Ke Mang yo a ka Hlakodišago Bao ba Llelago Thušo?

“Modimo, nea kxoši melaô ya xaxo; . . . Xobane ó tlo hlakodiša modiitšana xe a lla.”—PS. 72:1, 12.

1. Taba ya Dafida e re ruta’ng ka kgaugelo ya Modimo?

RURI mantšu a ao mohlomongwe a ngwadilwego ke Kgoši Dafida wa Isiraele ya bogolo a a kgothatša! Nywaga e mentši pele ga ge a ka a ngwala, o be a kwele bohloko kudu ka morago ga go dira bohlotlolo le Batseba. Ka nako yeo, Dafida o ile a lopa Modimo ka gore: “Mphomolê bosenyi, ka xobane kxauxêlô y’axo ké e kxolo. . . . Sebe sa-ka xa se tloxe pele xa-ka. . . . O a tseba, ke belexwe kè le wa molato; xomme mmê ó nkamoxetše kè le wa dibe.” (Ps. 51:1-5) Jehofa ka kgaugelo ga a lebale gore re abetše sebe.

2. Psalme 72 e ka re thuša bjang?

² Jehofa o kwešiša boemo bja rena bjo bo kwešago bohloko. Lega go le bjalo, ka ge go boletšwe e sa le pele, Kgoši e kgethilwego ke Modimo e “tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa.” (Ps. 72:12, 13) Ba tla hlakodišwa bjang? Psalme 72 e re nea karabo. Koša ye yeo e bego e opelwa mabapi le bogoši bja morwa wa Dafida e lego Solomone, e be e bontšha kamoo pušo ya Morwa wa Modimo, Jesu Kriste, e tlago go lokolla batho manyaming.

 Ponelopele ya Pušo ya Kriste

3. Solomone o ile a kgopela’ng, gomme Modimo o ile a mo nea eng?

³ Ka morago ga gore mokgalabje Dafida a laele gore Solomone a dirwe kgoši, o ile a nea ditaelo tšeo Solomone a ilego a di latela ka potego. (1 Dikx. 1:32-35; 2:1-3) Ka morago Jehofa o ile a tšwelela torong ya Solomone gomme a re: “Kxopêla se nkaxo Xo nea.” Solomone o ile a kgopela selo se tee: “Nea mohlanka wa xaxo pelo e kwaxo, xore a kxônê xo buša sethšaba sa xaxo, a hlaoloxanyê botse le bobe.” Ka baka la kgopelo ya Solomone yeo e bontšhago boikokobetšo, Modimo o ile a mo nea seo a se kgopetšego le dilo tše dingwe tše dintši.—1 Dikx. 3:5, 9-13.

4. Mmuši yo mongwe o ile a hlalosa bjang pušo ya Solomone?

⁴ Ka baka la ditšhegofatšo tša Jehofa, pušo ya Solomone e bile le khutšo le katlego e kgolo tšeo di sa kago tša ba gona pušong le ge e le efe ya motho. (1 Dikx. 4:25) Kgošigadi ya Seba ke yo mongwe wa bao ba ilego ba tla go bona kamoo pušo ya Solomone e bego e le ka gona a tla a e-na le bahlanka ba gagwe ba bantši. O boditše Solomone gore: “Tše ke di kwilexo kè le kwa naxeng ya xešo . . . ké therešô . . . tše ba mpoditšexo tšôna ké seripa fêla. Bohlale bya xaxo le botse bya xaxo di fetiša tumô ye ke e kwilexo.” (1 Dikx. 10:1, 6, 7) Lega go le bjalo, Jesu ke yena a bontšhitšego bohlale bjo bogolo, e bile o be a ka kgona go bolela ka yena ka noši a re: “Bonang! se se fetago Solomone se mo.”—Mat. 12:42.

