Ngtechang a Sebechel el Olsobel er Tirke el Olengit a Ngeso?

“Mosisecheklii a king el oukerrekeriil el oba llemeltem e Dios . . . Ng olsobel er a re mechebuul el tirkel omekedong er ngii.”​—PSALM 72:1, 12.

1. Ngoeak a tekoi el dilubech el mo er a David, e ngera kede suubii el kirel a klechubechub er a Dios?

 NGULTEREKOKL el kmal mengelaod a rengud aika el tekingel a King el David er a Israel! Betok el rak er a uchei er a loluches aika el tekoi, e ngchilarm er a meringel el uldesuel el kirel a klengit el lerirellii el mlo er a laokreng el obengkel a Bathseba. Ngar er seikid el taem e a David a mera el ullengit a klausubes er a Dios el kmo: A “bltkil a rengum a uchul; msuld a kngtik. . . . Ak medengei a telemellek; mak di blechoel melebedebek a kngtik. . . . Ngak tia er a kmekngit er ser a kmechell; ak dirk mlar a diil e mekngit el mer chelechang.” (Psalm 51:1-5) Me ngoeak a klechubechub er a Jehovah, e ngousubes a kngtid.

2. Ngmekerang a bades er a Psalm 72 el bliongel e ngosukid?

² A Jehovah a medengei a ringel el dechelebangel. El ua meldung er a uchei, a ngellitel el King er a Dios a mo “olsobel er a re mechebuul el tirkel omekedong er ngii, me tirkel metacherbesrir ma re cheloit el chad. Ng chubteterir a re mechitechut ma re mechebuul; ng olsobel a klengar er tirkel metacherbesrir.” (Psalm 72:12, 13) Ngmekerang e mo sebechel el meketmokl a osobel? A Psalm er a 72 el bliongel a ochotii a rolel. Aika el bades a mesaod er a omengederederel a ngelekel a David el king el Salomon, el olecholt er sel rolel a bo longedereder a Ngelekel a Dios el Jesus Kristus, el mo olsobel er a remechebuul.

A Olechotel a Omengederederel a Kristus

3. Ngera ngullengit er ngii a Salomon, me a Dios ngera ngmilsang?

³ Me a uriul er a lemechedaol el mo king a Salomon, e a chudelang el David a ullecholt a meklou a ultutelel el tekoi er ngii me ngmlo blak a rengul el oltaut ngii el tekoi. (1 King 1:32-​35; 2:1-3) Me a uriul e a Jehovah a mlo duum er a berrusel a Salomon e dilu el kmo: “Ng ngera soam a bo kbeskau?” Me a Salomon a ulenger el kmo: “Beskak a llomeserreng el kuusbech er ngii el mengedereder er a re chedam el oba llemalt, e bo kudengelii a klekakerous er a ungil ma mekngit.” Me ngoeak a ungil el ongtil, e a Dios a milsang aike el lullengit me a lmuut el betok.​—1 King 3:5, 9-13.

4. Ngmilekerang er a losaod er a omengederederel a Salomon a ta er a merreder er sel taem?

⁴ Me ngokiu a klengeltengat er a Jehovah, e a omengederederel a Salomon a mle kot el merael a  chisel el kirel a budech me a klungiaol el diak a ta el kabelment er a beluulechad el mo uai ngii. (1 King 4:25) A ta er tirke el mle oldingel er a Salomon a kuin er a Siba el ulebetiterir a rebetok el chedal. Ngdilu er a Salomon el kmo: “Ak rirenges er a beluak el kirem ma llemesel a rengum a merang! . . . Ak rirengesii a diak bo le tedobech er ngii; a llemesel a rengum ma kerruul er kau a kuk meklou er a ikel le silbedak er ngii.” (1 King 10:1, 6, 7) Me nguaisei, engdi a lmuut el ngarbab el llomeserreng a lulechotii a Jesus, el ngii a sebechel el melekoi el kirel el kmo: “Mesang, a kuk ngaruchei ra Salomo a ngar tiang.”​—Matteus 12:42.

