¿Pitaq librakunanpaq qayakuqta yanapaykunman?
¿Pitaq librakunanpaq qayakuqta yanapaykunman?
“Diosnilláy, reymanyá yachaynikita qoykuy allin arreglokuna rurananpaq [. . .]. Payqa libraykunqam qayakuq wakcha runataqa.” (SAL. 72:1, 12.)
1. ¿Imatam Davidmanta willakuy yachachiwanchik Diospa llakipayakuyninmanta?
¡MAYNA kallpanchaqmi chayna nisqanqa! Kaytaqa yaqachusmi ñawpaq Israelpi rey David qellqarqa, paymi ñawpaqtaraq Betsabeywan huchapakusqanmanta wanakuspan kaynata mañakurqa: ‘Sinchi llakipayakuynikiman hinayá mana kasukusqayta limpiaykullaway [. . .]. Manam atinichu huchallaykuna qonqaytaqa [. . .]. Huchallikuqpaqmi mamallayqa wiksayakuwarqa. Mana allin ruraqpaqmi mamallayqa wachakullawarqa’, nispa (Sal. 51:1-5). Arí, Diosqa llakipayakuqmi hinaspa yachanmi huchayoq kasqanchik sasachawasqanchikta.
2. ¿Imamantam willawanchik Salmo 72 capitulo?
2 Jehová Diosqa entiendenmi pantaq kasqanchikrayku sasachakuyllapiña kasqanchikta, chaymi prometewanchik yanapawananchikpaq. Huk Reytam churarun, paymi ‘libraykunqa qayakuq wakcha runatawan’ ‘mana yanapasqa runata’, ‘llakipayanqam mana imayoq runata’ hinaspa ‘salvaykunqam wakchakunapa vidantapas’ (Sal. 72:12, 13). Qawasqanchikman hinaqa, Salmo 72 capitulo niwanchik sasachakuyninchik imayna allichasqa kananmanta. Kay takiqa, Davidpa churin Salomonpa gobiernonmantam qallariypiqa rimarqa, chaywanpas qawachinmi Diospa Churin Jesucristo hamuq tiempopi imayna gobiernananmanta, chaypim runata libraykunqa ñakarichiqnin mana allinkunamanta.
Cristopa imayna kamachimunanmantam qawachin
3. ¿Imatam Salomon mañakurqa hinaspa imatam Diosqa qoykurqa?
3 David machuyayninpiña, churinta rantinpi gobiernananpaq churaspanpas, kamachikuykunatam qorqa mosoq rey haykapipas kasukunanpaq (1 Rey. 1:32-35; 2:1-3). Chaymantañam Diosqa mosqoyninpi Salomonman rikuriykuspa nirqa: “Mañakuway imam munasqaykita, ñoqam qosqayki”, nispa. Payqa kayllatam mañakurqa: “Qoykuwayá yachayta [. . .] runaykikunata gobiernanaypaq chaynapi imam allin kasqanta chaynataq mana allin kasqantapas tanteanaypaq”, nispa. Humilde kasqanmi Diosta gustarqa, chaymi mañakusqanmantapas astawanraq qoykurqa (1 Rey. 3: 5, 9-13).
4. ¿Imatam chay tiempopi huk reina nirqa Salomonpa gobiernasqanmanta?
4 Jehová Dios bendecisqanraykum, Salomonpa gobiernasqan watakunapi hawkalla hinaspa kusisqalla kawsakurqaku, manam mayqan runapa gobiernonpas chaynaqa karqachu (1 Rey. 4:25). Chaymi Saba nacionpa reinan achka-achka serviqninkunawan kuska qawaq rirqaku, hinaspam Salomonta nirqa: ‘Cheqapmi kasqa [. . .] niwasqankuqa. [. . .] Manamiki partellantapas willawasqakuchu. Yachaynikiwan tukuy imaykiqa uyarisqaymantapas aswanraqmi kasqa’, nispa (1 Rey. 10:1, 6, 7). Ichaqa, Salomonpa yachayninqa manam igualanchu Jesuspa yachayninmanqa, chaymi payqa kikinmanta nirqa: “Salomonmantapas aswan yachayniyoqmi kaypiqa kachkani”, nispa (Mat. 12:42).
