka sate?
10 Mams-y n ges-y vɩɩmã sẽn na n yɩ to-to, tẽngã gill sã n wa lebg arzãna. (Karm-y Yɩɩl Sõamyã 72:5-9.) Wa wĩndgã ne kiuugã sẽn be wakat fãa wã, neb nins sẽn tũud Wẽnnaamã na n vɩɩmda arzãnã pʋgẽ wakat fãa yĩnga. Rĩm a Zezi Kirist na n yɩɩ ‘wa saag sẽn niid mood sẽn yaa lom-lom zutu, la wa sa-sik sẽn niid tẽnga,’ n yols nebã.
11 Yãmb sã n tags n ges yɩɩn-kãngã sẽn na n pids to-to wã, rẽ yĩnga y sẽn na n wa paam n vɩɩmd wakat sẽn kõn sa tẽngã gill sẽn na n wa lebg arzãnã zugã, pa noom-y sɩda? Vẽenega, bi-bɛɛg ning b sẽn da ka n yɛgl a Zezi wã sũur yɩɩ noogo, a Zezi sẽn yeel-a tɩ “fo na n wa zĩnda ne maam arzãnã pʋgẽ” wã. (Luk 23:43, NW ) A Zezi naamã rɩɩb sẽn na n kaoos yʋʋm tusrã sasa, ra-kãngã na n vʋʋgame. La a sã n sak Kiristã naam, a na n tõog n vɩɩmda tẽngã zug wakat sẽn ka sate, laafɩ la sũ-noog hakɩk pʋgẽ.
12. Kiristã naam sẽn na n kaoos yʋʋm tusrã sasa, neb nins sẽn pa tɩrsã sẽn na n vʋʋgã na n paama zu-noog n wilg bõe?
12 A Zezi Kirist sẽn yaa Salomo kãsengã naamã rɩɩb sasa, ‘nin-tɩrsã na n tobame,’ rat n yeel tɩ b na n paama bark wʋsgo. (Yɩɩl 72:7) Kiristã na n wilga nebã t’a nong-b lame la a ges b yell sõma, wa a sẽn da maand to-to a sẽn wa n be tẽngã zugã. Dũni paalg ning Wẽnnaam sẽn pʋlmã pʋgẽ, baa neb nins “sẽn pa tɩrsã” sẽn na n vʋʋgã na n paama zu-noogo, n wilg b sã n na n tũu a Zeova noyã, sẽn na yɩl n kell n vɩɩmde. (Tʋʋ. 24:15, NW ) Yaa vẽeneg tɩ b pa na n bas neb nins sẽn na n zãgs Wẽnnaam noyã tũubã tɩ b kell n vɩɩmd ye. Bala b na n sãama bãan la zems-n-taar ning sẽn na n zĩnd nebã ne taab sʋk dũni paalgã pʋgẽ wã.
13. Rĩungã na n dɩɩ naam n ta hal zĩ bʋgo, la bõe la b na n maan tɩ laafɩ zĩnd wakat fãa?
13 B wilga Salomo kãsengã sẽn na n dɩ naam dũniyã zug tɩ ta zĩig ningã, n yeel woto: “Yẽ na n dɩɩ naam sẽn sɩng ne mog-kãseng a yembr n tɩ ta mogr a to, la sẽn sɩng ne kʋɩl-kãsengã [rat n yeel tɩ Efrat] n tɩ ta dũniyã tɛka. We-zãrg nebã na n sulga yẽ taoore, yẽ bɛɛbã na n yuga b zut tom.” (Yɩɩl 72:8, 9) Vẽenega, a Zezi Kirist na n dɩɩ naam dũniyã gill zugu. (Zak. 9:9, 10) Neb nins sẽn sakd a naamã la b wilgd b mi-beoog ne a sẽn wat ne bark ninsã na n “sulga yẽ taoore,” n sak-a ne yamleoogo. La b na n sãama yel-wẽn-maandb nins sẽn pa rat n tek yam n kos sugrã, baa b sã n taa “yʋʋm koabga.” (Ezai 65:20) Nin-kãensã na n “yuga b zut tom.”
A zoeta d nimbãaneg n get d yelle
14, 15. Bõe yĩng tɩ d tõe n yeel t’a Zezi mii ninsaalbã sẽn namsd to-to wã, la t’a na n fãaga “naong soab sẽn ka tar sõngda?”