A Ulengull el Ngar Eungel a Omengederederel a Klou el Salomon

5. Ngera el tekoi a lomeketakl er ngii a Psalm 72 el bliongel, e ngerang a olechotel el losaod er ngii?

⁵ Me chelechang e me bo dosaod er a Psalm 72 el bliongel me bo lsebeched el mesuub el kirel a klengeltengat el mo er ngii el ngar eungel a omengederederel a Jesus Kristus, el ngii a Klou el Salomon. (Monguiu er a Psalm 72:1-4.) Tia el babier er a Psalm a olecholt er a rengul a Jehovah el kirel a “klisichel el king” er a Ngelekel, e dirrek el “King er a Budech,” el Jesus Kristus. (Isaia 9:6, 7) Ngokiu a ulekrael er a Dios e ngika el Klou el Salomon a mo ‘melemalt el oukerrekeriil er a re mechebuul; e mo ngosuterir a re metacherbesrir.’ Me a omengederederel a mo mui er a budech me a llemalt. Sera lengar tia el chutem a Jesus, e ngullecholt aike el bo longetmokl er a chelsel sel Ta el Telael el Rak el longedereder.​—Chocholt 20:4.

6. A Jesus ngullecholt a ngera el klengeltengat el mo er ngii er eungel a omengederederel a Renged?

⁶ Me bo dosaod a bebil er a tekoi el lurruul a Jesus el olechotel aike el bo loruul el kirel a klechad el lolekoi a Psalm 72 el bliongel. Me ngngar er ngii a ungil el uchul e kede semeriar er sel klou el klechubechub er ngii el kirir tirke el chormang. (Matteus 9:35, 36; 15:29-​31) El ua tiang, a chad el mle smecher el kemkom a mlo er a Jesus e dilu el kmo: “A lungilbesul ra rengum, e ngsebechem el kikidak.” Me a Jesus a dilu el kmo: “Ngsoak; me bo mklikiid.” Me ngmlo klikiid! (Markus 1:40-​42) Uriul e ngmlo metik er a melakl el dil el mla mad a di ta el ngelekel el sechal. Me a Jesus “ra lesenge ngiil dil e ngmlo chubur” me ngdilu el kmo: “Bekiis, kaul buik!” Me ngmilekiis ngii el ngalek, el liluut el mo ngar!​—Lukas 7:11-​15.

7, 8. Ngera bebil er a tekoi el Jesus a uluusbech er a klisiich el meruul?

⁷ A Jehovah a milsang a klisichel a Jesus el mo meruul a mengasireng el tekoi. Tiang a mlocholt el okiu a tekoi el dilubech el mo er a “tal redil el mocha truich ma cherul rak el lorael a rsechel.” Me alta e “ngkmal mlo chuarm rar betok el toktang, me ngulekngemed a ikel bek el mlarngii er ngii, e dimlak a blkul ngbai mlo mekngit.” Ngii el redil a mlo tmoech er a seked el rutechii a Jesus, e tia el omeruul a omtok er a Llach el kirel “a redil [el] merael a rasech er ngii.” (Levitikus 15:19, 25) A Jesus a mlo melechesuar a klisiich el tilobed er ngii me nguleker el kmo ngtechang a rirtechii. Me ngika el redil a “mlei el medakd me ngulemritel e mlo terrob er medal e ullecholt a ikel le mlarngii el tekoi el rokui.” A Jesus a mlo medengei el kmo a Jehovah a ulemekungil er ngika el redil me ngmle ungil a tekingel el mo er ngii el kmo: “Rungalek, a kloumera er kau a ulemekungil er kau; morael el ngara budech, me bo mungil era rekdem.”​—Markus 5:25-​27, 30, 33, 34.

⁸ A klisiich el Dios a milsang a Jesus el mo omekungil er a resmecher a dirrek el mle klou a lerellii er a rengrir a rechad el ulemes er ngii. El ua tiang, a rebetok a mlo mechas a rengrir er a lomes er ngii el omekungil er a rechad, er a uchei er sel Osisecheklel el ngar a Rois. (Lukas 6:17-19) Sel  taem er a loldurech er a reteru el chad a Johanes el Techolb el mo merriter er a Jesus el kmo ngmera el Messias, e te mlo metik er Ngii el ‘omekungil rar betok el chad el chuarm ra rakd ma ringel mar mekngit el reng, e meruul rar betok el meiko el mo omes.’ Me a Jesus a dilu er tirka el terung el kmo: “Morael el mo subedii a Johanes ra ikal morrenges e omes el tekoi el kmo: ‘Ar meiko chomesengei, mar chitechut chocherir a merolang, mar kemkom a mekikidang, mar mechad chorrengesang, mar ulekoad a mokisang, mar mechebuul a choberka el mor tir a evangkelio.’ ” (Lukas 7:19-​22) Ngulterekokl tia el klumech el kmal millisiich er a Johanes!

