Sé mak bele salva sira neʼebé halerik hodi husu ajuda?
Sé mak bele salva sira neʼebé halerik hodi husu ajuda?
“Oh, Maromak, hatudu sai ba liurai Ita rasik nia tesi-lia . . . Tanba nia sei salva ema kiak neʼebé halerik hodi husu ajuda.”—SAL 72:1, 12.
1. Husi David nia situasaun, saida mak ita aprende kona-ba Maromak nia laran-sadiʼa?
LIAFUAN sira-neʼe, neʼebé karik Liurai David iha Izraél antigu mak hakerek, book duni ita-nia laran! Tinan balu antes nia hakerek liafuan sira-neʼe, nia sente laran-kraik tebes tanba nia halo sala-foʼer ho Batseba. Iha tempu neʼe, ho haraik-an David husu ba Maromak: “Hamoos haʼu-nia sala bá tuir Ita-nia laran-sadiʼa neʼebé boot. . . . Haʼu-nia sala sempre iha haʼu-nia oin. . . . Haree bá! Ho susar tuur-ahi nian, haʼu moris-mai ho sala. No ho sala mak haʼu-nia inan koʼus haʼu iha ninia knotak.” (Sal 51:1-5) Tanba Maromak Jeová laran-sadiʼa, nia hanoin kona-ba ita-nia situasaun nuʼudar ema sala-naʼin.
2. Oinsá mak Salmo 72 ajuda ita?
2 Maromak Jeová komprende kona-ba ita-nia situasaun neʼebé kasian tebes. Maibé, hanesan eskritura fó-hatene nanis ona, Maromak nia Liurai neʼebé nia hili, “nia sei salva ema kiak neʼebé halerik hodi husu ajuda, no mós ema neʼebé hasoru susar no ema neʼebé la hetan ajuda. Nia sei sente kasian ba ema kiʼik no ema kiak, no nia sei salva ema kiak sira-nia moris”. (Sal 72:12, 13) Oinsá mak nia sei fó salvasaun? Salmo 72 fó-hatene ita oinsá. Liurai David hakerek knananuk neʼe kona-ba nia oan Salomão nia ukun no ida-neʼe haleno oinsá mak Maromak nia Oan, Jesus Kristu sei salva ema hotu husi susar sira.
Salomão nia ukun haleno Kristu nia ukun
3. Saida mak Salomão husu ba Maromak? Saida mak Maromak fó ba nia?
3 Lakleur depois haruka tiha ema atu foti Salomão nuʼudar liurai, David neʼebé katuas ona fó lei sira ba Salomão neʼebé nia halo tuir ho laran-metin. (1 Reis 1:32-35; 2:1-3) Depois neʼe, Maromak Jeová mosu ba Salomão iha mehi no hatete: “Husu bá buat neʼebé haʼu tenke fó ba ó.” Salomão husu buat ida deʼit, nia dehan: “Haraik ba Ita atan neʼe fuan neʼebé halo tuir atubele tesi lia ba Ita-nia povu, atu hatene buat neʼebé diʼak husi buat neʼebé aat.” Tanba Salomão husu ho haraik-an, Maromak fó buat neʼebé nia husu no fó mós buat barak seluk tan.—1 Reis 3:5, 9-13.
4. Ukun-naʼin ida hatete saida kona-ba Salomão nia ukun?
4 Ho bensaun husi Maromak Jeová, Salomão nia ukun halo ninia povu haksolok tanba iha moris neʼebé nakonu ho dame no iha moris diʼak, no la iha ukun-naʼin ida iha rai neʼebé bele fó buat sira-neʼe ba sira-nia povu. (1 Reis 4:25) Husi ema sira neʼebé bá atu haree Salomão nia ukun, inklui mós liurai-feto husi rai Sabá hamutuk ho ninia ema sira. Nia hatete ba Salomão: “Liafuan hotu neʼebé haʼu rona ona iha haʼu-nia rai . . . mak loos duni. Buat barak liu mak ema seidauk fó-hatene mai haʼu. Ita iha matenek no rikusoin barak liu fali buat neʼebé haʼu rona ona.” (1 Reis 10:1, 6, 7) Maibé, Jesus iha matenek neʼebé boot liu, tan neʼe mak nia bele dehan kona-ba nia an: “Iha neʼe iha Ida neʼebé boot liu fali Salomão!”—Mt 12:42.
