Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ano ang makabulig sa imo nga mapadaku ang imo kabataan nga mangin responsable?

‘Maghatag sing sulundan’ sa inyo kabataan tuhoy sa maayo nga paggawi. (Juan 13:15) Mangin makatarunganon sa imo ginapaabot. Samtang nagadaku ang imo bata nagadugang man ang ginapaabot mo sa masarangan niya himuon, subong sang pagpaninlo, pag-abot sa eksakto nga oras kag paghimo sang iya mga asaynment sa eskwelahan. Maghatag sang espesipiko nga mga instruksion agod mahanas mo ang imo bata nga atipanon ang iya mga responsibilidad.—5/1, pahina 19-20.

• Ngaa wala ginsilutan sang Dios si Aaron sang naghimo sia sang bulawan nga tinday nga baka?

Ginsupak ni Aaron ang kasuguan sang Dios tuhoy sa idolatriya. (Ex. 20:3-5) Apang, nangamuyo si Moises para kay Aaron kag ang iya pangamuyo may “daku nga puersa.” (Sant. 5:16) Si Aaron may rekord na sang katutom. Kag bisan pa ginpilit sang mga tawo si Aaron nga maghimo sang tinday, ginpakita niya sang ulihi nga ang iya tagipusuon indi ugyon sa ila kay nagbuylog sia sa mga anak ni Levi nga nagdampig kay Jehova. (Ex. 32:25-29)—5/15, pahina 21.

• Sa diin nahamtang ang Ofir nga ginsambit sang Biblia nga kuluhaan sang bulawan?

Agod may kargahan sang bulawan gikan sa Ofir, nagpahimo si Solomon sang mga sakayan sa Ezion-geber. (1 Hari 9:26-28) Ina nga pantalan nahamtang sa punta sang Gulf of Aqaba nga malapit sa nahamtangan subong sang Elat kag Aqaba, sa Dagat nga Mapula. Gani, mahimo nga ang Ofir sakop sang Arabia nga malapit sa Dagat nga Mapula ukon sa baybayon sang Aprika ukon India.—6/1, pahina 15.

• Sa ano nagapatuhoy ang “banyus [balsamo, NW] sa Galaad”? (Jer. 8:22)

Ang lana sang balsamo amo ang mahamut kag madanlog nga duga halin sa lainlain nga tanom, nga makita sa lainlain nga mga lugar, kag sa Galaad, makita ini sa sidlangan sang Suba Jordan. Bangod epektibo ini nga bulong, ginabutang ini sa mga pilas. Ang makaluluoy nga kahimtangan sang Israel dapat magpahulag sa sini nga pungsod nga mangita sing bulong, apang wala nila ini ginhimo. (Jer. 8:9)—6/1, pahina 21-22.

• Ano ang makabulig sa isa ka Cristiano nga malandas ang pagpanghilahi sang iya tiayon?

Kon ang ginluiban nga tiayon nagakabuhi nahisuno sa mga prinsipio sa Biblia, indi niya dapat pagbasulon ang iya kaugalingon sa pagluib sang iya tiayon. Nahibaluan sang Dios nga kinahanglan mo ang lugpay kag pagpalig-on kag mahimo niya ini iaman paagi sa imo mga masigka-Cristiano.—6/15, pahina 30-31.

• Paano mo buligan ang isa nga nagabalatian?

Mamati sing maayo. (Man. 3:1, 7) Intiendiha ang iya sitwasyon. (Roma 12:15) Palig-una sia kag buligi. (Col. 4:6; 1 Juan 3:18) Kamustaha sia pirme. (Hulu. 17:17)—7/1, pahina 10-13.

• Paano naton nahibaluan nga ang Dios wala sing ginsuguran?

Ginpakita ini ni Moises sa iya pangamuyo. (Sal. 90:2) Si Jehova lamang ang may pinasahi nga titulo nga “Hari nga dayon.” (1 Tim. 1:17)—7/1, pahina 28.

• Paano mo ipatudok sa imo kabataan ang gugma sa pagbasa?

Ang gugma kag halimbawa sang mga ginikanan makabulig nga mapatudok sa kabataan ang gugma sa pagbasa. Hatagi sila sang libro, magbasa sing matunog, istoryahi ang inyo nabasa, ipaathag sa ila ang imo ginbasa, pabasaha sila kag palig-una nga mamangkot.—7/15, pahina 26.

• Ngaa wala nagdalidali si Jesus agod ayuhon ang iya nagamasakit nga abyan nga si Lazaro?

Sang pag-abot ni Jesus, apat na ka adlaw nga napatay si Lazaro. Paagi sa paghulat, nakahatag si Jesus sing mas maayo nga panaksi tuhoy sa iya Amay. Sa amo, madamo nga tawo ang nagtuo. (Juan 11:45)—8/1, pahina 14-15.

• Ano ang “mataas nga mga duog”?

Sa masami, nagapatuhoy ini sa mga lugar sang butig nga pagsimba nga mahimo yara sa ibabaw sang pukatod. Kon kaisa, may mga altar, sagrado nga mga haligi, kag iban pa nga gamit sa pagsimba nga ginabutang sa sini nga duog para gamiton sa mga buhat nga ginadumtan sang Dios. (Num. 33:52)—8/1, pahina 23.