Maara Ainei ia Koe?

Kua rekareka ainei koe i te tatau anga i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

• Eaa ta te au tamariki Kerititiano ka kite mai mei to Iesu akarongo anga i tona mapu anga?

I tetai tua ra, e rua o Iesu nga metua tane​—ko Iehova e Iosepha. Ei tamaiti mapu i runga nei i te enua, kua akarongo ua rai aia ki tona nga metua. (Luka 2:51, 52) Tera ra oki, kare i ngoie ua ana ia Iesu kia akarongo ki tona Metua i te rangi. Te po i mua ake i tona matenga, kua pati a Iesu kia Iehova me ka tika Iaia kia taui i Tona manako no runga i Tana i inangaro iaia kia rave. (Luka 22:42) Inara kua akarongo a Iesu i te Atua noatu e kare te reira i te mea ngoie.​—4/1 kapi 30-31.

• Eaa ra te Atua kare i akautunga ia Aarona no te maani anga i te punua puakatoro auro?

Kua aati a Aarona i te ture a te Atua no te akamorianga itoro. (Exo. 20:3-5) Inara, kua pati a Mose ki te Atua no runga i to Aarona turanga, e kua “manuia maata” tana patianga. (Iako. 5:16) E au rekoti meitaki akarongo mou to Aarona. Noatu e kua akakeu te au tangata ia Aarona kia maani i tetai punua puakatoro, kua akaari mai aia i muri mai e kare tona ngakau i aru ana ia ratou, no te mea kua kapiti atu aia ki te au tamariki a Levi i te turuturu anga i to Iehova tua. (Exo. 32:25-29)​—5/15, kapi 21.

• Eaa te au apiianga ka kiteaia mai mei ta Petero i rave i muri ake te mate anga o Iesu?

Kare e kore e e taitaia ua ana a Petero i te au taime ravarai ka akamanako aia i te mamae tana i akatupu ki tona Pu, i te ra openga tikai o Tona oraanga ei tangata. Inara, kare a Petero i tuku ua atu ana ki te reira. Kua akaari aia i te akarongo mou tikai na te akaputuputu anga ma tona au taeake noatu tona ngakau taitaia. Me rokoia tetai e te taitaia me kore e te mii, e mea kino kia akatakake iaia uaorai. Ko te arataa pakari kia aru koia oki kia noo vaitata ua ki te au oa akarongo, e kia rauka akaou te maroiroi tei anoanoia i te tavini anga i te Atua. Me inga tetai tavini o te Atua, ko te mea puapinga roa atu kare e ko te pakari o tona inga anga mari ra, ko te pakari o tona inangaro kia akamaroiroi akaou, kia akatikatika i te au mea ravarai.​—4/1, kapi 24.

• Eaa te ka tauturu i tetai Kerititiano kia akakoromaki i te akaturi a te tokorua?

Me kua tauta ana te tokorua mako ua i te aru i te au kaveinga Pipiria, kare aia e manako kinokino no runga i te ara pikikaa a te tokorua akaturi. Kua kite te Atua i toou anoano no te akapumaana e te akamaroiroianga. Penei ka oronga mai aia i te akapumaana anga na roto i te au taeake Kerititiano.​—6/15, kapi 30-31.

• Akapeea koe i te akatupu anga i te inangaro no te tatau anga ki roto i taau tamariki?

Ka riro tetai turanga akaperepereia e te akaraanga o nga metua i te tauturu i te akatupu i te inangaro no te tatau anga. Pera katoa, e akapapu e kia papa ua tetai au puka. Tatau maata. Akamaroiroi kia piri mai ki roto, e uriuri i taau i tatau. E akamaroiroi i taau tamariki kia tatau mai kia koe, e akamaroiroi ia ratou kia ui mai i tetai au uianga.​—7/15, kapi 26.

• I te pae mai i te Pipiria, eaa te akapapuanga te akakite maira e e tangata tika tikai a Iesu i roto i te tuatua enua?

E maata te aronga tata tei taiku tika mai ana ia Iesu. Kua rekoti mai a Cornelius Tacitus e kua tamateia a Iesu e te kavana ko Ponotio Pilato i te tuatau e tutara ra a Tiberio. Kua taiku mai a Flavius Josephus e kua uipa mai te Taunga Teitei ko Anania i te au akava o te Sunederi kia akava ia Iakobo, te teina o Iesu.​—4/1, kapi 15.