Salvasaun husi Ida neʼebé boot liu Salomão
5. Salmo 72 hatudu saida? Ida-neʼe fó sai buat saida deʼit?
5 Mai ita haree eskritura sira husi Salmo 72 hodi hatene kona-ba bensaun sira neʼebé ema hotu sei hetan iha Jesus Kristu, Salomão neʼebé boot liu nia ukun nia okos. (Lee Salmo 72:1-3a. *) Salmu ida-neʼe hatudu oinsá mak Maromak Jeová sente kona-ba ukun husi ninia Oan Jesus Kristu nuʼudar “Liurai-Oan Dame nian”. (Isa 9:6, 7) Ho Maromak nia apoia, Salomão neʼebé boot liu sei ‘defende sira neʼebé terus no salva sira neʼebé kiak nia oan sira’. Ninia ukun sei nakonu ho dame no justisa. Kuandu Jesus sei iha rai, nia hatudu sai buat neʼebé nia sei halo durante ninia Ukun ba Tinan Rihun Ida.—Apok 20:4.
6. Saida mak Jesus hatudu atu fó sai bensaun neʼebé ema sei hetan iha ninia ukun nia okos?
6 Hanoin toʼok kona-ba buat balu neʼebé Jesus halo iha tempu uluk neʼebé hatudu mai ita saida mak nia sei halo ba ema hodi kumpre liafuan iha Salmo 72. Ita iha razaun barak atu hafolin ninia laran-diʼak neʼebé nia hatudu ba ema neʼebé iha terus laran. (Mt 9:35, 36; 15:29-31) Porezemplu, kuandu ema ida neʼebé kona moras-lepra hakbesik ba Jesus no husu: “Ita hakarak karik, Ita bele hamoos haʼu,” Jesus hatán: “Haʼu hakarak; sai moos bá!” No mane neʼe hetan duni isin-diʼak! (Mc 1:40-42) Tuirmai, Jesus mós hasoru feto-faluk ida neʼebé ninia oan-mane mesak mate ona. Tanba Jesus “hanoin nia”, Jesus hatete: “Hamriik bá!” no feto neʼe nia oan hamriik duni. Nia moris fila fali!—Lc 7:11-15.
7, 8. Saida deʼit mak hatudu kona-ba Jesus nia kbiit atu kura ema?
7 Maromak Jeová fó kbiit ba Jesus atu halo milagre sira. Ezemplu ida kona-ba neʼe mak “feto ida neʼebé, ba tinan sanulu-resin-rua ona mak fakar raan”. Maski “nia terus tebetebes iha doutór barak sira liman hodi halakon nia rikusoi tomak”, maibé nia moras sai aat liután. Feto neʼe tama iha ema barak nia leet no kona Jesus, no ida-neʼe mak hahalok ida neʼebé kontra Lei kona-ba ema ida neʼebé ‘fakar raan’. (Lev 15:19, 25) Jesus sente katak kbiit ruma sai husi nia no tan neʼe nia husu kona-ba sé mak kona nia. Feto neʼe “nakdedar no taʼuk . . . nia hakneʼak iha nia oin hodi dehan sai lia-loos hotu”. Tan Jesus hatene duni katak Maromak Jeová kura tiha feto neʼe, nia ho laran-diʼak hatete ba feto neʼe: “Haʼu oan-feto . . . ó-nia fiar mak soi ó. Laʼo bá iha dame laran. Ó hetan diʼak husi ó-nia moras bá!”—Mc 5:25-27, 30, 33, 34.
8 Kbiit neʼebé Maromak fó ba Jesus bele kura duni ema moras sira, no mós bele book makaʼas ema barak neʼebé haree milagre sira-neʼe. Porezemplu, klaru katak ema barak hakfodak hodi haree Jesus kura ema sira antes ninia diskursu iha foho leten. (Lc 6:17-19) Kuandu João Batista haruka manu-ain naʼin-rua atu buka-hatene se Jesus mak loloos Mesias, sira haree nia “fó daudaun isin-diʼak ba ema barak nia moras no terus, hodi duni sai espíritu aat sira no halo matan-delek barak haree”. Depois neʼe Jesus hatete ba mane rua neʼe: “Imi bá fali hodi hateten ba João buat neʼebé imi haree no rona: ema matan-delek sira haree, ema ain-aat sira laʼo, ema moras-lepra sira hetan isin-moos, ema tilun-diuk sira rona, ema mate sira moris hiʼas fali, no haʼu haklaken tiha lia-foun diʼak ba kiak sira.” (Lc 7:19-22) Ita bele fiar katak Jesus nia liafuan sira-neʼe fó laran-manas duni ba João!
