Ino Nguni Uukonzya Kubagwasya Aabo Bapengede?
Ino Nguni Uukonzya Kubagwasya Aabo Bapengede?
“Upe mwami imbeta zyako, O Leza . . . Nkaambo ulavuna bacete nibakwiila.”—INT. 72:1, 12.
1. Ino ncinzi ncotwiiya kuluse Leza ndwaakatondezya kuli Davida?
EELO kaka alakulwaizya majwi ngaakalemba Mwami Davida muna Israyeli wansiku! Davida naakacita bumambe a Bateseba wakausa, pele kwakainda myaka minji katanalemba majwi aaya. Aciindi eeco Davida wakalomba Leza kuti: “Muluse lwako lupati ziminganya milandu yangu. . . . Azibi zyangu zili kumeso aangu lyoonse. . . . Ncobeni ndakazyalwa mumilandu, amuzibi bama mobakandiminta.” (Int. 51:1-5) Akaambo kakuti Jehova ulizyi kuti twakakona cibi ulatufwida lubomba.
2. Ino lugwalo lwa Intembauzyo 72 inga lwatugwasya buti?
2 Jehova ulatubona notupenga. Mbuli mbokwakasinsimwa, Mwami munanike wa Leza “ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula.” (Int. 72:12, 13) Ino mapenzi ayakumana buti? Lugwalo lwa Intembauzyo 72 lulatwaambila mbwaayakumana. Oolu lwiimbo lwakalembwa kujatikizya bwami bwa Solomoni mwana aa Davida, lutondezya bwami bwa Jesu Kristo Mwana aa Leza mbobuyakumana mapenzi aabantu.
Mbobuyakuba Bulelo bwa Kristo
3. Ino ncinzi ncaakalomba Solomoni, alimwi ino Leza wakamupa nzi?
3 Naakasalwa Solomoni kuti abe mwami, munene Davida wakamupa malailile ngaakeelede kutobela. (1 Bam. 1:32-35; 2:1-3) Nikwakainda ciindi Jehova wakalibonya kuli Solomoni muciloto kati: “Kumbila ncenti kupe.” Solomoni wakalomba buyo cintu comwe: “Undipe ndemulanda wako moyo wakumvwa, kuti mbeteke kabotu bantu bako akwaandaanya bubotu abubi.” Akaambo kakuti Solomoni wakalomba cakulibombya, Leza wakamupa cintu ncaakalomba alimwi azyintu zimbi nzyaatakalomba.—1 Bam. 3:5-13.
4. Ino bulelo bwa Solomoni bwakapandululwa buti amuleli umwi?
4 Kwiinda mukulongezyegwa a Jehova, ibulelo bwa Solomoni bwakaleta luumuno alusumpuko lutana bwenwe mufwulumende zyoonse zyaanyika. (1 Bam. 4:25) Akati kabaabo bakaboola kubona mbwaakali kulela Solomoni, wakali mwami mukaintu waku Seba abantu bakwe. Wakaambila Solomoni kuti: “Impuwo yamakani aako . . . njindakamvwa mucisi cangu, yakali yakusinizya . . . Lino ncobeni teendakaambilwa cisela, nkaambo busongo bwako abubotu bwako mbupati akwiinda impuwo njindakamvwide.” (1 Bam. 10:1, 6, 7) Nokuba boobo, ibusongo bwa Jesu bulainda alimwi wakali kukonzya kulyaamba kuti: “Ano mpali umwi mupati kwiinda Solomoni.”—Mt. 12:42.
