Ngubani Lotawukhulula Bantfu Labakhalela Lusito?

“Awu, Nkulunkulu! Nika inkhosi likhona lakho lekwehlulela . . . Iyawukhulula loyibitako, naloweswele.”—HLA. 72:1, 12.

1. Lokwehlela inkhosi Davide kusifundzisani ngeluvelo lwaNkulunkulu?

 LAMAVI labhalwe lapha ngenhla lehla ngemgogodla, abhalwa yiNkhosi Davide yaka-Israyeli wasendvulo. Eminyakeni lembalwa ngembikwekutsi abhale lamavi, Davide bekangene elubishini futsi weswela umgodzi wekubhaca ngenca yekuphinga naBhatisheba. Ngaleso sikhatsi, washweleta kuNkulunkulu watsi: “Ngekwemusa wakho, yesula tiphambuko tami. . . . Sono sami sisembikwami njalo. . . . Empeleni ngatalwa vele ngisesonweni, ngabasoni kusukela make atsatsa sisu.” (Hla. 51:1-5) Luvelo lubangela Jehova kutsi akugcine engcondvweni yakhe kutsi sitoni.

2. UmBhalo weTihlabelelo 72 ungasisita njani?

² Jehova ukwati kahle-hle kutsi sisesimeni lesivisa buhlungu. Njengobe kwashiwo kadzeni, iNkhosi lebekwe nguNkulunkulu ‘iyawukhulula loyibitako, naloweswele, nalomphofu, nalote umsiti. Ibe nesihe kulababutsakatsaka nalabaswele, isindzise kuphila kwalabeswele.’ (Hla. 72:12, 13) Lolusito lutawufika njani kubantfu? UmBhalo weTihlabelelo 72 uyayibhabata lendzaba. Lengoma yacanjwa kute ihlatiye kubusa kwaSolomoni loyindvodzana yaDavide. Itsi fahla fahla ngetintfo lesitibuke ngalabovu, letiyowenteka ngesikhatsi inkhosi lebekwe nguNkulunkulu, Jesu Khristu seyibusa. Loko kutawufaka ekhatsi kucedza kucindzeteleka.

Luhlatiyo Lwalokutawentiwa Kubusa KwaKhristu

3. Yini leyacelwa nguSolomoni kuNkulunkulu futsi wamphendvula njani?

³ Ngemuva kwekukhipha sicondziso sekutsi Solomoni abekwe njengenkhosi, Davide lobekasagugile waniketa Solomoni ticondziso latilalela. (1 Khos. 1:32-35; 2:1-3) Ngemuva kwesikhatsi, naku Jehova lakusho kuye asebentisa  liphupho: “Cela nome ngabe yini lofuna kutsi ngikuphe yona.” Naku lokwacelwa nguSolomoni: “Nika inceku yakho inhlitiyo lehlakaniphile nengcondvo lehlutekile lekwati kwehlukanisa lokuhle nalokubi.” Sicelo saSolomoni sekutehlisa saphumela ekutseni atfole imbhasela nobe lokungetulu kwaloko labekakucelile.—1 Khos. 3:5, 9-13.

4. Lomunye umbusi lowabusa ngesikhatsi lesifananako nesaSolomoni, wakuhlatiya njani kubusa kwaSolomoni?

⁴ Sibusiso saJehova lasehlisela kubusa kwaSolomoni, senta kutsi loko kubusa kucophe umlandvo. Kuthula kanye nemphumelelo lobekukhona bekukunyenti futsi akukate kube nahulumende lonjalo. (1 Khos. 4:25) Indlovukazi yaseSheba neludvwendvwe lwayo batifikela catsatsa kutewubona ngewabo umbuso waSolomoni. Naku lendlovukazi leyakutjela Solomoni: “Impela lombiko lengatjelwa ngawo ngiseseveni lami . . . uliciniso . . . Ngempela, angizange ngitjelwe incenye yaloku lengikubonako. Kuhlakanipha kwakho nemcebo wakho kungetulu kwaloko lengakuva ngematekelo.” (1 Khos. 10:1, 6, 7) Nobe kunjalo, kuhlakanipha lokwaboniswa nguJesu kwakukwelizinga leliphakeme kakhulu, kangangekutsi waze watsi: “Ase nibuke-ke, ngobe lapha kukhona lomkhulu kunaSolomoni!”—Mat. 12:42.