Kimollo e Tlišwago ke Solomone yo Mogolo

5. Ke’ng seo Psalme 72 e se utollago, gona e re bontšha’ng?

⁵ Anke ga bjale re hlahlobeng kamoo dikagare tša Psalme ya 72 di ka re rutago ka ditšhegofatšo tšeo re tla di hwetšago ka tlase ga pušo ya Jesu Kriste, Solomone yo Mogolo. (Bala Psalme 72:1-4.) Psalme ye e utolla kamoo Jehofa a ikwago ka gona ka “pušô” ya Morwa wa gagwe, “Kxoši ya kaxišô,” Jesu Kriste. (Jes. 9:5, 6) A hlahlwa ke Modimo, Solomone yo Mogolo o tla ‘ahlolela setšhaba sa gagwe gomme a thuše bana ba bahumanegi.’ Pušo ya gagwe e tla ba ya khutšo le toka. Ge Jesu a be a le lefaseng, o ile a bontšha seo Pušo ya gagwe e tlago ya Nywaga e Sekete e tla se fihlelelago.—Kut. 20:4.

6. Ke bjang Jesu a ilego a latswiša batho ditšhegofatšo tšeo di tla bago gona ka tlase ga pušo ya Mmušo?

⁶ Ela hloko e mengwe ya mediro ya Jesu Kriste yeo e re latswišago seo a tlago go se direla moloko wa batho e le go phethagatša Psalme 72. Re na le mabaka a kwagalago a go kgahlišwa ke ge a bontšha kwelobohloko e tseneletšego go bao ba bego ba tlaišega. (Mat. 9:35, 36; 15:29-31) Ka mohlala, monna yo a bego a swerwe ke lephera o ile a batamela Jesu gomme a mo lopa ka gore: “Ge feela o rata, o ka ntlhwekiša.” Jesu a araba ka gore: “Ke a rata. Hlweka.” Ke moka monna yo o ile a fola. (Mar. 1:40-42) Ka morago, Jesu o ile a kopana le mohlologadi yo a bego a hwetšwe ke morwa wa gagwe o tee. Ka ‘lešoko,’ Jesu o itše, “Tsoga!” gomme morwa wa mosadi yoo a tsoga. O ile a boela a phela!—Luka 7:11-15.

7, 8. Matla a Jesu a go fodiša a ile a bontšhwa bjang?

⁷ Jehofa o neile Jesu matla a go dira mehlolo. Se se bonagetše tabeng ya “mosadi yo a bego a swerwe ke bolwetši bja ngope ka nywaga e lesome-pedi.” Le ge a be “a tlaišitšwe kudu  ke dingaka tše dintši, a feditše dilo tša gagwe ka moka,” bolwetši bja gagwe bo ile bja gakala. Mosadi yoo o ile a tsena lešabeng gomme a kgwatha Jesu—go dira bjalo e be e le go tshela Molao ge go dirwa ke motho yo a ‘bofologilego letheka.’ (Lef. 15:19, 25) Jesu o ile a kwa gore go na matla a tšwilego go yena gomme a botšiša gore ke mang yo a mo kgwathilego. “A tšhogile e bile a thothomela,” mosadi yoo o ile “a wela fase pele ga gagwe, a mmotša therešo ka moka.” Ka ge Jesu a be a lemogile gore Jehofa o fodišitše mosadi yo, o ile a mo swara ka botho gomme a re: “Morwedi wa-ka, tumelo ya gago e go fodišitše. Sepela ka khutšo, gomme o fole bolwetšing bja gago bjo bohloko.”—Mar. 5:25-27, 30, 33, 34.

⁸ Jesu o ile a fodiša batho ka matla ao a neilwego ke Modimo gomme babogedi le bona ba swanetše go ba ba ile ba kgongwa kudu ke seo. Ka mohlala, ga go pelaelo gore ba bantši ba be ba makaditšwe ke go bona Jesu a fodiša batho pele a nea Thuto ya gagwe e tumilego ya Thabeng. (Luka 6:17-19) Ge Johane Mokolobetši a roma batseta ba babedi go yo nyaka bohlatse bja gore Jesu ke Mesia, ba ile ba Mo hwetša a “fodiša ba bantši malwetši le mahloko le meoya e mebe gomme a gaugela batho ba bantši ba foufetšego ka go dira gore ba bone.” Ke moka Jesu o ile a botša batseta bao gore: “Begelang Johane seo le se bonego le seo le se kwelego: difofu di a bona, dihlotša di a sepela, balephera ba a hlwekišwa, difoa di a kwa, bahu ba a tsošwa gomme badiidi ba botšwa ditaba tše dibotse.” (Luka 7:19-22) Ruri molaetša woo o swanetše go ba o ile wa kgothatša Johane!