9. Jesus nia milagre hatudu kona-ba saida?
9 Klaru katak buat neʼebé Jesus halo atu fó kmaan ba ema neʼebé terus kuandu nia sei iha rai mak tahan ba tempu uitoan deʼit. Ema sira neʼebé nia kura no fó moris-hiʼas ikusmai mate. Maibé, milagre sira-neʼe hatudu duni kona-ba bensaun ba nafatin neʼebé ema sei hetan iha Mesias nia ukun nia okos.
Paraízu iha mundu tomak
10, 11. (a) Bensaun husi Maromak nia Reinu sei tahan ba tempu hira? Jesus nia ukun sei sai hanesan saida? (b) Sé mak sei hamutuk Kristu iha Paraízu? Oinsá mak nia bele moris ba nafatin?
10 Koko atu hanoin toʼok kona-ba oinsá mak ita sei moris iha mundu paraízu. (Lee Salmo 72:5, 6. *) Ema sira neʼebé adora Maromak loos mesak deʼit sei haksolok ho moris iha paraízu ba nafatin, hanesan ho loron-matan no fulan neʼebé iha ba nafatin. Liurai Jesus Kristu nia ukun sei halo ema sente kmaan, “hanesan udan neʼebé tun ba duʼut neʼebé tesi tiha ona, no hanesan udan boot neʼebé habokon rai”.
11 Nuʼudar ita hanoin iha ita-nia neon kona-ba oinsá mak liafuan sira iha salmu sai loos, ida-neʼe book duni ita-nia laran tanba ita iha esperansa atu moris ba nafatin iha paraízu iha rai! Ita bele fiar katak ema aat neʼebé tara iha ai-riin besik Jesus nia sorin mós sente haksolok kuandu Jesus hatete ba nia: “Ó sei hamutuk ho haʼu iha Paraízu.” (Lc 23:43, MF) Iha Jesus nia Ukun ba Tinan Rihun Ida, mane neʼe sei hetan moris-hiʼas fali. Liután neʼe, se nia hakruʼuk ba Kristu nia ukun, nia bele moris ba nafatin iha rai no bele iha saúde neʼebé diʼak no moris kontente.
12. Durante Kristu nia Ukun ba Tinan Rihun Ida, ema neʼebé aat neʼebé moris hiʼas fali sei hetan oportunidade saida?
12 Iha ukun husi Jesus Kristu, Salomão neʼebé boot liu, “ema neʼebé loos sei sai buras”. (Sal 72:7) Kristu sei hatudu nia domin no ninia laran-diʼak ba ema hotu hanesan kuandu nia sei iha rai. Iha mundu foun neʼebé Maromak promete ona, “ema aat” mós sei hetan moris-hiʼas no iha oportunidade atu moris tuir Maromak Jeová nia matadalan hodi sira bele kontinua moris. (Apos 24:15) Klaru katak sira neʼebé lakohi atu moris tuir Maromak nia mandamentu sira sei la bele atu kontinua moris hodi estraga dame no hakmatek iha mundu foun.
13. Maromak nia Reinu nia ukun sei toʼo neʼebé? Tanbasá mak ema sei la estraga dame iha mundu foun?
13 Liafuan tuirmai neʼe hatudu toʼo neʼebé mak Salomão neʼebé boot liu sei ukun: “Nia sei iha povu husi tasi ba tasi no husi Mota [Eufrates] toʼo rai nia rohan. Ema neʼebé hela iha rai maran sei hakruʼuk iha nia oin, no ninia inimigu sira rasik sei lambe rai-rahun.” (Sal 72:8, 9) Sin, Jesus Kristu sei ukun rai tomak. (Zac 9:9, 10) Sira hotu neʼebé simu no hafolin ninia ukun no ninia bensaun sei ‘hakruʼuk an’ ho sira-nia hakarak rasik. Maibé, sira neʼebé la arrepende sira-nia sala sei halakon tiha, hanesan sira “moris deʼit ba tinan atus ida”. (Isa 65:20) Sira sei “lambe rai-rahun”.
Jesus hanoin ita
14, 15. Oinsá mak ita hatene katak Jesus komprende ita-nia sentimentu no nia “sei salva ema kiak neʼebé halerik atu husu ajuda”?