Lwaanguluko Mubweendelezi bwa Solomoni Mupati
5. Ino ntwaambo nzi tuli mu Intembauzyo 72, alimwi ino tututondezya nzi?
5 Atulange twaambo tuli mu Intembauzyo 72 tubone ncotukonzya kwiiya kujatikizya zilongezyo mubulelo bwa Jesu Kristo, Solomoni Mupati. (Amubale Intembauzyo 72:1-4.) Intembauzyo eeyi yaamba mbwalimvwa Jehova ‘kubweendelezi’ bwa Mwanaakwe, “Mwami waluumuno,” Jesu Kristo. (Is. 9:6, 7) Akaambo kakusololelwa a Leza, Solomoni Mupati uyakubabeteka kabotu ‘bantu bapengede akubafwutula bacete.’ Bulelo bwakwe bunakuli bwaluumuno abululami. Naakali anyika, Jesu wakatondezya nzyayakucita anakulela Mumyaka Iili Cuulu.—Ciy. 20:4.
6. Ino Jesu wakatondezya zilongezyo zili buti ziyakuba mu Bwami bwakwe?
6 Kamuyeeya zyintu nzyaakali kucita Jesu Kristo izitutondezya nzyayakucitila bantu kuzuzikizya Intembauzyo 72. Kuli twaambo tutupa kukkomana notubona mbobakali kumweetezya aabo bakali kupenga. (Mt. 9:35, 36; 15:29-31) Mucikozyanyo, muntu wakali kuciswa cinanta wakakombelezya Jesu kuti: “Kuti koyanda, ulakonzya kundisalazya.” Jesu wakamwaambila kuti: “Ndazumina, kosalazigwa.” Mpoonya muntu ooyu wakapona. (Mk. 1:40-42) Amane Jesu wakajana mukaintu wakafwidwa mwana musankwa wakazyedwe alikke. Jesu naakamubona, “wakamufwida luzyalo,” amane wakati “Mulombe, ndakwaambila, Buka” mpoonya wakabuka.—Lk. 7:11-15.
7, 8. Ino Jesu wakazitondezya buti nguzu zyakwe zyakuponya bantu?
7 Jehova wakapa Jesu nguzu kuti acite maleele. Eeci wakacitondezya naakamuponya “mwanakazi iwakali kuzwa bulowa myaaka iili ikumi aibili.” Nokuba kuti “wakapenga loko kubasilisi banji, wakasowa lubono lwakwe loonse,” pele bulwazi bwakaindila. Imukaintu ooyu wakanjila akati kabantu akumuguma Jesu —kusotoka Mulawo uujatikizya muntu ‘uuli kumwezi.’ (Lev. 15:19, 25) Jesu wakalimvwa kuti nguzu zyazwa mumubili wakwe mpoonya wakabuzya kuti nguni wamuguma. Mukaintu ooyu “wakayoowa akuzyangama”mpoonya “wakavundama kubusyu bwakwe, wakamwaambila lusinizyo loonse.” Jesu naakabona kuti Jehova wamuponya mukaintu ooyu, wakamufwida lubomba akumwaambila kuti: “Mwanaangu, lusyomo lwako lwakufutula, koya, ube aluumuno akupona kubulwazi bwako.”—Mk. 5:25-27, 30, 33, 34.
8 Nguzu nzyaakapegwa Jesu a Leza zyakuponya baciswa zyeelede kuti zyakali kubagambya bakali kulangilila. Mucikozyanyo, cakutadooneka banji bakabotelwa nibakabona Jesu kaponya bantu katana talika kukambauka Mulumbe wakwe atala a Cilundu. (Lk. 6:17-19) Iciindi Johane Mubbapatizi naakatuma bantu bobilo kutegwa bakabone masimpe naa Jesu ngo Mesiya, bakamujana ‘kaponya banji kuzilwazi akukuciswa akumyuuya mibi, aboofu banji wababonunuzya.’ Jesu wakaambila bantu aaba bobilo bakatumidwe kuti: “Kamuya mukamwaambile Johane zintu ezi nzomwabona anzomwamvwa, kuti boofu babona, abatyokede beenda, basicinsenda basalazigwa, basinke-matwi bamvwa, abafwide babusigwa, abacete bakambaukilwa Makani Mabotu.” (Lk. 7:19-22) Eelo kaka mulumbe ooyu wakamukulwaizya Johane!