Salomonmanta Aswan Atiyniyoq kamachiptin bendicionkuna
5. ¿Imatam qawachin Salmo 72, hinaspa imatam yachachiwanchik Jesuspa kay Pachapi rurasqan?
5 Salomonmanta Aswan Atiyniyoq Jesus gobiernaptin, bendicionkuna kananmanta entiendenapaq qawasunchik Salmo 72 nisqanta (leey Salmo 72:1-4). Chay takim qawachin “Hawkayay Qokuq” Churinpa kamachisqanta Jehová Dios imayna qawasqanta (Isa. 9:6, 7). Dios yanapaptinmi Cristoqa ‘ñakariqkunapaq allin arreglota ruranqa, Wakchakunapa churinkunata [. . .] salvanqa’. Gobiernonpiqa hawkayaypiwan allin ruraymi kanqa. Kay Pachapi kachkaspan imakuna rurasqanmi qawachiwanchik Waranqa Wata Kamachimuspan imakuna rurananmanta (Apo. 20:4).
6. ¿Imaynatam Jesuspa rurasqankuna yanapawanchik Diospa Gobiernon ima bendicionkuna apamunanpi piensanapaq?
6 Qawasunchik Jesuspa imakuna rurasqanmanta, kaykunam qawachin Salmo 72 cumplikuptin runakunapaq ima rurananmanta. Admirachiwanchikmi ñakariqkunata llakipayasqanqa (Mat. 9:35, 36; 15:29-31). Huk kutipim leprawan onqoq ruegakurqa: “Munaspaykiqa allinyaykachillawayá”. Payñataqmi nirqa: ‘Arí, munanim, allinyaykuyá’, nispa. ¡Ima sumaqmi chayqa! Chay runaqa sanoy-sanoyñam karqa (Mar. 1:40-42). Chaymantapas, huk viudapa sapallan qari wawanta pampanankupaq apachkaqta qawaykuspanmi, Cristo llakirikuspan mozota nirqa: “¡Hatariy!”, nispa. Chaynata niptinmi kawsariramurqa (Luc. 7:11-15).
7, 8. Onqoqkunata hampinanpaq atiyniyoq kasqanta qawachinanpaq, ¿imakunatam Jesus rurarqa?
7 Jesusmi milagrokunata rurarqa Jehová Dios atiyta qoptin, chaytam qawachin qatiqnin willakuy. Huk warmim yaqa 12 ‘wataña flujowan ñakarichkarqa’ hinaspa cuentata qokurqa sapa kuti peorchakusqanmanta. Chaynam karqa ‘achka medicokunawan hampichikuspanpas’ hinaspa ‘tukuy imanta’ gastaspanpas. Chaymi runakunapa chawpinta rispan Jesuspa pachanta hapiykurqa, Leyqa kamachirqam flujowan kaqkuna chayta mana ruranankupaq (Lev. 15:19, 25). Atiynin lloqsirusqanmanta Cristo musyaruspanmi, tapurqa pi llapchaykusqanmanta. ‘Manchakuywan katkatatastinmi’ warmiqa ‘qonqorakuykuspan willakurqa ima pasasqanta’. Jesusqa entienderqam Dios sanoyachisqanta, chaymi llakipayaspan nirqa: “Mamáy, iñisqaykiraykum allinyarunki, kunanqa hawkallaña pasakuy, manañam kay onqoywanqa ñakarinkiñachu”, nispa (Mar. 5:25-27, 30, 33, 34).
8 Diospa atiyninwan runakunata Jesuspa sanoyachisqanmi onqoqkunata yanaparqa, chayta qawaqkunapas admirasqam karqaku. Chaynachá pasarqa Orqopi Jesus manaraq yachachichkaspan onqoqkunata sanoyachiptin (Luc. 6:17-19). Chaynataqchá pasakurqa Jesus Mesias kasqanmanta yachamunankupaq 2 willakuqkunata Bautizaq Juan kamachiptinpas. Paykunaqa rikurqakum “tukuy rikchaq onqoyniyoqkunata, ñakariqkunata, demonioyoqkunata hinaspa ñawsakunata” sanoyachisqanta. Hinaptinmi Juanpa kachasqan runakunata Jesus nirqa: “Juanman willamuychik qawasqaykichiktawan uyarisqaykichikta [. . .]: ‘Ñawsakunam qawakuchkanña, suchukunam purichkanña, leprawan onqoqkunam sanoyachkanña, mana uyariqkunam uyarichkanña, wañusqakunam kawsarichkanña, wakchakunapas allin noticiatam uyarichkankuña’ ”, nispa (Luc. 7:18-22). ¡Maynatachá Juanta kallpancharqa chayna uyarisqanqa!
