Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Saida mak sei ajuda ita atu hanorin oan atubele kaer sira-nia responsabilidade?

“Fó ezemplu” ba Ita-nia oan kona-ba kaer responsabilidade. (Joao 13:15) Husu oan sira atu halo buat neʼebé sira bele halo; nuʼudar sira sai boot, hanorin sira atu tau matan sira-nia isin moos nafatin no hamoos kuartu, atu tuir oras, no ajuda sira atu komprende katak serbisu eskola nian mak importante tebes neʼebé sira rasik tenke halo. Fó matadalan neʼebé klaru hodi treinu oan atubele kaer rasik sira-nia responsabilidade.—1/7, pájina 19-20.

• Tanbasá mak Maromak la fó kastigu ba Aarão neʼebé halo karau-oan husi osan-mean?

Aarão kontra duni Maromak nia ukun-fuan. (Êx 20:3-5) Maibé, Moisés harohan kona-ba Aarão, no nia orasaun “makaʼas tebetebes”. (Tgo 5:16) Aarão laran-metin ba Maromak ba tempu kleur ona. No maski povu hakaʼas Aarão atu halo estátua ba sira, maibé buat neʼebé Aarão halo depois neʼe hatudu katak, tuir loloos, nia la simu atu fó adorasaun ba estátua. Aarão hamutuk ho Levi hotu hamriik metin iha Maromak Jeová nia sorin. (Êx 32:25-29)—15/5, pájina 21.

• Tanbasá mak Jesus hatete atu “la rai-hela tua foun iha tua-fatin kulit tuan”?

Iha tempu Bíblia nian, ema toman atu rai-hela tua iha animál nia kulit. (Jos 9:13) Neineik-neineik, kulit sai toos no la bele sai luan ona. Nuneʼe tua-fatin neʼebé tuan, ladiʼak ona atu rai-hela tua foun, tanba tua foun kontinua atu aumenta alkol no gás. Tan neʼe, tua foun neʼe bele halo kulit tuan neʼebé sai toos ona nakfera. Maibé, ida-neʼe la akontese ho kulit foun tanba kulit neʼe bele sai luan.—1/7, pájina 13.

• Tanbasá mak ema neʼebé halo tuir Kristu tenke fó-hatene lia-foun diʼak ba ema seluk?

Jesus hanorin ema neʼebé tuir nia atu haklaken lia-foun diʼak. Nia hatete ba ninia apóstolu sira: “Tuir dalan, haklaken bá katak reinu lalehan besik ona.” (Mt 10:7) Ema sira neʼebé tuir Jesus iha mensajen neʼebé folin-boot atu hatoʼo. Jesus hatete: “Neʼe mak moris rohan-laek: hatene Ita nuʼudar Maromak loos mesak deʼit, no Jesus Kristu neʼebé Ita haruka mai.” (Joao 17:3)—1/7, pájina 17.

• Tanbasá mak Ita presiza ajuda husi maluk sira iha Ita-nia kongregasaun?

‘Iha loron ikus sira, susar barak mosu mai’, tan neʼe Ita presiza ajuda husi Ita-nia irmaun no irmán sira iha Ita-nia kongregasaun. No sira mós presiza Ita-nia ajuda. (2 Tim 3:1) Dala ruma, ema kristaun ida ladún hatene dalan neʼebé loos atu hasoru problema ruma, maibé Maromak Jeová hatene. Nia bele uza irmaun-irmán iha kongregasaun laran, inklui Ita, atu ajuda ema neʼe hetan dalan neʼebé loos. (Isa 30:20, 21; 32:1, 2)—15/6, pájina 14.

• Saida mak bele ajuda ema kristaun ida atu tahan nafatin maski nia kaben la hatudu laran-metin?

Se kaben-naʼin neʼebé la halo sala hakaʼas an nafatin hodi moris tuir Bíblia nia matadalan, nia lalika duun nia an no sente sala kona-ba ninia kaben nia hahalok neʼebé la laran-metin. Maromak hatene katak nia presiza duni hetan kmaan no ajuda. Maromak bele ajuda nia liuhusi maluk sira iha kongregasaun.—15/6, pájina 30-31.

• Se kiak, bele naʼok ka lae?

Jesus hatudu laran-diʼak tebes ba ema neʼebé kiak. “Nia hanoin tebetebes sira.” (Mt 9:36) Maibé, nia nunka dehan katak la sala atu naʼok maski situasaun susar tebes.—1/7, pájina 24.

• Tanbasá mak ita presiza tau fiar tomak ba Maromak?

Maromak Jeová deʼit mak bele salva ita kuandu mundu aat neʼe hasoru terus boot neʼebé seidauk akontese uluk.—15/7, pájina 6-7.

• Oinsá mak Ita bele book Ita-nia oan atu haburas hakarak atu lee no estuda?

Buat neʼebé bele book oan sira atu hakarak lee no estuda mak inan-aman nia ezemplu no hodi halaʼo estudu família nian ho domin. No mós, husik oan kaer livru sira. Lee ho lian makaʼas. Book oan atu hola parte, koʼalia hamutuk kona-ba buat neʼebé Ita lee. Husu oan atu lee ba Ita, no book oan atu husu pergunta sira.—15/7, pájina 26.