9. Ino maleele ngaakacita Jesu akali kutondezya nzi?
9 Masimpe, kuponya nkwaakacita Jesu naakali anyika kwakali buyo kwaciindi cisyoonto. Aabo mbaakaponya akubusya bakafwa alimwi. Aboobo imaleele ngaakacita naakacili anyika akali kutondezya mbwaya kwaamana mapenzi aabantu mubulelo bwa Mesiya.
Paradaiso Yaanyika Kumbele
10, 11. (a) Ino zilongezyo zya Bwami ziyakutola ciindi cilamfwu buti, alimwi ino bulelo bwa Jesu buna kuli buti? (b) Ino nguni uuyakuba a Kristo mu Paradaiso, alimwi ino uyakupona buti kukabe kutamani?
10 Kamuyeeya buyo buumi mbobuya kuba mu Paradaiso anyika. (Amubale Intembauzyo 72:5-9.) Bakombi ba Leza wakasimpe baya kukkomana kupona mu Paradaiso mbubwena mbuli zuba amwezi mbozina kuliko—inzya kukabe kutamani. Mwami Jesu Kristo uyakubakatalusya, “mbuli imvula iiwida abwizu bumwidwe, ambuli miyoba iibombya nyika.”
11 Nomuyeeya mboluya kuzuzikizigwa lugwalo oolu lwa intembauzyo, sena tamukkomani nomulangila kupona kukabe kutamani anyika muparadaiso? Masimpe simucita zibi wakabikkidwe acisamu wakakkomana Jesu naakamwaambila kuti: “Tunooli ayebo mu-Paradaiso.” (Lk. 23:43) Mumyaka Iili Cuulu ya Bulelo bwa Jesu, imuntu ooyu uyakubusyigwa. Ikuti akazumanane kutobela bulelo bwa Kristo uyakupona anyika kukabe kutamani kakunyina kuciswa alimwi kakkomene.
12. Mubulelo bwa Kristo bwa Myaka Iili Cuulu, ino ncoolwe nzi ncobayakupegwa bantu ibayakubusyigwa bataluleme?
12 Mubulelo bwa Solomoni Mupati, Jesu Kristo, ‘bululami buyakukomena,’ akuyaambele. (Int. 72:7) Kristo uyakubayanda kapati bantu akubafwida lubomba mbumunya mbwaakali kucita naakali anyika. Munyika mpya njaakasyomezya Leza, nibaba “bataluleme” ibayakubusyigwa bayakupegwa coolwe cakupona kweelana azyeelelo zya Jehova. (Inc. 24:15) Aabo batayandi kupona kweelana anzyayanda Leza tabakazumizyigwi kuzumanana kupona akaambo kakuti balakonzya kunyonganya luumuno munyika mpya.
13. Ino bulelo bwa Bwami buyakukomena buti, alimwi nkaambo nzi luumuno mbolutakonzi kunyonganyizyigwa?
13 Mpobuyakusika bulelo bwanyika yoonse bwa Solomoni Mupati kulatondezyegwa mumajwi aaya aakuti: “Bwami bwakwe butandabale kuzwa kulwizi kusikila kulwizinyina, akuzwa kumulonga kusikila kumagolelo aanyika. Abo bamubusizya inkondo bamukotamine, abasinkondonyina bamyankute lusuko.” (Int. 72:8, 9) Inzya, Jesu Kristo uyakulela nyika yoonse. (Zek. 9:9, 10) Aabo babukkomanina bulelo bwakwe azilongezyo baya ‘kumukotamina’ cakuliyandila. Kulubazu lumwi, basizibi bateempwi bayakujaigwa nokuba kuti bali “amyaka iili mwanda.” (Is. 65:20) Baya “[kumyankuta] lusuko.”
Jesu Ulatufwida Lubomba
14, 15. Ino tuzyiba buti kuti Jesu ulizyi mbobalimvwa bantu akuti “ulavuna bacete nibakwiila”?