9. ¿Imatam qawachirqaña hamuq tiempomanta Jesuspa milagrokuna rurasqan?
9 Jesuspa kay Pachapi kachkaspan ñakariykuna chinkachisqanqa huk tiempollapaqmi karqa, sanoyachisqan otaq kawsarichisqan runakunaqa tiempo pasaptinmi wañururqaku. Ichaqa, chay milagrokuna rurasqanmi qawachirqa hamuq tiempopi kamachimuptin wiñaypaq bendicionkuna chaskinanchikmanta.
¡Kay Pachaqa paraisoñam kanqa!
10, 11. a) ¿Hayka tiempopaqmi kanqa Diospa Gobiernonpi bendicionkuna, hinaspa imaynataq kawsasun Jesucristo kamachiptin? b) ¿Pitaq Paraisopi Cristowan kanqa, hinaspa imatam ruranan wiñaypaq kawsananpaqqa?
10 Paraisopi kawsakuy imayna kananmanta piensarisun (leey Salmo 72:5-9). Kay Pacham sumaq huerta kanqa, chaypim Dios serviqkunaqa Intiwan Killa mana kanankama otaq wiñaypaq kanqaku. Cristoqa runakunapaqmi kanqa: ikllirimuq ‘pastokunapa [chaynataq allpapa] hawanman paramuchkaq hina’.
11 Chay Salmo libropi promesa cumplikuptin sumaq huertapi wiñay kawsanamanta yuyaymanaspaqa, ¿manachu sonqonchikpi kusikunchik? Chaynachá tarikurqa qerupi warkusqa suwaqa Jesus kaynata niptin: ‘Ñoqawanmi kanki Paraisopi’ (Luc. 23:43). Jesus Waranqa Wata Kamachiptinmi kawsarimunqa hinaspa Cristota kasukuspanqa mana onqospa chaynataq kusisqa wiñaypaq kawsanqa.
12. ‘Mana allinta’ rurastin wañukuspa kawsarimuqkuna, ¿imaynam kananku Jesucristo gobiernamuptin hinalla kawsakunankupaq?
12 Salomonmanta Aswan Atiyniyoq Cristo gobiernaptinmi, allin ruraqkunaqa ‘iklliriq pasto hina’ kanqaku (Sal. 72:7). Kay Pachapi kachkaspan rurasqanman hinam, Cristoqa kuyakuynintawan runakunata sumaq cuidasqanta qawachinqa. Paraisopiqa lliw runakunawan ‘mana allinta’ rurastin wañukuspa kawsarimuqkunapas, Diospa nisqanta kasukuspaqa atinqakum hinalla kawsakuyta (Hech. 24:15). Imayna kawsanamanta Diospa nisqanta mana kasukuqkunaqa chinkachisqam kanqaku. Chaynapim mana imapas harkanqachu Paraisopi hawkayaywan kusikuy kanantaqa.
13. ¿Maykamam Cristopa gobiernasqan kanqa, hinaspa imanasqam hawkayayqa mana tukuq kanqa?
13 Cristoqa allpantinpim gobiernanqa, chaymantam Biblia nin: ‘Lamar qochamantawan [. . .] Eufrates Mayumanta qallaykuspayá payqa gobiernachun kay pachapa cantonkama. Chunniqpi yachaqkunam paypa ñawpaqninpi qonqorakunqaku. Ñutu allpatam mikunqaku enemigonkunaqa’, nispa (Sal. 72:8, 9). Arí, ¡allpantinpim gobiernanqa! (Zac. 9:9, 10.) Chay Gobiernotawan bendicionninkunata chaninchaqkunaqa Cristopa ‘ñawpaqninpim qonqorakunqaku’ otaq kamachisqanta kasukunqaku. Mana wanakuqkunaqa puchukachisqam kanqaku ‘pachak watayoq’ kaspankupas (Isa. 65:20). Mana kasukuqkunaqa ‘ñutu allpatam mikunqaku’ otaq chinkachisqa kanqaku.
