Nte Afo Emeti?

Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso idin̄wam fi ekpep nditọ fo ndidi se ẹkemede ndiberi edem?

‘Nịm uwụtn̄kpọ’ nọ eyen fo ke nte enye akpanamde n̄kpọ ke usụn̄ oro ẹkemede ndiberi edem ke enye. (John 13:15) Kûyom eyen fo anam se isọn̄de ikan enye. Nọ enye nnennen ndausụn̄ man ekpep enye ndinam utom oro ọnọde enye.—5/1, page 19-20.

• Ntak emi Abasi mîkamiaha Aaron ufen ke ndikanam eyen enan̄ o-gold?

Aaron ama abiat ibet Abasi emi ọdọhọde ẹkûkpono ndem. (Ex. 20:3-5) Edi Moses ama ekpe Abasi ubọk ke ibuot Aaron, ndien n̄kpeubọk esie ama “enyene odudu.” (Jas. 5:16) Aaron ama anam akpanikọ ke anyan ini. Okposụkedi ẹkekpekde Aaron anam eyen enan̄ o-gold, se enye akanamde ke oro ebede owụt ke enye ikanamke oro ke ofụri esịt, koro enye ama etiene nditọ Levi ada ke n̄kan̄ Jehovah. (Ex. 32:25-29)—5/15, page 21.

• Ophir, emi Bible ọdọhọde ke ama enyene gold, okodu mmọn̄?

Solomon ama enyene ubom mbakara ke Ezion-geber emi ẹkesidade gold ke Ophir ẹdi. (1 Ndi. 9:26-28) Ezion-geber okodu ke edere Itụn̄ Inyan̄ibom Aqaba ke mbọhọ Elat ye Aqaba eyomfịn, ke Ididuot Inyan̄. Ke ntre, etie nte Ophir okodu ke Arabia ke mbọhọ Ididuot Inyan̄ m̀mê ke mbeninyan̄ Africa m̀mê India.—6/1, page 15.

• “Balsam ke Gilead” ada aban̄a nso? (Jer. 8:22)

Aran balsam ekedi itai nsio nsio eto emi ẹnyenede ufuọn̄. Enye ama esifọn ke udọn̄ọ ye unan. Akpakana idiọk idaha oro idụt Israel ẹkedude anam mmọ ẹyom usọbọ, edi mmọ ikoyomke. (Jer. 8:9)—6/1, page 21-22.

• Nso ikeme ndin̄wam Christian ọyọ ke ini ebe m̀mê n̄wan esie esịnde efịbe?

Edieke esinamde item Bible, kûkere ke afo anam ebe m̀mê n̄wan fo esịn efịbe. Abasi ọdiọn̄ọ ke omoyom un̄wam ye ndọn̄esịt. Enye ekeme ndida nditọete ndọn̄ fi esịt.—6/15, page 30-31.

• Didie ke akpan̄wam owo udọn̄ọ?

Nen̄ede kpan̄ utọn̄. (Eccl. 3:1, 7) Kop mbọm nyụn̄ kere ban̄a. (Rome 12:15) Tịn̄ se ibọpde-bọp nyụn̄ nọ un̄wam. (Col. 4:6; 1 John 3:18) Ka iso di ufan esie. (N̄ke 17:17)—7/1, page 10-13.

• Isan̄a didie ifiọk ke Abasi inyeneke ntọn̄ọ?

Akam Moses ke Psalm 90:2 ọbọrọ mbụme emi. Oro anam Jehovah enyene san̄asan̄a udorienyịn̄ emi, “nsinsi Edidem.” (1 Tim. 1:17)—7/1, page 28.

• Didie ke afo ekeme ndikpep nditọ fo ẹma ndikot n̄wed?

Eti idaha ye uwụtn̄kpọ mme ete ye eka ẹsin̄wam nditọ ẹma ukotn̄wed. Nọ mmọ n̄wed. Kot n̄wed nọ mmọ. Nam mmọ ẹtiene ẹkot, nyụn̄ neme se okotde ye mmọ. Dọhọ mmọ ẹkot n̄wed ẹnọ fi nyụn̄ kpep mmọ ndibụp mbụme.—7/15, page 26.

• Ntak emi Jesus mîkọsọpke ikọkọk Lazarus ufan esie udọn̄ọ?

Jesus etidisịm, usen inan̄ ẹma ẹbe tọn̄ọ Lazarus akakpa. Emi ama anam Jesus ọnọ eti ikọ ntiense aban̄a Ete esie. Ntem, ediwak owo ẹma ẹkabade ẹdi mme andinịm ke akpanikọ. (John 11:45)—8/1, page 14-15.

• Nso ikedi mme “edikon̄ ebiet”?

Emi ekesiwak ndidi ibuot obot oro owo mîbọpke n̄kpọ m̀mê mme ebiet en̄wen oro ẹkesidade ẹnam nsunsu utuakibuot. (Num. 33:52)—8/1, page 23.