14 Bantu batalondokede bali muciimo cuusisya alimwi bayandika kugwasyigwa. Pele swebo tulijisi bulangizi. (Amubale Intembauzyo 72:12-14.) Jesu, Solomoni Mupati uleetezyegwa akaambo kakuti ulituzyi mbotutalondokede. Kunze lyaboobo, Jesu wakapenga akaambo kabululami alimwi Leza wakamulekela kuti asunkwe. Jesu wakapenga kapati cakuti “nkasaalo yakwe yakaba mbuli malosi aabulowa aalondaukila ansi.” (Lk. 22:44) Amane kali acisamu cakupenzyezya wakalila kati: “Leza wangu, Leza wangu, wandisiilanzi?” (Mt. 27:45, 46) Nokuba kuti wakapenga kapati alimwi Saatani wakasoleka kumucinca kuti aleke kusyomeka kuli Jehova, Jesu wakatondezya kuti ulasyomeka kuli Jehova Leza.
15 Tweelede kuzyiba kuti Jesu ulatubona mbotupenga alimwi “ulavuna bacete nibakwiila, abalo bapengede abaabo babula mugwasyi.” Akaambo kakubayanda bantu mbuli mbobakali kubayanda Bausyi, Jesu ‘uyakubaswiilila bacete’ alimwi uyakubaponya batyokede mumoyo akwaanga zilonda zyabo.’(Int. 69:33; 147:3) Jesu ulakonzya “kutweetelela mukulengauka kwesu” akaambo kakuti “ngonguwe oyo uwakasunkwa mbubonya mbuli ndiswe.” (Heb. 4:15) Eelo kaka cilakkomanisya kuzyiba kuti Mwami Jesu Kristo ulalela lino kujulu akuti ulayandisya kumana mapenzi aabantu!
16. Ino nkaambo nzi Solomoni ncibakamweetezya bantu bakwe?
16 Akaambo kakuti wakali musongo, cakutadooneka Solomoni ‘wakabafwida luzyalo batengwana.’ Nokuba boobo, wakapenga mubuumi bwakwe. Imwanaakwabo Amnoni wakajata mucizyi wakwe Tamara amane Abisalomu mwanaakwabo umbi wakamujaya Amnoni akaambo kakuti wakabisya. (2 Sam. 13:1, 14, 28, 29) Abisalomu wakali kuyanda kumunyanga cuuno cabwami Davida, pele wakaalilwa mpoonya Joabu wakamujaya. (2 Sam. 15:10, 14; 18:9, 14) Nikwakainda ciindi, mwanaakwabo Solomoni Adonija wakali kuyanda kulibikka kuti abe mwami. Ikuti naakazwidilila, Solomoni naakajayigwa. (1 Bam. 1:5) Majwi ngaakaamba Solomoni mumupailo naakali kwaaba tempele lya Jehova atondezya kuti wakalizyi mbobakali kulimvwa bantu. Kaamba bantu bakwe, mwami wakapaila kuti: “Umwi aumwi mbuli mbwazi mapenzi aamumoyo wakwe . . . [yebo Jehova] ulekelele, akuboozezya umwi aumwi bulumbu bwanzila zyakwe.”—2 Mak. 6:29, 30.
17, 18. Ino mapenzi nzi aabapenzya babelesi ba Leza, alimwi ncinzi cibagwasya kuti baliyumye?
17 Tulakonzya kupenga akaambo kazyintu zyakatucitikila mubuumi. Ba Mary, * Bakamboni ba Jehova ibali amyaka iili 30, balemba kuti: “Kuli twaambo tunji tukonzya kundipa kukkomana, pele zyintu nzindakacita kaindi zilandicima alimwi zindijazya nsoni. Ndilacimwa kapati alimwi ndilaakulila nkaambo ndilaakubona mbuli kuti zyoonse zyakacitika jilo. Mizeezo icindikatazya cakuti ndilaakulimvwa bubi alimwi ndilalipa mulandu.”