Entiendewaqninchik hinaspa cuidawaqninchik Rey
14, 15. ¿Imanasqataq seguro kachwan imayna kasqanchikta Jesus entiendesqanmanta hinaspa ‘qayakuq wakcha runata’ librananmantapas?
14 ¡Mayna llakikunapaqmi pantaq runakunapa imayna tarikusqankuqa! Chaymi yanapanata necesitanku. Ichaqa, suyakuymi kachkan (leey Salmo 72:12-14). Salomonmanta Aswan Atiyniyoq Jesusmi llakipayawanchik. Payqa entiendenmi pantaq kasqanchikta hinaspa yachanmi nanay imayna kasqantapas, ñakarirqam allin rurayta defiendespan. Jehová Diosqa saqerqam tukuyninpi pruebakunata sapallan aguantanantapas. Llumpay sasachakuypi tarikusqanraykum ‘yawar sutuq hinaraq sudorninpas pampaman suturqa’ (Luc. 22:44). Chaymantañam, qerupi clavasqa kachkaspan nirqa: “Diosnilláy, Diosnilláy ¿imanasqataq sapallaytaqa saqerullawanki?”, nispa (Mat. 27:45, 46). Ichaqa, manam nanaypas nitaq Satanaspa mana allinkuna rurasqanpas Jehová Diosmantaqa rakirqachu. Wañukunankamam Diosta kasukurqa.
15 Segurom kanchik ñakarisqanchikta Jesus qawasqanmanta. ‘Payqa libraykunqam qayakuq wakcha runatawan [. . .] mana yanapasqa runataqa.’ Kuyakuq Taytanmi ‘uyarichkan wakcha runakunata’, ‘llakisqa sonqoyoqkunatapas consuelachkanmi, payqa heridankunatapas hampiykunmi’. Chaynatam Cristopas ruranqa (Sal. 69:33; 147:3). Payqa ‘huchaman urmaq kasqanchikmanta llakipayakuqmi’ ‘ñoqanchik hina tukuypi tentasqa [otaq pruebasqa] kasqanrayku’ (Heb. 4:15). ¡Maynatam kusichiwanchik hanaq pachapi kamachisqanmanta hinaspa ñakarichiwaqninchik sasachakuykunata allichay munasqanmanta yachayqa!
16. ¿Imanasqataq Salomonqa llakipayarqa kamachisqan runakunata?
16 Ñawpaq tiempopim, Salomon ‘llakipayarqa mana kallpayoq runakunata’. Chaynaqa karqa desgraciakunata pasasqanraykum, manam yuyayniyoq hinaspa entiendeq kasqanraykullachu. Amnon huknin wawqenmi panin Tamarta abusarurqa, Absalonñataq vengakuspa wañurachirqa (2 Sam. 13:1, 14, 28, 29). Chaymantañam Absalonqa Davidpa gobiernonpa contranpi hatariruspan paypa rantinpi gobiernayta munarqa, ichaqa manam atirqachu hinaspa Joab wañurachirqa (2 Sam. 15:10, 14; 18:9, 14). Wawqen Adoniaspas rey kaytam munarqa. Rey kaspanqa Salomontachá wañurachinman karqa (1 Rey. 1:5). Templota qespirachiptinku Salomonpa imayna orakusqanpim cuentata qokunchik runakunapa ñakarisqanta entiendeq kasqanta. Payqa yacharqam gobiernasqan runakuna ‘sonqonkupi llakikusqankuwan’ ñakarisqankuta, chaymi kaynata orakurqa: “Pampachaykuspayá sapakamaman pagapuy kawsasqankuman hina”, nispa (2 Cro. 6:29, 30).
17, 18. ¿Imakunataq wakin cristianokunata ñakarichin, hinaspa imataq yanapan atipanankupaq?
17 Sapakamam sasachakuyninchikkunawan ñakarinchik. Wakinpiqa ñakarinchik vidanchikpi tukuy ima pasawasqanchikwanmi. 30 watayoq Mary * sutiyoq iñiqmasinchikmi willakun: “Kanmi achka razonkuna kusikunaypaq, ichaqa ñawpaqta pasawasqanwanmi penqakuni hinaspa rabiakunipas, hatun llakikuy hapiruwaptinmi waqanipas. Qayna punchawllapas pasarunman hinam chaykunataqa mana qonqayta atinichu. Mana valeq hinaspa huchayoqpaqmi hapikuni”.