14 Ema neʼebé sala-naʼin mak kasian duni no sira presiza duni ajuda. Maski nuneʼe ita hotu iha esperansa. (Lee Salmo 72:13, 14a. *) Jesus, Salomão neʼebé boot liu, hanoin kona-ba ita tanba nia hatene ita-nia situasaun nuʼudar ema sala-naʼin. Liután neʼe, Jesus hetan terus tan buat neʼebé loos, no Maromak husik nia atu hasoru mesak koko oioin. No situasaun neʼebé Jesus hasoru halo nia laran-susar tebes toʼo “nia kosar-been hanesan raan suli ba rai”. (Lc 22:44) Ikusmai, kuandu nia iha ai-riin terus nia leten, nia hakilar dehan: “Maromak, haʼu-nia Maromak tansá Ita husik haʼu mesak?” (Mt 27:45, 46) Maski Jesus hasoru terus oioin, no maski Satanás halo buat hotu atu hasees nia husi Maromak Jeová, maibé nia hatudu katak nia laran-metin ba Maromak Jeová.
15 Ita bele fiar katak Jesus hatene ita-nia terus no nia “sei salva ema kiak neʼebé halerik hodi husu ajuda, no mós ema neʼebé hasoru susar no ema neʼebé la iha ajuda”. Hanesan nia Aman, Jesus hanoin ita, nia sei “rona ba ema kiak sira” no sei “kura ema sira neʼebé laran-kanek, no nia sei falun sira-nia kanek”. (Sal 69:33; 147:3) Jesus “hanoin ita-nia kbiit-laek” tanba hanesan ho ita, “nia rasik hetan mós babeur iha buat hotu”. (Ebr 4:15) Diʼak tebes atu hatene katak Liurai Jesus Kristu agora ukun ona iha lalehan no nia hakarak duni atu halo ema sente kmaan hodi halakon sira-nia terus!
16. Tanbasá mak Salomão bele komprende nia povu nia susar?
16 Ita bele fiar katak tanba Salomão iha matenek, nia komprende no “sente kasian ba ema neʼebé kiʼik”. Liután neʼe, iha ninia moris mós nia hasoru susar sira neʼebé halo nia triste tebes. Salomão nia maun, Amnon estraga nia biin Tamar, no ninia maun Absalão oho Amnon tan ninia hahalok aat neʼe. (2 Sam 13:1, 14, 28, 29) Absalão mós koko atu hadau David nia kadunan, maibé nia la konsege, no Joab oho nia. (2 Sam 15:10, 14; 18:9, 14) Tuirmai, Salomão nia maun, Adonias koko atu halo nia an sai liurai. Se Adonias nia planu neʼe hetan susesu, karik nia sei oho Salomão. (1 Reis 1:5) Ita bele haree katak Salomão komprende duni ema nia terus kuandu nia halo orasaun atu inaugura Maromak Jeová nia templu. Iha ninia orasaun nia koʼalia kona-ba ninia povu, nia hatete: “Sira ida-idak hatene kona-ba malisan no sira rasik nia terus . . . no [Jeová] perdua bá no fó kolen tuir sira ida-idak nia dalan.”—2 Crôn 6:29, 30.
17, 18. Maromak nia atan balu tahan hasoru susar saida? No saida mak bele ajuda sira atu tahan susar neʼe?
17 Dala ruma ‘ita rasik hetan terus’ tanba ita-nia moris uluk nian. Mary, * Testemuña ba Jeová ida ho idade 30 liu, hakerek: “Haʼu iha razaun barak atu sente kontente, maibé dala ruma haʼu-nia moris uluk nian halo haʼu sente moe no hakribi haʼu-nia an. Ida-neʼe halo haʼu sente laran-triste loos, no haʼu tanis tan haʼu sente katak buat sira-neʼe hanesan foin akontese horisehik. Esperiénsia husi moris uluk nian sei metin iha haʼu-nia neon, no ida-neʼe halo haʼu sente folin-laek no fó sala ba haʼu-nia an.”
18 Maromak nia atan barak mós sente ona hanesan neʼe, maibé saida mak bele ajuda sira atu iha kbiit hodi tahan sentimentu hanesan neʼe? Mary hatete: “Hodi iha kolega neʼebé diʼak no irmaun no irmán sira iha kongregasaun, agora haʼu bele sente kontente. Haʼu mós hakaʼas an atu hanoin nafatin kona-ba Maromak Jeová nia promete ba futuru, no haʼu fiar duni katak haʼu-nia halerik atu husu ajuda sei sai fali lian haksolok nian.” (Sal 126:5) Ita presiza duni tau fiar ba esperansa neʼebé Maromak fó liuhusi ninia Oan nuʼudar Ukun-Naʼin neʼebé nia hili ona. Kona-ba nia, eskritura sira-neʼe fó-hatene nanis: “Nia sei sente kasian ba ema neʼebé kiʼik no ema kiak, no nia sei salva ema kiak sira-nia moris. Nia sei sosa fali sira-nia moris husi terus no violénsia, no sira-nia raan sei sai folin-boot iha ninia matan.” (Sal 72:13, 14) Klaru katak liafuan sira-neʼe halo ita sente kmaan duni!