18 Babelesi ba Leza banji abalo mbobalimvwa oobu, pele ino ncinzi cikonzya kubagwasya kutegwa babe anguzu zyakuliyumya? Ba Mary baamba kuti: “Ikuba abeenzuma beni-beni akati kabakwesu abacizyi mumbungano kulandipa kukkomana. Alimwi ndilabikkila maano kuzyintu nzyaakatusyomezya Jehova, akusyoma kuti kulila nkondilila kuti ndigwasyigwe kuya kuba kulila kwalukkomano.” (Int. 126:5) Tweelede kubikka bulangizi bwesu mububambe bwa Leza bwa Mwanaakwe, Imuleli ngwaakasala. Kujatikizya nguwe, kwakasinsimwa kuti: “Bacete abatengwana ulabafwida luzyalo; buumi bwabacete ulabufutula. Ulanununa buumi bwabo kulupenzyo: bulowa bwabo bulayandika mumeso aakwe.” (Int. 72:13, 14) Eelo kaka eeci cilakulwaizya!
Nyika Mpya Motulangila Zyintu Zinji
19, 20. (a) Kweelana ambokutondezyedwe ku Intembauzyo 72, ino mapenzi nzi aayakumanizyigwa mubulelo bwa Bwami? (b) Ino nguni ngotweelede kulumba kapati akaambo kabulelo bwa Kristo, alimwi ino mulimvwa buti kujaitikizya zyintu ziyakucitwa?
19 Kamuyeeya buyo alimwi bantu ba Leza balondokede banakuli munyika mpya mubulelo bwa Solomoni Mupati. Tusyomezyegwa kuti: ‘Maila ayakuvula ansi, atala lyazilundu.’ (Int. 72:16) Mbwaanga maila kanji-kanji taalimwi atala amulundu, aaya majwi atondezya buyo kuti nyika iyakuba acakulya cinji. Zyakulya zinakuli zinji “mbuli lusaka lwaku-Lebano,” ibusena bakajisi cakulya cinji ciindi Solomoni naakali kulela. Kamuyeeya buyo! Nzala iyakumana alimwi kunyina banakuciswa nzala. Boonse baya kukkomana a “pobwe lyazintu zyamafuta.”—Is. 25:6-8; 35:1, 2.
20 Ino nguni ngotweelede kulumba akaambo kazileleko zyoonse eezyi? Ikapati tweelede kulumba Mwami Uuteeli alimwi Muleli Wakoonse-koonse, Jehova Leza. Toonse buyo tuyakwiimba antoomwe cakukondwa majwi aamamanino aalwiimbo lubotu oolu aakuti: “Izina lyakwe likalilile lyoonse, izina lyakwe linooliwo kufumbwa izuba lyanooliwo. Bantu balongezegwe nkaambo kakwe; misyobo yoonse imulongezye. Alumbwe Jehova Leza, Leza wa-Israyeli; ngonguwe alike uucita malele. Izina lyakwe lyabulemu lilumbwe lyoonse, anyika yoonse izule bulemu bwakwe. Akube boobo! Akube boobo!”—Int. 72:17-19.
Bupanduluzi buyungizidwe
^ munc. 17 Izyina lyacincwa.
Ino Inga Mwaingula Buti?
• Ino Intembauzyo 72 mukusinsima yakali kutondezya nzi?
• Ino Solomoni Mupati nguni, alimwi ino bulelo bwakwe buyakusika kulamfwu buti?
• Ino ncinzi cimukkomanisya nywebo kumugama kujatikizya zilongezyo zyakasinsimwa ku Intembauzyo 72?
[Mibuzyo yaciiyo]
[Cifwanikiso icili apeeji 29]
Ino kuzwidilila kwabulelo bwa Solomoni kwakali kwiiminina nzi?
[Cifwanikiso icili apeeji 32]
Tweelede kubeleka canguzu kutegwa tukajanike mu Paradaiso mubulelo bwa Solomoni Mupati