18 Achka cristianokunam Mary hina tarikunku. ¿Imataq kallpata qonman aguantanankupaq? Maryta kallpanchaq kaqkunam, paymi nin: “Kanmi kusichiwaqniy allin amistad turi-ñañaykunapas. Chaynataq kallpanchakunim Jehová Diospa sumaqllaña promesankunapi piensanaypaq. Chaymi seguro kachkani yanapawananpaq mañakusqayqa kusikuypi tukunanmanta”, nispa (Sal. 126:5). ¡Ancha allinmi Diospa nombrasqan Rey Jesucristopi llapanchik suyakuyninchikqa! Paymantam Biblia nin: ‘Llakipayanqam mana imayoq runataqa. Payqa salvaykunqam wakchakunapa vidantaqa. Engañasqa kanankumantawan [. . .] dañasqa kanankumantam [. . .] libraykunqa. eypa llumpay kuyasqanmi paykunapa vidanqa’, nispa (Sal. 72:13, 14). ¡Mayna kallpanchaqmi chayna nisqanqa!
Mosoq pacha chayamunantam suyachkanchik
19, 20. a) Salmo 72 nisqanman hina, ¿ima sasachakuytam allichanqa Cristo kamachispan? b) ¿Pitataq reqsikunanchik Gobiernonmanta, hinaspa imaynataq sientekunchik bendicionkuna qowananchikmanta?
19 Qawachkanchikmanpas hina piensasun Salomonmanta Aswan Atiyniyoq Jesucristo gobiernaptin imayna kawsakuy kananmanta: “Kay pachapiyá achka-achka kawsaykuna qespichun. Moqo chakrakunapiyá sumaqllataña kawsaykuna aywityachun” (Sal. 72:16). Orqokunapa puntanpiqa manam kawsaykunataqa tarpunchikchu, Bibliapa nisqanmi qawachin kawsaykuna kay pachapi allin qespinanta. “Libano lawpi” hinam kawsaykuna qespinqa, Salomonpa tiemponpim chay sitiopiqa kawsaykuna allinta qespirqa. Kaypi piensariy: manañam kanqachu muchuypas, nitaq yarqaypas. Llapallankum ‘hatun convidota ruranqaku’ (Isa. 25:6-8; 35:1, 2).
20 ¿Pitataq reqsikunanchik tukuypi bendeciwasqanchikmanta? Astawanqa Llapallan Kamachiq hinaspa Wiñaypaq Reyninchik Jehová Diostam. Chay punchawpim, kay sumaq takita qellqaq hina llapallanchik takisun: “[Jesuspa] sutinqa wiñaypaqyá yuyasqa kachun. Paypa reqsisqa kayninqa inti hinayá takyachun. Payraykuyá llapallan nacionkunaqa bendecisqa kachun. Paytaqa llapa nacionkunayá kusikuyniyoqpaq hapichun. Alabasqayá kachun Israelpa yupaychasqan Tayta Diosqa. Payllam ruran milagrokunataqa. Paypa allin reqsisqa sutinqa wiñaypaq alabasqayá kachun. Tukuy kay pachapiyá payqa ancha reqsisqa kachun. ¡Chaynapuniyá kachun!” (Sal. 72:17-19.)
[Willakuy]
^ par. 17 Manam cheqap sutinchu.
¿Ima niwaqtaq?
• ¿Imatam willawanchikña Salmo 72?
• ¿Pim Salomonmanta Aswan Atiyniyoq hinaspa maykamam gobiernanqa?
• Salmo 72 capitulopa willasqan bendicionkunamanta, ¿mayqantam astawan munawaq?
[Kay yachachikuypa tapukuyninkuna]
[29 kaq paginapi dibujo]
¿Imatam hamuq tiempomanta qawachirqaña Salomonpa allin gobiernon?
[32 kaq paginapi dibujo]
Salomonmanta Aswan Atiyniyoq kamachiptin Paraisopi kawsakunapaq kallpanchakuyqa ancha allinmi