Tingucuko Letitawuletfwa Kubusa KwaSolomoni Lomkhulu

5. Yini leyembulwa Tihlabelelo 72, futsi tikhuluma ngatiphi tingucuko letitawenteka?

⁵ Nyalo ase sihlatiye umBhalo weTihlabelelo 72 sinemgomo wekutfola tibusiso letitawuletfwa kubusa kwaJesu Khristu, longuSolomoni Lomkhulu. (Fundza Tihlabelelo 72:1-4.) Umhlabeli uveta indlela Jehova lativa ngayo ‘ngekubusa’ kweNdvodzana yakhe ‘LeyiNkhosi Yekuthula,’ Jesu Khristu. (Isa. 9:6, 7) Utawube acondziswa nguJehova Solomoni Lomkhulu ‘nakakhulula labacindzetelekile aphindze akhulula emadvodzana alabaphuyile.’ Kubusa kwakhe kutawugcwala kuthula nekulunga. Nakaselapha emhlabeni, Jesu wake watsi fahla fahla ngetingucuko nemphumelelo latayiletsa nase abusa njengeNkhosi iMinyaka Leyinkhulungwane.—Semb. 20:4.

6. Jesu waveta maphi emantjontjo etibusiso ekubusa kwakhe?

⁶ Ase ucabange ngaleminye yemisebenti Jesu layenta lengemantjontjo aloko latakwentela bantfu, lokuhambisana nemBhalo weTihlabelelo 72. Sinetizatfu letenta sitsintseke ngendlela Jesu bekahawukela ngayo bantfu labebadvonsa matima. (Mat. 9:35, 36; 15:29-31) Lokunye lokwenteka, kutsi indvodza lebeyinebulephelo yacondza ngco kuJesu yatincengela yatsi: “Nkhosi, nawutsandza, ungangihlambulula.” Jesu waphendvula watsi: “Ngiyatsandza, hlambuluka.” Yelapheka kanjalo lendvodza! (Mak. 1:40-42) Ngemuva kwesikhashana Jesu wahlangana nemfelokati lobekafelwe yindvodzana yakhe. “Inkhosi [Jesu] yamdzabukela” yase itsi “Vuka, jaha!” lendvodzana yavuka kanjalo ekufeni.—Luk. 7:11-15.

7, 8. Shano letinye tetiwombe letaveta emandla ekwelapha aJesu.

⁷ Jehova wanika Jesu emandla ekwenta timangaliso. Loko kwakhanya bha ngalesikhatsi Jesu ahlangana ‘nemfati lobekagula, aphetfwe sifo sekopha, lesasesicedze iminyaka lengu-12 simphetse.’ Lomfati “abesagule kakhulu, asaphelelwe timali kulabelaphako, angasenalutfo  esandleni,” kodvwa kujinge kungamsiti ngalutfo. Lomfati wabhidla sicumbi sebantfu wacondza ngco kuJesu wafike wamtsintsa. Kwenta njalo bekukwephula uMtsetfo lomayelana nemuntfu ‘lowophako.’ (Lev. 15:19, 25) Jesu wativa kutsi kunemandla akhe lasahambile, wase uyacalata uyabuta kutsi ngubani lona lamtsintsile. Lomfati “wasondzela ngembili achachatela, ngenca yekwesaba, waguca phansi embikwakhe, wamtjela lonkhe liciniso.” Kwamkhanyela Jesu kutsi Jehova sewumelaphile lomfati, wase ukhuluma naye ngemusa watsi: “Ndvodzakati yami, kukholwa kwakho kukuphilisile. Hamba ngekuthula, uphile esifeni sakho.”—Mak. 5:25-27, 30, 33, 34.

⁸ Emandla aJesu ekwenta timangaliso labekawanikwe nguNkulunkulu enta bantfu basala babambe wangephasi. Akubutwa kutsi labanyenti batsintseka nababona Jesu elapha bantfu ngembikwekwetfula iNshumayelo ledvumile yaseNtsabeni. (Luk. 6:17-19) Bafundzi baJohane lababili labekabatfume kuJesu kute abachazele kutsi unguMesiya yini, bamkhandza ‘aphilisa labanyenti labebaphetfwe ngimikhuhlane, netifo, nemadimoni, avula emehlo etimphumphutse letinyenti.’ Naku lokwashiwo nguJesu kuletintfunywa taJohane: “Ncandzekani nifike nimtjele konkhe lenikubone kwenteka nalenikuvile kukhulunywa: Timphumphutse tiyabona, tinchute netishosha tiyahamba, emalephelo ayaphiliswa, tihhulu tiyeva, labafile bayavuswa, neliVangeli liyashunyayelwa etimphuyeni.” (Luk. 7:19-22) Lombiko lowaletfwa nguletitfunywa, wamnika dvolocina Johane.