Mundu foun neʼebé nakonu ho bensaun
19, 20. (a) Hanesan fó sai iha Salmo 72, problema saida mak sei hadiʼa tiha iha Maromak nia Reinu nia ukun? (b) Sé mak sei simu hahiʼi tanba Kristu nia ukun? Ita sente oinsá kona-ba buat neʼebé Reinu neʼe sei halo?
19 Dala ida tan koko atu hanoin toʼok iha ita-nia neon kona-ba ema loos nia moris iha Maromak nia mundu foun iha neʼebé Salomão neʼebé boot liu mak ukun. Maromak promete ba ita hodi dehan: “Sei iha hahán barak iha rai; iha foho-tutun, sei iha barak liután.” (Sal 72:16) Baibain ema la kuda ai-han iha foho-tutun, nuneʼe liafuan sira-neʼe hatudu katak rai sei sai buras no sei fó ai-han barak. Ai-han sira-neʼe sei sai barak “hanesan iha Líbanu”, neʼe mak fatin neʼebé iha hahán barak iha tempu neʼebé Salomão ukun. Hanoin bá! Sei iha duni hahán barak, la iha ema neʼebé krekas tanba kuran hahán, no mós la iha ema neʼebé hamlaha! Ema hotu sei kontente ho “hahán festa nian neʼebé iha mina barak”.—Isa 25:6-8; 35:1, 2.
20 Sé mak sei simu hahiʼi tan fó bensaun sira-neʼe? Ulukliu mak Liurai Rohan-Laek nian no Ukun-Naʼin ba buat hotu, Maromak Jeová. Tuir loloos ita hotu ho laran-haksolok sei hasaʼe lian hodi kanta knananuk furak hanesan liafuan ikus husi salmu neʼe: “Husik ninia naran [Liurai Jesus Kristu] mak sei iha ba tempu neʼebé la bele sura; bainhira loron-matan sei iha, husik ninia naran aumenta ba beibeik, no liuhusi nia mak sira sei hetan bensaun; husik nasaun hotu dehan sai nia kontente. Hahiʼi ba Jeová, Maromak Izraél nian, nia mesak deʼit mak halo serbisu furak sira. No hahiʼi ba nia naran neʼebé furak toʼo tempu neʼebé la bele sura, no husik ninia glória sai nakonu iha rai tomak. Amen no Amen.”—Sal 72:17-19.
[Nota–rodapé]
^ par. 5 Salmo 72:1-3a: “Oh, Maromak, hatudu sai ba liurai Ita rasik nia tesi-lia, no ba liurai-oan Ita-nia justisa. Halo nia tesi lia ba Ita-nia povu iha dalan loos no fó justisa ba sira neʼebé hetan terus. Husik foho sira lori dame ba povu.”
^ par. 10 Salmo 72:5, 6: “Nuʼudar loron-matan sei iha, sira sei taʼuk ba Ita, no husi jerasaun ba jerasaun nuʼudar fulan sei iha. Nia sei tun hanesan udan neʼebé monu ba duʼut neʼebé tesi tiha, hanesan udan boot neʼebé habokon rai.”
^ par. 14 Salmo 72:13, 14a: “Nia sei sente kasian ba ema kiʼik no ema kiak, no nia sei salva ema kiak sira-nia moris. Nia sei sosa fali sira-nia moris husi terus no violénsia.”
^ par. 17 Laʼós naran neʼebé loos.
Oinsá Ita hatán?
• Salmo 72 fó sai nanis kona-ba saida?
• Sé mak Salomão neʼebé boot liu? No ninia ukun sei toʼo neʼebé?
• Saida mak Ita rasik gosta kona-ba bensaun sira neʼebé fó sai iha Salmo 72?
[Pergunta estudu nian]
[Dezeñu iha pájina 29]
Salomão nia ukun haleno buat diʼak saida deʼit neʼebé ema sei hetan iha futuru?
[Dezeñu iha pájina 32]
Iha folin duni atu ita hakaʼas an atu bele moris iha Paraízu iha neʼebé Salomão neʼebé boot liu mak ukun