9. Ngolechotel a ngerang aike el mengasireng el tekoi el lurruul a Jesus?

⁹ Ngklemerang, a mengasireng el tekoi el leriruul a Jesus er sera lengar tia el chutem a di mle tedeb. Tirke el lulemekungil er tir e ullekiis er tir er a kodall a mlad er a uriul. Me nguaisei, engdi aike el mengasireng el tekoi el lurruul a Jesus a di mle olechotel a diak a ulebengelel el ulengull el klechad a mo melechesuar er a eungel a omengederederel a Messias.

A Paradis el Beluulechad el Kmedu el Mei!

10, 11. (a) Ngmo ua ngerang a klemengetel aike el klengeltengat el mo er ngii er a Renged, e mo ua ngerang a omengederederel a Jesus? (b) E techang a mo obengkel a Kristus el ngar a Paradis el chutem, e ngmekerang e mo sebechel el kiei el diak a ulebengelel?

¹⁰ Ka mkora melebedebek er a klengar el kmo ngmo ua ngerang er a chelsel a Paradis el chutem. (Monguiu er a Psalm 72:​5-9.) Tirke el mengull er a mera el Dios a mo kiei el dmeu a rengrir er a chelsel a Paradis el beluulechad, el ngii a melemolem el dimerekmo bo lak a sils me a buil, el mo cherechar! Me a King el Jesus Kristus a mo oterekeklii el kmo ngii a mengelaod, el ua “chull er bebul a sers, el ua chull el ruebet er bebul a chutem.”

¹¹ Ngulterekokl el kmal mo dmeu a rengum sel molatk el kmo ke mo kiei er a beluulechad el paradis el oltirakl er a otutel a ulaoch el ngar er a Psalm. Ngulterekokl ngike mekngit el chad el mle deleoll er a kerrekar er a bita er a Jesus el kmal mlo dmeu a rengul er a ledu er ngii a Jesus el kmo: “Ke mo obengkek el ngara Baradis.” (Lukas 23:43) Ngar a chelsel sel Ta el Telael el Rak el Omengederederel a Jesus, e ngike el chad a mo mekiis er a kodall. A lsekum e ngkongei el mo chederedall er a eungel a omengederederel a Kristus, e ngsebechel el kiei er tia el chutem el cherrungel e dmeu a rengul el diak a ulebengelel.

12. Ngar a chelsel a Ta el Telael el Rak el Omengederederel a Kristus, e ngera el techall a mo er tirke el diak el melemalt el mo mekiis er a kodall?

¹² Ngar eungel a omengederederel a Klou el Salomon el Jesus Kristus, e “ar melemalt” a mo ungilbesrir. (Psalm 72:7) A bltkil a rengul a Kristus me a ulekerreuil a mo obeketakl el ua omerellel er sera lengar er tia el chutem. Ngar a chelsel a telbiil el beches el beluulechad er a Dios, e tirke el “diak le melemalt” a mo mekiis er a kodall e mo er ngii a techellir el mo oltirakl a llechul a Jehovah e melemolem el kiei. (Rellir 24:15) Me nguaisei, engdi tirke el oltngakl er a Dios me a llechul a diak el sebechir el melemolem el kiei el mo uchul e lolemall er a budech me a cherrungel el klengar er a beches el beluulechad.

13. Ngmo ua ngerang a klungel a omengederederel a Renged, e ngera uchul me a budech er a chelsel a sebechel el melemolem?

¹³ A omengederederel a Klou el Salomon a mo mekelekelii a beluulechad el oltirakl aika el tekoi el kmo: “A rengedel le bor ngii er a bital daob el mor a bitang, el ngar Omoachel Eufrates el mor a ikel ulebengelel a beluulchad. A re chad el kiei er a medideriik el beluu a di mo osus er medal; ma re cherrouel a di mo blengkangk er a chebechab.” (Psalm 72:8, 9) Me a Jesus Kristus a mo mengederederer er a beluulechad el rokir. (Sekaria 9:9, 10) Tirke el kongei er a omengederederel a Kristus me aike el klengeltengat el mo er ngii a “mo osus er medal,” e kongei el mo chederedall er ngii. E tirke el diak lobult er a kngterir a mo nguemed el mo lmuut er a lengai a “100 el rak.” (Isaia 65:20) Te “di mo blengkangk er a chebechab.”