9. Timangaliso taJesu betibonisani?

⁹ Kuliciniso kutsi loko Jesu lakwentela bantfu labahluphekile ngalesikhatsi alapha emhlabeni, bekukwesikhashana. Bantfu labelapha nalabo labavusa emathuneni, baphindze bafa. Nobe kunjalo, timangaliso Jesu latenta ngalesikhatsi alapha emhlabeni betimane nje tibonisa kutsi bantfu utawubakhulula nasekabusa njengaMesiya.

LiPharadisi Lemhlaba Wonkhe Selisedvute

10, 11. (a) Tibusiso letitawuletfwa nguMbuso titawuchubeka sikhatsi lesidze kangakanani, futsi kutawuba njani kubusa kwaJesu? (b) Ngubani lotawuba naKhristu ePharadisi, futsi yini lokufanele siyente kute sihlale khona phakadze?

¹⁰ Ase ucabange kutsi kutawuba njani kuphila ePharadisi emhlabeni. (Fundza Tihlabelelo 72:5-9.) Tikhonti taNkulunkulu weliciniso titawujabulela kuphila ePharadisi nangabe nje lilanga nenyanga kusekhona—ngalamanye emagama phakadze. INkhosi Jesu Khristu itawusiletsela imphumuto ‘njengemvula nayehlela emadlelweni, nanjengemvula nayinisela umhlabatsi.’

¹¹ Njengobe ucabanga ngekugcwaliseka kwalombhalo weTihlabelelo, inhlitiyo yakho ayikwenti yini ube nesifiso sekuphila phakadze emhlabeni loyiPharadisi? Nalesigelekece lebesibetselwe eceleni kwaJesu, sajabula ngalesikhatsi atsi: “Ngiyakutjela lamuhla, utakuba nami ePharadisi.” (Luk. 23:43 NW.) Ekhatsi nekubusa kwaJesu kweMinyaka Leyinkhulungwane, lesigelekece sitawuvuswa. Nangabe sititfoba ngephansi kwekubusa kwaKhristu, sitawuphila phakadze emhlabeni sesingenaso sono futsi sinenjabulo.

12. Ekhatsi nekubusa kwaKhristu kweMinyaka Leyinkhulungwane, bantfu labavusiwe batawunikwa sikhatsi sekwenta luphi lushintjo?

¹² Nasekubusa Solomoni Lomkhulu, Jesu Khristu, ‘labalungile bayokwandza,’ lokusho kutsi bayawuba banyenti. (Hla. 72:7) Lutsandvo lwaKhristu kanye nebubele bakhe, buyawukwandza bufanane nangalesikhatsi aselapha emhlabeni. Emhlabeni waNkulunkulu lomusha, ‘labalungile’ labavusiwe batawuniketwa sikhatsi sekutsi baphile ngendlela Nkulunkulu lafuna kutsi baphile ngayo. (Imis. 24:15) Kodvwa labo labangeke bakwente loko, angeke bavunyelwe kutsi bachubeke baphile futsi bonakalise kuthula kanye nebunye lobutawuba khona emhlabeni lomusha.

13. UMbuso waNkulunkulu uyawubusa indzawo lengakanani, futsi kungani kuthula kwawo kungeke kuphatamiseke?

¹³ Nankha emavi lakhombisa kutsi Solomoni  Lomkhulu utawubusa umhlaba wonkhe: “Shangatsi bukhosi bayo bungagcwala umhlaba, busuke elwandle buye bufike elwandle lolunye; busuke eMfuleni [Yufrathe] buze bufike ekugcineni kwemhlaba.” (Hla. 72:8, 9) Kuliciniso kutsi Jesu Khristu utawubusa umhlaba wonkhe. (Zak. 9:9, 10) Labo labajabulela kubusa kanye netibusiso takhe, ‘batawukhotsama embikwakhe’ bakhombise kutsi batinikela kuye. Ngakulokunye, bantfu labangafuni kuphendvuka bayawubhujiswa, ngisho nobe ‘baneminyaka lelikhulu budzala.’ (Isa. 65:20) ‘Bayawukhotsama.’