14 Ãdem-biisã sẽn yaa yel-wẽn-maandbã namsda wʋsgo, tɩ kɩt tɩ b sɩd rat sõngre. La d tõe n kɩsa sɩd tɩ d na n wa paama sõngre. (Karm-y Yɩɩl Sõamyã 72:12-14.) A Zezi sẽn yaa Salomo kãsengã zoeta d nimbãanega, bala a mii tõnd sẽn yaa koangdbã sẽn namsd tõnd to-to. Sẽn paase, a Zezi mengã namsa tɩrlmã yĩnga, tɩ Wẽnnaam me bas tɩ b nams-a. Sɩd me, daar a yembre, a Zezi sũurã sãama wʋsgo, hal t’a ‘tʋʋlgã ra yit wa zɩɩm n tosd bɛd-bɛd n lʋɩt tẽnga.’ (Luk 22:44) Rẽ poore, b sẽn wa n ka-a ra-lukã zugã, a wa n kelmame n yeel woto: “Mam Wẽnnaam, mam Wẽnnaam, yaa bõe tɩ yãmb bas maam?” (Mat. 27:45, 46) Baa ne b sẽn nams a Zezi wã, la baa ne a Sʋɩtãan sẽn modg n na n kɩt t’a kɩɩs a Zeova wã, a kell n saka Wẽnnaam a Zeova ne a sũur fãa.
15 D tõe n kɩsa sɩd t’a Zezi nee tõnd sẽn namsdã, la t’a “na n fãaga nimbãan-ned sẽn kelemda, la naong soab sẽn ka tar sõngda.” A Zezi sẽn nong tõnd wa a Ba wã sẽn nong-d to-to wã yĩnga, a na n ‘kelga naong rãmbã,’ la a ‘maag neb nins sẽn tar sũ-sãoongã, n tɩp bãmb toodã.’ (Yɩɩl 69:34; 147:3) A Zezi tõe n ‘zoee tõnd nimbãaneg d pãn-komsem pʋgẽ,’ bala yẽ me “paama makr ne bũmb fãa wa tõndo.” (Heb. 4:15) D sẽn bãng t’a Zezi Kirist lebga Rĩm n be saasẽ masã wã, la t’a tʋllame n yols neb nins sẽn namsdã sɩd noom-d lame!
16. Bõe yĩng t’a Salomo ra tõe n zoe a nin-buiidã nimbãanega?
16 A Salomo sẽn da tar yam la yam-vẽenemã yĩnga, sãmbg kae tɩ ‘far soab ne nimbãan-ned nimbãaneg ra tara yẽnda.’ Sẽn paase, a sega zu-loees buud toor-toor a vɩɩmã pʋgẽ. Wala makre, a kẽem a Amnõ wẽneg n yõga a Tamaar sẽn yaa a tãoã, t’a Absalom me sẽn yaa a kẽemã kɩt tɩ b kʋ a Amnõ rẽ yĩnga. (2 Sãm. 13:1, 14, 28, 29) A Absalom wa n yikame me n dat n deeg a Davɩɩd naamã, la a pa tõoge, t’a Zoaab kʋ-a. (2 Sãm. 15:10, 14; 18:9, 14) Kaoosg zugẽ, a Salomo kẽem a Adoniza makame n na n lebg rĩma. A sã n da tõogẽ, yaa vẽeneg t’a ra na n kɩtame tɩ b kʋ a Salomo. (1 Rĩm 1:5) A Salomo sẽn pʋʋs n kõs bũmb ning a Zeova roogã pakr daarã wilgdame t’a ra mii ninsaalbã sẽn namsd to-to wã. Rĩmã pʋʋsa a nin-buiidã yĩnga, n yeel woto: “Israɛll neba fãa bɩ b ned a ye sũur sã n sãam a kongr yĩng . . . bɩ y zĩnd y yir yĩngr n deeg a pʋʋsgã n kõ-a sugri.”—2 Kib. 6:29, 30.
17, 18. Zu-loe-bʋs la neb kẽer sẽn tũud Wẽnnaam maood ne, la bõe n sõngd-ba?
17 Yɛl tõnd sẽn da maan pĩnd tõe n ket n namsd-d lame. Wala makre, a Zeova Kaset soab a ye sẽn zems yʋʋm 30 la zak t’a yʋʋr boond t’a Maari * yeela woto: “Yaa sɩd tɩ yɛl wʋsg kõt-m-la sũ-noogo. La naoor wʋsgo, m sã n tẽeg yɛl kẽer m sẽn maan pĩndã, m sũur sãamdame tɩ yãnd tar-ma. Rẽ kɩtdame tɩ m daag nin-tãm tɩ yaa wa zaamẽ bal la m maan yel-kãensã. Yɛl kẽer f sẽn da maan pĩnd sã n ket n be f yamẽ, kɩtdame tɩ f ningd f meng taal la f tagsdẽ tɩ f ka yõod ye.”