A Jesus a Chubechub el Kired

14, 15. Kede mekerang e medengei el kmo a Jesus a medengei a ringeled er a klechad, e dirrek el “olsobel er a re mechebuul el tirkel omekedong er ngii”?

¹⁴ A diak el cherrungel el klechad a ngar a chelebuul er a chelechang, e mera el ousbech a ngeso. Engdi ngngar er ngii a omelatk el kired.  (Monguiu er a Psalm 72:12-​14.) A Jesus el ngii a Klou el Salomon a kmal chubechub el kired e le ngmedengei el kmo ngdiak demecherrungel. Ngii el Jesus a kilengei el mo chuarm el kirel a llemalt, e dirrek a Dios a milecherei me ngmo chelebangel a ringel el di mle ngii. Me nguaisei, a Jesus a kmal mlo chuarm a rengul “ma klsbengel a mlo ua kloul ngimech el rasech el olechars ra chutem.” (Lukas 22:44) A uriul er a lemedeel er a teluo el kerrekar, e nguleldiu el klou a ngerel el kmo: “Dios er ngak, Dios er ngak, ngera me ke chilitak?” (Matteus 27:45, 46) Ngar er a chelsel a rokui el ringel el blo lecharm er ngii me a dirrek el omerellel a Satan el mellasem el mengetikaik er ngii el mo cheroid er a Jehovah, e a Jesus a millemolem el ulechotii a blakerreng er ngii el mo er a Jehovah el Dios.

¹⁵ Ngulterekokl a rengud el medengei el kmo a Jesus a medengei a ringeled e “olsobel er a re mechebuul el tirkel omekedong er ngii, me tirkel metacherbesrir ma re cheloit el chad.” Me ngoeak a bltkil a rengul me a ulekerreuil el di ua Demal, e a Jesus a mo “orrenges er a re ngar a chelebuul” e dirrek el “omekungil a chelemuul el reng, e omkar a telemall er a bedengir.” (Psalm 69:33; 147:3) A Jesus a dirrek el sebechel el “chuub a chelitechetud, ele ngua kid el mlor ngii chomengarm el kirel a bek el tekoi.” (Hebru 4:15) Ngkmal mengelaod er kid sel dodengei el kmo a King el Jesus Kristus a mengedereder er a eanged er a chelechang e kmal orreched a rengul el mo olsobel er a klechad er a rokui el ringel!

16. Ngera uchul me a Salomon a mle sebechel el medengei a ringelir a rechedal?

¹⁶ Me a King el Salomon a mle mellomes a rengul e ulemtab a tekoi a uchul, me ngmle sebechel el “chubteterir a re mechitechut ma re mechebuul.” Osisiu el taem e ngdirrek el chilebangel a ringel er a klengar er ngii. A ta er ngii er a Amnon a ulterebekii a ochedal el Tamar, me a Absalom el dirrek el ta er ngii a milekodir a Amnon el kirel a klengit el lerirellii. (2 Samuel 13:1, 14, 28, 29) A Absalom a ulemerober er a kleking er a David engdi ngdimlak el sebechel, e a Joab a bai milekodir. (2 Samuel 15:10, 14; 18:9, 14) A uriul e a Adonia el ta er a Salomon a mellasem el melai er a deruchall el mo king. Oleko e ngngiluu tia el deruchall e ngmle sebechel el mo uchul a kodellel a Salomon. (1 King 1:5) A Salomon a ulterekokl el mle medengei a ringel el lechilarm er ngii a rechad, e le ngsebeched el melechesuar er a nglunguchel er sel taem er a longedaol er a templo er a Jehovah. Ngii el king a milluluuch el kirir a rechedal el kmo: A rechad “a mo medengei a kngterir e mo mekngit a rengrir . . . e [kau el Jehovah,] mrengeseterir e mousubes a kngterir.”​—2 Kronika 6:29, 30.

17, 18. A rebebil el mesiungel a Jehovah te uluutekangel a ngera el ringel er a klengar, e ngera el tekoi a ngilsuterir el mo outekangel?

¹⁷ A ‘ringelel a uldesued’ a sebechel el melemolem el oeak aike el tekoi el dilubech er a klengar er kid er a uchei. A Mary, * el 30 me a derengel a rekil el Sioning er a Jehovah, a meluches el kmo: “Ngbetok a ungil el uchul e ngdmeu a renguk, engdi a lebebil er a taem e a tekoi el dilubech er a klengar er ngak er a uchei a mo uchul a kngtil a renguk me a rrengek. Ngkmal mo mekngit a renguk me ak lmangel el ua ledilubech aika el tekoi er a chelii. A klengiterreng el medechel er a chelsel a rengud a sebechel el rullid el mo omdasu el kmo kede mekngit e diak a belkud el chad.”