Jesu Uyasihawukela

14, 15. Sati njani kutsi Jesu uyakwati kuhlupheka kwebantfu futsi ‘utawukhulula labambitako, nalabeswele, nalabamphofu, nalabete umsiti’?

¹⁴ Bantfu basesimeni lesivisa buhlungu futsi badzinga lusito lolukhulu. Kodvwa sinalo litsemba. (Fundza Tihlabelelo 72:12-14.) Jesu, Solomoni Lomkhulu, uyasihawukela ngobe uyati kutsi sinesono. Ngetulu kwaloko, naye wahlupheka ngenca yekulunga futsi Nkulunkulu wamvumela kutsi ahlupheke. Jesu wacindzeteleka kakhulu emoyeni kangangekutsi “titfukutfuku takhe taze taba njengematfonsi engati, atfontsela phansi.” (Luk. 22:44) Kamuva ngalesikhatsi abetselwe elugodvweni lwekuhlushwa, wakhala watsi: “Nkulunkulu wami, Nkulunkulu wami, ungishiyeleni?” (Mat. 27:45, 46) Nanobe ahlupheka, futsi naSathane enta konkhe lokusemandleni akhe kute amente ashiye Jehova, Jesu wahlala etsembekile kuNkulunkulu Jehova.

¹⁵ Siyaciniseka kutsi Jesu uyakubona kuhlupheka kwetfu futsi ‘uyokhulula lombitako, naloweswele, nalomphofu, nalote umsiti.’ Ngesizatfu sekutsi Jesu unelutsandvo njengaBabe wakhe, ‘uyawubalalela labamphofu’ futsi “labanetinhlitiyo letephukile uyawubaphilisa, abophe emanceba abo.” (Hla. 69:33; 147:3) Jesu ‘uvelana natsi ebutsakatsakeni betfu’ ngobe “walingwa ngayo yonkhe indlela njengatsi.” (Heb. 4:15) Kuyasijabulisa kwati kutsi iNkhosi Jesu Khristu nyalo ibusa ezulwini futsi itimisele kukhulula bantfu ekuhluphekeni kwabo.

16. Kungani Solomoni akwati kuvelana netikhonti takhe?

¹⁶ Ngesizatfu sekutsi abenekucondza nekuhlakanipha, Solomoni waba ‘nesihe kulababutsakatsaka nalabaswele.’ Nobe kunjalo, umlandvo wekuphila kwakhe wawunetiwombe letishwacisa lugogo. Umnakabo longu-Amnoni wagagadlela dzadzewabo Thamari. Ngesizatfu saleso sono umnkaboSolomoni longu-Absalomu wambulala Amnoni. (2 Sam. 13:1, 14, 28, 29) Absalomu wetama kuketula Davide esihlalweni sebukhosi, kodvwa imetamo yakhe yehluleka futsi wagcine abulawe nguJowabe. (2 Sam. 15:10, 14; 18:9, 14) Kwatsi kamuva, umnakaboSolomoni Adoniya wetama kutenta iNkhosi. Kube waphumelela kukwenta loko, bekutawusho kutsi Solomoni abetawubulawa. (1 Khos. 1:5) Lokwenta kucace kutsi Solomoni abekucondza kuhlupheka kwebantfu, nguloko lakusho emthandazweni wakhe ngesikhatsi kunikelwa lithempeli laJehova. Ngalokumayelana netikhonti tayo, lenkhosi yathandaza: “Nguloyo atibonela sishayo neminjunju enhlitiyweni yakhe . . . Utsetselele [Jehova] nguloyo naloyo umuntfu umphatse njengekwenta kwakhe.”—2 Khr. 6:29, 30.

17, 18. Ngubuphi buhlungu letinye tikhonti taNkulunkulu lokudzingeke kutsi tibubeketelele, futsi yini letisitile takhona kwenta njalo?

¹⁷ ‘Buhlungu lesingaba nabo’ bungabangelwa nguloko lokwentekile kitsi esikhatsini lesendlulile. Mariya, a Fakazi waJehova loneminyaka  letsi ayibe ngu-30 budzala, wabhala: “Kunyenti kakhulu lokungijabulisako kodvwa nangicabanga ngaloko lokwenteke kimi esikhatsini lesendlulile, ngiva kushwaca lugogo. Ngiva buhlungu kangangekutsi ngivele ngisikhihle sililo, kuba shengatsi loko lengicabanga ngako kwenteke nje itolo. Ngaso sonkhe sikhatsi nangikhumbula lokwenteka esikhatsini lesendlulile, ngitiva ngingumuntfu longenamsebenti nalonelicala.”