18 A Zeova nin-buiidã sʋka, yel-kãensã buud tõe n namsda neb wʋsgo, la bõe n tõe n sõng-b tɩ b paam daood sẽn na yɩl n tõog toogo? A Maari yeela woto: “M tara zo-rãmb hakɩk la tẽed-n-taas tɩ kõt-m sũ-noogo. Mam modgdame me n tagsd bũmb nins a Zeova sẽn pʋlem tɩ wat ka la bilfã yelle, la m kɩsa sɩd tɩ m sẽn yãbd n kot sõngr rũndã-rũndã wã na n wa lebga sũ-noog nin-tãm.” (Yɩɩl 126:5) D segd n tẽe bũmb nins Wẽnnaam sẽn na n maan ne a Bi-riblã sẽn yaa Rĩm ning a sẽn yãkã maasmã. Biiblã pĩnd n goma Rĩm kãng yell n yeel woto: “Far soab ne nimbãan-ned nimbãaneg tara yẽnda, la yẽ na n fãaga nimbãan dãmbã vɩɩm. Yẽ na n fãaga bãmb ne toolem la pãnga, la bãmb zɩɩm daagr na n yɩɩ bõn-kãseng yẽ nifẽ.” (Yɩɩl 72:13, 14) Ad gom-kãensã sɩd kengda raoodo!
Rɩɩb wʋsg na n zĩnda dũni paalgã pʋgẽ
19, 20. a) Wa Yɩɩl Sõamyã 72 soabã sẽn wilgdã, Rĩungã sã n wa soog tẽngã, zu-loe-bʋg n pa na n le zĩndi? b) Ãnd la d segd n pẽg Kiristã naam sẽn na n wa ne bark ninsã yĩnga, la yãmb tagsg yaa wãn ne bark kãensã?
19 Mams-y n ges-y nin-tɩrsã vɩɩm sẽn na n yɩ to-to dũni paalgã pʋgẽ, Salomo kãsengã naam sasa wã. Wẽnnaam pʋlma woto: “Ki wʋsg na n zĩnda soolem pʋgẽ. A na n miima tãens zutu.” (Yɩɩl 72:16) Kood pa wae n womd tãens zut ye. Rẽnd gom-kãensã wilgdame tɩ tẽngã na n saka kood sõma. Tẽngã kood “na n yɩɩ wa Libã dẽnda.” A Salomo sẽn wa n dɩt naamã sasa, rẽ tɩ Libã yaa tẽng sẽn da sakd kood sõma. Yãmb we n tags n gese: Kom pa na n le zĩnd ye! Nebã na n dɩt n tɩgdame, na n yɩɩ rɩ-sõma me. D fãa na n paamda rɩ-nood buud toor-toore.—Ezai 25:6-8; 35:1, 2.
20 Ãnda la d segd n pẽg bark kãensã fãa yĩngã? D sẽn segd n pẽg a soab pipi yaa Wẽnnaam a Zeova, sẽn yaa yĩngr la tẽng naab la a be wakat fãa wã. Bɩ d fãa naag yɩɩl-gʋlsdã, n zẽk d koees n togs gom-kãensã sẽn baasd a yɩɩllã sẽn be yamleoog wʋsgã. A yeela woto: “Bɩ yẽ [rat n yeel tɩ Rĩm a Zezi Kirist] yʋʋr kaoos wakat fãa. Bɩ yẽ yʋʋr saag zĩigã fãa wĩndgã sẽn pukdã tɛka. Buud fãa na n paama bark yẽ yĩnga, b na n yeelame tɩ yẽ bee barka. Bark Zusoab a Wẽnnaam sẽn yaa Israɛll Wẽnnaam sẽn maand bõn-bãnã. Bãmb yʋʋr ziir bee bark wakat sẽn ka sɛta. Bɩ dũniyã fãa pid ne bãmb ziiri. Amina. Amina!”—Yɩɩl 72:17-19.
[Tẽngr not rãmbã]
^ sull 1 Moorã Biibl pʋgẽ, b wilga pipi vɛrse wã pʋgẽ tɩ yɩɩllã yaa a Salomo rẽnda. La wa yaoolem vɛrse wã sẽn wilgdã, yaa a Davɩɩd n gʋls yɩɩn-kãnga.
^ sull 17 Pa a yʋʋrã meng la woto ye.
Wãn to la y na n leoke?
• Yɩɩl Sõamyã 72 soabã sõngda tõnd tɩ d bãng tɩ bõe n wate?
• Salomo kãsengã yaa ãnda, la a na n dɩɩ naam hal tɩ ta zĩ-bʋgo?
• Bark nins yell Yɩɩl Sõamyã 72 soabã sẽn gomdã sʋka, bʋg n noom yãmba?
[Zãmsgã sogsgã]
[Foto, seb-neng 28]
A Salomo naamã rɩɩb sẽn wa ne bark ninsã wilgda bõe?
[Foto, seb-neng 31]
Segdame tɩ d modg n wa paam n vɩɩmd arzãnã pʋgẽ, Salomo kãsengã naam sasa