Na o a Gopola?

Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

• Ke’ng seo se tla go thušago go godiša bana bao ba nago le boikarabelo?

‘Beela ngwana wa gago mohlala’ wa boitshwaro bjo bobotse. (Joh. 13:15) E-ba le ditebelelo tše di leka-lekanego; ge a dutše a gola, o ka letela gore a be le boikarabelo bjo bo oketšegilego ditabeng tša bohlweki, go swara nako le mošomo wa sekolo. Nea ngwana wa gago ditaelo tše itšego gore o mo tlwaetše go rwala boikarabelo.—5/1, matlakala 19-20.

• Ke ka baka la’ng Modimo a se a otla Arone ka baka la go dira namane ya gauta?

Arone o ile a roba molao wa Modimo wa mabapi le borapedi bja diswantšho. (Ek. 20:3-5) Lega go le bjalo, Moše o ile a phophothela Arone go Modimo gomme topo ya gagwe e be e le e “matla kudu.” (Jak. 5:16) Arone o be a ile a botega ka nywaga e mentši. Le ge batho ba ile ba gapeletša Arone gore a dire namane ya gauta, ka morago o ile a bontšha gore pelo ya gagwe e be e sa dumelelane le bona ka gore o ile a thekga barwa ba Lefi ge ba be ba ema le Jehofa. (Ek. 32:25-29)—5/15, letlakala 21.

• Ofira yeo e bolelwago ka Beibeleng e le mothopo wa gauta e be e le kae?

Solomone o ile a aga dikepe motseng wa Etsionegebere gore a kgone go tliša gauta e tšwago Ofira. (1 Dikx. 9:26-28) Boemakepe bjoo bo be bo le mathomong a Kgogometšane ya Aqaba kgaufsi le naga yeo lehono e tsebjago e le Elat le Aqaba, Lewatleng le Lehwibidu. Ka gona, Ofira e swanetše go ba e be e le Arabia kgaufsi le Lewatle le Lehwibidu goba lebopong la Afrika goba la India.—6/1, letlakala 15.

• ‘Balesamo ya Gileada’ ke’ng? (Jer. 8:22)

Makhura a balesamo e be e le setlolo sa monko o bose sa makhura seo se dirilwego ka diela tše di tšwago dimeleng tša mehuta-huta tšeo di hwetšwago dinageng tša go swana le Gileada le ka bohlabela bja Noka ya Jorodane. Ka ge e be e fodiša, e be e tlotšwa dinthong. Boemo bja Isiriale bjo bo nyamišago bo be bo swanetše go ba bo dirile gore setšhaba se tsome kalafo, eupša ga se sa dira bjalo. (Jer. 8:9)—6/1, matlakala 21-22.

• Ke’ng seo se ka thušago Mokriste go lebeletšana le go hlotlola ga molekane?

Ge e ba molekane yo a se nago molato a ile a leka go phela ka melao ya motheo ya Beibele, ga go nyakege gore a ikwe a le molato ka baka la go se botege ga molekane yo a dirilego bohlotlolo. Modimo o a tseba gore o nyaka khomotšo le kgothatšo. A ka go homotša ka Bakriste-gotee le wena.—6/15, matlakala 30-31.

• O ka dira’ng go thuša motho yo a babjago?

E-ba motheetši yo botse. (Mmo. 3:1, 7) E-ba yo a kwelago bohloko le yo a naganelago. (Baroma 12:15) E-ba yo a agago le yo a thušago. (Bakol. 4:6; 1 Joh. 3:18) Boledišanang ka mehla. (Die. 17:17)—7/1, matlakala 10-13.

• Re tsebja bjang gore Modimo ga a na mathomo?

Moše o ile a bolela seo ge a be a rapela. (Ps. 90:2) Le gona, Jehofa o na le sereto sa moswana-noši sa “Kgoši ya bosafelego.” (1 Tim. 1:17)—7/1, letlakala 28.

• O ka dira bjang gore bana ba gago ba rate go bala?

Tikologo ya lapa yeo e nago le lerato le mohlala wa batswadi di ka dira gore ba rate go bala. Le gona dira gore ba be le dipuku. Balela godimo. Ba kgothaletše go tšea karolo ge le ahla-ahla seo le se balago. E re bana ba gago ba go balele gomme o ba kgothaletše go botšiša dipotšišo.—7/15, letlakala 26.

• Ke ka baka la’ng Jesu a sa ka a kitimela go yo fodiša mogwera wa gagwe Latsaro yo a bego a babja?

Nakong ya ge Jesu a be a fihla, Latsaro o be a šetše a e-na le matšatši a mane a hwile. Ka go leta, Jesu o neile bohlatse bjo bobotse ka Tatagwe. Ka gona, ba bantši e ile ya ba badumedi. (Joh. 11:45)—8/1, matlakala 14-15.

• “Meboto” e be e le eng?

Gantši go bolelwa ka mafelo ao a sego a ageletšwa a lego godimo ga meboto goba mafelo a mangwe a borapedi bja maaka. Ka dinako tše dingwe dialetare, dikokwane tše kgethwa goba dikota le dilo tše dingwe tšeo di dirišwago borapeding di be di hlongwa bakeng sa go dira mekgwa yeo Modimo a bego a ganana le yona. (Num. 33:52)—8/1, letlakala 23.