¹⁸ Linyenti letikhonti taNkulunkulu litiva ngendlela lefanako. Kodvwa yini lengatisita itinike emandla kute tibeketele? Mariya uchubeka atsi: “Bungani lobungubo sibili nebazalwane nabodzadze ebandleni, bungiletsela injabulo. Ngiphindze ngisitwe kucabanga ngaloko Jehova lakutsembisile ngelikusasa, futsi ngiba nelitsemba lekutsi tinyembeti tami telusizi titawuba tenjabulo.” (Hla. 126:5) Kufanele sibeke litsemba letfu emhlatjelweni wesihlengo weNdvodzana yaNkulunkulu, lenguMbusi lamkhetsile. Ngalokumayelana naye, naku lokwashiwo: ‘Inesihe kulababutsakatsaka nalabaswele, isindzisa kuphila kwalabeswele. Ikhulula kuphila kwalabo labasekubandzetelweni nasebudloveni, ingati yabo iligugu emehlweni ayo.’ (Hla. 72:13, 14) Leso setsembiso siliciniso.

Siligadze Ngalabovu Live Lelisha Lelinenala

19, 20. (a) Njengobe kusho incwadzi yeTihlabelelo 72, nguyiphi inkinga letawucatululwa nguMbuso waNkulunkulu? (b) Ngubani lokufanele advunyiswe ngekubusa kwaKhristu, futsi utiva njani ngaloko loMbuso loyawukwenta?

¹⁹ Ase ucabange ngemehlo engcondvo likusasa lelihle lesetsenjiswe lona eveni lelisha laNkulunkulu nase kubusa Solomoni Lomkhulu. LiBhayibheli liyetsembisa: “Shangatsi kungaba nenala emasimini, lenala isibekele ticongo tetintsaba, kube tiphihli.” (Hla. 72:16) Njengobe inala ingatfolakali eticongweni tetintsaba, lamavi agcizelela kutsi ngaleso sikhatsi umhlaba utawube sewunemandla lamakhulu ekukhicita. Umkhicito wawo utawufanana ‘netihlahla taseLebanoni,’ indzawo leyayikhicita inala ngesikhatsi sekubusa kwaSolomoni. Cabanga nje kutsi kutawube sekute kuswelakala kwekudla, kungondleki kahle ngisho nalolambako. Bonkhe bantfu batawujabulela “lidzili lalokukhuluphele.”—Isa. 25:6-8; 35:1, 2.

²⁰ Ngubani lotawudvunyiswa ngato tonkhe letibusiso? Ngalokuyinhloko, yiNkhosi Yendzawo Yonkhe yaPhakadze, Nkulunkulu Jehova. Sonkhe sitawubese sivakalisa emavi etfu ngekuhlanganyela ekuculeni lendzinyana yekugcina yalengoma letsi: “Shangatsi libito layo [iNkhosi Jesu Khristu] lingahlala ingunaphakadze, lichubeke latiwe njengelilanga. Tive tonkhe atibusiswe ngayo; tiyawumbita ngekutsi yinkhosi lebusisekile. Akabongwe Simakadze [Jehova], Nkulunkulu nguye longuNkulunkulu wema-Israyeli nguye yedvwa lowenta timangaliso. Alibongwe libito lakhe lenkhatimulo, libongwe kuze kube phakadze, shangatsi umhlaba wonkhe ungagcwala inkhatimulo yakhe. Amen! Yebo, Amen!”—Hla. 72:17-19.

[Umbhalo longentasi]

Ungaphendvula Njani?

• Yini Tihlabelelo 72 letayisho kusengaphambili?

• Ngubani Solomoni Lomkhulu, futsi utawubusa indzawo lengakanani?

• Yini wena loyitsandzako ngetibusiso letichazwe encwadzini yeTihlabelelo 72?

[Imibuto Yesihloko Lesifundvwako]

[Sitfombe ekhasini 28]

Yayifanekiselani imphumelelo yekubusa kwaSolomoni?

[Sitfombe ekhasini 31]

Kudzingeka kutsi sifake umfutfo kuze sitfole kuphila lokuphakadze ePharadisi ngalesikhatsi sekubusa Solomoni Lomkhulu