¹⁸ A rebetok el mesiungel a Dios a sebechir el omelechesiu a ringel, engdi ngerang a sebechel el ngosuterir el mo mesisiich el dechor e outekangel? A Mary a melekoi el kmo: “A rudam me a rudos er ngak er a ongdibel me a resechelik a uchul a deuil a renguk, ak dirrek el melatk er a telbilel a Jehovah el kirel a ngarmedad el klebesei, e oba ulterekokl el reng el kmo a lengelek er a chelechang a mo uchul a deurreng er a ngak er  a uriul el taem.” (Psalm 126:5) Ngkmal kired el otuil a omeltked er sel techall el Dios a milsang a Ngelekel, el ngii a letiltkii el mo Mengederederer. Ngmedung er a ulaoch el kmo: “Ng chubteterir a re mechitechut ma re mechebuul; ng olsobel a klengar er tirkel metacherbesrir. Ng olsobel er tir er a ulecheracheb ma mekngit el bekeu el omeruul; a klengar er tir a mekreos el bedul ngii.” (Psalm 72:13, 14) Ngkmal mengelaod a rengud tia el ulaoch!

A Beches el Ungil el Beluulechad a Kmedang

19, 20. (a) Ngera el ringel a mo mesmechokl er a eungel a omengederederel a Renged el medung er a Psalm 72 el bliongel? (b) A chetengakl ngmo er a techang el kirel a omengederederel a Kristus, e ua ngerang a uldesuem el kirel aike el tekoi el mo mesmechokl?

¹⁹ Ngsebeched el kora melebedebek er a merael mei el beluulechad el chederedall er a eungel ngike el Klou el Salomon. A telbilel a Dios a kmo: “Bo le betok a redechel a wheat er a beluu; ma ikel bukl di bo le medekedek er a dellomel el kall.” (Psalm 72:16) Me alta e a kall a diak el duubech er a bebul a rois, engdi aika el tekoi a melisiich er a ulaoch el kmo a beluu a mo kekeuii. A ildisel a kall a mo “ua ikel ngar a Lebanon,” el ngii a renged el mle kekeuii er a taem er a omengederederel a Salomon. Ka di molatk er tiang! Ngmo diak a bosech er a kall, e mo diak a resongerenger, me a remedei er a kall! A rokui el chad a mo dmeu a rengrir er a “mur er a kot el ungil kall.”​—Isaia 25:6-8; 35:1, 2.

²⁰ Me a chetengakl ngrredemelel a mo er techang el kirel aika el rokui el klengeltengat? A kot e ngrredemelel a mo er a King er a diak a ulebengelel, e Mengederederer er a eanged me a chutem el Jehovah el Dios. Me kid el rokui a mo oba deurreng el mengitakl er tia el klebokel e ungil el chelitakl er a odanges el kmo: “A ngklel [a King el Jesus Kristus] lak bo le riid; ma chetengel di le ngar ngii el ua sils. A rokui el beluu bo loldanges er a king, ma rokui el chad bo lolengit er a Dios me lomekngeltengat er tir el ua lulemekngeltengat er ngii el king. Modengesii a [Jehovah,] el Dios er a Israel, el di ngii el tang a meruul a ikal mengasireng el tekoi! Modengesii a kebkall el ngklel el mo cherechar, ma klebkellel lokekii a beluulchad el rokir! Amen! Amen!”​—Psalm 72:17-​19.

[Footnote]

Ke Mekerang a Omonger?

• A Psalm 72 el bliongel, ngmeskid a olechotel a ngerang?

• Ngtechang ngike el Klou el Salomon, e ua ngerang a klungel a omengederederel?

• Ngua ngerang a uldesuem el kirel aike el klengeltengat el medung er a Psalm 72 el bliongel?

[Aike el Ker er a Suobel]

[Siasing el ngar er a 29 el llel]

Ngera el tekoi a mileketmokl el okiu a ungil el omengederederel a Salomon?

[Siasing el ngar er a 32 el llel]

A meringel el urered a mo uchul e kede mo nguu a diak a ulebengelel el klengar el ngar a Paradis er a eungel a omengederederel a Klou el Salomon