9. Mehlolo ya Jesu e be e swantšhetša’ng?

⁹ Ke therešo gore go imolla batho tlaišegong mo go dirilwego ke Jesu nakong ya bodiredi bja gagwe bja lefaseng e be e le ga nakwana feela. Batho bao a ilego a ba fodiša goba go ba tsoša bahung ka morago ba ile ba hwa. Lega go le bjalo, mehlolo yeo Jesu a ilego a e dira ge a be a le lefaseng e be e swantšhetša go imollwa ga batho sa ruri ka tlase ga pušo ya Mesia.

Lefase la Paradeise le Kgaufsi!

10, 11. (a) Ditšhegofatšo tša Mmušo e tla ba tša nako e kae, gomme pušo ya Jesu e tla ba ya mohuta mang? (b) Ke mang yo a tla bago le Kriste paradeiseng, gona ke’ng seo a swanetšego go se dira gore a phele ka mo go sa felego?

¹⁰ Akanya kamoo bophelo bo tla bago ka gona lefaseng la Paradeise. (Bala Psalme 72:5-9.) Ge feela letšatši le kgwedi di sa le gona, barapedi ba Modimo o tee feela wa therešo ba tla thabela bophelo lefaseng la Paradeise—ee, ka mo go sa felego! Kgoši Jesu Kriste o tla lapološa “a etšê thseola xe e tlôrômêla pilo; a etšê mookodi wa pula xe o nošetša naxa.”

¹¹ Ge o dutše o naganišiša ka go phethagala ga psalme ye, na pelo ya gago ga e kgongwe ke kholofelo ya go phela ka mo go sa felego lefaseng la paradeise? Ruri modiradibe yo a bego a kokotetšwe koteng o ile a thaba ge Jesu a be a mmotša gore: “O tla ba le nna Paradiseng.” (Luka 23:43) Pušong ya Jesu ya Nywaga e Sekete, monna yoo o tla bušetšwa bophelong. Ge e ba a tla ikokobeletša pušo ya Kriste, o tla kgona go phela ka mo go sa felego lefaseng a phethagetše e bile a thabile.

12. Nakong ya Pušo ya Kriste ya Nywaga e Sekete, ke sebaka sefe seo se tla bulegelago ba ba sa lokago bao ba tlago go tsošwa?

¹² Pušong ya Solomone yo Mogolo, Jesu Kriste, ‘moloki o tla taga,’ e lego seo se bolelago gore o tla atlega goba go šegofatšwa. (Ps. 72:7) Lerato la Kriste le tlhokomelo e lerato di tla ata, go etša ge a be a le lefaseng. Lefaseng le lefsa leo Modimo a le holofeditšego, gaešita le ba “ba sa lokago” bao ba tla tsošwago ba tla newa sebaka se sebotse sa go latela ditekanyetšo tša Jehofa gomme ba phele. (Dit. 24:15) Ke therešo gore bao ba tla ganago go phela ka go dumelelana le dinyakwa tša Modimo ba ka se dumelelwe go tšwela pele ba phela gomme ba senye khutšo le boiketlo bja lefase le lefsa.

13. Pušo ya Mmušo e tla ba e kgolo gakaaka’ng, gomme ke ka baka la’ng khutšo ya yona e ka se fele?

¹³ Tsela yeo ka yona pušo ya Solomone yo Mogolo e tlago go aparela lefase e bontšhwa ke mantšu a: “Mmušô wa xaxwe o tlo xóma ka lewatlê  thokô tšohle, xo tloxa nokeng [ya Eforate] xo fihla mafêlêlong a lefase. Ba ba axilexo mašokeng ba tlo mo lothša, manaba a xaxwe a koma lerole.” (Ps. 72:8, 9) Ee, Jesu Kriste o tla buša lefase ka bophara. (Sak. 9:9, 10) Bao ba kgahlwago ke pušo ya gagwe le ditšhegofatšo tša yona ba tla mo “lothša” ka boikokobetšo. Ka lehlakoreng le lengwe, badiradibe bao ba sa itsholego ba tla fedišwa, mo gongwe ba šetše ba e-na le “nywaxa e lekxolo.” (Jes. 65:20) Ruri ba tla “koma lerole.”

O re Kwela Bohloko

14, 15. Re tseba bjang gore Jesu o kwešiša kamoo batho ba ikwago ka gona le gore “ó tlo hlakodiša modiitšana xe a lla”?

¹⁴ Batho ba badiradibe ba boemong bjo bo šokišago gomme ba tloga ba nyaka thušo. Eupša re na le kholofelo. (Bala Psalme 72:12-14.) Jesu e lego Solomone yo Mogolo, o re kwela bohloko ka gobane o kwešiša boemo bja rena bja go se phethagale. Go oketša moo, Jesu o ile a tlaišetšwa toko, gomme Modimo o ile a dumelela gore a tlaišege. Ee, Jesu o ile a gateletšega kudu maikwelong moo “kudumela ya gagwe [e ilego] ya ba bjalo ka marothi a madi a rothela fase”! (Luka 22:44) Ka morago, ge a be a le koteng ya tlhokofatšo, o ile a goeletša ka gore: “Modimo wa-ka, Modimo wa-ka, o ntlogeletše’ng?” (Mat. 27:45, 46) Go sa šetšwe dilo ka moka tšeo Jesu a ilego a lebeletšana le tšona, go akaretša le gore Sathane o ile a dira maiteko ka moka go dira gore a hlanogele Jehofa, o ile a dula a botegela Jehofa Modimo.

¹⁵ Re ka kgodišega gore Jesu o bona mahloko ao re a kwago gomme “ó tlo hlakodiša modiitšana xe a lla, le mohlaki xe a hlôka monamodi.” Ka ge Jesu a tshwenyega ka rena go etša Tatagwe, o tla ‘kwa badiidi’ gomme a “fodiša ba dipelo tše’ robexilexo, [le go] tlêmêlêla ’nthô tša bôná.” (Ps. 69:33; 147:3) Jesu a ka re “kwela bohloko bofokoding bja rena,” ka ge a “[lekilwe] ka ditsela tšohle go swana le rena.” (Baheb. 4:15) Ke mo go thabišago gakaakang go tseba gore ga bjale Kgoši Jesu Kriste o buša legodimong le gore o fagahletše go imolla batho bao ba tlaišegago!

16. Ke ka baka la’ng Solomone a ile a kgona go kwela balata ba gagwe bohloko?

¹⁶ Ka ge Solomone a be a le bohlale e bile a e-na le temogo, ga go pelaelo gore o be a “xauxêla mosenyi.” Go oketša moo, bophelo bja gagwe bo be bo tletše ka manyami le ditiragalo tšeo di kwešago bohloko. Morwarragwe Aminone o ile a kata kgaetšedi ya’gwe Thamara, gomme morwarrago Solomone e lego Abesalomo o ile a bolaya Aminone ka baka la bosenyi bjoo. (2 Sam. 13:1, 14, 28, 29) Abesalomo o ile a leka go amoga Dafida bogoši, eupša maano a gagwe a ile a folotša gomme o ile a bolawa ke Joaba. (2 Sam. 15:10, 14; 18:9, 14) Ka morago, morwarrago Solomone e lego Adonija o ile a leka go itira kgoši. Ge nkabe a atlegile, o be a tla bolaya Solomone. (1 Dikx. 1:5) Go bonagala Solomone a be a kwešiša gabotse kamoo batho ba ikwago ka gona go seo a se boletšego thapelong ya gagwe ge go be go kgakolwa tempele ya Jehofa. Kgoši e ile ya rapela mabapi le balata ba yona ya re: “Bà lemoxa kôtlô ya dipelo tša bôná . . . [Jehofa] o ba lebalêlê; bohle O ba neé tše di lebanexo.”—2 Kor. 6:29, 30.

17, 18. Ba bangwe ba bahlanka ba Modimo ba ile ba kgotlelela bohloko bofe, gomme ba thušitšwe ke’ng go kgotlelela?

¹⁷ ‘Bohloko bja dipelo tša rena’ bo ka bakwa ke seo se re diragaletšego nakong e fetilego  maphelong a rena. Mary, * e lego Hlatse ya Jehofa yeo e lego nywageng ya magareng ga ya bo-30, o ngwadile gore: “Ke na le mabaka a mantši a go thaba, eupša gantši dilo tšeo ke di dirilego nakong e fetilego di nteša dihlong le go nkweša bohloko. Se se dira gore ke nyame kudu, gomme gantši ke feleletša ke lla, bjalo ka ge eka dilo tše ka moka di sa tšwa go direga. Dilo tšeo di nweletšego ka monaganong wa-ka di dira gore ke ikwe ke imelwa ke maikwelo a gore ga ke na mohola.”

¹⁸ Bahlanka ba bantši ba Modimo ba ka ikwa ka tsela e swanago, eupša ba ka thušwa ke’ng gore ba hwetše matla a nyakegago gore ba kgotlelele? Mary o itše: “Ga bjale ke thabišwa ke go ba le bagwera ba paale le lapa la moya. E bile ke leka go naganišiša ka seo Jehofa a se holofeditšego bakeng sa nako e tlago gomme ke kgodišegile gore dillo tša-ka tša go llela thušo di tla fetoga megokgo ya lethabo.” (Ps. 126:5) Re swanetše go bota tokišetšo yeo Modimo a re neilego yona ya Morwa wa gagwe, Mmuši yo a kgethilwego ke yena. Go boletšwe ka yena e sa le pele gore: “Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.” (Ps. 72:13, 14) Ruri seo se a kgothatša!

Re Lebile Lefaseng le Lefsa Leo le re Huparetšego mo Gontši

19, 20. (a) Bjalo ka ge go bontšhitšwe go Psalme 72, pušo ya Mmušo e tla rarolla mathata afe? (b) Ke mang yo ge e le gabotse re swanetšego go mo tumiša ka baka la pušo ya Kriste, gomme o ikwa bjang ka seo e tlago go se phethagatša?

¹⁹ Leka gape go akanya ka bokamoso bja batho ba lokilego lefaseng le lefsa la Modimo ka tlase ga pušo ya Solomone yo Mogolo. Re holofetšwa gore: “Xo tlo ba le mohora wa mabêlê’ mo naxeng; ’phoxong tša thaba meré ya dienywa e tlo xwaša.” (Ps. 72:16) Ka ge mabele gantši a sa mele godimo ga dithaba, mantšu a a gatelela kamoo lefase le tlago go tšweletša ka gona. Ditšweletšwa tša lona di tla ba “bo-ka Libanoni,” e lego tikologo yeo e bego e tšweletša ka boati mehleng ya pušo ya Solomone. Nagana feela! Go ka se sa ba le tlhaelelo ya dijo, phepo-mpe e bile go ka se be le yo a llago ka tlala! Ka nako yeo bohle ba tla thabela “monyanya wa makhura.”—Jes. 25:6-8; 35:1, 2.

²⁰ Ke mang yo a tla tumišwago ka baka la ditšhegofatšo tše ka moka? Ke Kgoši ya ka mo go sa Felego le Mmuši wa Legohle, Jehofa Modimo. Ge e le gabotse, ka moka ga rena re tla goeletša ka lethabo phethagalong ya karolo ya mafelelo ya kopelo ye e botse le e kgomago pelo e rego: “Leina la xaxwe [la Kgoši Jesu Kriste] e tlo ba la neng le neng; le tlo tšwêlêla la y’o fihla mo letšatši le fihlaxo xôna. Batho ba tlo ithšexofatša ka yêna, dithšaba ka moka tša reta lešexo la xaxwe. A xo rêtwê Morêna Modim’a Isiraele, Mo-dira-mehlôlô a nnoši. Xo rêtwê leina la xaxwe la borêna bya neng le neng, dinaxa ka moka di tlalê letaxô la xaxwe. Amene, Amene.”—Ps. 72:17-19.

[Mongwalo wa tlase]

O be o tla Araba Bjang?

• Psalme 72 e re nea ponelo-pele efe ka tsela ya boporofeta?

• Solomone yo Mogolo ke mang, gomme pušo ya gagwe e tla ba e kgolo gakaaka’ng?

• Ke’ng seo wena o kwago se go kgahla mabapi le ditšhegofatšo tšeo go boletšwego ka tšona e sa le pele go Psalme 72?

[Dipotšišo tša Thuto]

[Seswantšho go letlakala 29]

Ke’ng seo se bego se swantšhetšwa ke katlego yeo e bego e le gona pušong ya Solomone?

[Seswantšho go letlakala 32]

Re swanetše go iteka ka matla gore re hwetše bophelo lefaseng la Paradeise ka tlase ga pušo ya Solomone yo Mogolo